Kapitulo 4

Onsabi si Jesus a Walaan na Panamaseseg

1. Siopa so susulaten natan nen Juan, tan siopa ed panaon tayo so nepeg a nainteresan a maong ed mensahe to?

SAY ontumbok so nepeg a makapainteres a maong ed amin a mililimog ed saray kongregasyon na totoo na Dios natan. Nia so serye na saray mensahe. Saratan so walaan na partikular ya aplikasyon legan a manasingger so “[aturon] panaon.” (Apocalipsis 1:3) Parad magnayon a pakagunggonaan tayo so italineng ed saratan ya anunsio. Oniay nabasa a rekord: “Siak si Juan isulat ko ed saray pitoran iglesia [“kongregasyon,” NW] a wala ed Asia: Grasya komon so wala ed sikayo tan deen na saman so wala natan, tan wala nensaman, tan onla dia; tan saray pitoran espiritu a wala ra ed arap na trono to, tan si Jesu-Kristo.”—Apocalipsis 1:4, 5a.

2. (a) Anto so isisimbolo na bilang a “pitora”? (b) Legan na agew na Katawan, siopa so aplikaan na saray mensahe ed “pitoran iglesia”?

² Say pangipapaarapan nen Juan dia et say “pitoran iglesia,” tan diad saginonor na propesiya et nasalambit so kangaranan na saraya ed sikatayo. Say bilang a “pitora,” so aminpigan asalambit ed Apocalipsis. Satan so mangisisimbolo ed inkakompleto, nagkalalo la no nipaakar ed saray bengatla na Dios tan say alanaan a kongregasyon to. Lapud say bilang na saray kongregasyon na totoo na Dios ed sankamundoan so binmulaslas ed pigamplon libo legan na agew na Katawan, makaseguro itayo a say manunan nibaga ed “pitoran iglesia” na saray alanaan so onaplika met ed amin a totoo na Dios natan. (Apocalipsis 1:10) On, walaan si Juan na importantin mensahe parad amin a kongregasyon na saray Tasi nen Jehova tan ed amin a mililimog ed sikara, ed amin a pasen na dalin.

3. (a) Diad pabano nen Juan, iner so panlapuan na ‘grasya [odino agkanepegan a panangasi] tan kareenan’? (b) Anton balikas nen apostol Pablo so miulibayan ed pabano nen Juan?

³ “Grasya [odino agkanepegan a panangasi] komon so wala ed sikayo tan deen”—agaylan kalkaliktan iratan tan nagkalalo la no pablien tayo so lapuan na saratan! Say “Saman” a panlalapuan na saratan et say Soberanon Katawan a Jehova a mismo, say “Ari ya andi-angga,” a manbibilay “manlapu ed andi-anggaan ya angga ed andi-anggaan.” (1 Timoteo 1:17; Salmo 90:2) Nalalanor met dia so “pitoran espiritu,” a satan a termino so pakapatnagan na inkasigpot na ikukurang na aktibon puersa na Dios, odino masanton espiritu, legan ya itatarok na satan so pakatalos tan bendisyon ed amin a mangimano ed propesiya. Si “Jesu-Kristo” so walaan met na importantin betang, a diad sikato et insulat nen Juan ed saginonor: “[Sikato so] napno na grasya tan katuaan.” (Juan 1:14) Kanian, say pabano nen Juan so miulibayan ed samay sinaglawi nen apostol Pablo diad sampot na komaduan sulat to ed kongregasyon na Corinto: “Say grasya na Katawan a Jesu-Kristo, tan say aro na Dios, tan say pinanabang ed espiritu santo, wala komon ed sikayo ya amin.” (2 Corinto 13:14) Komon ta onaplika met iratan a salita ed balang sakey ed sikatayo a mangaaro ed katuaan natan!—Salmo 119:97.

“Say Tasi a Matoor”

4. Panon ya intuloy nen Juan a deneskribe si Jesu-Kristo, tan akin a matukotukoy irayan impaneskribe?

⁴ Si Jesus so ontumbok ed si Jehova a sankagloriaan a persona ed talba, a singa binidbir nen Juan, ya aneskribe ed sikato bilang “Say Tasi a Matoor, say panguloan ya anak ed saray inatey, tan Uloen na saray arari ed dalin.” (Apocalipsis 1:5b) Singa say bulan ed katawenan, sikato so malet a niletneg bilang say sankatalonggaringan a Tasi ed inka-Dios nen Jehova. (Salmo 89:37) Kayari na impanmatoor to anggad masakripisyon ipapatey, sikatoy nagmaliw ya inmuna ed limog na katooan ya apaoli ed imortal ya espiritun bilay. (Colosas 1:18) Tan natan diad kiwawala nen Jehova, sikatoy nitandoro ed tagey na amin a mangaraldalin ya arari, a naikdan na “amin a pakauley . . . ed tawen tan dia ed dalin.” (Mateo 28:18; Salmo 89:27; 1 Timoteo 6:15) Nen 1914 sikatoy nitrono bilang Ari a manuley ed limog na saray mangaraldalin a nasyones.—Salmo 2:6-9.

5. (a) Panon ya intuloy nen Juan ya imbalikas so apresasyon ed Katawan a Jesu-Kristo? (b) Siopa so nagunggonaan ed langkap nen Jesus ya ayadyarin bilay to bilang too, tan panon ya akaiba iray alanaan a Kristiano ed sakey a nikabiig a bendisyon?

⁵ Intuloy nen Juan ya ibalikas so apresasyon ed Katawan a Jesu-Kristo diad sarayan masnag a salita: “Saman so angaro ed sikatayo, tan anguras ed saray kasalanan tayo ed dili to a dala; tan ginawa to itayo a panarian tan saserdote nipaakar ed Dios tan Ama to; sikato so narayew tan manari komon ed ando lan ando. Amen.” (Apocalipsis 1:5c, 6) Inter nen Jesus so ayadyarin bilay to bilang too ta pian saramay walad mundo na katooan a mangagamil na pananisia ed sikato so nipawil ed ayadyarin bilay. Sika a pinablin manbabasa, so nayarin kaiba ed saya! (Juan 3:16) Balet say masakripisyon impatey nen Jesus so angilukas na dalan parad nikabiig a bendisyon ed saramay magmaliw ya alanaan a Kristiano a singa si Juan. Saraya so niyabawag a matunong diad basiyan na dondon bagat nen Jesus. Lapud impangitalirak ed amin ya ilalo ed mangaraldalin a bilay, a singa ginawa nen Jesus, saramay kabiangan na melag a pulok so inilalak na espiritu na Dios, tan walaan na ilalon paolien a manlingkor bilang arari tan saserdote a kaiba nen Jesu-Kristo ed Panarian to. (Lucas 12:32; Roma 8:18; 1 Pedro 2:5; Apocalipsis 20:6) Agaylan engranden pribilehyo! Agpankelawan a mapekder ya inyabawag nen Juan a say dayew tan say panari et kien nen Jesus!

“Onla Dia ya Ulopen na Saray Lurem”

6. (a) Antoy iyaabawag nen Juan nipaakar ed ‘iyonla dia [nen Jesus] ya ulopen na saray lurem,’ tan anton propesiya nen Jesus so nayarin anonotan nen Juan? (b) Panon a si Jesus so “onla dia,” tan siopa so managmak na baleg a dageyem odino kaermenan ed dalin?

⁶ Kayari na satan, maligsan iyaabawag nen Juan: “Nia, ya onla dia ya ulopen na saray lurem; tan amin a mata sikato so nanengneng da, tan saray anugat met ed sikato; et saray amin a kailalakan ed dalin mandageyem ira naani lapu ed sikato. Ontan pa komon, Amen.” (Apocalipsis 1:7) Andi-duaruwan anonotan dia nen Juan so asasakbay a propesiya nen Jesus nipaakar ed konklusyon na sistema na bengabengatla. Inkuan nen Jesus ed saman: “Insan ompatnag so tanda na Anak na too ed tawen; et manermen naani ed satan so amin a polipoli na dalin, tan nanengneng da naani so Anak na too ya onsasabi ed tapew na lurelurem na tawen a napnoy pakayari tan baleg a gloria.” (Mateo 24:3, 30) Sirin, si Jesus so “onla dia” diad pangipaarap toy imano to ed pangipaakseb ed saray panangukom nen Jehova ed saray nasyon. Saya so mansumpal ed makatantanda iran pananguman ed dalin, tan lapud imbaliwala na “amin a kailalakan ed dalin” so inkapeteg na inkaari nen Jesus, peteg a sagmaken da so “petang tan sanok na Dios a Makapanyarin-amin.”—Apocalipsis 19:11-21; Salmo 2:2, 3, 8, 9.

7. Panon ya “amin a mata,” pati saramay agmatulok, et “nanengneng” da si Jesus?

⁷ Legan na samay unor a labi a kaiba nen Jesus iray babangatan to, inkuan to ed sikara: “Wala ni daiset, et say mundo agto ak la nanengneng.” (Juan 14:19) Panon, sirin, a sikatoy ‘nanengneng na amin a mata?’ Agtayo nepeg ya ilaloan a saray kakabusol nen Jesus so makanengneng ed sikato ed pisikal a kamataan da, lapud imbaga nen apostol Pablo kayari na insegep nen Jesus ed tawen a si Jesus natan so “manaayam ed sakey a liwawa ya agnaasinggeran,” tan “sikato so agnanengneng na anggan siopa ed saray totoo, et sikato so agnayari a nengnengen.” (1 Timoteo 6:16) Mapatnag a say kabaliksan na inkuan nen Juan a “nanengneng” et “natebek,” no panon a nanenengneng odino natetebek tayo iray agnanengneng a kalidad na Dios diad panamegley na saray palsa to. (Roma 1:20) Si Jesus so “onla dia ya ulopen na saray lurem” ed pantalos a sikatoy agnanengneng na literal a mata a singa say banwa sano asaniban na saray lurem. Anggan sano asaniban na saray lurem so banwa legan ya agew, amta tayon wadtan itan lapud naliliwawaan itayo. Mipadpara, anggaman agnanengneng so Katawan a Jesus, sikatoy niparungtal a singa ‘mandarlang ya apoy, diad pamales to ed saray ag-ontulok ed ebanghelyo nipaakar ed sikato.’ Saraya met so napaskar a ‘makanengneng ed sikato.’—2 Tesalonica 1:6-8; 2:8.

8. (a) Siopa ‘iramay anugat ed sikato’ nen 33 C.E., tan siopa iraya natan? (b) Lapud anggapo la dia ed dalin si Jesus, panon a saray totoo so nayarin ‘manugat ed sikato’?

⁸ Si Jesus so “nanengneng” met na ‘saray anugat ed sikato.’ Siopa kasi iraya? Sanen si Jesus so pinatey nen 33 C.E., saray sundalon Romano so literal ya anugat ed sikato. Natetel met iray Judio ed saman a kasalanan ya impamatey, lapud imbaga nen Pedro ed arum ed saraya nen Pentecostes: ‘Sayan Jesus ya impasak yo, ginawa na Dios a sikato so Katawan tan Kristo.’ (Gawa 2:5-11, 36; ikompara so Zacarias 12:10; Juan 19:37.) Ngalngali 2,000 a taon la natan ya inatey iraman a Romano tan Judio. Kanian saramay ‘manugat ed sikato’ natan so nepeg a mangirepresenta ed nasyones tan totoo a mangipapatnag met na panggula a nipatnag sanen impasak si Jesus. Anggapo la dia ed dalin si Jesus. Balet sano saray sumusumpa ed saray Tasi nen Jehova, a mantatasi ed si Jesus, so balanglan aktibon mamapasegsegang, odino mangokonsente ed ontan a panagtrato, saratan a sumusumpa so singa lanlamang ‘manusugat’ ed si Jesus a mismo.—Mateo 25:33, 41-46.

Say “Alfa tan say Omega”

9. (a) Siopa natan so mansasalita, tan aminpiga ton ginawa itan diad Apocalipsis? (b) Sanen tinawag nen Jehova so inkasikato a say “Alfa tan say Omega” tan “say Makapanyarin-amin,” antoy kabaliksan na saya?

⁹ Natan, pakelaw na saray pakelaw! Say Soberanon Katawan a Jehova a mismo so mansasalita. Agaylan saya so matukoy bilang paunan-salita ed saray pasingawey a ngalngali lan niparungtal, lapud sikato so Engranden Managbangat tayo tan say ultimon Lapuan na Apocalipsis! (Isaias 30:20) Onia so iyaabawag na Dios tayo: “Siak so Alfa tan say Omega, . . . a wala natan tan wala nensaman tan say onla dia, say Makapanyarin-amin.” (Apocalipsis 1:8) Diad Apocalipsis, saya so unona ed amitlon impansalita a mismo nen Jehova manlapud tawen. (Nengnengen met so Apocalipsis 21:5-8; 22:12-15.) Saray Kristiano nen inmunan siglo so akabidbir a tampol ed alfa tan omega bilang unona tan unor a letra na Griegon alpabeto. Say impanawag nen Jehova ed inkasikato ed saratan a duaran letra so mangidadanet a sakbay to, anggapo so makapanyarin-amin a Dios, tan anggapo la so ontumbok ed sikato. Itarok to ed matalonan konklusyon, ed inkamagnayon, so isyu nipaakar ed inka-Dios. Sikatoy niyalangon ed ando lan ando bilang saksakey tan alenleneg a makapanyarin-amin a Dios, Supremon Soberano ed amin a pinalsa to.—Ikompara so Isaias 46:10; 55:10, 11.

10. (a) Panon so tinmumbok ya impaneskribe nen Juan ed inkasikato, tan iner so niprisoan to? (b) Siopa so tinmulong pian nipatulor ed saray kongregasyon iray lukot ya insulat nen Juan? (c) Panon so mabetbet a pangitatarya na taganon espiritual natan?

¹⁰ Lapud matalek a si Jehova so mangiwanwan ed pansumpalan na saray pamaakaran, inkuan nen Juan ed kapara ton ariripen: “Siak si Juan, ya agi yo tan kadamay yo ed irap tan ed nanarian tan ed anos a wala ra ed Jesus, wala ak nensaman ed pulo a manngaran na Patmos, lapu ed salita na Dios tan say impantasi nen Jesu-Kristo.” (Apocalipsis 1:9) Legan a priso ed Patmos nisesengeg ed maong a balita, a susungdoan toray kairapan a kaiba iray agagi to, a mapekder a maniilalon makapibiang ed onsasabin Panarian, say masiken lan Juan natan so makakanengneng na unona ed saray pasingawey ed Apocalipsis. Seguradon sikatoy apaseseg a tuloy ed sarayan pasingawey, no panon a say Juan a klase natan so napapaseseg met ed pakakaimaton ed kasumpalan na saratan. Agtayo amta no panoy impangipatulor nen Juan ed lukot na Apocalipsis diad saray kongregasyon, lapud sikatoy nipriso ed saman. (Apocalipsis 1:11; 22:18, 19) Seguradon tinmulong iray anghel nen Jehova pian nagawaan iya, a singa mabetbet a panasalimbeng da ed saray matoor a Tasi nen Jehova a manlilingkor anggaman ed saray pananebel tan panameget natan, ta pian niiter da so nipanpanaon ya espiritual a tagano ed saray narasan ed katuaan ya agagi ra.—Salmo 34:6, 7.

11. Mipadpara ed samay inapresya nen Juan, anton pribilehyo so papablien a maong na Juan a klase natan?

¹¹ Seguradon inapresya a maong nen Juan so pribilehyo to a panguusar nen Jehova ed sikato bilang paralanan na pitatalosan To diad saray kongregasyon! Mipadpara, say Juan a klase natan so mamapablin maong ed pribilehyon panangitarya na espiritual a “tagano ed panaon a kinepeg to” ed sankaabungan na Dios. (Mateo 24:45) Komon ta sakey ka ed saramay napapabiskeg ed sayan espiritual a probisyon ta pian nadampot so maglorian kalat ya andi-anggaan a bilay!—Uliran 3:13-18; Juan 17:3.

[Kahon ed pahina 21]

Pakagamor na Espiritual a Tagano ed Panaon na Kairapan

Legan na sarayan kaunoran ya agew, a saray Tasi nen Jehova so manasagmak na pirmin panamasegsegang tan kairapan, importante ed sikara so pakaawat na espiritual a tagano ta pian mansiansia iran mabiskeg ed pananisia. Kaslakan lan nitatarya so magenap a suplay, a mabetbet et diad tulong na pigaran nikadkaduman panangipatnag na pakapanyari nen Jehova.

Alimbawa, diad Alemanya sanen uley nen Hitler, saray Tasi nen Jehova so amawala na saray kopya na The Watchtower panamegley na mimeograph tan angibunog ed saratan a magasin ya insebel na saray maruksan autoridad na Nazi. Diad Hamburg et sinukisok na saray Gestapo so sakey ya abung a pamapawalaan na saray kopya. Say abung so melag, tan anggapo so napangiyamotan na antokaman a bengatla. Say makinilya so inseksek ed sakey ya estante, tan say baleg a kagawaan a mimeograph so inkarga ed pananginan na patatas diad silongan. Sakey ni, diad beneg na satan a pananginan et walay maleta a napno na saray magasin! Singa mainomay a nasukayan iya. Balet antoy agawa? Lapud paraan na impangilukas na opisyal ed estante et agto anengneng so makinilya. Dia met ed silongan, oniay inreport na unabung: “Saray taloran opisyales so akaalagey ed pegley na kuarto, on, diman a mismo ed kawalaan na pananginan, a say malitan napno na saray Watchtower et walad beneg na satan. Balet agda naimano itan; singa ira abulag.” Lapud sayan nikadkaduman tulong, say sankaabungan so nantultuloy ya akapangisuplay na espiritual a tagano diad mairap tan mapeligron panaon.

Diad dekada na 1960, tinmerak so guerra-sibil ed baetan na Nigeria tan say sinmian a probinsya a Biafra. Lapud say Biafra et sigpot ya apaliberan na teritorya na Nigeria, say alenleneg a koneksion na satan ed arum a parte na mundo et say patekkiaban na eroplano. Kabaliksan na saya a saray Tasi ed Biafra et napepeligron agnasuplayan na espiritual a tagano. Insan, diad kagapo na 1968, saray autoridad na Biafra so angiasain na sakey ya empleyado ra ed serbisyo sibil parad sakey ya importantin puesto ed Europa, tan say sananey ni dia ed patikkiaban na eroplano ed Biafra. Nibanbana a sarayan dua et Tasi nen Jehova, tan natan et pareho iran walad sampot tan sampot na alenleneg a kawing ed baetan na Biafra tan arum a parte na mundo. Amoria na duara a sayan uksoyan et nanlapud si Jehova. Kanian, namboluntaryo ira parad delikado tan mapeligron kimey a pangipatulor na espiritual a tagano ed Biafra. Tan agawaan da iya sanlegan na guerra. Inkomento na sakey ed sikara: “Agnayarin panisiaan a sayan uksoyan et implano labat na too.”

[Tsart ed pahina 19]

Saray Simbolikon Bilang ed Apocalipsis

Bilang Simbolikon Kabaliksan

Say arum a bilang ya asalambit ed Apocalipsis so talosan bilang literal. Mabetbet, say konteksto so ontulong ed sikatayon nadetermina iya. (Nengnengen so Apocalipsis 7:4, 9; 11:2, 3; 12:6, 14; 17:3, 9-11; 20:3-5.)