Panon Tayon Momoriaen so Totoo Legan a Manasingger lay Agew nen Jehova?
“Say Katawan agto bayagen so sipan to, . . . noag ingen masungdo ed sikayo, agto labay a wala so siopaman a natawtaw noag ingen amin komon nagegemtan da so panagsibkel.”—2 PEDRO 3:9.
1, 2. (a) Panon a momoriaen nen Jehova so totoo natan? (b) Anto iray nitepet tayo ed inkasikatayon dili?
NIGANGGAN iray lingkor nen Jehova a ‘manggawa na babangatan ed amin a nasyones.’ (Mateo 28:19) Legan tayon susumpalen iyan asainmin tan tatalaranan so “baleg ya agew nen Jehova,” nakaukolan a moriaen tayo so totoo unong ed panmoria to. (Sofonias 1:14) Tan panon so panmoria to? Oniay kuan nen apostol Pedro: “Say Katawan agto bayagen so sipan to, a singa say arum igaton da a mabayag; noag ingen masungdo ed sikayo, agto labay a wala so siopaman a natawtaw noag ingen amin komon nagegemtan da so panagsibkel.” (2 Pedro 3:9) Momoriaen na Dios so totoo bilang indibidual a posiblin makarapat na panagbabawi. Say ‘labay to et amin a totoo nilaban ira komon, tan ondago ra ed pakapikabat ed katuaan.’ (1 Timoteo 2:4) Agayla, manliket si Jehova sano ‘say marelmeng ompawil a manlapu ed dalan to tan manbilay’!—Ezequiel 33:11.
2 Kasin mipara so panmoria tayo ed panmoria nen Jehova ed saray totoo? Singa sikato, kasin ipapasen tayo iray indibidual a nanlapud kada rasa tan nasyon a posiblin magmaliw a “karkarnero na pastolan to”? (Salmo 100:3; Gawa 10:34, 35) Konsideraen tayo so duaran alimbawa a mangipapanengneng ed kaimportantian na pakawalaan na panmoria na Dios. Diad saratan a kipapasen, mapatnag ya asingger la so kadederal, tan saray lingkor nen Jehova so apasakbayan la ed sayan katuaan. Sarayan alimbawa so nagkalalo lan makabaliksan legan tayon tatalaranan so baleg ya agew nen Jehova.
Si Abraham so Walaan na Panmoria nen Jehova
3. Anto so panmoria nen Jehova ed saray manaayam ed Sodoma tan Gomorra?
3 Say primeron alimbawa so mangilalanor ed matoor a patriarkan si Abraham tan say marelmeng iran syudad na Sodoma tan Gomorra. Sanen nadngel nen Jehova so ‘akis nipaakar ed Sodoma tan Gomorra,’ agton tampol dineral iratan a syudad tan amin a manaayam ditan. Saratan so sinuri to nin unona. (Genesis 18:20, 21) Duaran anghel so imbaki ed Sodoma, a nanayam ira ed abung na matunong a toon si Lot. Diad samay labi ya insabi na saray anghel, “saray lalaki ed syudad . . . niliktob da so abung a manliberliber, tobonbalo man tan matatken, amin a katooan,” a pantintindekan da so pigawaan na homoseksualidad ed saray anghel. Malinew, say mauges-uges a kipapasen na saray manaayam ed syudad so mamaneknek a makanepegan itan a naderal. Ingen, inkuan na saray anghel ed si Lot: “Wala ni kakanayon mo ya arum dia? Manugang mo a laki, tan saray lalaki ya anak mo, tan bibii ya anak mo, tan antokaman a kien mo dia ed syudad, ipaway mo ra ed sayan pasen.” Inlukas nen Jehova so pankanawnawa pian niliktar so arum a manaayam ed satan a syudad, balet diad kaunoran et si Lot tan say duaran anak ton bibii lambengat so aliktar ed kadederal.—Genesis 19:4, 5, 12, 16, 23-26.
4, 5. Akin ya akikasi si Abraham nisesengeg ed saray manaayam ed Sodoma, tan kasin mitunosan so panmoria to ed totoo dia ed panmoria nen Jehova?
4 Ompawil tayo natan ed panaon sanen imparungtal nen Jehova so getma ton usisaen iray syudad na Sodoma tan Gomorra. Diad saman et akikasi si Abraham: “Panon ey no wala so limamplo a matunong ed loob na syudad. Deralen mo ta ni so saman a pasen ya agmo palabasen a nisengeg ed saray limamplo a wadman? Arawi pa komon a gawaen mo so ontan, a pipapatey mo so saray matunong ed saray bagel: Arawi komon ed sika, a saray matunong et singa saray bagel. Agta gawaen na Ukom na amin a dalin so maalas?” Amiduan inusar nen Abraham so balikas ya ‘arawi komon ed sika.’ Unong ed eksperiensya to, amta nen Abraham ya ag-ipideral nen Jehova so matunong ed marelmeng. Sanen inkuan nen Jehova ya agto deralen so Sodoma no wala so “limamplon matunong ed syudad,” nantultuloy ya akitawalan si Abraham anggad asabi toy samplora labat.—Genesis 18:22-33.
5 Kasin ikonsidera nen Jehova iray kerew nen Abraham no saratan et misumlangan ed mismon panmoria To? Mapatnag ya andi. Bilang ‘kaaro nen Jehova,’ mapatnag ya amta tan mipara so panmoria nen Abraham ed panmoria nen Jehova. (Santiago 2:23) Sanen impaarap nen Jehova so imano to ed Sodoma tan Gomorra, sikato so mabulos ya angikonsidera ed saray kerew nen Abraham. Akin? Lapud say mangatatawen ya Ama tayo et “agto labay a wala so siopaman a natawtaw noag ingen amin komon nagegemtan da so panagsibkel.”
Midumaan a Tuloy so Panmoria nen Jonas ed Totoo
6. Panon so inkiwas na saray taga-Ninive ed inyabawag nen Jonas?
6 Natan et konsideraen tayo so komaduan alimbawa—nipaakar ed si Jonas. Diad saya et say syudad a niganan naderal et say Ninive. Diad saman et nepeg ya iyabawag nen propetan Jonas a say kaugsan na satan a syudad et ‘akasabi la ed arap nen Jehova.’ (Jonas 1:2) Kabiangan iray kabangibang a lugar na satan, say Ninive et baleg a syudad, a ‘taloy agew ya akaren.’ Sanen tinmulok a siansia si Jonas insan linmoob ed Ninive, oniay intultuloy ton inyabawag: “Apataplo ya agew a manlapu ed natan, et say Ninive nabagbag naani.” Diad satan, “saray totoo a taga-Ninive sinisia ra so Dios; et imbawag da so panayunal, tan nankawes ira na magaspang ya abel.” Anggan say ari na Ninive et nagbabawi.—Jonas 3:1-6.
7. Panon so impanmoria nen Jehova ed magbabawin awawey na saray taga-Ninive?
7 Satan so pirmin midumaan ed inkiwas na Sodoma! Panon so impanmoria nen Jehova ed saray magbabawin taga-Ninive? Oniay inkuan na Jonas 3:10: “Say [tuan] Dios imbabawi to so mauges ya imbaga to nensaman a gawaen komon ed sikara; et agto ginawa.” Say kabaliksan na “imbabawi” nen Jehova et inuman to so pidedeneng to ed saray taga-Ninive lapud nampasimbalo ira. Ag-anguman iray estandarte na Dios, balet inuman nen Jehova so desisyon to diad impakaimaton to ed impagbabawi na saray taga-Ninive.—Malaquias 3:6.
8. Akin a binmeleng si Jonas?
8 Sanen amoria nen Jonas ya agnaderal so Ninive, tinalosan to kasi iray bengatla unong ed panmoria nen Jehova? Andi, lapud oniay nibaga ed sikatayo: “Balet si Jonas apatabang a mapalpalalo, tan apasnokan.” Anto ni so ginawa nen Jonas? Oniay kuan na salaysay: “Nampikasi ed Jehova, et inkuanto, Pikasik ed sika, O Jehova, aliwa ta a saya man so inkuan ko sanen wala ak ni ed dalin ko: Kanian imparaan ko so yakar ko ed Tarsis; ta amtak nensaman a sika so Dios a manamalangkap, tan mapangasi, matantan a manpasnok, mayaman ed maaro ya abig na linawa, tan pagbabawian mo so mauges.” (Jonas 4:1, 2) Amta nen Jonas so nipaakar ed saray kalidad nen Jehova. Balet, diad satan a pankanawnawa et sikatoy mabelbeleng tan midumaan so panmoria to ed panmoria na Dios nipaakar ed saray magbabawin manaayam ed Ninive.
9, 10. (a) Anton leksion so inter nen Jehova ed si Jonas? (b) Akin a nibaga tayo ya inawat met lanlamang nen Jonas so panmoria nen Jehova ed saray taga-Ninive?
9 Si Jonas so tinmaynan ed Ninive, angipaalagey na alolong, tan yinmurong ed silong na satan “angga ed nanengneng to no anto naani so nagawa ed syudad.” Pinatubo nen Jehova so sakey a gebey ta pian mangiter na sirom ed si Jonas. Balet ta diad tinmumbok ya agew et nalnes so tanaman. Sanen inmingongot si Jonas lapud satan, oniay kuan nen Jehova: “Kinawanan mo so gebey . . . Et siak anggapo lagi so panangasik ed Ninive, saman so syudad a baleg a sikato so kawalaan na masulok a sanlasus tan duamplo a libo a totoo ya agda amta so lima ra a kawanan tan lima ra a kawigi; et ontan met ed dakel a bakbaka?” (Jonas 4:5-11) Agaylan leksion parad si Jonas so nipaakar ed panmoria nen Jehova ed totoo!
10 Agla nikurit no anto so inkiwas nen Jonas ed balikas na Dios nipaakar ed pankawanan To ed totoo na Ninive. Ingen ta mapatnag ya inuman na propeta so panmoria to nipaakar ed saray magbabawin taga-Ninive. Ontan so nibaga tayo lapud sikatoy inusar ni nen Jehova a mangikurit ed sayan apuyanan a salaysay.
Dinan ya Awawey so Walad Sikayo?
11. Panon kasin moriaen nen Abraham so totoo a manbibilay natan?
11 Natan, nipapaarap itayo ed sananey a kadederal—salanti say kaderal na kaplesan a marelmeng a sistema na bengabengatla legan na baleg ya agew nen Jehova. (Lucas 17:26-30; Galacia 1:4; 2 Pedro 3:10) Panon kasin moriaen nen Abraham so totoo a manbibilay ed sayan mundo a magano lan naderal? Posiblin sikato so manpaga ed saramay agni akadngel na “ebanghelyo na panarian.” (Mateo 24:14) Aminpigan akikasi si Abraham ed Dios nipaakar ed saramay posiblin matunong a walad Sodoma. Kasin ipapagaan tayon mismo so totoo a mangiwaklit ed saray dalan na sayan mundo a babanlongan nen Satanas no naikdan ira na pankanawnawan magbabawi tan manlingkor ed Dios?—1 Juan 5:19; Apocalipsis 18:2-4.
12. Akin a mainomay so pakawalaan na awawey a singa ed si Jonas nipaakar ed saray totoon lalaen tayo ed ministeryo tayo, tan anto so nagawaan tayo ed saya?
12 Manepeg labat a pirawaten so pangangga na karelmengan. (Habacuc 1:2, 3) Ingen ta main-inomay so pakawalaan na awawey a singa ed si Jonas, ya agmapaga ed pankaabigan na totoo a nayarin magbabawi. Saya so nagkalalo lan tua no makaabet itayon naynay na saray indibidual ya agmangim-imano, masumpa, odino mapasang sano ondalaw itayo ed saray ayaman da a tarok tayo so mensahe na Panarian. Nayarin nibaliwala tayo iramay itipon ni nen Jehova manlapud sayan sistema na bengabengatla. (Roma 2:4) No diad seryoson panusisa tayo ed inkasikatayo et ompatnag a naaalig tayo la, anggan samet labat, so datin awawey nen Jonas nipaakar ed saray taga-Ninive, nayarian tayo so manpikasi pian nitunos so panmoria tayo ed panmoria nen Jehova.
13. Akin a nibaga tayo ya ipapagaan nen Jehova so totoo natan?
13 Si Jehova so mapaga nipaakar ed saramay agni manlilingkor ed sikato, tan dedengelen toray kerew na dedikadon totoo to. (Mateo 10:11) Singa bilang, “ipaakseb to so inkahustisya” bilang ebat ed saray pikakasi ra. (Lucas 18:7, 8, NW) Niarum ni, sumpalen nen Jehova so amin a sipan tan gagala to diad mismon panaon to. (Habacuc 2:3) Laktipen na satan so pangekal ed amin a kaugsan ed sayan dalin, a singa ed impaneral to lanlamang ed Ninive sanen pinmawil ed karelmengan iray manaayam ditan.—Nahum 3:5-7.
14. Anto so nepeg a gawaen tayo legan ya aalagaren tayo so baleg ya agew nen Jehova?
14 Angga’d agni angangga iyan marelmeng a sistema na bengabengatla legan na agew nen Jehova, kasin maanos itayon manaalagar, ya okupadon manggagawa ed linawa to? Agtayo amta iray detalye nipaakar ed laknab ni na nagawaan na panagpulong a kimey sakbay ya onsabi so agew nen Jehova, balet amta tayo a say maong a balita na Panarian so nipulong ed amin a panaayaman a dalin unong ed mismon panlabayan na Dios sakbay ya onsabi so anggaan. Tan maseguron nepeg itayon manpaga nipaakar ed “saray mabli a bengatla” a nitipon ni legan ya itutultuloy a papanoen nen Jehova na gloria so abung to.—Aggeo 2:7.
Say Panmoria Tayo so Napatnagan ed Kiwas Tayo
15. Anto so mamaaralem na apresasyon tayo ed panagpulong a kimey?
15 Nayarin manaayam itayo ed komunidad ya agtanton interesado ed panagpulong tayo tan ag-iyabuloy na sirkumstansya tayo ya onalis ed lugar a babaleg so pankaukolan parad saray manangiyabawag na Panarian. Ipasen pa a samplora so naromog ed teritorya tayo sakbay ya onsabi so anggaan. Kasin liknaen tayo a satan a samplora et makanepegan ya anapen? ‘Inabagey’ nen Jesus iray ulop na totoo “lapud maermen tan abuybuyak ira, a singa saray karnero ya anggapoy pastol da.” (Mateo 9:36) Diad panaral ed Biblia tan maalwar a pambasa ed saray artikulo na Say Panag-Bantayan tan Awake!, makagamor itayo na malalaknab a pakatalos ed mauges a kipapasen na sayan mundo. Bilang resulta, saya so mamaaralem na apresasyon tayo ed pankaukolan ya ipulong so maong a balita. Niarum ni, say maapresyan pangusar ed nibase ed Biblia a materyal ya intarya na “matoor tan makabat ya aripen” so manggawa ed mensahe tayo a lalon makapasagyat ed mabetbet a nakimeyan a teritorya.—Mateo 24:45-47; 2 Timoteo 3:14-17.
16. Panon tayon napabulaslas so inkaepektibo na ministeryo tayo?
16 Say panagpaga tayo ed saramay ondengel ni ed manangiter-bilay a mensahe na Biblia so mamakiwas ed sikatayo a mangikonsidera ed nanduruman oras tan paraan na pitotongtong ed saray unabung diad ministeryo tayo. Kasin naiimano tayo a dakel so andi ed abung no ondalaw itayo? No ontan, nayarian tayon pabulaslasen so inkaepektibo na ministeryo tayo diad panguman-uman ed oras tan pasen a pampupulongan tayo. Saray managsigay so onlan mansigay no walay naalan sira. Sarag tayo met kasin gawaen itan diad espiritual a panagsigay tayo? (Marcos 1:16-18) Akin ta no salien so pampulong ed labi tan diad panamegley na telepono, no satan so aabuloyan na ley? Aromog na arum a saray paradaan, tundaan na saray trak, gasolinaan, tan saray lakoan so mabungan ‘pansigayan.’ Say pakawalaan tayo na singa-Abraham ya awawey ed totoo so ompatnag met sano anamoten tayo iray pankanawnawan manpulong ya impormal.
17. Diad antoran dalan a napaseseg tayo iray misionaryo tan arum nin manseserbi ed arum a bansa?
17 Minilyon so agni akadngel ed mensahe na Panarian. Niarum ni ed panagpulong tayo, kasin nipapanengneng tayo so panagpaga ed saratan a totoo anggaman wala itayo labat ed ayaman tayo? Bueno, wala kasi iray kabat tayon misionaryo odino sigpot-panaon a ministro a manseserbi ed arum a bansa? No wala, nayarin maabig so pansulat ed sikara ya ibalikas tayo so apresasyon tayo ed kimey da. Panon itan a mangipatnag na panagpaga ed totoo diad inkalapagan? Saray sulat tayon walaan na panamaseseg tan komendasyon so mamabiskeg ed saray misionaryo a mansiansia ed asainmin da, kanian makatulong ni ira ed dakel nin totoo ya onggamor na pikakabat ed katuaan. (Uko-ukom 11:40) Nayarian tayo met ya ipikasi iray misionaryo pati saramay naeerasan ed katuaan a walad arum a daldalin. (Efeso 6:18-20) Say sananey nin dalan pian nipanengneng tayo so panagpaga et diad pandonasyon ed sankamundoan a kimey na saray Tasi nen Jehova.—2 Corinto 8:13, 14; 9:6, 7.
Nayarian Yo Kasi so Onalis?
18. Anto so ginawa na pigaran Kristiano pian iyalibansa so intereses na Panarian diad bansa a panaayaman da?
18 Saramay inmalis ed saray lugar a babaleg so pankaukolan parad saray manangiyabawag na Panarian so atumangan lapud masakripisyon sagpot da. Balet, anggaman mansiasiansia ira ed bansa ra, arum a Tasi nen Jehova so nanaral na sananey a lenguahe pian natulongan iray sankaili diad espiritual a paraan. Talagan makapatumang iratan a sagpot. Alimbawa, pitoran Tastasi ya ontutulong ed saray Tsino diad sakey syudad ed Texas, E.U.A., so angabrasa na 114 ya indibidual diad selebrasyon na Pangdem na Katawan nen 2001. Amoria na saramay ontutulong ed saratan a grupo ya akaparaan lan anien iray uma ra.—Mateo 9:37, 38.
19. Anto so manepeg a gawaen no mannononot kayon onalis ed arum a bansa pian ontulong ed kimey na panangipulong ed Panarian diman?
19 Nayarin naisip yon sankapamilyaan a sarag yoy onalis ed pasen a babaleg so pankaukolan parad saray manangipulong na Panarian. Siempre, makabat so ‘onyurong nin unona tan bilangen so bili.’ (Lucas 14:28) Nagkalalo lan tua itan sano say sakey a too et manplaplanon onalis ed arum a bansa. Siopaman a mannononot ed satan a posibilidad so nepeg a mangitepet ed saraya diad sikaton mismo: ‘Sarag ko kasin legpeten so pamilyak? Makala ak kasi na matukoy a visa? Kasin mansasalita ak na lenguahe na satan a bansa, odino mabulos ak a manaral ed satan? Kasin inisip ko la so nipaakar ed klima tan kultura? Nayarian ko kasin talaga so magmaliw a “makapabiskeg a tulong” tan aliwan pabelat ed saray kapananisiaan ed satan a bansa?’ (Colosas 4:10, 11, NW) Pian naamtaan yo no kaunongan so pankaukolan ed sakey a bansa a nononoten yon alisan, lawas matukoy so pansulat ed sangan opisina na saray Tasi nen Jehova a mangaasikaso ed panagpulong a kimey ed satan a lugar.a
20. Panon so impangisekar na sakey a kalangweran a Kristiano pian nagunggonaan iray kaparan mananisia tan saray arum ni diad arum a bansa?
20 Naamtaan na sakey a Kristiano a kabiangan ed panagpaalagey na saray Kingdom Hall diad Hapon a nakaukolan iray eksperiensyadon komikimey a mangipaalagey na sakey a pasen na pandayewan diad Paraguay. Lapud balolaki ni tan mabiskeg, sikato so inmalis ed satan a bansa tan nankimey diman a waloy bulan bilang alenleneg a sigpot-panaon a komikimey ed proyekto. Legan na impansiansia to diman, naaralan to so man-Español tan angikondukta na saray panangiyaral ed Biblia. Amoria to so pankaukolan ed saray manangiyabawag na Panarian ed satan a bansa. Anggaman sikato so pinmawil ed Hapon, sikato so pinmawil lanlamang ed Paraguay tan tinmulong a mangitipon na totoo diad satan a mismon Kingdom Hall.
21. Anto so nepeg a manunan pampagaan tan punto de bista tayo legan tayon tatalaranan so baleg ya agew nen Jehova?
21 Seguroen na Dios a say panagpulong a kimey so sigpot a nasumpal, unong ed linawa to. Natan, papepelesen to la so kaunoran ya espiritual a panag-ani. (Isaias 60:22) Legan na pantatalaran tayo sirin ed agew nen Jehova, maseseg itayon mibiang ed panag-anin kimey tan moriaen so totoo unong ed panmoria ed sikara na maaron Dios tayo.
Kasin Natandaan Yo?
• Legan tayon tatalaranan so agew nen Jehova, panon so nepeg tayon panmoria ed totoo?
• Anto so panmoria nen Abraham ed saray matunong a nayarin manaayam ed Sodoma?
• Panon so impanmoria nen Jonas ed magbabawin totoo diad Ninive?
• Panon tayon nipatnag a mipara so panmoria tayo ed panmoria nen Jehova ed totoo ya agni akadngel ed maong a balita?
[Paimano ed Leksab]
a Aglawas makatulong no onalis kayo ed sakey a bansa a sebel odino apegetan so panagpulong a kimey. Say panggawa ed satan so nayarin mangipeligro ni ingen ed saray manangipalapag na Panarian a maalwar a mankikimey ed ontan iran kipapasen.
[Litrato ed pahina 16]
Minoria nen Abraham so totoo unong ed panmoria nen Jehova
[Litrato ed pahina 17]
Si Jonas so awalaan a siansia na panmoria nen Jehova ed saray magbabawin taga-Ninive
[Saray litrato ed pahina 18]
Say panagpaga ed totoo so mamakiwas ed sikatayon mangikonsidera ed nanduruman oras tan paraan ed panangipulong ed maong a balita