Panagdalepdep tan Pikakasi—Kaukolan Pian Maseseg ed Ministeryo
1. Antoy tinmulong ed si Jesus pian agnaamper ed manunan kimey to?
1 Sanlabin nampaabig si Jesus na saray mansasakit tan nampapaway na saray demonyo. Kaimbuasan, sikatoy inanap na saray disipulo to tan imbaga ra’d sikato ya: “Aanapen kay amin a totoo,” ya labay dan ituloy toy panmimilagro to. Balet ag-inabuloyan nen Jesus ya walay makaamper ed pangipupulong to’d maong a balita, ta satan so manunan kimey to. Oniay ebat to: “Onla itayo ed arum a pasen, diad asingger iran balbaley, pian makapanpulong ak met diman, ta saya so gagala na inyakar ko dia.” Antoy tinmulong ed si Jesus pian mansiansian akapokus ed sayan kimey? Diad saman et sikatoy binmangon a kabkabuasan pian manpikasi tan mandalepdep. (Mar. 1:32-39) Panon ya ontulong so panagdalepdep tan pikakasi pian maseseg tayo met ed ministeryo?
2. Antoray dalepdepen tayo pian mansiansia tayon maseseg ed ministeryo?
2 Antoy Dalepdepen? Naimano nen Jesus ya saray totoo et “singa ra kinatatan tan pinaulyanan a karnero ya andian na managpastol.” (Mat. 9:36) Singa si Jesus, nonoten tayon kakkaukolan na totoo ya naamtaan so maong a balita. Nonoten tayo met ya apatikeyan lay nakekeraan ya panaon. (1 Cor. 7:29) Dalepdepen tayo ray kimey tan kualidad nen Jehova, say pribilehyo tayon magmaliw ya Tasi nen Jehova, tan say mabli ran espiritual ya kayamanan ya naaralan tayo ed Salitay Dios ya agni amta na totoo diad teritorya tayo.—Sal. 77:11-13; Isa. 43:10-12; Mat. 13:52.
3. Kapigan itayo nayarin mandalepdep?
3 Kapigan Mandalepdep? Singa si Jesus, walaray ombabangon a masakbay legan ya mareen so kaliberliber. Say arum balet et mas labay day mandalepdep diad labi antis iran onugip. (Gen. 24:63) Anggano busy itayo, ipanaon tayoy panagdalepdep. Gagawaen itan na arum legan dan manbiabiahe. Mandadalepdep met so arum legay lunch break. Naimano met na dakel ya no mandalepdep ira anggan magano labat antis iran onlan manpulong, ontulong itan pian mas maseseg tan makpel ira’d ministeryo.
4. Akin et nepeg itayon mandalepdep?
4 Say panagdalepdep ya atekepay pikakasi et ontulong pian ombiskeg so pilalek tayon lingkoran si Jehova, niyuna tayoy panagdayew diad bilay tayo, tan mas determinado itayon mantultuloy a manpulong. Si Jesus, say Manunan Ministro na Dios, et agunggonaan ed panagdalepdep, tan nagunggonaan tayo met.