Ombisita Tayod New Zealand

MANGA 800 taon lay apalabas nen nambiahe na nilibon kilometro ed dayat iray tribu na Maori tan nanayam irad New Zealand. Adiskobre day dalin ya duman maong ed saray tropical ya isla na Polynesia ya nanlapuan da. Say asabi dan lugar et mapalandey, amayamay so angkakabaleg ya yelo, tan dakel so hot spring tan snow. Kayari na manga 500 ya taon, sinmabi so sananey a lahi ya nanlapu nid Europe. Natan, say tradisyon na saray maslak ya taga New Zealand et nanlaok ya Anglo-Saxon tan Polynesian. Ngalngali 90 porsiento na populasyon et manaayam ed syudad. Say syudad na Wellington et kabkabat ya sankaarawian ya capital diad south ya parte na mundo.

Manlelwag iran pitek diad North Island ed New Zealand — Manlelwag ya pitek diad North Island

Lapud nikadkaduma tan balibali iray lugar ed New Zealand, onaabot ed taloran milyon ya turista so ompapasyar ditan kada taon anggano arawrawi.

Kiew ya silver fern — Say kiew a silver fern ya ombaleg na anggad masulok ya 10 metro (30 piye)

Ag-ontitikyab ya takahe — Antis na 1948, iisipen na arum ya say ag-ontitikyab a manok ya takahe et naupot la

Nanengneng ed New Zealand iray nikadkaduman ayayep, tan ditan so kawalaan na sankarakelan ya ag-ontitikyab iran manok diad interon mundo. Wadtan met so tuatara, ya singa tilay so itsura to tan manbilay na anggad 100 a taon! Say wadtan labat ya native ya mammal et pigaran klase na kaging tan pigaran angkakabaleg iran mammal ed dayat, singa say balyena tan dolphin.

Ngalngali 120 taon la ya wala ray Tasi nen Jehova ed New Zealand. Ibabangat day Biblia diad 19 ya lenguahe, kaiba lay lenguahe ed Polynesia ya Niuean, Rarotongan, Samoan, tan Tongan.

Saray Maori ya onsasayaw tan akasulong na tradisyonal a kawes