Saray Reperensya Parad Workbook ed Aral
MARSO 1-7
KAYAMANAN ED SALITA NA DIOS | NUMEROS 7-8
“Saray Leksion ya Naaralan ed Kampo na Israel”
mwbr21.03—it-1 497 ¶3
Kongregasyon
Diad Israel nensaman et wala ray responsablin mangirerepresenta ed saray totoo. (Esd 10:14) Kanian saray “papangulo na saray tribu” so angitarya na saray apay kayarin impaalagey so tabernakulo. (Nu 7:1-11) Ontan met, pinaletan na saray saserdote, Levita, tan saray “pangulo na baley” panamegley na panagtatak so “malet a paknaan” diad panaon nen Nehemias. (Ne 9:38–10:27) Legan ya walad kalawakan iray Israelita, wala ray “papangulo na totoo, saray pinili ed kongregasyon, bantog a lalaki,” ya 250 ed sikara so akila ed si Kora, Datan, Abiram, tan On tan nantitipon ira ya sinmumpa ed si Moises tan Aaron. (Nu 16:1-3) Diad panangigiya na Dios, amili si Moises na 70 ed saray mamatatken ed Israel ya opisyal na saray totoo pian ontulong ed sikato ya manakbat ed ‘awit na saray totoo’ ya agto sarag a sakbaten ya bukor. (Nu 11:16, 17, 24, 25) Abitla ed Levitico 4:15 iray “mamatatken na totoo,” tan mapatnag ya say mangirerepresenta ed totoo et saray mamatatken, saray ulo, saray ukom, tan saray opisyal na totoo.—Nu 1:4, 16; Jos 23:2; 24:1.
mwbr21.03—it-2 796 ¶1
Ruben
Diad kampo na Israel, saray Rubenita ya walad abay na saray kapolian nen Simeon tan Gad et manaayam ed bandad abalaten na tabernakulo. Diad impanbiahe da, indaulo na tribu na Ruben irayan taloran-tribu a dibisyon tan ontutumbok ed sikara so taloran-tribu a dibisyon na Juda, Isacar, tan Zebulon. (Nu 2:10-16; 10:14-20) Ontan met so impansusublayan na saray tribu ed impangiyapay da na saray apay diad inagurasyon na tabernakulo.—Nu 7:1, 2, 10-47.
Saray Pabitar ed Libro na Numeros
8:25, 26. Ta pian naseguro a saray makayarin lalaki so napabtangan na serbisyo bilang Levita, tan lapud ikokonsidera so edad da, saray mamasiken so kinaukolan a manretiro ed obligadon panaglingkor. Balet, nayarian day manboluntaryon ontulong ed arum a Levita. Anggaman anggapo so panagretiro ed pagmaliw a manangiyabawag na Panarian natan, say prinsipyo na sayan ganggan so mangibabangat ed sikatayo na makanan leksion. No agla nasumpal na sakey a Kristiano so pigaran obligasyon lapud inkatakken to la, nayarian toy mibiang ed sakey a nengneng na serbisyo ya iyabuloy na biskeg to.
Saray Espiritual a Kayamanan
mwbr21.03—it-1 835
Panguloan
Lapud saray panguloan ya anak a lalaki na saray Israelita so iilaloan ya magmaliw ya ulo na saray pamilya, irerepresenta da so interon nasyon. Diad tua, tinukoy nen Jehova so interon nasyon bilang say “panguloan” to, satan so panguloan ya nasyon to lapud impisipanan tod si Abraham. (Ex 4:22) Lapud inliktar toy bilay na saray panguloan a lalaki, ingganggan nen Jehova ya “amin a panguloan a laki ed limog na saray Israelita . . . ya iyanak na too odino ayep,” et pasantoen parad sikato. (Ex 13:2) Kanian, saray panguloan a lalaki et akadedika ed Dios.
MARSO 8-14
KAYAMANAN ED SALITA NA DIOS | NUMEROS 9-10
“No Panon ya Igigiya nen Jehova Iray Totoo To”
mwbr21.03—it-1 398 ¶3
Kampo
Makapadinayew met so inkauksoy na balbaleg ya kampo na saray Israelita kada no onalis ira diad sananey ya pasen (manga 40 ya impankampo so abitla nen Moises diad Numeros 33). Anggad ag-onalis so lurem ed tagey na tabernakulo, agmet onalis so kampo. No ombuat so lurem, ombuat met so kampo. “Diad ganggan nen Jehova et ombuat iray Israelita, tan diad ganggan nen Jehova et mankampo ra.” (Nu 9:15-23) Ipapaamta nen Jehova no kapigan ira ombuat odino mankampo panamegley na duaran pinanday a pilak ya trumpeta. (Nu 10:2, 5, 6) Walay manguman-uman a tanol pian mangiter na sinyales no anto ran kampo so ombuat. Unonan agawa iya “diad komaduan taon [1512 B.C.E.], diad koma-20 agew na komaduan bulan.” Walad unaan so kaban na sipan no ombuat ira, insan ontumbok so taloran-tribu a dibisyon ya idadaulo na Juda tan tumbokan na Isacar tan Zebulon. Ontumbok ed sikara iray Gersonita tan Merarita ya awi-awit da iray kagawaan na tabernakulo ya inyasain ed sikara. Insan ontumbok so taloran-tribu a dibisyon ya idadaulo na tribu nen Ruben ya tumbokan na tribu di Simeon tan Gad. Kayari da et ombuat iray Kohatita ya awi-awit da so santuaryo, insan ontumbok so komatlon taloran-tribu a dibisyon, say Efraim, ya tumbokan na tribu di Manases tan Benjamin. Kaunoran, say bantay ed benegan et say dibisyon ya idadaulo nen Dan ya tumbokan nen Aser tan Neftali. Kanian say duara ya sankarakelan tan sankabiskegan ya dibisyon et akaposisyon ed unaan tan diad benegan.—Nu 10:11-28.
Kasin Natetebek Yo ya Igigiya Itayo na Dios?
Panon tayon nipanengneng ya aapresyaen tayoy panangigiya na Dios? Inkuan nen apostol Pablo: “Matulok kayo komon ed saramay mangidadaulo diad limog yo tan mapasakop kayo komon.” (Heb. 13:17) Nayarin aliwan mainomay itan. Bilang ilustrasyon, ipasen mo pan sakey kan Israelita ed panaon nen Moises. Kayarim ya nanakar na andukerukey, tinmunda so singa lusek a lurem. Anggad kapigan kasi itunda to? Sakey agew? Sakey simba? Pigaran bulan? Ompan isipen mon, ‘Walwalen ko ni kasi irayay balbalkot ko?’ Nayarin diad unona et ipaway mo iramay talagan kaukolan mo labat. Balet kayari pigay agew, naiingongotan ka lan manbubukait ed saray kagkagawaan mo kanian ipaway mo laingen iratan ya amin. Nen ngalngali ka la nasumpal, anengneng mon onaatagey la imay lurem, tan kaukolan mo lamet so man-impake! Agta singa marama-rama? Balet, siansia nin ‘nanakar iray anak na Israel kayari na satan.’—Num. 9:17-22.
Kanian, antoy reaksion tayo sano makakaawat tayoy panangigiya manlapud Dios? Kasin iyaaplika tayon tampol itan? Odino siansia nin gagawaen tayo iramay apasalan tayo la? Kasin aamtaen tan iimanoen tayo ray balon instruksion nipaakar ed panangiyaral na Biblia, panagpulong ed totoon sananey so lenguahe ra, regular ya onaatendi’d panagdayew na pamilya, pikokoopera ed saray Hospital Liaison Committee, tan maong a kondukta diad saray kombension? Nipapanengneng tayo met ya aapresyaen tayo so panangigiya nen Jehova no maawat tayo na simbawa. Sano manggawa itayo na importante iran desisyon, agtayo panmamatalekay dilin karunongan tayo, noagta manilalo tayo ed panangigiya nen Jehova tan na organisasyon to. Singa say ugaw ya pasasalimbengan ed atateng to no walay bagyo, pasasalimbengan itayo met ed organisasyon nen Jehova sano makasagmak itayo na singa bagyon problema ed sayan mundo.
Saray Espiritual a Kayamanan
mwbr21.03—it-1 199 ¶3
Pantitipon
Say Kaimportantian na Pantitipon. Nidanet ed tinaon ya panagselebra ed Paskua ya importante so sigpot ya pibiang ed saray pantitipon pian naawat iray espiritual ya probisyon ya itatarya nen Jehova. No say sakey a laki et malinis tan agmanbiabiahe ed arawi balet ta agto selebraan so Paskua, nepeg ya sikatoy pateyen. (Nu 9:9-14) Nen tinipon nen Arin Hezekias diad Jerusalem iray tagad Juda tan Israel pian selebraan so Paskua, oniay kaibad samay mensahe tod sikara: “O totoo na Israel, pawil kayod si Jehova . . . agkayo magmamaliw a benger a singa saray inmuunan atateng yo. Manpasakop kayo ed si Jehova tan la kayod santuaryo to a pinasanto to ya anggad angga tan manlingkor kayo ed si Jehova a Dios yo, pian onkepay mandarlang a sanok tod sikayo. . . . Ta si Jehova a Dios yo et maabagey tan mapangasi, tan agto iyarap ed biek so lupa to no ompawil kayod sikato.” (2Aw 30:6-9) No gagalaen na sakey so ag-onatendi, ipapanengneng ton ibabaliwala toy Dios. Anggaman agseselebraan na saray Kristiano iray piesta ya singa say Paskua, pinaseseg ira nen Pablo ya agda papaulyanan so regular ya iyatendi ed pantitipon na saray totoo na Dios, oniay imbaga to: “Nonoten tayoy sakey tan sakey pian makapansasagyatan itayo a mangaro tan manggaway maabig iran kimey, ya agtayo papaulyanan so pantitipon tayo, a singa niyugali na arum, noagta manpapasesegan itayo, nagkalalo la ta nanenengneng yon manasingger lay agew.”—Heb 10:24, 25.
MARSO 15-21
KAYAMANAN ED SALITA NA DIOS | NUMEROS 11-12
“Akin ya Paliisan so Lanang ya Panreklamo?”
Aleg a Magmaliw a Malingwan a Dumerengel
20 Karaklan ed saray Kristiano so agbalot onsusuko ed seksual ya imoralidad. Ingen, nakaukolan tayo so manalwar pian agtayo gegemtanen so kurang a mangitonton ed naynay a panag-nguronguro a mansumpal ed agpanangabobon na Dios. Oniay simbawa ed sikatayo nen Pablo: ‘Agyo komon gawaen so panalsali ed Katawan a singa saray arum ed [saray Israelita] nanggawa ra na panalsali, tan abagbag ira ed saray uleg. Tan agkayo mantalabutob komon, a singa arum ed sikara nantalabutob ira, tan inatey ira ed managbagbag.’ (1 Corinto 10:9, 10) Nanmeremere iray Israelita sumpad si Moises tan Aaron—on, sumpa ni ingen ed Dios a mismo—ya irereklamo ra so nipaakar ed mamilagron nitatarya a mana. (Numeros 16:41; 21:5) Kasin agtanton naopendi si Jehova ed impanmeremere ra nen say impangagamil da na pilalawanan? Ipapabitar na salaysay na Biblia a dakel a nanmeremere so pinatey na saray uleg. (Numeros 21:6) Diad akadkaunan inkagawa, masulok a 14,700 a rebelyoson nanmeremere so aderal. (Numeros 16:49) Kanian agtayo susuboken so inkaanos nen Jehova diad agpanrespeto ed saray probisyon to.
‘Paliisan so Pannguronguro’
7 Anguma-uman so awawey na Israel! Diad primero, apakiwas ira a mankanta na panangidayew ed si Jehova lapud pisasalamat da ed inkibulos da manlapud Ehipto tan inkiliktar da ed Ambalangan Dayat. (Exodo15:1-21) Balet, lapud nipaarap ira ed irap diad kalawakan tan tinmakot ira ed saray Canaanita, satan a maapresyan awawey na totoo na Dios so asalatan na ag-inkakontento. Imbes a pisalamatan da so Dios lapud inkibulos da, sikato so tinetel da lapud lingon ipapasen da a sikaray sisibletan. Say panagnguronguro sirin so pakapatnagan na kakulangay suston apresasyon ed saray probisyon nen Jehova. Agpankelawan sirin no akin ya oniay imbaga to: “Kaunongan kabayag so pantepel ko ed sayan mauges a sankatiponan, a mantalabutob na sumpa ed siak?”—Numeros 14:27; 21:5.
mwbr21.03—it-2 719 ¶4
Pankokolkol
Panmeremere. Makapadismaya tan makaderal so panmeremere. Ag-abayag kapaway na saray Israelita ed Ehipto, nanmeremere ira ed si Jehova, makritiko ira ed panangidaulo to panamegley na saray lingkor ton si Moises tan Aaron. (Ex 16:2, 7) Adismayan maong si Moises ed saray reklamo ra kanian labay to lay ompatey. (Nu 11:13-15) Ipepeligro met na saray manme-meremere so mismon bilay da. Parad si Jehova, panagrebelde ed panangidaulo to imay impanreklamo na saray totoo ed si Moises. (Nu 14:26-30) Dakel so inatey lapud saman ya impankritiko.
Saray Espiritual a Kayamanan
mwbr21.03—it-2 309
Mana
Deskripsion. Say mana et ‘amputi a singa bukel na kulantro’ tan “kaparpara” na yaket na bedelio, sakey a magket tan malinew a substansia ya say itsura to et singa perlas. Say taway to et singa “bibingkan tirampiak a nandilo” odino “masamit a bibingka a nilarakan.” Kayari itan ya gilingen odino bayoen, nayari itan ya ilambong odino gawaen ya tinapay.—Ex 16:23, 31; Nu 11:7, 8.
MARSO 22-28
KAYAMANAN ED SALITA NA DIOS | NUMEROS 13-14
“Gawaen Itayon Makpel na Pananisia Tayo”
Makpel Lapud Pananisia tan Maridios a Takot
5 Balet, duara ed saray espiya, si Josue tan Caleb, so magunaet a linmoob ed Insipan a Dalin. Saray taga-Canaan et “onkana ed sikatayo a tinapay,” so inkuan da. “Say sekder da naekal ed sikara, et si Jehova ibaan to itayo: agkayo ontakot ed sikara.” (Numeros 14:9) Kasin anggapoy basiyan na positibon panmoria di Josue tan Caleb? Wala. Kaiba so interon nasyon, anengneng da so impangiyabeba nen Jehova ed mabiskeg ya Ehipto tan ed dirios na satan diad panamegley na Samploran Salot. Insan anengneng da so impangilener nen Jehova ed si Faraon tan say puersa-militar to diad Ambalangan Dayat. (Salmo 136:15) Mabitar ya agnikatunongan imay takot ya impatnag na samploran espiya tan saramay naimpluensyaan da. “Panon kabayag so agda panisia ed siak, lapu ed saray amin a tanda a ginawak ed saray nanleleetan da?” so imbaga nen Jehova sanen imbalikas to so inkasakitan to.—Numeros 14:11.
6 Imbalikas nen Jehova so manunan sengegan na problema—say inkapayakot na totoo so pakapatnagan na kakulangan day pananisia. On, say pananisia tan inkakpel so maapit a mansiglaotan, a maapit a tuloy kanian oniay insulat nen apostol Juan nipaakar ed Kristianon kongregasyon tan say espiritual a pankaabigan da: “Saya so pananalo a manaeg ed mundo, salanti say pananisia tayo.” (1 Juan 5:4) Natan, lapud pananisia a singa ed impatnag di Josue tan Caleb, say maong a balita so nipupulong la ed sankamundoan panamegley na masulok ya anemiran milyon a Tasi nen Jehova, malangwer tan matatken, mabiskeg tan maletey. Sayan mabiskeg tan makpel ya armada so agnapareen na siopaman a kabusol.—Roma 8:31.
Saray Espiritual a Kayamanan
mwbr21.03—it-1 740
Say Dalin ya Inter na Dios ed Israel
Say dalin ya inter na Dios ed Israel et talagan maong ya dalin. Nen imbaki nen Moises iray lalaki ya man-espiya ed Insipan a Dalin tan mangalay bunga na dalin diman, angisempet ira na saray igos, granada, tan sakey monil ya ubas ya lapud kabaleg to et kaukolan a sakbaten na duaran lalaki ed panamegley na tubo! Anggano natatakot ira lapud kulang so pananisia ra, oniay imbalita da nipaakar ed dalin: “Tua a manag-agus diman so gatas tan dilo.”—Nu 13:23, 27.
MARSO 29–ABRIL 4
KAYAMANAN ED SALITA NA DIOS | NUMEROS 15-16
“Agmagmamaliw ya Mapasirayew tan Makompiyansa ed Sarili”
Kasin Kabat Ka nen Jehova?
12 Balet, legan a mamapaarap so nasyon na Israel ed Insipan a Dalin, inisip nen Kora a walay aliwa ed uksoyan na Dios. Labay ton walay nagawan pananguman, tan 250 nin lalaki so dinmapag ed sikato. Segsegurado iran walad sikaray panangabobon nen Jehova. Oniay kuan dad si Moises tan Aaron: ‘Alabas lay panbalegbalegan yo, anta say amin a duypo et masanto. Miulop-ulop a lanang si Jehova ed balang sakey ed saray duypo.’ (Num. 16:1-3) Talagan mapaatagey ira tan alablabas so panagmatalek dad sarili da! Oniay ebat nen Moises ed sikara: “Ipatnag naani nen Jehova no siopa so too to [odino, kayarian to].” (Basaen so Numeros 16:5.) Diad ontumbok ya agew, inatey si Kora tan amin ya rebelden kaiba to.—Num. 16:31-35.
Kasin Kabat Ka nen Jehova?
11 Nengnengen tayoy mandumaan ya alimbawa na duaran lalaki, si Moises tan Kora. Naaralan tayod saray ginawa ra a say panmoria nen Jehova ed sikatayo et akadepende ed panrespeto tayod saray desisyon tan uksoyan to. Si Kora et Kohatitan Levita, tan dakel so pribilehyo to. Atasian toy impangiliktar nen Jehova ed Israel diad Ambalangan Dayat, sinuportaan toy impangukom nen Jehova ed saray masugnar ya Israelita diad Palandey Sinai, tan walay betang tod pangiyaalis-alis ed kaban na sipan. (Exo. 32:26-29; Num. 3:30, 31) Ompatnag ya sikatoy abayag lan manmamatoor ed si Jehova kanian rerespetoen na saray Israelita.
Saray Espiritual a Kayamanan
Seguroen a Niyuna Iray Prayuridad!
Minoria nen Jehova so kaso a seryoson tuloy. “Et,” kuan na Biblia, “si Jehova inkuan to ed Moises: ‘Satan a too napapatey naani a tuatua.’” (Numeros 15:35) Akin a mapekder a tuloy si Jehova nipaakar ed ginawa na saman a laki?
Walaan na anemiran agew so totoo pian mantipon na kiew ontan met pian asikasoen iray pankaukolan da parad tagano, kawesen, tan siruman. Say komapiton agew so nepeg ya ideboto ed saray pankaukolan da ed espiritual. Anggaman aliwan makapuy so pantipon na kiew, mauges so pangusar na panaon a nepeg a nigana ed panagdayew ed si Jehova. Anggaman anggapo’d silong na Mosaikon Ganggan iray Kristiano, agta sayan inkagawa so mangibangat ed sikatayo na sakey a leksion diad suston panangiyuna tayo’d saray prayuridad tayo natan?—Filipos 1:10.
ABRIL 5-11
KAYAMANAN ED SALITA NA DIOS | NUMEROS 17-19
‘Siak so Tawir Mo’
Kasin Ipapanengneng Mon si Jehova so Apag Mo?
9 Isipen pa iray Levita. Anggapoy tawir dan dalin. Say manunan kimey da et idaulo so nasyon ed malinis a panagdayew, kanian kaukolan ya manmatalek iran saray pankaukolan da et itarya nen Jehova, ya angibagad sikaran: “Siak so apag [yo].” (Num. 18:20) Anggan agtayo manlilingkor ed literal a templo a singa sikara, naalig tayoy panagmatalek dad si Jehova. Legan a manasingger so anggaan, nagkalalo lan kakkaukolan itayon manmatalek ya itarya na Dios iray pankaukolan tayo.—Apo. 13:17.
Si Jehova so Apag Ko
4 Sanen inter nen Jehova itan a kimey ed saray Levita, panon a sikatoy nagmaliw ya apag da? Imbes ya ikdan ira nen Jehova na tawir a dalin, inmatalek tod sikara so mabmablin pribilehyo. “Say inkasaserdote ed Jehova” so tawir odino apag da. (Jos. 18:7) Ipapanengneng na konteksto na Numeros 18:20 ya agmet ira manirap lapud satan. (Basaen so Numeros 18:19, 21, 24.) Naawat na saray Levita so “amin a kakaplo ed Israel ya onkana a sakey a tawir a magnayon, ya ombales ed kimey ya impanlingkor da.” Kabaliksan na saya ya onlad sikara so 10 porsiento na ani tan say idakel na ayayep na interon Israel. Iter met balet na saray Levita so “kamaomaongan” a kakaplo na naawat da pian nasuportaan so inkasaserdote. (Num. 18:25-29) Naawat met na saray saserdote so ‘amin a masanton apay’ ya iyapay na saray Israelita ed Dios diad pasen a pandadayewan dad sikato. Makapanmatalek sirin iray saserdote ya itarya nen Jehova iray pankaukolan da.
Saray Espiritual a Kayamanan
mwbr21.03—g02 6/8 14 ¶2
Asin—Sakey ya Importantin Produkto
Uusaren so asin pian isimbolo so inkaligen tan inkapermanente. Kanian diad Biblia, say sakey ya permanente tan agnauman ya sipanan et tinawag ya “sipanan na asin.” Saray kabiangan na satan ya sipanan et saniiban mangan ya walay asin pian paletan itan. (Numeros 18:19) Diad Mosaikon Ganggan, kaiba ed saray iyaapay ed altar so asin ya mangisisimbolo ed agkabulok.
ABRIL 12-18
KAYAMANAN ED SALITA NA DIOS | NUMEROS 20-21
“Mansiansian Mauyamo Anggano Mairap so Situasyon”
Anap Yoy Kauyamoan tan Paliket Yoy Jehova
19 Napaliisan tayoy makagawa na lingo. Isipen pa lamet si Moises. Pigaran dekada ya sikatoy nansiansian mauyamo tan apaliket toy Jehova. Balet nen magano lan manampot so 40 taon ya mairap ya impanbiahe ra ed kalawakan, agnipanengneng nen Moises so kauyamoan. Say atsi to, say posiblin tinmulong pian niliktar so bilay to diad Ehipto, et kakkapatey to ed saman tan imponpon ed Kades. Tan ibabaga lamet na saray Israelita ya ag-ira naaasikason maong. Diad saya et “kinolkol na saray totoo si Moises” lapud anggapoy danum. Anggano dakdakel lay anengneng dan milagro ya ginawa nen Jehova panamegley nen Moises tan anggano abaybayag la ya masakripisyon idadaulo ira nen Moises, nanreklamo ni ran siansia. Aglabat ira nanreklamo ya anggapoy danum noagta tinetel da met si Moises, ya singa kasalanan to no akin ya apaet ira.—Num. 20:1-5, 9-11.
Anap Yoy Kauyamoan tan Paliket Yoy Jehova
20 Sinmanok a maong si Moises kanian agto apansiansia so inkaulimek to. Imbes ya mansalita ed bato, ya singa ingganggan nen Jehova, nampasnokan to ray totoo tan inggloria toy sarili to. Insan, amidua ton imbasig so baston to ed baleg a bato tan pinmaway so amayamay a danum. Lapud inkamapaatagey tan sanok, balbaleg ya lingo so agawaan nen Moises. (Sal. 106:32, 33) Tan lapud temporaryon naandi so kauyamoan to, sikatoy agnaabuloyan ya onloob ed Insipan a Dalin.—Num. 20:12.
21 Makaaral tayo na importante iran leksion ed sayan inkagawa. Unona, nepeg ya naynay tayon pansagpotan ya pansiansiaen so mauyamon ugali tayo. No agtayo nipanengneng itan anggan magano labat, nayarin magmaliw tayon mapaatagey tan ompan makapansalita tan makagawa tayo na aliwa. Komadua, mairap so mansiansian mauyamo no nai-stress tayo, kanian pansagpotan tayon ipatnag itan anggano aliwan mainomay.
mwbr21.03—w09 9/1 19 ¶5
Ukom ya Mapekder ed no Antoy Duga
Unona, ag-ingganggan na Dios si Moises ya katongtongen iray totoo, tan ukomen ira bilang rebelde. Komadua, ag-inggloria nen Moises tan Aaron so Dios. “Agyo . . . ak pinasanto,” so kuan na Dios. (Bersikulo 12) Nen imbaga nen Moises ya “mamapaway kami na danum,” singa to ibabaga ya sikaran dua nen Aaron so angiter na danum, aliwan say Dios. Komatlo, say sentensia ed sikara et mipara ed saray panangukom na Dios ed apalabas. Ag-inabuloyan na Dios iray rebelde ed akaunan henerasyon ya makaloob ed Canaan, kanian ontan met so ginawa to ed si Moises tan Aaron. (Numeros 14:22, 23) Komapat, si Moises tan Aaron so mangidadaulo ed Israel. Saramay naikdan na ambelat ya responsabilidad et baleg so eebatan da ed Dios.—Lucas 12:48.
Saray Espiritual a Kayamanan
Kasin Miparad si Jehova so Panmoriam ed Kakapuyan na Arum?
12 Diad saratan ya situasyon, sarag komon nen Jehova ya dusaen a tampol si Aaron. Balet amta to ya aliwan mauges a too si Aaron tan aliwan sikato so manunan natetel. Sikatoy alingo lapud mairap ya situasyon tan impluensya na arum. Balet nen nipamoriad sikato iray lingo to, inamin ton tampol tan inawat toy simbawa nen Jehova. (Exo. 32:26; Num. 12:11; 20:23-27) Say ninengneng nen Jehova et say pananisia nen Aaron tan say pagbabawi to. Kalabas na pigaran siglo, kabkabat nin siansia si Aaron tan saray ilalak to ya walaan na takot ed si Jehova.—Sal. 115:10-12; 135:19, 20.
MAGMALIW YA EPEKTIBO ED MINISTERYO
mwbr21.03—g 1/15 9
No Panon Mon Nakontrol so Pasnok Mo
NO ANTOY NEPEG MON NAAMTAAN
No mapasnok ka, naderal so reputasyon mo. “Dati, iisipen ko ya dapat nasanay lay arum ed onian ugalik,” so imbaga nen Briana, ya mantaon na 21. “Pero apansin ko ya pakaskasi iramay agda nakontrol so liknaan da, kanian apaisip ak—ontan met sirin so pakanengneng na arum ed siak!” Ibabaga na Biblia: “Samay magangganon manpasnok et onkikiwas a makulangkulang.”—Proverbio 14:17.
No mapasnok ka, iwasan ka na arum. “No agmo nakontrol so pasnok mo,” so imbaga nen Daniel, mantaon na 18, “onabebay pakanengneng na arum ed sika tan naekal so respeto da ed sika.” Onabobon ed satan si Elaine, mantaon met na 18. Imbaga to: “No mapaspasnok ka, mairap ka laingen ya asinggeran na arum ta natatakot ira ed sika.” Ibabaga na Biblia: “Agka miuulop ed samay mipepetang so ulo to tan agka mimilmila ed toon misasanok.”—Proverbio 22:24.
Sarag mon nakontrol so pasnok mo. “Nayarin agmo nakontrol so liknaan mo ed sakey ya situasyon,” so imbaga nen Sara, mantaon na 15, “balet sarag mon kontrolen no panon mon ibalikas so naliliknam. Agmo la kailangan so onsanok.” Ibabaga na Biblia: “Samay matantan a manpasnok et mas maong ni nen say mabiskeg a laki, tan samay kokontrolen toy petang na ulo to et mas maong ni nen samay manasakop na syudad.”—Proverbio 16:32.
NO ANTOY NAGAWAAN MO
Mangi-set na goal. Imbes ya ibagam, “Ta onia ak lan talaga,” gawam so anggaay nayarian mon kontrolen so sanok mo diad loob na sakey ya espisipikon panaon—singa bilang, diad loob na anem bulan. Legan na satan ya panaon, ilistam iray maong ya nagagawaan mo. Kada no akapasnok ka, isulat mo no (1) antoy agawa, (2) antoy reaksion mo, tan (3) anto komon so dugan reaksion mo—tan akin. Tan gawam ya goal ya gawaen no antoy dugan reaksion mo diad ontumbok ya makakapasnok ka la. Tip: Ilistam met iramay panaon ya akontrol moy pasnok mo! Isulat mo iray balibalin aliknam nen kinontrol moy liknaan mo.—Prinsipyo ed Biblia: Colosas 3:8
Isip mo ni ibagam. No makakapasnok ka lapud sakey a bengatla odino lapud ginawa na arum ed sika, agmo ibabagan tampol so unonan naisip mo. Imbes, pannonotan mo ni. Ingas kay aralem no kaukolan. Oniay imbaga nen Erik, ya mantaon na 15: “No oningas ak na aralem, mas makapannonot ak ni imbes ya basta ak labat makagawa odino makapangibaga na pagbabawian ko lanlamang.”—Prinsipyo na Biblia: Proverbio 21:23.
Palaknab moy pakatalos mo. No maminsan, nayarin makapasnok ka ta ompan manpopokus ka labat ed sakey ya parte na problema—amay akasakit ed sika. Salim ya amtaen so arum ya detalye na problema. Oniay imbaga nen Jessica: “Anggano aliwliway panagtrato na arum, walan walay rason ya nayarin makatulong ed siak pian natalosan ko no akin ya onman ira.—Prinsipyo na Biblia: Proverbio 19:11.
No kaukolan, alis ka la. Ibabaga na Biblia: “Antis nin ompetang so sangsangan, taynan ka la.” (Proverbio 17:14) Singa ipapanengneng na satan ya teksto, no maminsan et mas maong lay ontayanan ed makapasyodot ya situasyon. Insan, imbes ya nonot ka lan nonot ed agawa tan onloor so sanok mo, manggawa na arum ya bengatla. “Apruebaan ko ya no mani-exercise ak, mas onlelemew so liknaan ko, tan mas nakokontrol koy pasnok ko,” so imbaga na sakey ya biin si Danielle.
Palampasen la. Ibabaga na Biblia: “No onsasanok ka, agka komon mankakasalanan. No walay ibagam, dia labat lad pusom, . . . tan mandeen ka labat.” (Salmo 4:4) Tandaan ya agmet mauges ya nalikna so pasnok. Balet say tepet, Antoy onsublay ya nagawa? Oniay imbaga na sakey ya kabataan ya si Richard: “No paulyanan mon onsanok ka lapud ginawa o imbaga na arum ed sika, manpapakontrol ka ed sikara. Mas maabig no ipanengneng mon mature ka tan palampasen lay agawa.” No ontan so gagawaen mo, kokontrolen moy pasnok mo, imbes ya sika so kokontrolen na satan.
ABRIL 19-25
KAYAMANAN ED SALITA NA DIOS | NUMEROS 22-24
“Pinagmaliw nen Jehova ya Bendisyon so Ayew”
mwbr21.03—bt 53 ¶5
Pangiyabawag ed “Maong a Balita Nipaakar ed si Jesus”
5 Singa met nen inmunan siglo, anggano napapasegsegang iray totoo na Dios natan, ag-ira ontutundan manpulong. Apaneknekan la ya no puersaan ya awiten ed arum ya lugar iray Kristiano—balanglan diad prisoan odino diad arum ya bansa—makakatulong laingen itan pian nipakabat so mensahe na Panarian diad balon pasen ya laen da. Singa bilang, nen World War II, baleg ya pantasi so agawaan na saray Tasi nen Jehova diad saray panamairapan ya kampo na Nazi. Oniay imbaga na sakey ya Judio ya akabat to ray Tasi diad kampo: “Lapud mapekder iray aprison Tasi nen Jehova, akombinse ak ya base ed Biblia iray papanisiaan da—lapud satan et nagmaliw ak met ya Tasi.”
mwbr21.03—it-2 291
Inkamakulangkulang
Kakulangkulangan so Ikontra ed si Jehova. Makulangkulang si Balaam ta labay toy manpropesiya kontra ed Israel pian makaawat na kuarta ed si Balak ya ari na saray Moabita, balet ag-itan inabuloyan nen Jehova tan inamper to itan. Insulat nen apostol Pedro so nipaakar ed si Balaam ya “inamper na sakey ya andiay boses ya asno a nansalitan singa too so makulangkulang a gagawaen na sayan propeta.” Inusar na apostol so Griegon salita ya pa·ra·phro·niʹa pian tukoyen so inkamakulangkulang nen Balaam, ya say labay ton ibaga et “anggapod sarilin isip to.”—2Pe 2:15, 16; Nu 22:26-31.
Saray Espiritual a Kayamanan
Saray Pabitar ed Libro na Numeros
22:20-22—Akin a dinmalang so sanok nen Jehova ed si Balaam? Imbaga la nen Jehova ed si propetan Balaam ya agto nepeg ya ayewen iray Israelita. (Numeros 22:12) Balet, linma so propeta a kaiba iray bataan nen Balak a getma ran ayewen so Israel. Kinaliktan nen Balaam a paliketen so ari na Moabita tan makaawat na tumang manlapud sikato. (2 Pedro 2:15, 16; Judas 11) Anggaman apaskar si Balaam a papalaren so Israel imbes ya ayewen to, nanggunaetan to nin siansia so pabor na ari diad impangisuheri ton usaren iray bibiin mandadayew ed si Baal pian ayaten iray lalakin Israelita. (Numeros 31:15, 16) Kanian, say rason ed insanok na Dios sumpad si propetan Balaam et say andiay-prinsipyon inkaagum to.
ABRIL 26–MAYO 2
KAYAMANAN ED SALITA NA DIOS | NUMEROS 25-26
“Kasin Walay Nagawaan na Anggan Sakey Labat ya Too?”
“Ibatikan Yoy Seksual ya Imoralidad!”
Linma so sakey a too ed lugar ya kawalaan na sira ya labay ton banwiten. Nampili na tapang tan ginmapon nanbanwit. Maanos ya nanalagar, tan nen walay sira ya angan ed tapang, binigsot ton tampol so banwit kanian atagaan so sira tan narel to.
2 Nayari met ya naerel iray totoo ed ontan a paraan. Singa bilang, nen ngalngali lan makasabi iray Israelita ed Insipan a Dalin, nankampo ra ed Patar na Moab. Insipan na ari na Moab ya ikdan to si Balaam na dakel a kuarta no isamba to so Israel. Ag-abayag, akanonot si Balaam na paraan pian saray Israelitan mismo so mangisamba ed sarili da. Inisip ton maong no antoy usaren ton tapang. Angibaki na saray kabataan ya Moabitan bibii ed kampo na saray Israelita pian tuksoen iray lalaki ditan.—Numeros 22:1-7; 31:15, 16; Apocalipsis 2:14.
“Ibatikan Yoy Seksual ya Imoralidad!”
4 Akin et amayamay ya Israelita so apatitan nen Balaam? Say sankanonot da labat et say pamenek dad sarili dan pilalek, tan alingwanan da so amin ya ginawa nen Jehova parad sikara. Dakel komon so rason na saray Israelita pian manmatoor ira ed Dios. Imbulos to ra ed impakaaripen da ed Ehipto, pinakan to ra diad kalawakan, tan prinotektaan to ra anggad akasabi ra ed ketegan na Insipan a Dalin. (Hebreo 3:12) Balet, atukso ni ran siansia ya manggaway seksual ya imoralidad. Oniay insulat nen apostol Pablo: “Agtayo met komon manggagaway seksual ya imoralidad, a singa say arum ed sikara a nanggaway seksual ya imoralidad, kanian inatey [ira].”—1 Corinto 10:8.
Saray Espiritual a Kayamanan
mwbr21.03—it-1 359 ¶1-2
Ketegan
Diad impangapag ed dalin ya tawiren na kada tribu, napatnagan iyan duaran basiyan: say resulta na pampapalaranan, tan say kabaleg na tribu. Nayarin naamtaan panamegley na pampapalaranan so pasen na dalin ya tawiren na kada tribu, kanian nibaga la no iner ya parte na dalin so tawiren da, singa bilang diad bandad N odino S, E odino W, gilig na dayat, odino diad saray kapalandeyan. Say resulta na pampapalaranan et nanlapud si Jehova kanian napaliisan so paniimonan tan pankokolkol na saray tribu. (Pro 16:33) Lapud satan ya paraan, nigiya met na Dios iray nagawa pian say magmaliw ya kipapasen na kada tribu et mitukoyan ed samay pinuyanan ya propesiya na patriarkan si Jacob antis ya inatey, ya singa nabasa ed Genesis 49:1-33.
No naamtaan la panamegley na pampapalaranan no iner ya banda so dalin ya iter ed sakey a tribu, desisyonan da no panon kaawang so magmaliw ya teritorya to base ed samay komaduan basiyan: say kabaleg na tribu. “Nepeg yon apagen so dalin ed panamegley na pampapalaranan bilang sakey a kayarian na saray pamilya yo. Parad babaleg a grupo et aruman yo so tawir to, tan parad memelag a grupo et bawasan yo so tawir to. Say tawir na balang sakey et samay pinmaway parad sikato ed panamegley na pampapalaranan.” (Nu 33:54) Kaukolan ya unoren so resulta na pampapalaranan nipaakar ed pasen na dalin, balet nayarin umanen so kabaleg na dalin ya natawir. Kanian nen naamtaan ya masyadon baleg so dalin na Juda, binawasan so kabaleg na satan tan inter so arum ya parte ed tribu na Simeon.—Jos 19:9.