“Ipatnag Yon Misalsalamat Kayo”
1 Sanen pinaabig nen Jesus so samploran akating, saksakey so pinmawil pian misalamat. Intepet nen Jesus: “Aliwa ta’n samplora so alinisan? Balet iner sirin so kawalaan day siamera?” (Luc. 17:11-19) Agaylan importante so pagmaliw tayon maapresya tan misalsalamat ed amin a maabig a langkap tan naspot a regalo ya inter ed sikatayo na mabunlok tan maaron Ama tayo ed tawen a si Jehova a Dios!—Col. 3:15, NW; Sant. 1:17.
2 Antoray pigaran bengatla a pisalamatan tayo? Misalsalamat itayo ed dondon, say sankaabigan a regalo na Dios ed katooan. (Juan 3:16) Misalsalamat itayo met ed si Jehova ed pangiyaasingger to’d sikatayo ed si Jesus. (Juan 6:44) Say pankakasakey tayo bilang Kristiano et sananey nin rason a pisalamatan tayo. (Sal. 133:1-3) Seguradon nanonotan yo iray arum nin dakel a regalo nen Jehova. Agtayon balot labay so magmaliw a singa saray agmaapresyan Israelita ya akalingwan ed saray ginawa nen Jehova ed sikara!—Sal. 106:12, 13.
3 Ipatnag so Pisasalamat: Anggaman nayarin inapresya na amin a samploran akating so ginawa nen Jesus ed sikara, saksakey so angipatnag na pisasalamat. (Luc. 17:15) Ontan met, ipapatnag tayoy apresasyon tayo diad maseseg a pibibiang tayo ed ministeryo. No talagan misalsalamat itayo ed amin a ginawa na maaron mangatatawen ya Ama tayo, napakiwas so kapusoan tayon mangalig ed inkamaaro tan inkabunlok to diad pangipakabat ed arum nipaakar ed sikato. (Luc. 6:45) Bilang resulta, legan tayon ibabaga ed arum so nipaakar ed ‘makapakelkelaw a gawagawa tan nonot nen [Jehova] ed sikatayo,’ onaralem so panangaro tan panamabli tayo ed sikato.—Sal. 40:5.
4 Ipaslep so Apresasyon ed Arum: Kaukolan ya alisto itayon ontulong ed ananak tayo tan ed saray iyaaralan tayo na Biblia pian nabayuboan da so apresasyon. Dakel so pankanawnawa na atateng a nagawaan iya, say sakey et sano itotongtong da ed ananak da iray palsa nen Jehova. (Roma 1:20) Sano mangiyaaral na Biblia, nayarin tepetan tayoy iyaaralan tayo: “Anto so ibabaga na saya ed sikatayo nipaakar ed personalidad nen Jehova?” Legan ya ombabaleg so apresasyon na iyaaralan tayo, ombaleg met so panangaro to ed Dios tan ed determinasyon ton mamaliket ed sikato.
5 Legan na sarayan unor ya agew, dakel so agmaapresya tan agmisasalamat. (2 Tim. 3:1, 2) Seguradon makapaliket ed si Jehova so pakanengneng ed saray masimoon a lingkor to a mangipapatnag na pisasalamat diad maseseg a pibibiang da ed ministeryo!—Sant. 1:22-25.