Say Libro na Apocalipsis—Antoy Labay ya Ibaga na Satan?
Say ebat na Biblia
Say libro ed Biblia ya Apocalipsis ya diad Griego et A·po·kaʹly·psis, et mankabaliksan na “Panangiparungtal” odino “Pangipaamta.” No ontan sirin, naamtaan dia iray bengatlan akaamot tan saray nagawa ed arapen ya abaybayag lan nisulat. Dakel ed saray propesiyan akasulat ditan et agni asumpal.
Sumaryo na libron Apocalipsis
Introduksion.—Apocalipsis 1:1-9.
Mensahe nen Jesus ed pitoran kongregasyon.—Apocalipsis 1:10–3:22.
Pasingawey ya say Dios et walad trono tod tawen.—Apocalipsis 4:1-11.
Nantutumbokan ya pasingawey:
Pitoran tatak.—Apocalipsis 5:1–8:6.
Pitoran trumpeta, say unor ya talora et ipaamta ray taloran kairapan.—Apocalipsis 8:7–14:20.
Pitoran yaong, kada sakey et nankargay salot ya mangirerepresentad panangukom na Dios ya ikalbo ed dalin.—Apocalipsis 15:1–16:21.
Pasingawey tungkol ed kaderal na saray kabusol na Dios.—Apocalipsis 17:1–20:10.
Pasingawey tungkol ed saray bendisyon na Dios ya iter tod tawen tan dalin.—Apocalipsis 20:11–22:5.
Konklusyon.—Apocalipsis 22:6-21.
Saray nepeg ya tandaan pian natalosan so libro ya Apocalipsis
Say mensahe to et positibo, aliwan makapataktakot ed saray manlilingkor ed Dios. Anggano iisipen na dakel ya say salitan “apocalipsis” et tungkol ed graben kadederal, nabasa ed gapo tan sampot na libron Apocalipsis ya saray manbabasa, makakatalos, tan mangiyaaplika ed mensahe to et maliket ed panggawa dad satan.—Apocalipsis 1:3; 22:7.
Nabasa ed Apocalipsis so dakel ya “simbolo” o tanda, ya aliwan literal so kabaliksan da.—Apocalipsis 1:1.
Dakel so ngaran tan simbolo ed libro na Apocalipsis ya abitla lad akauna iran libro na Biblia:
Jehova—say “tuan Dios ed tawen” tan Amalsa ed amin.—Deuteronomio 4:39; Salmo 103:19; Apocalipsis 4:11; 15:3.
Jesu-Kristo—“say Kordero na Dios.”—Juan 1:29; Apocalipsis 5:6; 14:1.
Satanas ya Diablo—kalaban na Dios.—Genesis 3:14, 15; Juan 8:44; Apocalipsis 12:9.
Makapanyarin Babilonia—singa say syudad na Babilonia nensaman (Babel), ya kalaban nen Jehova a Dios tan saray totoo to tan ditan nanlapu so amin ya katilaan na relihyon.—Genesis 11:2-9; Isaias 13:1, 11; Apocalipsis 17:4-6; 18:4, 20.
“Dayat”—saray mauges ya totoon kakalabanen day Dios.—Isaias 57:20; Apocalipsis 13:1; 21:1.
Saray bengatla ya miparad parte o gagawaen ed tabernakulo nensaman parad panagdayew ed Dios—kaiba lay kaban na sipanan, salming a dayat (palanggana ya panag-urasan), lamparaan, pangiyapay na insenso, tan altar ya pambabagatan.—Exodo 25:10, 17, 18; 40:24-32; Apocalipsis 4:5, 6; 5:8; 8:3; 11:19.
Makapataktakot iran atap ya ayep—mangisisimbolod saray gobierno na too.—Daniel 7:1-8, 17-26; Apocalipsis 13:2, 11; 17:3.
Saray numero ya walay isisimbolo da.—Apocalipsis 1:20; 8:13; 13:18; 21:16.
Saray pasingawey ditan et ontutukoy ed “agew na Katawan,” ya ginmapo nen niletneg so Panarian na Dios nen 1914 tan ginmapon nanuley si Jesus bilang Ari. (Apocalipsis 1:10) Ilaloan tayo sirin ya nasumpal ed panaon tayo iray akasulat ed Apocalipsis.
Pian natalosan tayo so libro na Apocalipsis tan arum nin libro na Biblia, kaukolan tayoy karunongan ya nanlapud Dios tan patulongan tayod saramay natatalosan da itan.—Gawa 8:26-39; Santiago 1:5.