Panangipulong ed Panarian​—Pangiyaabawag ed Maong a Balita Diad Interon Mundo

ASAKBAY kan namparaan pian manpulong ta day off mo. Medyo nangingirasan ka ta naksawan ka ni. Balibali ni komoy manpainawa! Balet impikasim itan tan desidido kan onla. Say aka-partner mo et matoor ya maedad lan sister tan apaseseg kad anos tan kaabigan to. Legan yon manpupulong, anonotan mon inanabang met na agagi ed interon mundo so parehon mensahe, uusaren day parehon literatura, tan minanabang irad parehon panangipasal. Kanian kasempet mo, maligligsa ka. Maliket ka ta nampulong ka!

Diad panaon tayo, say Kristianon ministeryo so manunan kimey na Panarian na Dios. Impasakbay nen Jesus ya diad kaunoran iran agew et onlaknab so panagpulong a kimey. (Mat. 24:14) Panon ya nasusumpal iyan propesiya to? Diad sayan seksion, aralen tayoy nipaakar ed saray totoo, paraan, tan uusaren ya importantid Kristianon ministeryo, tan ontutulong ed minilyon a totoo pian namoria da ya talagan tua so Panarian na Dios.