Magmaliw a Maliket a Managbasa ed Libro na Apocalipsis

“Mapalar so manbasa, tan saray ondengel ed sarayan salita na saya ya angipropetaan, tan unoren da so saray bengatlan wadman a nisulat.”​—APOCALIPSIS 1:3.

1. Diad antoran sirkumstansia so inkidungetan nen apostol Juan sanen insulat to so Apocalipsis, tan anto so gagala na inkisulat na sarayan pasingawey?

“SIAK si Juan, . . . wala ak nensaman ed pulo a manngaran na Patmos, lapu ed salita na Dios tan say impantasi nen Jesu-Kristo.” (Apocalipsis 1:9) Ontan so kipapasen nen apostol Juan sanen insulat toy libron Apocalipsis, odino Puyan. Impasen a sikato so adestiero ed Patmos kaleganay uley nen Romanon Emperador a Domitian (81-96 K.P.), ya angipaakseb ed panagdayew ed emperador tan nagmaliw a managpasegsegang ed saray Kristiano. Legan a wadman ed Patmos, akaawat si Juan na nantutumbokan a pasingawey ya insulat to. Insalaysay to iratan, aliwan pian taktakoten iray inmunan Kristiano, noagta pian pabiskegen, ligliwaen, tan pasesegen ira lapu ed saray subok a sasagmaken da tan saramay sagmaken da ni ed arapen.​— Gawa 28:22; Apocalipsis 1:4; 2:3, 9, 10, 13.

2. Akin a makapainteres parad saray Kristiano natan so kipapasen ya inkidungetan nen Juan tan saray kapara ton Kristiano?

² Saray sirkumstansia sanen nisulat iyan libro na Biblia so makabkabaliksan ed saray Kristianon manbibilay natan. Sasagmaken nen Juan so panamasegsegang lapud ta sikato et sakey a tasi parad si Jehova tan ed Anak To, si Kristo Jesus. Anggaman panggugunaetan day magmaliw a maong a mibabaley, sikato tan saray kapara ton Kristiano so manbibilay ed kaliberliber a walay isusumpa lapud agda aagamilen so panagdayew ed emperador. (Lucas 4:8) Diad arum a bansa, ontan met so kidudungetan na saray tuan Kristiano natan, a no iner et say Estado so walaay kanepegan a manetermina no anto so “duga ed relihyoson paraan.” Agaylan makaligliwa sirin iray salitan naromog ed introduksion ed libro na Apocalipsis: “Mapalar so manbasa, tan saray ondengel ed sarayan salita na saya ya angipropetaan, tan unoren da so saray bengatlan wadman a nisulat: ta say panaon asingger la.” (Apocalipsis 1:3) On, nagamoran na saray maimano tan matulok a managbasa na Apocalipsis so tuan liket tan dakel a bendision.

3. Siopa so Lapuan na Puyan a niiter ed si Juan?

³ Siopa so manunan Lapuan na Apocalipsis, tan anton paralanan so uusaren pian ipasabi itan? Oniay ibabaga na manangilukas a bersikulo: “Say puyan nen Jesu-Kristo ya initer na Dios ed sikato, pian ipakaba’to ed saray ariripen to, salanti saray bengatlan nakaukolan da so nagawa a magano: tan impawi’to tan impaliwawa to ed panamegley na anghel to ed aripen to a Juan.” (Apocalipsis 1:1) Diad simplin pangibaga, say peteg a Lapuan na Apocalipsis et si Jehova a Dios, ya angiter ed satan ed si Jesus, tan diad panamegley na anghel et impasabi itan nen Jesus ed si Juan. No surien ni et ompatnag ya inusar met nen Jesus so masanton espiritu pian ipasabi iray mensahe ed saray kongregasyon, ontan met ed impangiter na saray pasingawey ed si Juan.​—Apocalipsis 2:7, 11, 17, 29; 3:6, 13, 22; 4:2; 17:3; 21:10; ikompara so Gawa 2:33.

4. Anton paraan so siansia nin uusaren nen Jehova natan pian iwanwan so totoo to diad dalin?

⁴ Siansia nin uusaren nen Jehova so Anak to, say “ulo na kongregasyon,” pian bangatan iray lingkor to ed dalin. (Efeso 5:23, NW; Isaias 54:13; Juan 6:45) Uusaren met nen Jehova so espiritu to pian bangatan so totoo to. (Juan 15:26; 1 Corinto 2:10) Tan no panon ya inusar nen Jesus so “aripen to a Juan” pian mangipasabi ed espiritual a taganon manustuni ed saray inmunan siglon kongregasyon, ontan met so panguusar to natan ed “matoor tan makabat ya aripen,” a tugyopen na alanaan ya “agagi” to diad dalin, pian nasustuni so sankaabungan to tan saray kaiba ra na espiritual a “tagano ed panaon a kinepeg to.” (Mateo 24:45-47; 25:40) Maliket iramay mamidbir ed Lapuan na ‘maong iran langkap’ a naaawat tayo diad panamegley na espiritual a tagano tan say paralanan ya uusaren To.​—Santiago 1:17.

Saray Kongregasyon ya Ididirehi nen Kristo

5. (a) Anto so angiyalilingan ed saray Kristianon kongregasyon tan saray manangasikaso ed saratan? (b) Anggaman ed ag-inkayadyari na too, anto so makatulong ed pakawalaan tayo na liket?

⁵ Diad manangilukas iran kapitulo na Apocalipsis, niyaliling iray Kristianon kongregasyon ed saray kandelero. Niyaliling iray manangasikaso ra ed saray anghel (mensaheros) tan ed bibitewen. (Apocalipsis 1:20)a Nipaakar ed inkasikato, oniay impaisulat nen Kristo ed si Juan: “Say nanegna ed kawanan a lima to na pitora a bitewen, a sikato so manaakar ed pegley na saray pitoran kandelero a balitok, kuan to so saraya.” (Apocalipsis 2:1) Say pitoran mensahe a nipasabi ed pitoran kongregasyon na Asia so mangipanengneng a diad inmunan siglo K.P., saray kongregasyon tan saray mamatatken da so walaan na saray maong tan makapuy a walna. Tua met itan natan. Kanian, mas maliket itayo no agtayon balot lingwanan so katuaan a si Kristo, say Ulo tayo, so walad utel na saray kongregasyon. Amta ton amin so nagagawa. Diad simbolikon paraan, saray manangasikaso so wala “ed kawanan a lima to,” salanti, walad silong na panangontrol tan panangidirehi to tan walaay eebatan ed sikato no panoy pamapastol da ed saray kongregasyon.​—Gawa 20:28; Hebreos 13:17.

6. Antoy mangipanengneng ya aliwa lambengat a saray manangasikaso so walaay eebatan ed si Kristo?

⁶ Balet, papalikdoen tayoy inkasikatayo no isipen tayon saray manangasikaso lambengat so walaay eebatan ed si Kristo lapud gagawaen da. Diad sakey ed saray mensahe to, inkuan nen Kristo: “[Say] lapag na iglesia naamtaan da a siak so manalaysay ed saray karaldalman a kanonotan tan saray kapusoan: tan itdan ko so balang sakey ed sikayo unong ed saray gawa yo.” (Apocalipsis 2:23) Saya so pasakbay tan sakey a panamaseseg​—sakey a pasakbay lapud ta amta nen Kristo so akindalem iran motibo tayo, tan sakey a panamaseseg lapud ipapaseguro na satan ed sikatayo ya amta nen Kristo so pansasagpot tayo tan palaboan to itayo no gawaen tayoy anggaay nayarian tayo.​—Marcos 14:6-9; Lucas 21:3, 4.

7. Panon ya ‘inunor na saray Kristiano ed Filadelfia so salita nipaakar ed impansungdo nen Jesus’?

⁷ Anggapo so panamaat a lugan na mensahe nen Kristo ed kongregasyon a walad syudad na Filadelfia diad Lydia, balet ipapaseguro na satan a pankaabigan tayon maong itan. “Lapu ed inunor mo so salita na kasungdoan ko, sika met ilaban taka ed oras na katukso [“subok,” NW], dia ed oras ya onla ed lapag na sansinakuban, pian salien da so saray manaayam ed dalin.” (Apocalipsis 3:10) Say Griegon balikas parad “inunor mo so salita na kasungdoan ko” et mankabaliksan met na “unoren no antoy imbagak nipaakar ed panagsungdo.” Isusuheri na bersikulo 8 ya aglambengat inunor na saray Kristiano ed Filadelfia iray ganggan nen Kristo noagta tinumbok da met so simbawa ton mansungdo ira tekep na katooran.​—Mateo 10:22; Lucas 21:19.

8. (a) Anto so insipan nen Jesus ed saray Kristiano ed Filadelfia? (b) Siopara natan so apektado ed “oras na subok”?

⁸ Inyarum nen Jesus ya iyagel to ra ed “oras na subok.” Agtayo amta no anto so kabaliksan na satan parad saray Kristiano nensaman. Anggaman wala so aganon inkepa na panamasegsegang kayari impatey nen Domitian nen 96 K.P., ginmapo so mas alodloor a panamasegsegang diad silong nen Trajan (98-117 K.P.), ya andi-duaruwan angitarok na kaaruman niran subok. Balet nagawa so manunan “oras na subok” diad “agew na Katawan” legan na “panaon na anggaan,” a pambibilayan tayo la natan. (Apocalipsis 1:10; Daniel 12:4, NW) Sinagmak na alanaan na espiritu iran Kristiano so sakey a panaon na panagsubok legan tan kayarin tuloy na Guerra Mundial I. Ingen, tuloytuloy ni so “oras na subok.” Apektaen na satan so “lapag na sansinakuban,” pati say minilyon a kabiangan na baleg ya ulop, a maniilalon niliktar ed baleg a kairapan. (Apocalipsis 3:10; 7:9, 14) Maliket itayo no ‘unoren tayo so imbaga nen Jesus nipaakar ed panagsungdo,’ salanti: “Say misungdo ya angga ed kasampotan, sikato lamlamang so nilaban naani.”​—Mateo 24:13.

Maliket a Panagpasakop ed Inkasoberano nen Jehova

9, 10. (a) Diad antoran paraan a naapektaan itayo ed pasingawey nipaakar ed trono nen Jehova? (b) Panon a makatulong so pambabasa tayo ed Apocalipsis diad pakawalaan tayoy liket?

⁹ Say pasingawey nipaakar ed trono nen Jehova tan say mangatatawen a korte to a wala ed kapitulo 4 tan 5 na Apocalipsis so nepeg a pandinayewan tayo. Kaukolan a nasagyat itayo ed masimoon iran balikas na panangidayew na saray makapanyarin pinalsa ed tawen legan na magayagan panpapasakop da ed matunong ya inkasoberano nen Jehova. (Apocalipsis 4:8-11) Nepeg a narengel so bosis tayo ed limog na saramay mangibabagay: “Diad Samay manyurong ed trono, bendision, tan dayew, tan gloria, tan pakayari tan diad Kordero dia ed ando lan ando.”​—Apocalipsis 5:13.

¹⁰ Diad praktikal a paraan, kabaliksan na saya so magayagan panpapasakop tayo ed linawa nen Jehova ed amin a bengatla. Insulat na apostol Pablo: “Amin a gawaen yo, dia ed salita odino gawa, gawaen yo ya amin ed ngaran na Katawan tayo a Jesus a misalsalamat kayo ed Dios ya Ama lapu ed sikato.” (Colosas 3:17) Panliketan tayon talaga so pambabasa tayo’d Apocalipsis no bidbiren tayo manlapud sankautelan a parti na kanonotan tan kapusoan tayo so inkasoberano nen Jehova tan nodnonoten so linawa to ed amin ya aspekto na kabibilay tayo.

11, 12. (a) Panon a nayakayak tan naderal so mangaraldalin a sistema nen Satanas? (b) Unong ed Apocalipsis kapitulo 7, siopa so ‘makaalagey’ ed satan a panaon?

¹¹ Say magayagan panagpasakop ed inkasoberano nen Jehova so basiyan na liket diad indibidual tan diad inkalapagan a paraan. Maganggano lan yakayaken na simbolikon baleg a yegyeg so sistemay mundo nen Satanas diad saray mismon pundasyon to tan deralen to itan. Anggapo lan balot so pansalimbengan na totoon agmanpapasakop ed mangatatawen a gobiernon Panarian nen Kristo, a mangirerepresenta ed manepeg ya inkasoberano na Dios. Oniay ibabaga na propesiya: “Saray arari ed dalin, tan saray prinsipe, tan saray manunaan a kapitanes tan saray mamayaman tan saray mabibiskeg, tan lapag na aripen tan lapag na bulos, inmamot ira ed ungib tan utel na saray batobato na saray palandey: Tan kuanda ed saray palandey tan saray batobato: Pelag kayo ed sikami, tan yamot yo kami ed lupa na samay wala a manyurong ed trono, tan dia ed sanok na Kordero: Ta say agew a baleg na sanok da sinmabi la; tan siopa so makayari ya ontanyareg?”​—Apocalipsis 6:12, 15-17.

¹² Nipaakar ed satan a tepet, deneskribe nen apostol Juan diad ontumbok a kapitulo so nipaakar ed saramay manugyop ed baleg ya ulop, a pinmaway ed baleg a kairapan, a “mananalagey ira’d arap na trono, tan ed arap na Kordero.” (Apocalipsis 7:9, 14, 15) Say panalalagey da ed arap na trono na Dios so mangipapanengneng a bibidbiren da itan a trono tan sigpot iran manpapasakop ed inkasoberano nen Jehova. Akaalagey ira sirin a naabobonan.

13. (a) Anto so dadayewen na karaklan ed saray manaayam diad dalin, tan anto so isisimbolo na tanda a walad kamolingan da odino ed kalimaan da? (b) Akin a nakaukolan sirin so panagsungdo?

¹³ Diad biek a dapag, inlitrato na kapitulo 13 so arum nin manaayam ed dalin a mandadayew ed mapolitikan sistema nen Satanas, ya insimbolo na masebeg ya ayep. Atatakan ira ed ‘kamolingan’ da odino ed ‘kalimaan’ da, a mangipapabitar ed panusuporta ra ed satan a sistema, diad isip tan gawa ra. (Apocalipsis 13:1-8, 16, 17) Insan, oniay inyarum na kapitulo 14: “No wala so siopaman a mangigalang ed ayep tan say talintao to, tan alaen to so tanda to ed moling to, o dia ed lima to, sikato oninum met ed alak na sanok na Dios, a sikato so abiig a wala ya imbales ed kopa na sanok to; . . . Dia so kawalaan na sungdo na sasantos, saray mangunor ed ganggan na Dios, tan say pananisia nen Jesus.” (Apocalipsis 14:9, 10, 12) Diad panakar na panaon, lalon nidanet so tepet a: Siopa so suportaan mo? Si Jehova tan say inkasoberano to odino sayan agmaridios a sistemay politika ya insimbolo na masebeg ya ayep? Maliket iramay agmangawat ed tanda na ayep tan sitotoor a mansungdo diad panagpasakop ed inkasoberano nen Jehova.

14, 15. Anton mensahe so sinmalet ed deskripsion na Apocalipsis nipaakar ed Armagedon, a walaan na anton kabaliksan ed sikatayo?

¹⁴ Saray manuley na “lapag a sansinakuban” so makapibanggaan la ed si Jehova, a miarap ira’d sikato nisesengeg ed isyu na inkasoberano. Say panlalaban so nagawa ed Armagedon, say “bakal na baleg ya agew na Dios, a Makapanyarin-amin.” (Apocalipsis 16:14, 16) Pinmatnag so walad makapainteres a parenthesis diad mismon nanleetan na deskripsion nipaakar ed impantitipon na saray manuley ed dalin pian mibakal ed si Jehova. Sinmalet a mismo si Jesus ed pasingawey ya oniay inkuanto: “Nia, siak ondago ak a singa matakew. Mapalar so manpuyat, tan isinop to so saray kawes to, ompan manakar a labos-lakseb, tan nanengneng da so kababaingan to.” (Apocalipsis 16:15) Nayarin ipanonot na saya so nipaakar ed saray Levitan guardia ed templo a nalakseban tan napabaingan ed publiko no naromog iran nanaugip legan na pambabantay da.

¹⁵ Say mensahe et malinlinew: No labay tayoy makaliktar ed Armagedon, kaukolan a mansiansia itayon aliing ed espiritual tan pansiansiaen ya akasulong so simbolikon kawes a mangipabidbir ed sikatayo bilang matoor a Tastasi nen Jehova a Dios. Maliket itayo no agtayo ontemeg ed espiritual tan ag-itayon balot ontunda, a maseseg a mibiang ed panangiwakawak na “andi angga a maabig a balita” nipaakar ed niletneg lan Panarian na Dios.​—Apocalipsis 14:6.

‘Maliket so Siopaman a Mangunor ed Sarayan Salita’

16. Akin a nagkalautlan panliketan iray manangisaran kapitulo na Apocalipsis?

¹⁶ Makapanggayaga lambengat iray maliket a managbasa ed libro na Apocalipsis legan dan babasaen iray manangisaran kapitulo a manedeskribe ed maglorian ilalo tayo​—sakey a balon tawen tan balon dalin, salanti, sakey a matunong a mangatatawen a gobiernon Panarian a manuley ed balo tan alinisan lan sosyedad na totoo, a kirayewan ya amin nen “Jehova a Dios say Makapanyarin-amin.” (Apocalipsis 21:22, NW) Diad pansampot la na makapakelaw iran nantutumbokan a pasingawey, oniay inkuan na nibakin anghel ed si Juan: “Saraya a salita sikara so matoor tan matua: tan say Katawan [a] Dios na saray espiritu na propetas, imbaki to so anghel to pian ipatnag to ed saray aripen to so saray bengatla a kaukolan a nagawan magano. Tan nia, ondago ak a magano. Mapalar so saray mangunor ed saray salita na propesiya na sayan libro [“lukot,” NW].”​—Apocalipsis 22:6, 7.

17. (a) Anto so panamaseguron niiter ed Apocalipsis 22:6? (b) Anto so nepeg tayon panalertoan a paliisan?

¹⁷ Nanonotan na saray maliket a managbasa na Apocalipsis iray salitan mipadpara ed saratan a nabasa diad gapo na “lukot.” (Apocalipsis 1:1, 3) Sarayan salita so mangipapaseguro ed sikatayo a ‘maganggano lan nagawa’ so amin a ‘bengabengatla’ a nipropesiya ed sayan sampot a libro na Biblia. Manbibilay itayo ed kapantokan lay panaon na anggaan a seguradon maganggano lan nagawa, diad maples a pantutumbokan, iray ebenton nipasakbay ed Apocalipsis. Sirin, antokaman so ompatnag ya inkaligen ed sistema nen Satanas et agnepeg a mamateglep ed sikatayo. Nanodnonotan na malikas a mambabasa iray pasakbay a nidatak ed saray mensahen impasabi ed pitoran kongregasyon na Asia tan napaliisan to iray kalot na materyalismo, idolatriya, imoralidad, inkamalainem-em, tan apostatan sektarianismo.

18, 19. (a) Akin ya onsabi ni si Jesus, tan anton ilalo ya imbalikas nen Juan so pakapibiangan tayo? (b) Anto so gagala na ‘isabi’ ni nen Jehova?

¹⁸ Diad libro na Apocalipsis, oniay aminpigan inyabawag nen Jesus: “Onsabi ak a tampol.” (Apocalipsis 2:16; 3:11; 22:7, 20a, NW) Sikato so onsabi ni pian ipaakseb toy panangukom ed Babilonia a Baleg, say mapolitikan sistema nen Satanas, tan ed amin a totoon agmanpapasakop ed inkasoberano nen Jehova, ya irerepresenta natan na Mesianikon Panarian. Iyulop tayoray bosis tayo ed walan inkelyaw nen apostol Juan: “Amen: Gala, Katawan a Jesus.”​—Apocalipsis 22:20b.

¹⁹ Inkuan a mismo nen Jehova: “Nia, siak ondago [“onsabi,” NW] ak a magano; tan say pambayar ko wala ed siak, pian tumangan ko so balang sakey unong ed gawa to.” (Apocalipsis 22:12) Legan tayon tatalaranan so maglorian tumang nipaakar ed magnayon a bilay bilang kabiangan na insipan a “balo a tawen” odino ed “balo a dalin,” komon ta maseseg itayon mibiang ed pananginatnat na imbitasyon ed amin a totoon matuan-impanpuso: “Gala. Tan say napgaan, ondago: et say malabay, mangala ed danum na bilay ya andi bayar.” (Apocalipsis 22:17) Magmaliw met ira komon a maliket a managbasa ed apuyanan tan makapasagyat a libro na Apocalipsis!

[Saray paimano ed leksab]

Saray Punton Repasoen

◻ Anton paralanan so inusar nen Jehova pian nipasabi so Apocalipsis, tan anto so naaralan tayo ed saya?

◻ Akin a nepeg tayon panliketan so pambasa ed saray mensahen impasabi ed pitoran kongregasyon diad Asia?

◻ Panon itayon niyagel kaleganay “oras na subok”?

◻ Anton liket so niwala ed sikatayo no unoren tayoray salita na lukot a lugan na Apocalipsis?

[Litrato ed pahina 15]

Maliket iramay mamidbir ed Lapuan na saray maabig a balita

[Litrato ed pahina 18]

Maliket so mansiasiansian aliing