Propesiya nen Isaias​—Liwawa Parad Amin a Katooan II

Kapitulo Dos

Makaligliwa a Mapropetiko Iran Salita a Mangilalanor ed Sika

Isaias 41:1-29

1. Akin a nepeg ya interesado itayo ed propesiya nen Isaias?

INSULAT nen Isaias so libro a ningaran ed sikato ngalngali 3,000 taon lay apalabas, balet satan so walaan na peteg a kakanaan ed sikatayo natan. Makaaral itayo na makana iran prinsipyo manlapud saray ebento ed awaran ya inkurit to. Tan napabiskeg tayo so pananisia tayo panamegley na panaral ed saray propesiya ya insulat to diad ngaran nen Jehova. On, si Isaias so propeta na mabilay a Dios. Sikatoy pinuyanan nen Jehova ya ikurit lan masakbay so awaran​—pian deskribien iray ebento antis a nagawa iratan. Diad ontan et impatnag nen Jehova a sarag ton ipasakbay tan determinaen so nagawa ed arapen. Kayarin inaral so libro na Isaias, kombinsido iray tuan Kristiano a sumpalen nen Jehova so amin ya insipan to.

2. Anto so kipapasen ed Jerusalem sanen inkurit nen Isaias so mapropetikon libro to, tan anto so nagawan pananguman?

² Sanen akompleto nen Isaias ya insulat so propesiya to, say Jerusalem so alegyas la ed panesesga na Asiryano. Manalalagey nin siansia so templo, tan mantutultuloy ni iray totoo ed inagew-agew iran kapagaan a singa gagawaen da ed loob na nilasus lan taon. Balet, satan a kipapasen so manguman. Nasabi panaon et awiten so kayamanan na saray Judion arari ed Babilonia tan saray kalangweran a Judio so magmaliw ya opisyales ed korte na satan a syudad.a (Isaias 39:6-7) Saya so nagawa kayari na masulok a 100 taon ed saginonor.​—2 Arari 24:12-17; Daniel 1:19.

3. Anton mensahe so naromog ed Isaias kapitulo 41?

³ Anggaman ontan, say mensahe nen Jehova panamegley nen Isaias et aliwa labat lan mensahe na panangukom. Say kapitulo 40 na libro to so ginmapo ed salitan “Ligliwaen.”b Saray Judio so naligliwa diad impamaseguron sikara odino saray ananak da so makapawil ed nianakan dan dalin. Intultuloy na kapitulo 41 itan a makaligliwan mensahe tan impasakbay na satan a patalindegen nen Jehova so sakey a makapanyarin ari a manumpal ed linawa To. Lugan na satan iray panamaseguro tan mangiiter na panamaseseg a manmatalek ed Dios. Iwawalwal met na satan ya andian na pakayari so palson dirios a panmamatalkan na saray totoo ed nasyones. Diad sayan amin et napabiskeg a tuloy so pananisia, na namparan diad panaon nen Isaias tan ed panaon tayo.

Aangaten nen Jehova so Nasyones

4. Tekep na antoran salita ya aangaten nen Jehova so nasyones?

⁴ Oniay inkuan nen Jehova panamegley na propeta to: “Agkayo onesel ed arap ko, O pulpulo; et saray totoo pasimbaloen da komon so saray biskeg da; onasingger ira komon; saman la ra mansalita; onasingger itayo komon a manuulop ed kaukom.” (Isaias 41:1) Diad sarayan salita et aangaten nen Jehova so nasyones ya onsusumpa ed totoo to. Paulyan iran onalagey ed arap to tan manpakpel a mansalita! Singa nanengneng ed saginonor, si Jehova et singa sakey ya ukom ed korte a mangiganggan ed sarayan nasyon a mamaneknek no kasin saray talintao ra so peteg a dirios. Kasin nipasakbay na sarayan dirios iray gawaen a panangiliktar ed saray managdayew da odino saray panangukom sumpad kakabusol da? No ontan, kasin sarag dan sumpalen iratan a propesiya? Say ebat et andi. Si Jehova lambengat so makapanggawa ed saratan a bengatla.

5. Ipaliwawa no panon a saray propesiya nen Isaias so walaan na masulok nen sakey a kasumpalan.

⁵ Legan a kokonsideraen tayo so propesiya nen Isaias, nonoten tayo a saray salita to so walaan na mas nen sakey a kasumpalan, a singa ed dakel a propesiya ed Biblia. Diad 607 K.K.P., say Juda so idestiero ed Babilonia. Balet, ipaparungtal na propesiya nen Isaias ya iliktar nen Jehova iray Israelitan akautibo diman. Saya so agawa nen 537 K.K.P. Satan ya inkibulos so walaan na kasimbangan diad gapo na koma-20 siglo. Legan na inmunan guerra mundial, saray alanaan a lingkor nen Jehova diad dalin so anagmak na peryodo na kairapan. Nen 1918, say desdes manlapud mundo nen Satanas, ya insugsog na Kakristianoan bilang manunan kabiangan na Babilonia a Baleg, so amatunda lawari ed naorganisan panagpulong na maong a balita. (Apocalipsis 11:5-10) Arum ed saray responsablin opisyal na Watch Tower Society so impriso lapud palson impamakasalanan. Ompatnag a singano analo so mundo diad pibabakal na satan ed saray lingkor na Dios. Insan, singa agawa nen 537 K.K.P., si Jehova so ag-inilaloan ya angibulos ed sikara. Nen 1919 saray aprison opisyal so imbulos, tan diad saginonor et insener iray akusasyon sumpad sikara. Say kombension diad Cedar Point, Ohio, nen Setyembre 1919 so amabiskeg lamet ed saray lingkor nen Jehova pian ituloy so panagpulong a kimey na maong a balita na Panarian. (Apocalipsis 11:11, 12) Manlapu la’d saman anggad natan, makatantanda so inlaknab na nasasakopan na satan a panagpulong a kimey. Niarum ni, dakel ed saray salita nen Isaias so walaan na makapalikliket a kasumpalan diad Paraison dalin ya onsabi. Mapatnag, saray salita nen Isaias nensaman so mangilalanor ed amin a nasyon tan totoo natan.

Tinawag so Manangiliktar

6. Panon a deneskribe na propeta so onsasabin konkestador?

⁶ Panamegley nen Isaias, impasakbay nen Jehova so sakey a konkestador a mangiliktar ed totoo na Dios manlapud Babilonia tan mangukom ed kakabusol da. Intepet nen Jehova: “Siopa so amaalagey na sakey a nanlapu ed bukig, a sikato so tawagen to dia ed katunongan ed sali to? Sikato yawa’to so saray nasyon ed arap to, ta sikato so gawaen to a manuley ed saray arari; iter to ra ed kampilan to a singa dabok, tan singa nitekkiab a dayami ed bekang to. Sikato usilan to ra, tan onlabas ya agnaano, anggan ed sakey ni a dalan ya agni dinalan na saray sali to. Siopa so nanggawa tan anumpal na saya, a tawagen to so saray kailalakan a manlapu ed gapo? Siak, a Jehova, say unona tan naunor, Siak iman.”​—Isaias 41:2-4.

7. Siopa so onsasabin konkestador, tan anto so sumpalen to?

⁷ Siopa so patalindegen manlapud bubutayan na banwa, manlapud saray banda’d bukig? Saray bansan Medo-Persia tan Elam so walad bukig na Babilonia. Manlapud man et manmartsa si Persianon Ciro, kaiba iray mabiskeg ya armada to. (Isaias 41:25; 44:28; 45:1-4, 13; 46:11) Anggaman aglingkor nen Jehova si Ciro, sikatoy onkiwas unong ed linawa nen Jehova, say matunong a Dios. Si Ciro so mangubkob ed arari, tan nabuybuyak iraya a singa dabok ed arap to. Diad pangokonkesta to, sikatoy ondalan ya “agnaano,” odino maligen, diad saray basbas ya agdatin dadalanan, a talonaan to so amin a babeng. Diad taon 539 K.K.P., asabi nen Ciro so mabiskeg a syudad na Babilonia tan inggeba to itan. Bilang resulta, nibulos iray totoo na Dios pian makapawil ira ed Jerusalem a mangiletneg lamet na puron panagdayew.​—Esdras 1:1-7.c

8. Si Jehova lambengat so makagawa na anto?

⁸ Kanian, panamegley nen Isaias, impasakbay la nen Jehova so italindeg nen Ciro antis nin nianak itan ya ari. Say tuan Dios lambengat so suston makapangipasakbay na ontan a bengatla. Anggapoy kapara nen Jehova diad limog na saray palson dirios na nasyones. Tekep na maabig a rason, inkuan nen Jehova: “Say gloriak agko naani iter ed sananey.” Si Jehova lambengat so makanepegan a mangibagan: “Siak so inmuna tan say kaunoran; et anggapo la so arum a Dios noag siak.”​—Isaias 42:8; 44:6, 7.

Manmamatalek ed Saray TalintaoIray Ataktakot a Totoo

9-11. Panon so inkiwas na nasyones ed iyaabanti nen Ciro?

⁹ Deneskribe natan nen Isaias so reaksion na nasyones ed sayan onsasabin konkestador: “Saray pulpulo anengneng da, tan antakot ira; saray sampot na dalin onggiwgiw ira; onasingger ira, tan onsabi ra. Sikara nantutulongan ira a balang sakey ed kaabay to; et say balang sakey kuan to ed agi to, Manpabiskeg ka a maong. Ontan met so anluwagi pakulien na panday-balitok, tan say mamalanas ed babatla pakulien to [so] samay mamitpit ed papasnaan, a kuan to ed manpapainang, Sikato so maong; et impasak to, pian sikato so agnatenyeg.”​—Isaias 41:5-7.

¹⁰ Legan ya iimanoen nen Jehova so manga 200 a taon ed arapen, uusisaen to so eksena diad mundo. Saray mabiskeg ya armada ya idadaulo nen Ciro so maples ya onaabanti, a mangukubkob ed amin a sumpa. Saray totoo​—anggan saray manaayam ed saray isla, saramay walad arawdawin pasen​—so onggiwgiw ed isabi to. Lapud takot, sikaray nankasakey pian sumpaen so sakey a tinawag nen Jehova manlapud bukig a mangipaakseb na panangukom. Sasalien dan pasesegen so balang sakey, diad pangibabagan: “Manpabiskeg ka a maong.”

¹¹ Saray anluwagi so naniiban mankikimey pian mamorma na talintaon dirios a mangiliktar ed totoo. Pinorma na karpentero so tablan kuadro, insan to papasesegen so managpanday na balitok ya uklopan itan na metal, a nayarin balitok. Say iskultor so mamipitpit ed apalanas a metal tan onaabobon ed pan-inang. Nayarin satan so leleglemewen kanian binitla so pangipasak pian ag-ontongtongging odino agnapatnagan a makapuy, a singa ed agawa ed talintaon Dagon ya abalintuwag diad arap na kaban nen Jehova.​—1 Samuel 5:4.

Ag-ontatakot!

12. Anto so impaseguro nen Jehova ed Israel?

¹² Natan et inimano nen Jehova so totoo to. Aliwan singa saramay manmamatalek ed andiay-bilay a talintao, saramay manmamatalek ed tuan Dios so agbalot kaukolan ya ontakot. Ginmapo a mamapaseguro si Jehova diad impangipanonot a say Israel et ilalak na kaaro ton Abraham. Diad balikas a walaay pirmin inkatamoy, impakabat nen Isaias iray salita nen Jehova: “Sika, Israel, ya aripen ko, Jacob a pinilik, bini nen Abraham a kaarok, sika ya inegnaan ko a nanlapu ed saray sampot na dalin, tan tinawag ko a nanlapu ed saray suyok to, tan inkuan ko ed sika, Sika so aripen ko, pinili taka, tan agtaka imbantak; agka antakot, ta wala ak ed sika, agka napagaan, ta siak so Dios mo; pabiskegen taka naani; on, tulongan taka: On ampayaen taka ed nikawanan a lima na inkatunong ko.”​—Isaias 41:8-10.

13. Akin a makaligliwa iray salita nen Jehova ed saray akautibon Judio?

¹³ Agaylan makaligliwa irayan salita ed saray matoor a Judio ya akautibo ed sankailin dalin! Agaylan makapaseseg so pakadngel a tinawag ira nen Jehova ya “aripen ko” diad panaon ya akadestiero ira, a lingkor na ari na Babilonia! (2 Awaran 36:20) Anggaman disiplinaen ira nen Jehova lapud agda impanmatoor, agto ira ipulisay. Say Israel et kien nen Jehova, aliwan kien na Babilonia. Anggapoy rason ya onggiwgiw iray lingkor na Dios ed isabi na onlulubak a si Ciro. Si Jehova so walad totoo to pian tulongan to ra.

14. Panon a makaligliwa iray salita nen Jehova ed Israel diad saray lingkor na Dios natan?

¹⁴ Saraman a salita so amaseguro tan amabiskeg ed saray lingkor na Dios anggan diad panaon tayo. Nen 1918 pirawrawat da ya amtaen so linawa nen Jehova parad sikara. Pantintindekan day makaliktar manlapud impakautibo ed espiritual a kipapasen da. Natan et pipirawaten tayo so inawa manlapud saray panedesdes nen Satanas, say mundo, tan say dili tayon ag-inkayadyari. Balet pisalsalamatan tayo ta sigpot ya amta nen Jehova no kapigan tan no panon ya onkiwas nisengeg ed totoo to. Singa ugugaw, ombebemben itayo ed mabiskeg a lima to, a matalek a tulongan to itayon ontalona. (Salmo 63:7, 8) Papablien nen Jehova iramay manlilingkor ed sikato. Susuportaan to itayo natan a singa ed impanuporta to ed totoo to diad mairap a panaon nen 1918-19 tan singa ed impanuporta to ed matoor iran Israelita nensaman.

15, 16. (a) Antoy pagmaliwan na saray kakabusol na Israel, tan diad antoran dalan a mipara so Israel ed bigis? (b) Nagkalautlan makapaseseg iray salita nen Jehova natan diad arap na anton makapasesgan panangataki?

¹⁵ Konsideraen so sinmublay ya imbaga nen Jehova panamegley nen Isaias: “Nia, amin iray nanggula a sumpa ed sika nibabaing ira tan nagulo ra: saray misangsangan ed sika singa ra naani anggapo tan nabalang ira. Sika anapen mo ra et agmo ra naromog, anggan saray misangsangan ed sika: saray mamakal ed sika magmaliw ira naani a singa anggapo, tan singa sakey a bengatla ya andi kakanaan to. Ta siak, si Jehova a Dios mo, a mangitagey na kawanan a limam, a kuan ko ed sika, Agka antakot; tulongan [ta] ka naani. Agka antakot, sika bigis a Jacob, tan sikayo totoo na Israel; tulongan ta kayo naani, kuan nen Jehova, tan say Mananondon mo sikato so Santo na Israel.”​—Isaias 41:11-14.

¹⁶ Saray kakabusol na Israel so ag-ontalona. Saramay manpapetang sumpad Israel so nabaingan. Saramay mibakal sumpad sikato so natawtaw. Anggaman saray kautibon Israelita so singa makapkapuy tan agmakalaban a singa mankiwelkiwel ed dabok a bigis, sikaray tulongan nen Jehova. Agaylan makapaseseg iya diad “saray kaunoran ya agew” legan a nidudunget iray Kristiano ed pirmin inkaruksa na dakerakel ed mundo! (2 Timoteo 3:1) Tan agaylan makapabiskeg so sipan nen Jehova diad arap na makapasesgan panangataki nen Satanas, a tinukoy diad propesiya bilang “Gog ed dalin na Magog”! Diad masebeg a pangataki nen Gog, saray totoo nen Jehova so ompatnag a singa bigis ya agmakalaban​—totoon ‘manaayam ya andian na saray bakor’ tan andian na anggan say ‘balewet tan wangwangalan.’ Bangbalet, saramay maniilalo ed si Jehova so agkaukolan ya onggiwgiw ed takot. Say Makapanyarin-amin a mismo so mibakal pian iliktar ira.​—Ezequiel 38:2, 11, 14-16, 21-23; 2 Corinto 1:3.

Ligliwa Parad Israel

17, 18. Panon ya indeskribe nen Isaias so panamabiskeg ed Israel, tan apaseguroan itayo na anton kasumpalan?

¹⁷ Si Jehova so mantutultuloy a manliligliwa ed totoo to: “Nia, ginawa ta ka a sakey a balo tan mautok a panbayo a walaan na ngipen; sika bayoen mo naani so saray palandey, tan mekmeken mo ra naani a melmelanting, tan gawaen mo naani a singa taep so saray pukdol. Itegap mo ra naani, tan itekkiab ira naani na dagem, tan say bagyo buyaken to ra naani; et sika manliket ka naani ed Jehova, mangigloria ka naani ed Santo na Israel.”​—Isaias 41:15, 16.

¹⁸ Say Israel so pabiskegen pian onkiwas tan, diad espiritual a pantalos, et pian taloen to so singa-palandey a kakabusol to. Sano say Israel so ompawil manlapud inkadestiero, talonaan to iray kakabusol to a manggugunaet a mangamper ed pangipaalagey lamet na templo tan saray bakor na Jerusalem. (Esdras 6:12; Nehemias 6:16) Anggaman ontan, saray salita nen Jehova so malaknab a nasumpal diad “Israel na Dios.” (Galacia 6:16) Insipan nen Jesus ed saray alanaan a Kristiano: “Say manalo, tan say manumpal ed saray gawak angga ed kasumpalan, siak ikdan ko naani pakayari ed saray nasyon: Tan panuleyan to’ra a mansetro na balatyang, et nabetag ira a singa bangabanga na pomapalba a namisimisi; unong met a siak inawat ko ed Amak.” (Apocalipsis 2:26, 27) Seguradon onsabi panaon sano saray agagi nen Kristo ya apaoli ed mangatatawen a gloria so makapibiang a maneral ed saray kakabusol nen Jehova.​—2 Tesalonica 1:7, 8; Apocalipsis 20:4, 6.

19, 20. Anto so insulat nen Isaias nipaakar ed kipawil na Israel ed pasen na karakpan, tan panon iyan asumpal?

¹⁹ Diad piguratibon panagsalita, pinaletan natan nen Jehova so sipan to a tulongan to so totoo to. Insulat nen Isaias: “Saray duka tan saray naukolan anapen da so danum, et anggapo a balot, et saray dila ra onkapuy a nisengeg ed pega; siak, si Jehova ebatan ko ra naani, siak, a Dios na Israel, agko ra naani ikaindan. Mangilukas ak naani na saray ilog ed saray malinis a palandey, tan subosubol ed pegley na saray lawak; gawaen ko so kalawakan a sakey a libsong na danum, tan sakey ya amaga a dalin a mantakbol na danum. Yan ko naani ed kalawakan so cedro, say acacia, tan say arrayan, tan say kiew a mangiter na larak, ipasen ko naani ed takel so kiew ya abeto, say saleng, tan say kiew na alamo a manlalason ira: Pian nanengneng da, tan naamtaan da, tan naisip da, tan natalosan da a sankaulop, a say lima nen Jehova ginawa to so saya, tan say Santo na Israel sikato so pinalsa to.”​—Isaias 41:17-20.

²⁰ Anggaman saray adestieron Israelita so manaayam ed kabiseran syudad na mayaman a pakayari ed mundo, parad sikara satan so singa andiay danum a desierto. Nalilikna ra so singa alikna nen David sanen sikatoy nanamot-amot lapud si Arin Saul. Nen 537 K.K.P., nilukasan nen Jehova so dalan pian sikaray makapawil ed Juda tan ipaalagey lamet so templo to ed Jerusalem, diad ontan et nipawil so puron panagdayew. Lapud satan, bendisyonan ira nen Jehova. Diad saginonor a propesiya et impasakbay nen Isaias: “Si Jehova niligliwa to [so] Sion, sikato niligliwa to so saray amin a pasen to ya abagbag, tan ginawa to so kalawakan to a singa Eden, tan say kabueran a dalin to a singa tanamanan nen Jehova.” (Isaias 51:3) Saya so peteg ya agawa kayari impawil na saray Judio ed nianakan dan dalin.

21. Anton panangipawil so agawa diad modernon panaon, tan anto so nagawa diad arapen?

²¹ Mipara itan ed agawa diad modernon panaon sanen say Babaleg a Ciro, si Kristo Jesus, so angibulos ed saray alanaan a patumbok to manlapud espiritual ya impakakautibo pian nipawil da so puron panagdayew. Saraman a matoor a totoo so abendisyonan na mayaman ya espiritual a paraiso, sakey a piguratibon hardin na Eden. (Isaias 11:6-9; 35:1-7) Agmanbayag, sano deralen la na Dios so kakabusol to, say interon dalin so magmaliw a pisikal a paraiso, a singa insipan nen Jesus ed sakey a managkasalanan a nipasak ed kiew.​—Lucas 23:43.

Sakey ya Angat ed Kakabusol na Israel

22. Diad antoran salita ya inangat lamet nen Jehova so nasyones?

²² Natan et binmaliksat lamet si Jehova ed pisusuppiatan to ed nasyones tan ed talintaon dirios da: “Ipaliwawa yo so pegdat yo, kuan nen Jehova; ipatnag yo so saray mabiskeg a pamaakaran yo, kuan na ari nen Jacob. Yakar da ra komon, tan ipakabat da ed sikami no anto naani nagawa: ipakabat yo so saray inmuna a bengatla, no anto ra, pian isipen mi ra, tan naamtaan mi so kaunoran a kasumpalan da; odino ipanengneng yo ed sikami so saray bengatla ya onsabi. Ibaga yo so saray bengatla ya onsabi ed arapen, pian naamtaan mi a dirios kayo; on, manggawa kayo na maabig, odino manggawa kayo na mauges, pian sikami nikelawan kami tan sikato so nanengneng mi a sankatipon. Nia, anggapo so kakanaan yo, tan say gawa yo sikato so anggapo; sakey a kadimla so mamili ed sikayo.” (Isaias 41:21-24) Kasin makapanpropesiya a susto so dirios na nasyones pian napaneknekan a walay labas nen toon pikakabat da? No on, siempre nepeg a walay resulta, balanglan maong odino mauges, pian nasuportaan iray ibabaga ra. Balet, diad tua, saray talintaon dios so agmakapanggawa na antokaman tan singa ira bengatlan aglinmesa.

23. Akin a tuloytuloy a kokondenaen nen Jehova, panamegley na saray propeta to, iray talintao?

²³ Diad panaon tayo, nayarin mankelaw so arum no akin ya angusar si Jehova na dakel a panaon a mangokondena ed kaatiwan na idolatriya, panamegley nen Isaias tan saray kapara ton propeta. Nayarin mapatpatnag la ed dakel natan so inka-andi kakanaan na saray talintao. Balet, bektaman a niletneg la tan aawaten la na dakel so palson sistema na sisiaen, mairap lan buralen itan ed kanonotan na saramay manisia ed satan. Dakel a sisisiaen ed kaplesan so andi-kana a singa say sisiaen a say andiay-bilay iran imahen et peteg a dirios. Ingen, mansiasiansia ni iray totoo ed saratan a sisiaen anggan panon lan makakombinse iray argumento sumpad saratan. Diad panamegley lambengat na paulit-ulit ya impakadngel ed katuaan ya apakiwas so arum a namoria so kakabatan na panmatalek ed si Jehova.

24, 25. Panon lamet a tinukoy nen Jehova si Ciro, tan anton arum a propesiya so ipapanonot na saya?

²⁴ Tinukoy lamet nen Jehova si Ciro: “Amaalagey ak na sakey a nanlapu ed amianen et sikato so onsabi; manlapu ed letakan na banwa sakey a nantawag na ngaran ko: et sikato so onsabi naani ed tapew na saray makauley a singa manakar ed tapew na pitek, tan singa say domadamili ya igatin-gatin to so pitek.” (Isaias 41:25)d Miduma ed dirios na nasyones, nayarian nen Jehova a sumpalen so bengabengatla. Sano papawayen to si Ciro manlapud bukig, manlapud “letakan na banwa,” ipatnag na Dios so pakapanyari to a mangipasakbay insan determinaen to so nagawa ed arapen pian sumpalen so impasakbay to.

²⁵ Sarayan salita so mangipapanonot ed sikatayo ed mapropetikon panangideskribe nen apostol Juan ed arari a pakiwasen diad panaon tayo. Diad Apocalipsis 16:12 et nabasa tayo a say dalan so iparaan parad “saray ari a manlapu ed letakan.” Sarayan arari et anggapoy arum noag si Jehova a Dios tan si Jesu-Kristo. No panon ya inliktar nen Ciro so totoo na Dios nensaman, galpongen na sarayan mas makapanyarin arari so kakabusol nen Jehova tan pastolan so totoo to diad panaon na baleg a kairapan anggad balon mundo na katunongan.​—Salmo 2:8, 9; 2 Pedro 3:13; Apocalipsis 7:14-17.

Si Jehova so Supremo!

26. Anto so intepet natan nen Jehova, tan kasin naebatan itan?

²⁶ Lamet, inyabawag nen Jehova so katuaan a sikato lambengat so tua a Dios. Intepet to: “Siopa so angibaga ed sikato nanlapu ed inmuna, pian nakabatan tayo komon? Tan sanen inmuna, pian nikuan mi, Wala so katunongan to? On, anggapo so mangibaga, on, anggapo so ondengel ed saray salita yo.” (Isaias 41:26) Anggapoy talintaon dios ya angiyabawag ed isabi na sakey a konkestador a mangibulos ed saramay manmamatalek ed satan. Amin iratan a dirios so inatey, emel. Aliwa ra ingen a dirios.

27, 28. Anton katuaan so indanet ed unor iran bersikulo na Isaias 41, tan siopa labat so mangiyaabawag ed saya?

²⁷ Kayarin inreport irayan makapaseseg a mapropetikon salita nen Jehova, indanet nen Isaias so sakey a makanan katuaan: “Siak so unona a mankuan ed Sion, Nengnengen yo, nengnengen yo ra; iter ko naani ed Jerusalem so sakey a mangiyakar na saray maong a balita. Et no onnengneng ak, anggapo so too; anggan komon no sakey a manimbawa anggapo ed sikara, a, no mantepet ak komon na nipaakar ed sikara, makaebat komon ed sakey a salita. Nia, sikara ya amin, saray gawa ra sikara so maapa tan andi kakanaan da; saray inbobo a talintao sikara so dagem tan kagulo.”​—Isaias 41:27-29.

²⁸ Si Jehova so unaan. Sikato so supremo! Sikato so tua a Dios, a mangiyaabawag na kiliktar na totoo to, a mangitatarok na maong a balita ed sikara. Tan saray Tastasi to lambengat so mangiyaabawag ed inkatalonggaring to diad nasyones. Lapud panggula, kokondenaen nen Jehova iramay manmamatalek ed panagdayew ed talintao, ya ipapasen to iray talintao ra a “dagem tan kagulo.” Agaylan mabiskeg a rason ya ompeket ed tua a Dios! Si Jehova lambengat so makanepegan ed mapekder a panagmatalek tayo.

[Saray paimano ed leksab]