BILAY NA KRISTIANO

Say Dalin et “Inakmon Toy Ilog”

Nensaman, wala ray pankanawnawa ya tinulongan na saray walad autoridad iray lingkor nen Jehova. (Esd 6:1-12; Es 8:10-13) Diad panaon tayo, nanenengneng tayo ya “say dalin,” ya ontutukoy ed saray maimpluensya balet makatunongan ya totoo ed mundo, et inakmon da so singa “ilog” iran panamasegsegang ya insugsog na “dragon,” si Satanas a Diablo. (Apo 12:16) Wala ray pankanawnawa ya pakikiwasen nen Jehova, say “Dios a mangililiktar,” iray totoon manuley pian natulongan iray totoo to.—Sal 68:20; Pro 21:1.

Panon to no apriso ka lapud pananisiam? Agmo lilingwanan ya wadtan si Jehova. (Ge 39:21-23; Sal 105:17-20) Seguradon bendisyonan toy panmamatalek mo, tan lapud katooran mo et napapaseseg mo ray agagi ed interon mundo.—Fil 1:12-14; Apo 2:10.

BANTAYAN SO VIDEO YA NIBULOS LA RAY AGAGIN IMPRISO ED SOUTH KOREA, INSAN EBATAN IRAYA:

Diad dakel iran taon, akin et nilibon agagi so impriso ed South Korea?
Anto ran desisyon na korte so akatulong pian mas masakbay ya nibulos so pigaran agagi tayo?
Panon tayon natulongan iray agagi tayo ed nanduruman bansa ya akapriso natan lapud pananisia ra?
Antoy gawaen tayo legan ya anggapo ni pananebel ya nagagawa?
Siopa so talagan angipanalo ed saray kaso tayo ed korte?

Sakey ed saray prisoan diad Korea ya datin akaprisoan na Saray Tasi nen Jehova; sulsulat na Saray Tasi nen Jehova ed branch na Korea ya impawit ed saray aprison brother; sanama ya nanlakapan nen akapaniba ira lamet — Antoy gagawaen ko natan legan ya anggapo ni pananebel?