Kimey a Susuportaan na Dios
1 Diad limog na saray lingkor na Dios natan, matalag so walaan na atagey ya aral, kayamanan, odino inkabantog diad peles a sistema na bengabengatla. Lapud satan, ipapasen na arum a totoo ya andiay kakanaan so ministeryo tayo. (Isa. 53:3) Anggaman ontan, say gagawaen tayon kimey a panagbangat na Biblia so nanligliwa tan angiter na ilalo ed minilyon a totoo ed interon mundo. Panon ya adampot na ordinaryon totoo iratan a makatantandan agawaan? Dia lambengat ed tulong na Dios. (Mat. 28:19, 20; Gawa 1:8) “Pinili [na Dios] so saray bengatla a makapuy na mundo, [pian] onkana a pamabaing to ed saray bengatla a mabiskeg,” so impaliwawa nen apostol Pablo.—1 Cor. 1:26-29.
2 Maslak ed saray apostol tan Kristiano nen inmunan siglo so “andi-aral tan kabanyakan.” (Gawa 4:13) Balet, makpel dan sinumpal so ingganggan ed sikara a pangipulong na maong a balita, kanian benendisyonan nen Jehova so impansagpot da. Anggaman walaray babeng tan isusumpa, say ‘salita na Katawan so binmaleg tan tinmalona.’ Anggapo so akapatunda ed kimey lapud satan so sinuportaan na Dios. (Gawa 5:38, 39; 19:20) Mipadpara met itan ed modernon panaon. Anggan say pirmin isusumpa na saray makapanyarin manuley et agmakapatunda ed itatalona tan ibubulaslas na maong a balita.—Isa. 54:17.
3 Iter so Amin a Dayew ed Dios: Kasin walay kanepegan tayo a manlastog lapud apaboran a posisyon tayo bilang ministros na Dios? Anggapon balot. Diad panutukoy to ed Kristianon ministeryo, oniay insulat nen Pablo: “Wala so sayan kayarian tayo ed baso a pitek, pian say sankatageyan ya inkabaleg na pakayari kien komon na Dios, ya agmanlapu ed sikatayo.” (2 Cor. 4:7) Binidbir nen Pablo ya ayarian ton asumpal so ministeryo to lapu lambengat ed biskeg ya inter na Dios ed sikato.—Efe. 6:19, 20; Fil. 4:13.
4 Bibidbiren tayo met a lapu lambengat ed “agamoran [tayon] tulong na Dios,” a nasusumpal so panagpulong a kimey. (Gawa 26:22) Diad sayan sankamundoan a panangiyabawag, uusaren itayo nen Jehova diad makatantandan paraan pian ipasabi ed amin a nasyones so sakey a makapagiwgiw a pasakbay nipaakar ed makadesyang a panangukom a magano lan nagawa. (Ag. 2:7) Agaylan pribilehyo tayo so pagmaliw a “kakimeyan na Dios” diad engranden espiritual a panag-ani!—1 Cor. 3:6-9.