Agmo Aabuloyan a say Kinaabig Mo et Magmaliw a Kakapuyan
Lapud walaan na 16 ya agnalooban na danum iran kuarto ed kaha to, say maluhon bapor a Titanic so impasen ya ag-onlereg. Diad pilimeron baroy to nen 1912, lugan to labat so ngalngali kapalduan bilang na nakaukolan iran para salba a baloto. Adumbo na bapor so sakey ya iceberg kanian nakneb, ya inateyan na masulok a 1,500.
SAY matakot ed Dios ya Arin Uzias ed Jerusalem nensaman so marunong a komandante na militar. Diad tulong nen Jehova, tinatalo toray kakabusol to. “Say ngaran [nen Uzias so] kinmayat ed paway; ta sikato so makapakelaw ya atulongan, angga ed sikato so mabiskeg.” Balet diad saman “say puso to nipaatagey . . . tan linmukso sumpa ed Jehova a Dios to.” Lapud kapangtaan nen Uzias, sikatoy akating.—2 Awaran 26:15-21; Uliran 16:18.
Ibangat ed sikatayo na sarayan duaran salaysay a saray kinaabig, sano agnatekepan na kakabatan, kapaabebaan, kaumildian et mainomay iran magmaliw a kakapuyan odino pankaugsan. Seryoso iya, ta diad nanduruman dalan, balang sakey ed sikatayo so walaan na pigaran kinaabig, odino saray langkap, tan labay tayon saraya so pakagunggunaan tan panlapuan na gayaga tayo tan ed arum, nagkalalo la ed Manamalsa tayo. On, nepeg tayon usaren a sigpot so dinanman a langkap na Dios a niwala’d sikatayo balet alwaran tayo met ta pian mansiansian makanakanan pakagunggunaan itan.
Alimbawa, no panliliketan na sakey a too so kimey to et ompan satan so mainomay lan magmaliw a kakapuyay langkap to diad pagmaliw lan alablabas a mantrabaho. Say maalwar a too so agmainomay a naloko odino napalikdo, balet nayarin sikato so magmaliw a maalwar ya agmet lan balot makapandesisyon. Say inkakuli met so maabig a kualidad, balet ta no alablabas la, a nibaliwala lay kakabusan na too, say resulta et nayarin magmaliw lan mabinta tan mapeget so kaliberliber a panlapuan na ermen. Kanian molimolien pan magano iray kinaabig mon dili. Kasin sustoy kikakana ed saratan? Kasin pakagunggunaan iratan ed arum? Manuna’d amin, kasin nauusar mo iratan pian pagalangan si Jehova, say Lapuan na “amin a maong a palangkap”? (Santiago 1:17) Lapud satan, nengnengen tayo pan maong so pigaran alimbawa nipaakar ed saray walan kinaabig a nayarin magmaliw a kakapuyan, pankaugsan ni ingen, no agnaasikaso.
Usaren a Makabat Iray Abilidad a Manisip
Say maong ya impangutek so seguradon maabig ya abilidad. Siansia, nayari nin magmaliw itan a kakapuyan no mansumpal itan ed alabas a panagmatalek odino pakabayuboan tayoy sobran opinyon tayo’d inkasikatayo, nagkalalo la no komendaan itayon alablabas odino irayrayew itayo na arum. Odino nayarin nabayuboan tayoy marundunong a panmoria ed Salitay Dios tan nibase’d Biblia ya aaralen iran publikasyon.
Nayarin onlesa’d nanduruman dalan so alabas a panagmatalek. Alimbawa, sano say sakey a walaan na alay abig ya impangutek so akaawat na asainmin ed Kristianon kongregasyon, anganko et publikon paliwawa odino paliwawa ed Teokratikon Eskuelaan Parad Panagministro, nayarin sikatoy manparaan no maganggano la, ompan agni ingen manpikasi ed panamendision nen Jehova. Imbes, sikatoy manmatalek ed wala lan pikakabat to tan ed say abilidad ton makapannonot a tampol. Say natural ya abilidad so nayarin mandisimula ed inkapaleen to, balet no anggapoy sigpot a panamendision nen Jehova, say iyaaligwas to ed espiritual so ontayer, ompan ontunda ni ingen. Agaylan inkaperdi na maabig a langkap!—Uliran 3:5, 6; Santiago 3:1.
Nayarin moriaen met na siopaman, a walaan na matalem a kanonotan, a nayarin makaasol na marunong a panmoria ed Biblia tan ed saray katulongan a panaralan ed Biblia. Balet, say ontan a pikakabat et “patageyen to [labat] so linawa,” odino ombisog a singa lubo; ag-itan ‘mamabiskeg’ na maaro iran siglaotan bilang Kristiano. (1 Corinto 8:1; Galacia 5:26) Diad biek a dapag, say maespiritual a too, anggaman walaray abilidad ton manisip, so lawas nin mangipikasi tan manmatalek ed espiritu na Dios. Say kinaabig to so magmaliw a lalon pankaabigan leleg a sikatoy ombubulaslas ed aro, kaumildian, pikakabat, tan kakabatan—tan nagawa’d asimsimbang a dalan.—Colosas 1:9, 10.
Magmaliw met a kakapuyan so abilidad no diad satan et nabayuboan tayoy agmakatunongan ya opinyon tayo, a mangiparungtal na kakulangay kapaabebaan. Say alangkapan a too—tan siopaman ya alabas a mangirayew ed sikato—so nayarin makalingwan a si Jehova et “agto imatleken so anggan siopa a makabat ed puso,” anggaman alangkapan man ira. (Job 37:24) “Saray mapaabeba wala so kakabatan,” so inkuan na Salitay Dios. (Uliran 11:2) Anggaman, mautek tan atagey so aral nen apostol Pablo, oniay inkuan to ed saray taga-Corinto: “Sanen sinmabi ak ed sikayo, agak sinmabi ed kaatageyan na pananalita, odino kakabatan . . . Akiayam ak ed sikayo ed kakapuyan tan takot, tan baleg a giwgiw; tan say salitak tan panangipulong ko aliwa ra a salita a makaay-ayat na kakabatan, noag dia ed panangipatnag na espiritu tan pakayari, ta pian say pananisia yo aliwa dia ed kakabatan na saray totoo, noag dia ed pakayari’ Dios.”—1 Corinto 2:1-5.
Say tuan makabat a too et agnapalikdo na panmoriay mundo nipaakar ed inkadunong, nisay diad estandarte na satan nipaakar ed iyaasenso. Kanian imbes ya usaren to iray talento to pian nagamoray panangabobon na totoo odino pian makatipon na kayamanan ed mundo, iter toy sankaabigan to ed samay Sakey ya angiter na bilay tan ed saray abilidad to. (1 Juan 2:15-17) Lapud satan et pantultuloyen ton iyunay intereses na Panarian ed bilay to, a magmaliw a singa sakey a mabungan “kiew a nitanem ed abay na ag-agus na danum.” Lapud panamendision nen Jehova, aliwan ed dili ton natural iran talento, “amin a gawaen to ombuna.”—Salmo 1:1-3; Mateo 6:33.
Napalaknab Komon so Kinaabig Mo Lapud Inkakristiano
Diad mismon kipapasen to, daakan so nabayuboan a kinaabig lapud Inkakristiano ya agnaparaan na minumundo iran pilosopiya. Alimbawa, lapud dalan na bilay bilang Kristiano et niwawala iray sankaabigan ya asawan lalaki tan bibii, sankaabigan iran kakaabay, tan sankaabigan iran empleyado—totoon matua, marespeto, mareen, tan makuli. (Colosas 3:18-23) Niarum ni, napaaligwas na Kristiano a nipapasal a manpaliwawa tan manbangat so maabig iran dunong ed pitatalosan. (1 Timoteo 4:13-15) Sirin, agpankelawan a saray Kristiano so labalabay ya ikdan na amo ra na kaaruman a responsabilidad tan saray promotion. Balet saratan a kinaabig so lingon nausar no agnaasikason maong. Say promotion odino say makapaayat a trabahon opresi so nayarin mankabaliksay pangiter to lawari lan amin a panaon to ed kompanya, a maparanay lan agmakakar ed saray Kristianon miting, odino kisakripisyoan la na mablin panaon parad pamilya na sakey.
Diad Australia sakey a Kristianon matatken tan de-pamilya, a maal-aligwas met a negosyante et “sarag to komon so onyaman tan ombantog,” a singa panangibaga. Balet sikatoy ag-atukso pian onasenso ed sayan sistema. “Labay ko a malaem so nausar kon panaon a kaibay pamilyak tan diad Kristianon ministeryo,” so inkuan to. “Kanian nampaknaan mi nen asawak a maalwar kon bawasay uusaren kon panaon ed anapan ko. Akin et mantrabaho ak ni na limay agew ed sakey simba anta agko met la nakaukolan?” so inyarum to. Diad impanggawa na pigaran ninonot a maong iran pananguman ed bilay to, amoria na sayan matatken a nayarian to nin asikasoen so pamilya to diad pantrabaho na talora odino apatiran agew ed loob na sakey simba. Asabi panaon, sikatoy inimbitaan a mibiang ed arum nin pribilihyo ed serbisyo, singa say panlingkor ed lokal ya Assembly Hall Committee tan kabiangay administration na distriton kombension. Lapud makabat ya impangusar to ed kinaabig to, angitarok itan na gayaga tan kapenek to tan ed say pamilya to.
Asimbang ya Awawey Nipaakar ed Saray Pribilihyo
Papasesegen iray Kristianon lalaki a dampoten da iray pribilihyo na serbisyo ed kongregasyon. “No siopaman a lakin manadampot parad betang a manangasikaso [odino ministeryal a lingkor], pampilalekan to so maabig a gawa.” (1 Timoteo 3:1, NW) No nipaakar ed abitla la iran kinaabig, say mabulos a pangawat ed saray responsabilidad et kaukolan met a tekepan na maabig a panagdesisyon. Anggapo komon so mangaawat na dakel iran asainmin a kabalangan to lay gayaga to ed panaglingkor ed si Jehova. On, say mabulos ya awawey so nakomendaan, no kakkaukolan, ta ag-abobonan nen Jehova so awawey ya ipaliis so sarili; noagta say inkamabulos so nepeg met a mangisindag na kapaabebaan tan “inkalimpio ed kanonotan.”—Tito 2:12, NW; Apocalipsis 3:15, 16.
Lapud inkatamoy, aralem a pakatalos, tan pililikna nen Jesus et agnasisikig iray abebbeba dia ed kiwawala to. Ontan met natan, agnasisikig iray totoo ed saramay say kinaabig da et atekepay pililikna tan manangiyansakit a personalidad. Diad Kristianon kongregasyon, say ontan iran maligsa tan alinyadon mamatatken so talagan pinabpabli “iran langkap a totoo.” Sikaray “sakey ya amotan na dagem, tan sakey a siruman ed bagyo, singa saray agus na saray danum ed pasen ya amaga, singa anino na sakey a baleg a batondampay ed sakey a dalin ya amagaan.”—Efeso 4:8; NW; Isaias 32:2.
Balet nepeg a simbangen na mamatatken so uusaren dan panaon diad panulong ed arum tan ed dilin pankaukolan da ed personal a panagaral, panagdalepdep, pikakasi, tan ed panagpulong. Natural labat, nakaukolan met na de-asawan mamatatken so pangipanaon da ed pamilya ra, a diad sikara et kaukolan iran nagkalalo lan alinyado.
Makayarin Bibii—Alay Abig a Bendision
Singa saray makayarin mamatatken, saray sinononot ed espiritual a bibii met so maabig a pankaabigan ed organisasyon nen Jehova. Kaslakan, saray alangkapan a bibii so walaay interes ed arum a totoo—sakey itan a kualidad a papablien tan ipapaseseg nen Jehova. Mantultuloy ya “agnengnengen na balang sakey ed sikayo so kayarian [“interes,” NW] ton dili, noag balang sakey ed sikayo nengnengen to met so saray bengatlan kayarian na saray arum,” so insulat nen apostol Pablo. (Filipos 2:4) Balet, sayan ‘personal ya interes’ et walaay mismon limitasyon, ta anggapoy Kristianon malabay a ‘mibiang ed gawa na arum a too’; nisay mantalabutob so sakey.—1 Pedro 4:15; 1 Timoteo 5:13.
Walaan na dakel a langkap iray bibii. Alimbawa, nayarin mas mautek so sakey a Kristianon asawan bii nen say asawa to. Anggaman kuan, bilang “sakey a makayarin asawan bii” ya ontatakot ed si Jehova, nepeg ton respetoen so asawa to tan usaren toray langkap to pian mipanoan ed asawan laki, aliwan milaslasan ed sikato. Tan imbes ya ibegan odino pan-ingongotan toy asawa ton bii, say makabat, mapaabeban asawan laki so nepeg ton pablien iray kinaabig na asawa to tan panliketan to iratan. Nepeg a pasesegen na asawan laki so asawa to ya usaren iray abilidad na asawan bii ed sipot a paraan pian ipaalagey toy sankaabungan to tan pian tulongan toy ananak ton ‘ontakot ed si Jehova,’ a singa gagawaen lan mismo na bii. (Uliran 31:10; 28-30; Genesis 2:18) Saratan a mapaabeba, maulimek ya asawan lalaki tan bibii so onaligwas ed panamaley da, a peteg a mamagalang ed si Jehova.
Kontrolen so Mapuersan Personalidad
Say mapuersan personalidad a niletneg ed inkatunong tan intiron-kamarerwan panumpal ed linawa nen Jehova so nayarin magmaliw a maabig a kayarian sano atekepan na kapaabebaan tan kaumildian. Balet, nayarin magmaliw itan a kakapuyan no satan so mamakiwas ed sakey pian dominaen odino pagyawen so arum. Nagkalalo lan tua iya ed loob na Kristianon kongregasyon. Komon ta agnasisikig iray Kristiano ed sinansakey, ontan met sano kaulop da iray mamatatken ed kongregasyon.—Mateo 20:25-27.
Ontan met, komon ta agnasisikig iray mamatatken diad pipiulop da ed arum. Tan sano mantitipon ira, say masanton espiritu so nepeg a mangimpluensia ed saray desisyon da ya aliwan say puersa na personalidad. On, makaimpluensia so masanton espiritu ed siopaman a matatken dia ed ulop na mamatatken, anggan say sankaugawan odino agmasmasel a matatken. Kanian saramay walaay mas mapuersan personalidad, anggano liknaen dan sikaray duga et kaukolan dan pokpokan so kinaabig da diad panaral na dunong a mapalugar, a diad ontan et “nipanengneng so galang” ed kaparan mamatatken. (Roma 12:10, NW) Mapangasin mamapasakbay so Eclesiastes 7:16: “Agka manpetek ya alabas; agmo met gawaen so inkasika ya alabas a makabat, akin ta a bagbagen mo so inkasika?”
Si Jehova, say Lapuan na “amin a maong a palangkap,” so mangokontrol ed makapakelkelaw iran pakayari to tekep na absoluton inkayadyari. (Santiago 1:17; Deuteronomio 32:4) Tan sikatoy Managbangat tayo! Kanian manaral itayo ed sikato tan pankimeyan itan a maong, namparan diad pamayubo ed inkasiporan iran langkap odino saray kinaabig tayo, tan usaren tayo iratan diad makabat, mapaabeba, tan maaron paraan. Agaylan pakagunggunaan iratan na arum!
[Saray litrato ed pahina 27]
Mandependi so espiritual ya iyaaligwas diad masimoon a panagaral tan panagmatalek ed si Jehova
[Litrato ed pahina 29]
Say personal ya interes ya atekepan na kapaabebaan et sakey a bendision
[Picture Credit Line ed pahina 26]
Diad Impangiyabuloy na The Mariners’ Museum, Newport New, VA