Aralen a Panliketan so Salita na Dios

MALIKET so too ‘a say panliketan [to] et diad ganggan nen Jehova.’ Basaen na satan a too so Salita na Dios “a makalna ed agew tan labi.” (Sal. 1:1, 2, NW) Kasin nanaeksperiensiam itan a liket? Panon mon napadaak so gayagam ya itatarok ed sika na Salita na Dios?

Ontalineng Legan a Mansasalita si Jehova

Aglabat la basta basaen iray salita. Iretrato ed kaisipan iray kipapasen ed nababasam. Isipen iray boses na saraman so inaon. Legan mon babasaen iray manangilukas a kapitulo na Biblia, dengelen si Jehova a kalkalnan mangipaparungtal ed ginawa to diad impangiparaan ed dalin a manepeg ed too. Talinengen legan ya ibabaga to ed Anak to, say Pangulon Komikimey, a sinmabi la so panaon pian palsaen so inmunan totoo. Iretrato so eksena: Nanrebelde si Adan tan Eva, impaakseb na Dios so panangukom ed sikara tan, tinmumbok, sikara so pinataynan to ed Paraiso. (Genesis, kap. 1-3) Liknaen so mapagalang a takot sano nabasam ya ipapakabat na sakey a boses manlapud tawen si Jesu-Kristo bilang say Anak na Dios, say inad-aro, say sakey ya imbaki na Dios a mangisaklang na bilay to para ed katooan. (Mat. 3:16, 17) Salien ya isipen so inkiwas nen apostol Juan sanen nadngel ton iyaabawag nen Jehova a: “Nia, siak gawaen ko a balo so saray amin a bengatla.” (Apoc. 21:5) Tua, say panagbasa ed Salita na Dios ed onian paraan so makapalikliket ya eksperiensya!

Itultuloy a basaen so impuyan a rekord, tan naamtaan moy Jehova bilang sankarlangan tan makapakelkelaw a persona. Napaapit kan maong ed sayan Sakey a mangaaro ed sikatayo, a midedeneng a sipapangasi ed sikatayo, ontutulong ed sikatayo no mapaabeba itayon manggugunaet a gawaen so linawa to, tan mangipanengneng ed sikatayo no panon a panggayagaan so italona ed amin a gawaen tayo.​—Jos. 1:8; Sal. 8:1; Isa. 41:10.

No malaem a panaon so usaren mon manbasa ed Biblia, lalon napenek ka legan ya ombulaslas ka diad pikakabat ed linawa na Dios parad sika. Ingen say panliket so nagkalalo ni nen say satan. Sano say panagbasam so makatutulong ed sika diad pangarap a sikakabat ed saray problema, naliknam so singa alikna na salmista ya angikuan: “Saray panamintuan [“panonot,” NW] mo makapakelaw ira; kanian say kamarerwak unoren to ra.” (Sal. 119:129) Sika met so manliket sano natebek mo manlapud Kasulatan iray prinsipyon ontulong a mangiwanwan ed kanonotan mo tan saray pilalek mo ed maridios a dalan.​—Isa. 55:8, 9.

Itatarya na Biblia so moral a giya a manalimbeng ed sikatayo manlapud kasakitan tan mangipanengneng ed sikatayo ed dugan dalan. Legan a babasaen tayo itan, natebek tayo a si Jehova so sakey ya Ama a mikabat ed saray probleman onsabi sano onsuko itayo ed pilpilalek na ag-ayadyarin laman. Agto labay a sagmaken tayo iray teriblin pansumpalan ya onsabin agnapaliisan lapud impanleglemew ed saray atagey ya estandarte to ed moral. Tatalimaen to itayo tan labay to itayon manggayaga ed sankaabigan a dalan na bilay. Say pambasa tayo ed Salita to so ontulong ed sikatayon mangapresyan nagkalalo ya agaylan bendisyon so pamidbir tayon sikato so Dios tan mangatatawen ya Ama tayo.

Basaen so Biblia ya Inagew-agew

Inkuan na salmista nipaakar ed toon manbabasa ed Salita na Dios ya inagew-agew: “Amin a gawaen to ombuna.” (Sal. 1:3) On, anggaman ed saray agtayo inkayadyari, anggaman manbibilay itayo ed marelmeng a sistema na bengabengatla nen Satanas, tan anggaman pambabanikelan na Diablo so panabsab ed sikatayo, say maparanay a panagbasa tan panangiyaplika ed Salita na Dios so ontulong ed sikatayon ontalona ed amin a bengatlan manasaglawi ed relasyon tayo ed si Jehova.

Lapud sikatayo so nadedesdes manlapud sayan daan a sistema, mamabiskeg ed sikatayo so panmolimoli ed saray kanonotan na Manamalsa anggano ed pigpigaran mabmablin bekta kada agew. Arum ya apriso nisesengeg ed pananisia ra so akabasa lambengat na pigaran bersikulo ya aromog dan inaon ed saray artikulo ed peryodiko. Saraya so kinakatli ra, impatlep da, tan dinalepdep da. Benendisyonan nen Jehova iray sagpot da lapud ginawa ra so inyabuloy na sirkumstansya ra diad pangala ra na pikakabat manlapud Salita na Dios. (Mat. 5:3) Ingen, maslak ed sikatayo so walaan na lalon kawayangan nen say satan. Agtayo ibabagan say masiglat a pambasa ed sakey a bersikulo na Biblia a maminsan ed sakey ya agew so masarag la pian nawalaan na mamilagron epekto. Anggaman ontan, nagamoran tayo iray bendisyon no iyarunsa tayoray nepeg tayon unaen ta pian nabasa so porsyon na Biblia a kada agew, nadalepdep, tan niyaplika itan ed bilay tayo.

Diad tua, saray sankaabigan a plano tayo so nayarin naderal. No ontan so nagawa, iyuna tayo iray bengatlan peteg ya importante. Alimbawa, agtayo gagalaen so ag-oninum na danum ed sanagew odino duay agew. Sirin, antokaman so onsabi ed inagew-agew a bilay tayo, mangigana itayo na panaon a represkoan so inkasikatayo ed saray danum na katuaan.​—Gawa 17:11.

Basaen ya Intero so Salita na Dios

Kasin abasam lan personal so interon Biblia? Liknaen na arum a mairap so pambasa manlapud Genesis anggad Apocalipsis. Kanian, dakel a malabay a manbasa ed interon Biblia so ginmapo diad impamasa ya unona ed Kristianon Griegon Kasulatan. Akin? Nayari pa lagin lapud mainomay dan natalosan no panon a saratan a libro na Biblia so onaplika ed sikara bilang indibidual a manggugunaet a mankurang ed saray bakat nen Kristo. Odino nayarin lapud say Kristianon Griegon Kasulatan et singa aliwan dakerakel a basaen​—ta masudsulok labat a kakapat na Biblia. Balet kayari ran abasa iratan a 27 a libro, impaarap day imano ra ed 39 a libro na Hebreon Kasulatan tan ginapoan dan basaen tan panggayagaan iratan. Diad pakasumpal da ed Hebreon Kasulatan, akapangiletneg la ra na pangaligan parad maparanay a panagbasa ed Biblia, kanian intuloy dan basaen lamet a mikadua so Kristianon Griegon Kasulatan, tan agda lan balot intunda. Komon ta iyugalim met ed legay-bilay mo so inagew-agew a panagbasa ed Salita na Dios.

Kasin walay agmakabasa ed pamilyam odino ed kongregasyon yo? Akin ya agmo iyopresi ed satan a too ya ibasa so Biblia a maparanay? Sika so nagunggonaan, tan sikato met so nagunggonaan legan a dadalepdepen to iray narerengel to tan insan to iyaplika ed bilay to.​—Apoc. 1:3.

Nasabi panaon, nayarin labay mon igapo so nikabkabiig iran proyekto nipaakar ed panagbasam ed Biblia. Arum ed saraya so mamalaknab na pakatalos mo ed siglaotan na saray nanduruman parte na Biblia. No say Bibliam et walaan na marhinal iran reperensya, saraya so nayarin mangipaarap ed sika ed maawaran iran detalye tan misiglaotan iran salaysay. Natulongan ka na saraya pian natebek iray sirkumstansya ya angitonton ed inkisulat na nanduruman salmo ontan met ed saray sulat ya insulat na saray apostol nen Jesu-Kristo. Say Insight on the Scriptures so mangiter na daakan ya impormasyon nipaakar ed saray totoo, paspasen, tan diad saray kalidad ya abitla ed Biblia. Ipaimano na saray tsart so kasumpalan na saray propesiya na Biblia, ya ipanengneng to no sioparan arari tan propeta so bansag a nambilay, tan mangiter na kinalkula iran petsa ed dakel iran agawgawa ed Biblia.

Legan mon dadalepdepen so nanaaral mo, natalosan mo so rason no akin a saray ontan a kipapasen so agawa ed limog na totoo na Dios. Naromog mo met no akin ya akideneng si Jehova ed totoo to unong ed impideneng to. Natalosan mo no panon a denetermina nen Jehova iray kiwas na gobierno, totoo, tan indibidual. Saya so mangiter ed sika na nagkalalon pakatalos ed panagnonot to.

Magmaliw a lalon makapainteres ed sika so awaran na Biblia sano iretratom ed isip mo so pasen ya akagawaan na satan. Saray mapa na daldalin ya asalambit ed Biblia so mangibabaga ed saray basbas ontan met ed distansia ed baetan na paspasen. Alimbawa, no kalkulaen, iner so binaliwan na saray Israelita ed Ambalangan Dayat? Anto so sukat na Insipan a Dalin? Kaunongan kaarawi so inakar nen Jesus sanen sinumpal to so mangaraldalin a ministeryo to? Antoran paspasen kasi so anengneng nen Pablo ed saray impanbiahe to bilang misionaryo? Saray mapa tan heograpiko iran deskripsion so mangipasabi ed saray detalyin manggawan mabilabilay so panagbasam. Iner so pakaromogan mo ed saray mapa na daldalin ya asalambit ed Biblia? Arum so wala ed New World Translation of the Holy Scriptures. Lugan na saray tomo na Insight so ngalngalin 70 a mapa, tan walay sakey ya indese na mapa ed sampot na unonan tomo. Usaren so Watch Tower Publications Index diad pananap ed arum a mapa. No anggapo ed sika irayan reperensya, usar mo iray mapan impalapag ed Say Panag-Bantayan pian ontulong ed sika ed panagbasam ed Biblia.

Diad Hebreon Kasulatan, intandoro nen Arin David si Jehova, a kuanto: “Alay kablian na nodnonot mo ed siak! O Dios! Alay kinabalgan na asinop a bilang da!” (Sal. 139:17) Diad Kristianon Griegon Kasulatan, indayew nen apostol Pablo si Jehova lapud Sikato “so sinminag ed saray kapusoan tayo pian liwawaan to ra ed maglorian pikakabat na Dios diad lupa nen Kristo.” (2 Cor. 4:6, NW) Pigaran siglo so baetan na impanbilay nen David tan si Pablo; ingen ta namparan nanliketan da so Salita na Dios. Ontan mo met no mangigana ka na panaon pian basaen so amin ya inter nen Jehova ed sika diad saray pahina na apuyanan a Salita to.