Linmaknab so Maong a Balita

KAYARI inkakomberte nen Pablo, sikatoy maseseg ya angipulong ed maong a balita nipaakar ed Panarian na Dios​—diad saman to met asali so graben isusumpa, a datin kagagawa to. Sayan makulin apostol et aminpigan nambiahe na ararawi pian ipulong so Panarian a manumpal ed orihinal a gagala na Dios parad katooan.

Diad Listra, legan na inmunan biahe nen Pablo, pinaabig toy sakey a lakin lupoy nanlapu la’d inkianak to. Kabekta et iyeeyag na dakel a totoo a si Pablo tan si Bernabe et dirios. Ngalngalin agdan dua nabano iray totoo a mangiyapay na saray bagat ed sikara. Balet ag-abayag, sanen saraya lanlamang a totoo et sinugsogan na saray onsusumpa ed si Pablo, tinutupak day Pablo ya anggad abaloan dan inatey la. Ag-inatey si Pablo ed impangataki ra tan asabi panaon et amawil lamet ed satan a syudad pian pasesegen iray babangatan.

Ipipilit na arum a Judion Kristiano ed saray aliwan Judion mananisia a kaukolan dan unoren iray kabiangan na Ganggan a niiter ed si Moises. Inkonsulta nen Pablo so isyu ed saray apostol tan mamasiken ed Jerusalem. Kayari dan inusisa so Kasulatan tan diad tulong na masanton espiritu na Dios, nansulat ira ed saray kongregasyon tan insimbawa ray iyarawi ed panagtalintao, pangan na dala tan ag-aparalaan a karne, tan ed pilalawanan. Saratan a ganggan et “kaukolan” odino importante, pero agto kabaliksan a pian naunor iraya et nepeg a tumboken so Mosaikon Ganggan.​—Gawa 15:28, 29.

Diad tinmumbok a biahe to, binisita nen Pablo so Berea, a natan et walad sakop na Greece. Saray Judion manaayam ditan so angawat ed impulong ed sikara, tan inusisa da so Kasulatan ya inagew-agew pian seguroen so ibabangat to. Lapud isusumpa et inmalis lamet si Pablo, a nakar toy Atenas. Diad arap na saray de-aral a taga Atenas, mapuersay impansalita nen Pablo, a saman so uliran ed inkamataktika, pakatebek, tan inkamaong a mansalita.

Kayari komatlon impanbiahe to, linma si Pablo ed Jerusalem. Sanen linma ed templo diman, walay pigaran Judio a nanggulo, a labay dan sikatoy pateyen. Balet ag-itan atuloy ta akibabali iray Romanon sundalo, insan da tinetepetan si Pablo. Bilang sakey a taga Roma, ag-abayag et indepensa toy inkasikato ed arap na Romanon Gobernador a si Felix. Anggapoy ebidensia na saray Judio ed akusasyon da ed si Pablo. Pian amperen si Festo a gobernador met na Roma, ed pangiyawat ed sikato ed saray Judio, inkuan nen Pablo: “Ompanon ak ed Cesar.” Inmebat si Festo: “Onla ka naani ed Cesar.”​—Gawa 25:11, 12.

Inlugan ed barko si Pablo pian awiten ed Italya parad bista. Lapud linmereg so barko a niluganan to, kaukolan toy mansiansia ed isla na Malta legay ambetel a panaon. Sanen akasabi a siansia ed Roma, sikatoy nanayam a duay taon ed inabangan ya abung. Anggaman sikatoy guardiado, siansian maseet ton impulong so Panarian na Dios ed amin a binmisita ed sikato.

​—Nibase ed Gawa 11:22–28:31.