Bayuboan so Interes Panamegley na Rota na Magasin

1. Panon tayon nausar so rota na magasin pian nabayuboan so interes na too?

¹ Maslak ed totoon naaabet tayo ed ministeryo so mangabrasa tan maliket a mangawat na literatura tayo balet ta masuyat iran paiyaralan na Biblia a regular. Sakey lan paraan pian nabayuboan so interes da et diad panamegley na rota na magasin. Sano makapangipalima kayo na saray magasin, isulat so ngaran tan address na too, say petsa na indalaw, saray isyun nitilak, tan say tekston asingbat, laktip lay antokaman a naimano yon pakapatnagan na saray interes na too. Insan, diad kada onsabin isyu na magasin, anapen iray punton makapainteres ed saramay rota yo, tan iparungtal iratan diad idalaw yo. (1 Cor. 9:19-23) Nasabi panaon, lapud bengatlan abasa ra ed dyurnal tayo et nayarin nasagyat so interes da tan manpilalek la ran mangamta ni na dakel.

2. Akin a pankaganatan la natan ya anapen na saray totoo si Jehova, tan anto ni nagawaan tayo pian natulongan ira?

² Anggaman kuan, bibidbiren tayo a maslak a totoo et agmagmaliw a lingkor nen Jehova diad pambasa ra labat a bukor ed saray magasin. Lapud pankaganatan la natan ya anapen na saray totoo si Jehova, anto ni nagawaan tayo pian natulongan ira? (Sof. 2:2, 3; Apo. 14:6, 7) Nabayuboan tayo so interes da diad panginabang ed sikara na pinilin maong a teksto kada iter tayo iray magasin.

3. (a) Panon itayon makapanparaan na manggegendanan a pangitongtong na sakey a teksto? (b) Antoran tema so paninteresan a maong na saray totoo ed teritorya yo?

³ Mangitongtong na Sakey a Teksto: Nonoten pa so kipapasen na saray rota yo na magasin, insan manparaan na manggegendanan a pangitongtong na sakey a teksto parad espisipikon pankaukolan na balang sakey. (Fil. 2:4) Alimbawa, no walay agano nin inateyan, nayarian yon pawilen a maminpiga pian kalkalnan itongtong so ibabaga na Biblia nipaakar ed kipapasen na inaatey tan ed ilalon kikioli. Say materyal ed libron Reasoning ed silong na saray manunan paulo a “Death” tan “Resurrection” so nausar pian niparaan irayan pangitongtong na sakey a teksto. Nayarin tuloy-tuloy la’d satan a nasingbat iray misiglaotan a tema, a singa say no panon a sigpot a naandi so sakit, itatakken, tan ipapatey. Say kalat et mananap na tema a paninteresan na too tan progresibon ibangat ed sikato so ibabaga na Biblia nipaakar ed satan.

4. Akin ya importante a tulongan tayo so arum a mantalos sano manguusar itayo na Kasulatan, tan panon tayon nagawaan itan?

⁴ Tulongan Iran Mantalos: Anggaman mabetbet lan maabig no simpli tan antikey labat so paningbat, aliwan magenap so pambasa labat ed apilin teksto. Binulag nen Satanas so kanonotan na totoo ed maong a balita. (2 Cor. 4:3, 4) Anggan saramay pamilyar la’d Biblia so mankaukolan na tulong pian natalosan da itan. (Gawa 8:30, 31) Kanian, mangigana na panaon pian ipaliwawa tan iyilustra so teksto, a singa gawaen yo no walay parte yo ed Teokratikon Eskuelaan Parad Ministeryo. (Gawa 17:3) Seguroen a natetebek na too so praktikal a kakanaan na Salitay Dios ed mismon bilay to.

5. Panon a magmaliw ya iyaralan na Biblia so rota yo na magasin?

⁵ No naliliketan so too ed naaaralan to, kalkalnan parukeyen so pantotongtong a mangusar lay duara odino talora a teksto ed Biblia kada idalaw. Iyanap yoy pakapangiparungtal ed brosyur a Kakaukolanen odino libron Pikakabat. Diad onia, say rota yo na magasin so magmaliw lan iyaaralay Biblia diad saginonor.

No Anto so Ibaga Nipaakar ed Saray Magasin

Say Panag-Bantayan Mayo 15

“Diad padesir yo, makapambilay itayo ni kasi ed sakey a mundon anggapoy kairapay-bilay? [Abuloyan ya onebat.] Imano yo so isisipan na Dios. [Basaen so Isaias 65:21.] Sisingbaten na sayan isyu na Say Panag-Bantayan no panon ya ontua iyan sipan.” Iyuksoy so ipawil pian ebatan so tepet a: Kapigan so kagawa na sayan nisipan a pananguman?

Awake! Mayo 22

“Narerengelan la na maslak a totoo ya importante so pan-ehersisyo pian mabunigas itayo, ingen amayamay so mangaaksobin ag-ira tanto man-eehersisyo. Agta ontan? [Abuloyan ya onebat.] Uusisaen na sayan magasin iray gunggona na regular a pan-ehersisyo tan mangisusuheri na pigaran paraan pian nipanaon itan ed okupadon bilay tayo.”

Say Panag-Bantayan Hun. 1

“Anggaman pantotongtongan na amin lawari so kareenan, agmet talagan mankakasakey so katooan. Antoy padesir yo, kugkugip labat kasi so pakagamor ed satan? [Abuloyan ya onebat.] Ipapaimano na sayan magasin so gobierno a makapankasakey ed katooan.” Basaen so Salmo 72:7, 8, tan iyuksoy so ipawil pian itongtong no panon iyan nagawa.

Awake! Hun. 8

“Naiimano yo ta a dakel a totoo so napapagaan ed idarakel na nakakanser ed baog? [Abuloyan ya onebat.] Uusisaen na sayan isyu na Awake! no akin a nayarin mas napepeligro itayo natan tan no antoy nagawaan tayo pian naprotektaan so inkasikatayo.” Sampotan diad pangibasa ed makaligliwan sipan ed Job 33:25.