Kasin Makatulong so Biblia Pian Magmaliw Tayon Makonsidera?
“Magmaliw labat ya mareen so interon mundo no magmaliw ya makonsidera iray totoo.”—UNESCO Declaration of Principles on Tolerance, 1995.
No agbalet manpapalugaran iray totoo, agda nipanengneng so respeto ed balang sakey tan manlalaban ira. No ontan so sakey ya too, magmainomay toy mansalita na ansakit, melmelagen so arum ya lahi, tan sakitan iray arum ya totoo.
Pero nandurumay iisipen na totoo tungkol ed pagmaliw ya makonsidera. Panisiaan na arum ya no say sakey ya too et makonsidera, dapat payagan to so amin ya kagagawa tan ugali. Panisiaan balet na arum imay ibabaga na Biblia, ya saray makonsidera ya totoo et rerespetoen day kanepegan na sakey ya mandesisyon tan manpili na panisiaan anggano sikaran mismo et ag-ira onabobon ed saratan ya desisyon tan pananisia.
Talaga kasin makatulong so Biblia pian magmaliw ya makonsidera iray totoo ed panaon tayo?
No akin ya ipapaseseg na Biblia so pagmaliw ya makonsidera
Ipapaseseg na Biblia so pagmaliw ya makonsidera. Onia so nabasa ditan: “Naamtaan komon na amin a totoo a makatunongan kayo.” (Filipos 4:5) Papasesegen itayo na Biblia ya makonsidera, magalang, tan patas so pantrato tayo ed totoo. Saramay mangiyaaplika ed sayan bilin na Biblia et nayarin agda abobonan o aaligen so kagagawa na sakey ya too, balet papaulyanan da no antoy labay ton gawaen.
Ibabaga balet na Biblia, no anto so labay na Dios ya dapat ya ikiwas na saray totoo. Nabasa ditan: “Imbaga na [Dios] ed sika, O too, no antoy maabig.” (Miqueas 6:8) Nabasa ed Biblia iray instruksion na Dios pian magmaliw ya maliket so bilay na saray totoo.—Isaias 48:17, 18.
Ag-itayo inikdan na Dios na autoridad ya ukomen iray arum ya totoo. Base ed Biblia, “Saksakey so Manangiter na Ganggan tan Ukom . . . Siopa ka a mangukom ed kaparam a too?” (Santiago 4:12) Inikdan na Dios so kada sakey ed sikatayo na kalayaan ya mandesisyon parad sarili tayo.—Deuteronomio 30:19.
No antoy ibabaga na Biblia tungkol ed respeto
Ibabaga na Biblia ya kailangan tayon “respetoen so amin.” (1 Pedro 2:17, New Jerusalem Bible) Kanian saramay nandesisyon ya manbilay base ed ibabaga na Biblia et rerespetoen day amin ya totoo, anggan antoy pananisia o kabibilay da. (Lucas 6:31) Aglabay ya ibaga na satan ya abobonan da so amin ya pananisia o opinyon na arum odino suportaan da so anggan anton desisyon na too. Imbes ya balawen tan ag-respetoen iray arum ya totoo, pansagpotan dan aligen so impantrato nen Jesus diad saray totoo.
Singa bilang, aminsan et walay akatongtong nen Jesus ya biin dumay relihyon to. Wala met so kaamong na samay bii ya agto asawa—kagagawa ya agbalot konsintien nen Jesus. Anggaman ontan, marespeto nin siansia so impitongtong tod samay bii.—Juan 4:9, 17-24.
Singa si Jesus, labalabay na saray Kristiano ya ipaliwawa so papanisiaan da ed saray malabay ya ondengel, balet gagawaen da itan ya walaay “aralem ya respeto.” (1 Pedro 3:15) Bibilinen na Biblia iray Kristiano ya agda ipipilit iray opinyon da ed arum. Nabasa ditan ya saray papatumbok nen Kristo et “agnepeg a mikolkol, noagta nepeg a mauyamo ed amin,” pati diad saramay duma so papanisiaan da.—2 Timoteo 2:24.
No antoy ibabaga na Biblia tungkol ed pambusol
Oniay ibabaga na Biblia ed sikatayo: “Panseetan yoy mikareenan ed amin a totoo.” (Hebreo 12:14) No say sakey et labay toy mikareenan, ekalen tod puso toy pambusol. Anggano agto ikompromisoy papanisiaan to, pansagpotan to balet so manbilay ya mareen kaiba iray arum ya totoo. (Mateo 5:9) Diad tua, papasesegen na Biblia iray Kristiano ya aroen da iray mamubusol ed sikara tan tratoen da ra diad mabait ya paraan anggano aliwliwa so panagtrato ed sikara na arum.—Mateo 5:44.
Tua, ibabaga na Biblia ya “kagula,” odino “kabusol,” na Dios iray kagagawa ya mangekal na dignidad na arum odino mangipeligro na bilay da. (Proverbio 6:16-19) Balet inusar dia na Biblia so salitan “kabusol” pian ideskribe so graben agpanlabay ed saray mauges ya kagagawa. Ibabaga na Biblia ya akaparaan so Dios ya perdonaen tan tulongan iray totoo ya labay dan umanen so kabibilay da tan manbilay ira base ed estandarte to.—Isaias 55:7.
Saray bersikulo ed Biblia tungkol ed pagmaliw ya makonsidera tan marespeto
Tito 3:2: “Magmaliw iran makatunongan, ya ipatnag day inkaulimek ed amin a totoo.”
Say makatunongan ya too et kalmado labat so reaksion to, tan rerespetoen to ray arum anggano dumay opinyon da.
Mateo 7:12: “Sirin, amin a labay yon gawaen na totoo ed sikayo, ontan met so nepeg yon gawaen ed sikara.”
Balibali liknaan tayo no respetoen itayo na arum tan ikonsidera day liknaan tayo. Pian makaaral ni no panon ya niyaplika iyan kabkabat ya imbangat nen Jesus, nengnengen so artikulon “Ano ang Gintong Tuntunin?”
Josue 24:15: “Manpili kayod sayan agew no siopay panlingkoran yo.”
No rerespetoen tayoy kanepegan na arum ya mandesisyon parad sarili ra, labay tayon niwalay kareenan.
Gawa 10:34: “Anggapoy lalabien na Dios.”
Say Dios et anggapoy lalabien to lapud kultura, kasarian, nasyonalidad, lahi, odino lugar ya nanlapuan. Saramay labay dan aligen so Dios et rerespetoen day amin ya totoo.
Habacuc 1:12, 13: ‘Ag-abuloyan na Dios so kaugsan.’
Walay limitasyon na panaanos na Dios. Agto abuloyan ya mantultuloy ed andi-anggaan so inkauges na totoo. Pian naarumay antam, bantayan so video ya Akin et Aabuloyan na Dios so Paniirap?
Roma 12:19: “Noagta ikdan yo na pasen so sanok; ta nisulat: “‘Kien ko so panangibales; siak so ombawi,’ kuan nen Jehova.”a
Anggapoy anggan siopa ya inikdan nen Jehova a Dios na autoridad ya ombales. Seguradoen to ya niiter so hustisya diad dugan panaon ya pilien to. Pian naarumay antam, basaen so artikulon “Makakamit Pa Ba Natin ang Katarungan?”
a Jehova so personal ya ngaran na Dios. (Salmo 83:18) Nengnengen so artikulon “Siopa si Jehova?”