LEKSION 18

Pakaaralan na Saray Ondedengel

1 Corinto 9:19-23

SUMARYO: Pannonoten iray ondedengel pian kayarim ya mansalita et nalikna dan akaaral ira na impormasyon ya pakagunggonaan da.

Ikonsidera no anto lay amta na saray ondedengel. Imbes ya basta labat uliten iray amta da la, tulongan iran makaaral na balo ed samay topic.

Pelesan so pangipresenta ed saray pamilyar lan punto, balet tantanan so pangipresenta ed saray balon ideya.
Man-research tan mandalepdep. No posible, usaren iray agmasyadon pamilyar ya impormasyon odino kaplesan iran balita pian iyilustra iray importantin ideya. Nonoten a maong so topic tan say koneksion na satan ed saray impormasyon ya planom ya usaren.

Legan mon aaralen so topic, pannonotan mo ray tepet ya singa say ‘anto, akin, kapigan, iner, siopa, tan panon.’ Gawaen a mabilabilay so panagbangat mo diad pangusar mod saratan ya tepet tan pangebat ed saratan legan na presentasyon mo odino paliwawam.
Ipanengneng no panon ya makatulong so mensahem. Ipaliwawa no panon a saray punto ed Biblia et makatulong ed inagew-agew a bilay na saray ondedengel. Mangibaga na espisipiko iran situasyon, ugali, tan kagagawa ya ontukoy ed saray ondedengel.