Kapitulo 5

Anengneng nen Juan so Niglorian Jesus

Pasingawey 1​—Apocalipsis 1:10–3:22

Tema: Uusisaen nen Jesus so espiritual ya Israel diad dalin tan mangiiter na maligsan panamaseseg

Panaon na kasumpalan: Saknapen na sayan kabiangan na agew na Katawan so manlapud 1914 ya anggad ipatey tan kioli na unor a matoor ya alanaan

1. Panon so inkipresenta na unonan pasingawey, tan panon ya impatnag nen Juan so panaon na peteg a kiyaplikaan na satan?

SAY unonan pasingawey ed libro na Apocalipsis so onggapo ed kapitulo 1, bersikulo 10. Sayan pasingawey, singa ed arum ni ed Apocalipsis, so niparungtal diad sakey a deklarasyon a walay bengatlan nikadkaduman narerengel odino nanenengneng nen Juan. (Apocalipsis 1:10, 12; 4:1; 6:1) Sayan unonan pasingawey so nipresenta unong ed kipapasen nen inmunan-siglo, a ditan et insulat iray mensahe parad pitoran kongregasyon ed panaon nen Juan. Balet ta impabitar nen Juan so panaon na peteg a kiyaplikaan na satan sanen inkuanto: “Siak wala ak nensaman ed espiritu ed sakey ya agew na Katawan.” (Apocalipsis 1:10a) Kapigan itan ya “agew”? Kasin walay pisiglaotan na satan ed saray ebento ed sarayan magonigon a panaon? No ontan, nepeg tayon imanoen a maong so propesiya, lapud apektadon mismo so bilay tayo—pati say kililiktar tayo.—1 Tesalonica 5:20, 21.

Diad Agew na Katawan

2. Kapigan so igapo na agew na Katawan, tan kapigan so pangangga na satan?

² Ipapasen na saya so kasumpalan na Apocalipsis ed anton peryodo na panaon? Bueno, anto so agew na Katawan? Tutukoyen nen apostol Pablo itan bilang panaon na panangukom tan kasumpalan na saray sipan na Dios. (1 Corinto 1:8; 2 Corinto 1:14; Filipos 1:6, 10; 2:16) Diad isasabi na satan ya “agew,” saray engranden gagala nen Jehova so progresibo tan matalonan onaabanti ed kapantokan na saratan. Satan ya “agew” so onggapo ed kitrono nen Jesus bilang mangatatawen ya Ari. Anggan kayari na pangipaakseb nen Jesus na panangukom ed mundo nen Satanas, say agew na Katawan so mantultuloy diad kipawil na Paraiso tan kipawil na katooan ed inkayadyari, ya anggad diad kaunoran et “iter [nen Jesus] so panarian ed Dios tan Ama [to].”—1 Corinto 15:24-26; Apocalipsis 6:1, 2.

3. (a) Panon a say propesiya nen Daniel nipaakar ed “pitoran panaon” so ontulong ed sikatayon natalosan no kapigan so igapo na agew na Katawan? (b) Antoran ebento ed dalin so mamekder ed taon 1914 bilang gapoan na agew na Katawan?

³ Say kasumpalan na arum niran propesiya na Biblia so ontulong ed sikatayon natalosan no kapigan so igapo na agew na Katawan. Alimbawa, deneskribe nen Daniel a nabatang odino napegpeg so pananguley na linya nen Arin David; kayari na “pitoran panaon” et naamtaan a “say Sankatagyan [so] Manuley ed panarian na saray totoo, tan sikato so iter to ed anggan siopa a labay to.” (Daniel 4:23, 24, 31, 32) Say manunan kasumpalan na satan a propesiya so ginmapo diad impankibalatar na panarian na Juda, ya impabitar na ebidensya ed Biblia ya asumpal nen Oktubre 607 B.C.E. Ipapanengneng na Apocalipsis 12:6, 14 a say kasimbangan na 3 1/2 a panaon et 1,260 ya agew; kanian, say pitoran panaon (mamidua na satan a bilang) et 2,520 ya agew. No kuentaen so “balang agew ed sakey taon,” nasabi tayoy 2,520 a taon bilang karukey na “pitoran panaon.” (Ezequiel 4:6) Kanian, ginmapo so mangatatawen ya uley nen Kristo Jesus ed saginonor a kabiangan na 1914. Say inggapo na inmunan guerra mundial ed satan a taon so ananda ed “gapo na kairapan” a nantultuloy a nansalot ed katooan. Nanlapula’d 1914, agaylan makatantanda a saray ebento ed sayan aleteb na dala a dalin so amekder ed satan a taon bilang gapoan na “agew” na kiwawala nen Jesus!—Mateo 24:3-14.a

4. (a) Antoy ipapatnag na saray salita na Apocalipsis a mismo ed no kapigan so kasumpalan na unonan pasingawey? (b) Kapigan mangangga so kasumpalan na unonan pasingawey?

⁴ Kanian, sayan unonan pasingawey tan say simbawan lugan na satan so parad agew na Katawan, manlapud 1914 a manpatuloy. Sayan panaon et susuportaan na katuaan a diad saginonor ed Apocalipsis et dedeskribien na rekord so pangipaakseb na tua tan matunong a panangukom na Dios—saray ebento a ditan et say Katawan a Jesus so walaan na matalonggaring a betang. (Apocalipsis 11:18; 16:15; 17:1; 19:2, 11) No say kasumpalan na unonan pasingawey so ginmapo nen 1914, kapigan so pangangga na satan? Unong ya ipanengneng na saray mensahe a mismo, say natutukoy ya organisasyon et say kongregasyon na Dios a tugyopen na saray nilanaan ed dalin. Sirin, say kasumpalan na sayan unonan pasingawey so mangangga, sano say unor a matoor a membro na satan ya alanaan a kongregasyon so ompatey tan napaoli ed mangatatawen a bilay. Balet, say Agew na Katawan, tekep na saray bendisyon ed mangaraldalin ya arum a karnero, so mantultuloy anggad pangangga na Milenyon Uley nen Jesu-Kristo.—Juan 10:16; Apocalipsis 20:4, 5.

5. (a) Anto so ingganggan na sakey a boses a gawaen nen Juan? (b) Akin a say kawalaan na ‘pitoran kongregasyon’ et mainomay a nituloran na lukot?

⁵ Diad sayan unonan pasingawey, sakbay a nanengneng nen Juan so antokaman, walay narerengel to: “Tan nadngel ko ed abenegan ko so sakey a baleg a boses, a singa tanol na trumpeta. A kuan to, Isulat mo ed sakey a libro so nanengneng mo, tan ipawit mo ed saray pitora ya iglesia [“kongregasyon,” NW] ed Efeso, tan ed Smirna, tan ed Pergamo, tan ed Tiatira, tan ed Sardis, tan ed Filadelfia, tan ed Laodicea.” (Apocalipsis 1:10b, 11) Mipara ed tanol na sakey a trumpeta a walaan na autoridad tan mangigaganggan, sakey a boses so ontatawag ed si Juan a mansulat ed ‘pitoran [kongregasyon].’ Sikato so makaawat na nantutumbokan a mensahe tan mangipalapag ed saray bengatlan nanengneng tan narengel to. Imanoen a saray kongregasyon ya asalambit dia et walan talaga nen panaon nen Juan. Amin na saratan so naromog ed Asia Minor, diad mismon kabasil ed dayat manlapud Patmos. Magmainomay a laen so balang sakey panamegley na marakep iran karsada na Roma a walad saman a pasen. Say sakey a mensahero so agnairapan ed pangawit na lukot manlapud sakey a kongregasyon paonla ed sananey. Sarayan pitoran kongregasyon so miulibay ed sakey a seksion na modernon-agew a sirkito na saray Tasi nen Jehova.

6. (a) Anto so kabaliksan na “saray nagawa natan”? (b) Akin a makaseguro itayo a saray kipapasen ed kongregasyon na saray alanaan a Kristiano natan so mipadpara ed saramay wala ed panaon nen Juan?

⁶ Maslak ed saray propesiya ed Apocalipsis so nasumpal kayari na panaon nen Juan. Tinukoy na saratan iray “bengatla [a] nagawaan ed kayari.” Balet say simbawa ed pitoran kongregasyon so manasaglawi ed “saray nagawa natan,” saray kipapasen a talagan agawa ed pitoran kongregasyon ed saman a panaon. Saray mensahe so makanakanan tulong ed saray matoor ya aturon mamatatken ed saraman a pitoran kongregasyon, ontan met ed amin nin arum a kongregasyon na alanaan a Kristianos ed saman a panaon.b Lapud say pasingawey so walaan na manunan kiyaplikaan ed agew na Katawan, say ibabaga nen Jesus so kinmanan paimano a saray mipadparan kipapasen so nailaloan ed kongregasyon na saray alanaan a Kristiano ed mismon panaon tayo.—Apocalipsis 1:10, 19.

7. Siopa so anengneng nen Juan ed sayan unonan pasingawey, tan akin ya importantin tuloy tan makapaligsa itan ed sikatayo natan?

⁷ Diad sayan unonan pasingawey, anengneng nen Juan so masnag a Katawan a Jesu-Kristo ed mangatatawen a gloria To. Wala ta ni mas matukoy ed sakey a libro na saray propesiya a manasaglawi ed baleg ya agew na sayan Katawan ya ingganggan na tawen? Tan anto ni mas importante ed sikatayo, a manbibilay natan ed satan a peryodo na panaon tan maniimanon maong ed amin a ganggan to? Sakey ni, agaylan makapaligsa ed saray manusuporta ed inkasoberano nen Jehova a napaseguroan a say Mesianikon Bini, a sinungdoan to so amin iran subok tan panamasegsegang ya intarok nen Satanas tan anagmak na makapaot-ot ya ipapatey sanen sinugatan so “mukor” To ngalngali 2,000 taon lay apalabas, so mabilay la natan ed tawen, a naikdan na pakapanyarin mangitarok ed engranden gagala na Dios diad mananalon kasumpalan na satan!—Genesis 3:15.

8. Akaparaan lan onkiwas natan si Jesus parad anto?

⁸ Mapatnag a si Jesus natan so akaparaan lan onkiwas bilang nitronon Ari. Sikatoy tinuro bilang Manunan Manamatey ya usaren nen Jehova a mangitarok na saray pinal a panangukom nen Jehova sumpad sayan daan, marelmeng a sistema na bengabengatla tan say mauges a dios na saya, si Satanas. Sikatoy akaparaan met a mangukom ed saramay alanaan a kabiangan na kongregasyon to tan say baleg ya ulop a mililimog ed sikara, ontan met a pian ukomen so mundo.—Apocalipsis 7:4, 9; Gawa 17:31.

9. (a) Panon so impaneskribe nen Juan ed niglorian Jesu-Kristo a walad pegley na saray binmalitok a kandelero? (b) Anto so ipapatnag na singa-templon eksena tan say kawes a sulong nen Jesus? (c) Antoy kabaliksan na binmalitok a balkes to?

⁹ Si Juan so linmingaw ed tanol na maksil a boses, et onia so nanenengneng to: “Linmingaw ak pian nengneng[en] ko so boses ya akisalita ed siak. Tan kalingaw ko anengneng ko so pitora a kandelero a balitok.” (Apocalipsis 1:12) Diad saginonor, naamtaan nen Juan so isisimbolo na sarayan pitoran kandelero. Balet say akalay imano to et samay personan walad pegley na saray kandelero. Wadman “ed pegley na pitora a kandelero, anengneng ko so sakey a kaulibay na anak na too, ya akawesan na sakey a kawes ya angga ed saray sali, tan abalkesan ed pagew na sakey a balkes a balitok.” (Apocalipsis 1:13) Si Jesus, say “anak na too,” so angiparungtal ed inkasikato bilang matalonggaring, masnag a persona ed arap na nikelkelawan a tasi, si Juan. Sikatoy pinmatnag ed masnag a gloria ed limog na mandarlang iran binmalitok a kandelero. Sayan singa-templon eksena so angipurek ed si Juan a si Jesus so presente bilang baleg ya Atagey a Saserdote nen Jehova, a walaan na pakapanyarin mangukom. (Hebreos 4:14; 7:21-25) Say andukey, makapadinayew a kawes to so matukoy ed betang to bilang saserdote. Singa saray Judion atagey a saserdote nensaman, sikatoy akasulong na balkes—binmalitok a balkes diad pagew to, ya anakbong ed puso to. Kabaliksan na saya a sikatoy sigpot-puson manumpal ed madibinon kimey ya inawat to ed si Jehova a Dios.—Exodo 28:8, 30; Hebreos 8:1, 2.

10. (a) Antoy ipapatnag na singa niebe kaputin buek nen Jesus tan saray mandarlang a mata to? (b) Antoy kabaliksan na saray sali nen Jesus a singa masnag a gansa?

¹⁰ Intuloy na salaysay nen Juan: “Tan say ulo tan saray buek to amputi ra a singa bago’y karnero ya amputi, amputin singa nieve, tan saray mata to singa dalang na apoy.” (Apocalipsis 1:14) Say singa bago’y karnero kaputin buek to so mangipapatnag na kakabatan lapud dukey na bilay. (Ikompara so Uliran 16:31.) Tan saray mandarlang a mata to so mangipanengneng a sikatoy intelihente tan alerto, legan ton manuusisa, manusubok, odino mangibabalikas ed sanok to. Anggan saray sali nen Jesus so angalay imano nen Juan: “Tan saray sali to singa ra gansa a masnag, a singa agogolan dia ed sakey a horno; tan say boses to singa ungol na dakel a danum.” (Apocalipsis 1:15) Diad pasingawey, saray sali nen Jesus et singa gansa, masnag, maliwliwawa—manepenepeg parad sakey a manaakar a maseseg tan walaan na maabig a talindeg ed imaton nen Jehova a Dios. Sakey ni, bangta diad Biblia et saray madibinon bengatla so mabetbet ya inrepresenta na balitok, saray bengatlan nipaakar ed too so no maminsan et irerepresenta na gansa.c Kanian say masnag a sali nen Jesus a singa agogolan a gansa so mangipapanonot ed sikatayo no panon ‘kalimgas’ so sali to sanen sikatoy wadiad dalin ya angipulong ed maong a balita.—Isaias 52:7; Roma 10:15.

11. (a) Anto so ipapanonot ed sikatayo na saray maglorian sali nen Jesus? (b) Antoy ipapatnag na katuaan a say boses nen Jesus et “singa ungol na dakel a danum”?

¹¹ Peteg, bilang ayadyarin too, walaan si Jesus na liwawa a mabitar ed saray anghel tan totoo. (Juan 1:14) Saray maglorian sali to so mangipanonot met ed sikatayo a sikatoy akaalagey ed masanton pasen diad organisasyon nen Jehova, bilang Atagey a Saserdote. (Ikompara so Exodo 3:5.) Sakey ni, say boses to et singa ungol na abalbaleg a pataboy ya agus na danum. Satan so makapadinayew, makapakelkelaw, tan matukoy met parad sakey a tinawag na Salita na Dios, bilang sakey a sinmabin “mangukom ed panaayaman a dalin diad inkatunong.”—Gawa 17:31, NW; Juan 1:1.

12. Antoy kabaliksan na “kampilan a mautok a duara so tarem” to?

¹² “Tan nanegna ed kawanan a lima to na pitoran bitewen: tan dia ed sangi to ompapaway so sakey a kampilan a mautok a duara so tarem; tan say lupa to singa say agew no onsindag ed kabiskegan to. Tan nen anengneng ko, alukbob ak a singa inatey ed saray sali to.” (Apocalipsis 1:16, 17a) Nanagunoyan ni et ipaliwawa a mismo nen Jesus so kabaliksan na pitoran bibitewen. Balet imanoen no antoy ompapaway ed sangi to: “sakey a kampilan a mautok a duara so tarem” to. Agaylan matukotukoy a panangirepresenta! Lapud si Jesus so aturon mangibesngaw na saray unor a panangukom nen Jehova sumpad saray kakabusol To. Saray mapekder a balikas na sangi to so mansumpal ed kaderal na amin a marelmeng.—Apocalipsis 19:13, 15.

13. (a) Say maliwliwawa, mansinag a lupa nen Jesus so mangipanonot ed sikatayo na anto? (b) Anto so interamentin impresyon ya ipupurek ed sikatayo na deskripsion nen Juan nipaakar ed si Jesus?

¹³ Say maliwliwawa, mansinag a lupa nen Jesus so mangipapanonot ed sikatayo a say lupa nen Moises so sinminag kayari na impitongtong nen Jehova ed sikato ed Palandey Sinai. (Exodo 34:29, 30) Tandaan met a diad samay transpigurasyon nen Jesus a naimatonan na taloran apostol to ed ngalngali 2,000 taon lay apalabas, “say lupa to sinminag a singa say banwa, tan saray kawes to nagmaliw ya amputi a singa liwawa.” (Mateo 17:2) Natan, diad pasingawey a representasyon nen Jesus legan na agew na Katawan, say lupa to so mipadparan mangisisindag na masnag a karlangan na sakey a wala ed kiwawala nen Jehova. (2 Corinto 3:18) Diad tua, say interamentin impresyon ya ipupurek na pasingawey nen Juan et say inkamasnag na gloria. Manlapud singa bago’y karnero kaputin buek, mandarlang iran mata, tan say mansinag a lupa ya angga ed masnag a sali, satan so superlatibon pasingawey nipaakar ed Sakey a manaayam la natan “ed sakey a liwawa ya agnaasinggeran.” (1 Timoteo 6:16) Mabitabitar tan mabilabilay iyan nenengnengen! Anto so reaksion na abigbigla a Juan? Ibabaga ed sikatayo na apostol: “Tan nen anengneng ko, alukbob ak a singa inatey ed saray sali to.”—Apocalipsis 1:17.

14. Panon itayon nepeg a naapektaan sano babasaen tayo so pasingawey nen Juan nipaakar ed niglorian Jesus?

¹⁴ Natan, say makolor, detalyadon deskripsion na pasingawey nen Juan so mangipapalikna ed saray totoo na Dios na impapuson apresasyon. Natan et apalabas tayo la so masulok a 90 a taon na agew na Katawan, a kaleganan na satan et say pasingawey so mantutultuloy a nawawalaan na makapainteres a kasumpalan. Parad sikatayo, say uley na Panarian nen Jesus et sakey a mabilay, kaplesan lan nagagawa, aliwan diad arapen nin ilalo. Kanian, manepeg ed sikatayo bilang matoor ya uuleyan na Panarian so pangimano nin nagkalalo tekep na pankelaw ed dedeskribien nen Juan ed sayan unonan pasingawey tan ontalineng a situtulok ed saray salita na niglorian Jesu-Kristo.

[Saray paimano ed leksab]

[Saray litrato ed pahina 23]

Say arkeolohikon kabiangan na saray syudad a pakaromogan ed pitoran kongregasyon so mamepekder ed rekord na Biblia. Dia naawat na saray inmunan-siglon Kristiano so makapaseseg iran mensahe nen Jesus a mamapabiskeg natan ed sankamundoan a kongregasyon

PERGAMO

SMIRNA

TIATIRA

SARDIS

EFESO

FILADELFIA

LAODICEA