Parte 6​—Pangikondukta na Progresibo Iran Panangiyaral na Biblia

Sano Walay Tepet na Iyaaralan

¹ Bektaman a niletneg lan maong so panangiyaral na Biblia, kaslakan et sankaabigan lan aralen a maalutor iray bangat na Biblia imbes ya onlukso-lukso ed nanduruman tema. Ontulong iya ed iyaaralan a niletneg to so pundasyon parad suston pikakabat tan pian onaligwas ed espiritual. (Col. 1:9, 10) Balet ta mabetbet a walaray itetepet na saray iyaaralan nipaakar ed nanduruman tema legan na panagaral. Panon tayo kasin asikasoen iraya?

² Usaren so Pakatebek: Mabetbet a nayari lan ebatan a tampol iray tepet a mikonektaan ed aaralen a materyal. No bilang ta say tepet et nasingbat ed saginonor na materyal ya aaralen, nayarin magenap labat lan saglawien itan ed sikato. Balet no say tepet et agmikonektaan ed aaralen a materyal odino mankaukolan na pansukimat pian naebatan na susto, nayarin magmaong no singbaten itan kasumpal na panagaral odino diad arum lan panaon. Nalmoan na arum a say pangisulat ed tepet so mangipaseguro ed iyaaralan ya ag-ibabaliwala so tepet to tan makatulong met itan pian napaliisan so pakaarawi ed aaralen a tema.

³ Dakel a bangat na Biblia so antikey labat ya asingbat ed saray uusaren tayon publikasyon parad panangiyaral. Panon to balet no naiirapan so iyaaralan a mangawat ed sakey a bangat odino nigalet ed sakey a palson sisiaen? Makatulong so pangonsidera na kaaruman a materyal a sigpot a manisingbat ed no antoy ibabaga na Biblia ed satan a tema. No agnin siansia akombinse so iyaaralan, dia la’d arum a panaon itan pantongtongan tan ituloy so regular a panangiyaral ed sikato. (Juan 16:12) Legan ya onlalaknab so pikakabat to ed Biblia tan onaaligwas so espiritualidad to, nayarin natalosan to la itan a bangat na Biblia.

⁴ Magmaliw a Mapaabeba: No agka segurado ed ebat na nitepet, paliisan so palpalaran a pangiter na opinyon. (2 Tim. 2:15; 1 Ped. 4:11) Ipaliwawam a mansukimat ka nipaakar ed satan insan mo ebatan ed ontumbok. Nayarian mo ni ingen ya anamoten itan a pankanawnawa pian ibangat so iyaaralan no panon so mansukimat. Sandaraiset ya ibangat ed sikato no panon ya usaren iray nanduruman katulongan ed panagsukimat ya intarya na organisasyon nen Jehova. Diad ontan et naebatan to lan bukor ed saginonor iray tepet ton mismo.​—Gawa 17:11.

Tulongan Iran Makaawat na Kaaruman a Panagtasi

¹ Diad pangipupulong tayoy maong a balita, mabetbet a walaray totoon nakakatongtong tayo a manaayam ed agla sakop na teritorya tayo odino duma’y lenguahe ra, a laktip lay sign language. Arum met a mabetbet tayo lan nakakatongtong nipaakar ed Biblia so nayarin onalis manlapud teritorya tayo. Panon tayon niyuksoy so pakaawat da na kaaruman a panagtasi? Diad pangusar tayo na Please Follow Up (S-43) a porma.

² Kaslakan et mas ondengel iray totoo ed maong a balita sano ipresenta itan ed sikara ed dili ran lenguahe. (Gawa 22:1, 2) Lapud saya, kaslakan et kaukolan tayon sulatan so porma sano walay akatongtong tayon sananey so lenguahe to, anggan agto angipatnag na interes ed mensahe na Panarian. Balet, no baleg so populasyon a manguusar na lenguahe ed arum a bansa a regular lan napupulongan ed dili ran lenguahe, anggan agla sulatan so porma likud labat no interesado so too.

³ Pansulat ed Porma: Panggunaetan ya alaen so ngaran, address, tan numero na telepono na too ed mataktikan paraan. Isulat met no kaunongan kainteresado so too, no kapigan so pakadalaw ed sikato, no antoy literaturan nipalima odino inorder to, tan say lenguahen natalosan ton maong. Sano akompleto lan asulatan so porma, iter itan a tampol ed sekretaryo pian nipawit to ed matukoy a kongregasyon odino grupo.

⁴ Pangipawit ed Porma: No ag-amta na sekretaryo no dinan a kongregasyon odino grupo so nepeg a pangipawitan ed porma odino anggapo’d sikato so address a napangipawitan, nayarin ipawit to itan ed sangan opisina pian nipawit met ed manepeg a kongregasyon odino grupo.

⁵ Sano makaawat so sakey a kongregasyon odino grupo na asulatan a Please Follow Up a porma, nepeg ya iyuksoy so idalaw a tampol ed too. Legan a maseet tayon susumpalen so nabebetangan tayo, makapanmatalek itayo a lukasan nen Jehova so kapusoan na saramay “suston nikiling ed andi-anggaan a bilay.”​—Gawa 13:48, NW.