LEKSION 14

Nidanet Iray Manunan Punto

Hebreo 8:1

SUMARYO: Tulongan iray ondedengel ya natumbok so paliwawam, tan ipalinew no panon ya onkonekta ed gagalam tan ed temam so kada manunan punto.

Seguroen ya walay gagalam. Nonoten no kasin say gagala na paliwawam et pian mangiter na impormasyon, mangombinse, odino mamaseseg ed saray ondedengel, insan manparaan base ed satan. Seguroen ya amin a manunan punto et onsuporta pian nagawaan mo so gagalam.

Nonot mo: ‘Anto ray nayarin itepet odino ag-awaten na saray ondedengel nipaakar ed sayan topic? Panon dan pantutumbokanen ya itepet iratan?’ Insan uksoy mo ray punto base ed satan pian natumbok, natalosan, tan awaten da so impormasyon.
Idanet so tema na paliwawam. Diad interon paliwawam, maminpigan uliten so tema diad pamitla ed saray manunan salita odino pangusar ed saray salitan miparay kabaliksan.
Gawam ya simpli tan malinew iray manunan punto. Pilim labat iray manunan punto ya epektibon nibangat mo ed niganan oras tan onkonekta ed temam. Limitaan mo so bilang na manunan punto, malinew ya ibaga so kada sakey ed saratan, ontundan magano kayari sakey a manunan punto, tan ikonektam itan ed onsublay a manunan punto.

Sarag mon bitlaen iray manunan punto ed introduksion mo pian natumbok na saray ondedengel odino uliten iratan ed konklusyon mo pian natandaan da.