Ombisita Tayod Kyrgyzstan

SAY Kyrgyzstan et sakey a bansa diad Central Asia ya apaliberan na ataragey ya palandey a nasasakbongay yelo, tan kaabay to ray bansan Kazakhstan, Uzbekistan, Tajikistan, tan China. Kapalandeyan so manga 90 porsiento na Kyrgyzstan. Say sankatageyan ya pasen ed Kapalandeyan na Tian Shan et walad Kyrgyzstan, ya 7,439 metro so katagey to. Manga 4 porsiento na sayan bansa et kakiewan. Diad interon mundo, say sankaawangan ya kakiewan na walnut ya ag-intanem et walad Kyrgyzstan.

Saray Kyrgyz et marespeton totoo tan maasikaso ira ed saray bisita. Uusaren da so salitan “kayo” o “sikayo” pian nipanengneng so respeto ed saray mas matatken, papalugaran da ra diad luluganan, tan papayurongen da rad sankaimportantian ya pasen ed lamisaan.

Kaslakan ya pamilya et walaan na taloran anak odino masulok ni. Say bolirek ya laki et mansiansia ed abung na ateng to anggano wala lay asawa to, tan sikatoy mangasikaso ed sikara no matatken la ra.

Saray bibii, anggano ugaw ni ra et babangatan la na saray kimey ed abung pian magmaliw iran maong ya asawa. Kanian anggano 15 taon da ni labat et sarasarag da la so amin ya kimey ed abung. No walay mankasal, say pamilya na nobya et mangiter na regalo. Nayarin kaibad satan so nanduruman klase na ikamen, kawes, tan handmade ya carpet. Say nobyo balet et mangiter na kuarta tan ayayep ed pamilya na nobya.

Diad saray selebrasyon tan saray ponpon, walay papakgeran ya karnero o kabayo. Pat-partien da itan, tan kada parte et walay espisipikon too ya pangiteran. Say parte ya iter ed kada bisita et depende ed no antoy edad o posisyon to. Diad sayan tradisyon, importantin maong so pangipanengneng na respeto. Insan da la iparungo so beshbarmak, say kabkabat ya kakanen ed bansa da. Mantumpok ira no kanen da itan.