Pinatunda nen Jesus so Bagyo ed Dayat

Sanagew ya dakel so ginawa nen Jesus kanian naknaksawan. Kasabi labi, imbaga tod saray disipulo to: “Onla tayod biek a gilig na dayat,” diad petek na Capernaum.​—Marcos 4:35.

Diad bandad bukig a gilig na Dayat na Galilea et rehyon na saray Geraseno, ya sakop na Decapolis. Saray syudad ed Decapolis et sentro na kulturay Griego, anggano amayamay met so Judion manaayam diman.

Say intaynan nen Jesus ed Capernaum et akabatan na totoo. Walay arum ya baloton sinmipot ya ombaliw met ed dayat. (Marcos 4:36) Diad tua, magano labat so biahe. Say Dayat na Galilea et manga 21 kilometroy karukey to tan say kaawang to et manga 12 kilometro. Pero aralem.

Anggano perpekto si Jesus, seguradon nakekesawan met ed ministeryo to. Kanian nen binmuat la ra, sikatoy dinmukol ed bandad beneg na baloto, akadanganan, tan naugip.

Saray arum ya apostol et eksperton mangimaneho na baloto, balet nairapan irad sayan pambiahe da. Apaliberan na kapalandeyan so Dayat na Galilea tan mabetbet ya medyo ampetang so tapew na danum. No maminsan, manabetan so ambetel a dagem a manlapud palandey tan ampetang a dagem ed tapew na danum, kanian biglan man-alimbusabos ed dayat. Ontan so agawa. Kanian binmasig ed baloto so angkakabaleg a daluyon anggad “napapano lay danum so baloto ra tan napepeligro la ra.” (Lucas 8:23) Balet siansia nin masamsamit so ugip nen Jesus!

Mantalikarkar iray mangimamaneho ed baloto, gagawaen day amin a paraan a singa datin gagawaen da. Balet duma iya natan. Ngalngali la ra ompatey kanian binangon day Jesus tan inyeyag da: “Katawan, iliktar mo kami, ompatey ti la!” (Mateo 8:25) Agaylay takot na saray disipulo ta onlelereg la ra!

Nen abangon si Jesus, imbaga tod saray apostol: “Akin et agaylay takot yo, sikayo ran kulang na pananisia?” (Mateo 8:26) Insan ingganggan toy dagem tan dayat: “Tunda ka! Deen ka!” (Marcos 4:39) Tinmundan tampol so makmaksil a dagem tan dinmeen so dayat. (Inistorya nen Marcos tan Lucas iyan makapakelaw ya eksena. Unona, indanet da ya mamilagron pinatunda nen Jesus so bagyo, tan imbaga day kakulangay pananisia na saray disipulo.)

Isipen pay epekto na satan ed saray disipulo! Anengneng dan mismo ya agaylay kasil na bagyo insan biglan dinmeen. Akalikna ray nikadkaduman takot. Inkuan dad balang sakey: “Siopa kasi iya? Anggan say dagem tan dayat et ontutulok ed sikato.” Tan akasabi ran mabilay ed biek na dayat. (Marcos 4:41–5:1) Nayarin saray arum ya baloto et akapawil lad nanlapuan da, diad sagur ya gilig na dayat.

Talagan makapaseseg a naamtaan a sarag ya kontrolen na Anak na Dios iray kipapasen na panaon! No ipokus to lay imano tod dalin diad panuley tod Panarian, maligen lay amin ya totoo, ta anggapo la ray makapataktakot ya kalamidad!