Say Teokratikon Eskuelaan Parad Ministeryo ed 2004

¹ Kikinlongan nen Jehova iray ordinaryon totoo a manumpal ed importante a kimey ed sankamundoan. Say sakey a paraan a gagawaen to iya et diad pangitatarya na panangipasal kada simba diad Teokratikon Eskuelaan Parad Ministeryo. Kasin sigpot kan mibibiang anggad iyabuloy na sirkumstansyam? No Enero et nagawa so pigaran pananguman diad gagalan tulongan iray estudyante a minabang a nagkalalo ed saray uksoyan.

² Pansusublayan na Katulongan a Managkonseho: Saray agagin mangiprepresenta na saray instruksion a paliwawa tan pabitar ed Biblia so mangaapresya ed saray obserbasyon na katulongan a managkonseho. Diad saray kongregasyon a dakel so kualipikadon mamatatken, say betang bilang katulongan a managkonseho so nayarin pansusublayan a tinaon. Diad ontan et napansasakbatan so kimey; balet, say nagkalalon importante et nagunggonaan iray mamatatken tan kualipikadon ministeryal a lingkor ed nantetekep ya eksperiensya na nanduruman makayarin managpaliwawa tan managbangat.

³ Pangiyeskedyul ed Insalitan Repaso: No wala so sirkiton asamblea na kongregasyon yo diad simba na insalitan repaso, kaukolan ya iguntang so panrepaso (tan say arum a sinimban eskedyul) diad ontumbok a simba tan say akaeskedyul ed ontumbok a simba so singbaten ed simba na sirkiton asamblea. Balet, agla kaukolan a pansalatan so duaran kompleton sinimban eskedyul sano nibana ed bisita na manangasikaso na sirkito so insalitan repaso. Imbes, say kanta, paliwawa ed kalidad na panagsalita, tan saray pabitar ed Biblia so nepeg ya ipresenta unong ed akaeskedyul. Say instruksion a paliwawa (ya ipresenta kayari na paliwawa ed kalidad na panagsalita) so nepeg ya alaen manlapud eskedyul ed ontumbok a simba. Saray pabitar ed Biblia so tumbokan na kapalduay-oras a Service Meeting, a nayarin umanen pian onggenap so taloran tunggal 10-minuto odino duaran tunggal 15-minuto a parte. (Anggapo la so panlukas iran pakabat.) Say Service Meeting so tumbokan na kanta tan kapalduay-oras a programa na manangasikaso na sirkito. Say Teokratikon Eskuelaan Parad Ministeryo ed ontumbok a simba so onggapo ed paliwawa ed kalidad na panagsalita tan saray pabitar ed Biblia unong ed akaeskedyul, a tumbokan na insalitan repaso.

⁴ Anamoten so kada pankanawnawa parad espiritual ya iyaaligwas. Legan kayon nagugunggonaan ed panagaral yo ed Teokratikon Eskuelaan Parad Ministeryo, napapaseseg yo so kongregasyon yo, kabiangan kayo ed pakasusumpal na propesiya ed Biblia, tan nidadayew yo so Lapuan na alay abig a mensahe a nepeg tayon iyabawag.​—Isa. 32:3, 4; Apoc. 9:19.

Balon Programa ed Espisyal ya Agew ya Asamblea

Dakdakel natan so impormasyon nipaakar ed pamasiansia ed literal a puso tayo a mabunigas ta pian nawalaan itayo na mas maliket tan andukey a bilay. Ingen, nagkalalon importante so kipapasen na piguratibon puso tayo. Agaylan matukoy sirin so tema ed programa na espisyal ya agew ya asamblea tayo ya onggapo no Pebrero 2004: ‘Manlingkor ed si Jehova Tekep na Interon Puso.’ (1 Awa. 28:9, NW) Anto so nailaloan tayo a naaralan?

Say manangasikaso na sirkito so maningbat ed “Tulongan so Arum a Manlingkor ed si Jehova Tekep na Malikeliket a Kamarerwa.” Saray interbio so mangipabitar ed gayaga a resulta na panamayubo ed interes tan saray panangiyaral ed Biblia. Amin ya onatendi so seguradon naligliwa tan napaseseg ed primeron paliwawa na ombibisitan espiker ya, “Alwaran so Kapusoan Tayo Diad Magulon Mundo.” Manampot so sesyon ed kabuasan panamegley na paliwawa ed bautismo.

Diad ngarem, say partin “Pananulong ed Arum” so mangonsidera ed no panon tayon natulongan so arum. Anto so nagawaan na atateng pian naprotektaan so kapusoan na ananak da manlapud mauges iran impluensya tan natulongan iran onapit ed si Jehova? Say partin “Tulongan so Ananak Yo a Manggayaga ed si Jehova” so mangitarya na praktikal iran suhestion tan mangidemostra no panon iyan nagawaan.

Kasin aanamoten tayo so kada probisyon nen Jehova pian mansiansian mabunigas tan mabiskeg so piguratibon puso tayo? Say unor a paliwawa na ombibisitan espiker a “Pansiansiaen so Interon Puso a Panaglingkor ed si Jehova,” so mangiyapasakey ed apatiran makanan aspekto na rotina tayo a mamasiansia ed espiritualidad tayo. Kaunongan karakel so oras tan sagpot ya itatalaga tayo ed masimoon a panagpikasi, panagaral ed Salitay Dios, maseseg a panagpulong, tan pililimog ed arum a Kristiano? Kasin onaligwas itayo ni ed dinanman ed sarayan aspekto?

Si Jehova so mangiimbita: “Ipakep mo so pusom ed panangibangat ko, tan saray layag mo ed saray salita na pikakabat.” (Uli. 23:12) Manplano la natan ya onatendi ed sayan makagunggonan agew na panamilin a manlalapud Kasulatan. Say panggawa ed satan so mamabiskeg ed sika a mantultuloy a manlingkor ed si Jehova tekep na interon puso.