Saray Tepet Parad Panaral ed Saray Istorya ed Biblia

Istorya 1

Ginmapon Nanggawa so Dios

1. Siopay nanggawa ed amin a maong a bengatla, tan manbitla ka pay alimbawa?

2. Anto so sankaunaan ya ginawa na Dios?

3. Akin et espisyal imay sankaunaan ya anghel?

4. Anto so itsura na dalin nensaman? (Nengnengen so litrato.)

5. Panon ya imparaan na Dios so dalin pian napanayaman na ayayep tan totoo?

Kaaruman iran tepet:

1. Basaen so Jeremias 10:12.

   Anto ran ugali na Dios so nanengneng mo ed saray balibalin ginawa to? (Isa. 40:26; Roma 11:33)

2. Basaen so Colosas 1:15-17.

   Kayarin pinalsa si Jesus, antoy ginawa to, tan antoy nibagam nipaakar ed sikato? (Col. 1:15-17)

3. Basaen so Genesis 1:1-10.

   1. Siopay nanggawa ed dalin? (Gen. 1:1)

   2. Antoy agawa nen unonan agew na impamalsa? (Gen. 1:3-5)

   3. Antoy agawa nen komaduan agew na impamalsa? (Gen. 1:7, 8)

Istorya 2

Balibalin Hardin

1. Antoy ginawa na Dios ed dalin pian napanayaman tayo?

2. Manbitla ka pay ayayep ya ginawa na Dios. (Nengnengen so litrato.)

3. Akin et espisyal so hardin na Eden?

4. Antoy labay na Dios ya nagawad interon dalin?

Kaaruman iran tepet:

1. Basaen so Genesis 1:11-25.

   1. Antoy ginawa na Dios nen komatlon agew na impamalsa? (Gen. 1:12)

   2. Antoy agawa nen komapat ya agew na impamalsa? (Gen. 1:16)

   3. Anto ran klase na ayayep so ginawa na Dios nen komalima tan komanem iran agew? (Gen. 1:20, 21, 25)

2. Basaen so Genesis 2:8, 9.

   Anton duaran espisyal ya kiew so inyan na Dios ed hardin, tan antoy isisimbolo na saratan?

Istorya 3

Say Inmunan Laki tan Bii

1. Antoy pandumaan na litrato ya walad Istorya 3 tan Istorya 2?

2. Siopay nanggawa ed unaan ya laki, tan antoy ngaran na laki?

3. Antoy impagawa na Dios ed si Adan?

4. Akin et pinaugip na Dios si Adan?

5. Anggad kapigan komon manbilay si Adan tan Eva, tan antoy ipapagawa na Dios ed sikara?

Kaaruman iran tepet:

1. Basaen so Salmo 83:18.

   Antoy ngaran na Dios, tan antoy nikadkaduman posisyon to ed dalin? (Jer. 16:21; Dan. 4:17)

2. Basaen so Genesis 1:26-31.

   1. Anto so sankasampotan ya ginawa na Dios nen komanem ya agew na impamalsa, tan antoy pidumaan na sayan pinalsa ed ayayep? (Gen. 1:26)

   2. Antoy inter nen Jehova ed too tan ed ayayep? (Gen. 1:30)

3. Basaen so Genesis 2:7-25.

   1. Pian nangaranan nen Adan iray ayayep, anto ni kaukolan ton gawaen? (Gen. 2:19)

   2. Panon ya makatulong so Genesis 2:24 pian natalosan tayo so panag-isip nen Jehova ed panangasawa, pansian, tan pandiborsyo? (Mat. 19:4-6, 9)

Istorya 4

Pinataynan Irad Panaayaman Da

1. Diad litrato, antoy agawa ed si Adan tan Eva?

2. Akin et dinusa ira nen Jehova?

3. Antoy imbaga na uleg ed si Eva?

4. Siopay nampasalita ed uleg?

5. Akin et pinataynan si Adan tan Eva ed Paraison panaayaman da?

Kaaruman iran tepet:

1. Basaen so Genesis 2:16, 17 tan 3:1-13, 24.

   1. Panon ya aderal so ngaran nen Jehova lapud tepet na uleg ed si Eva? (Gen. 3:1-5; 1 Juan 5:3)

   2. Antoy naaralan tayod ginawa nen Eva? (Fil. 4:8; Sant. 1:14, 15; 1 Juan 2:16)

   3. Inamin kasi nen Adan tan Eva so kasalanan da? (Gen. 3:12, 13)

   4. Panon ya sinuportaan na saray kerubin ya inyan ed bukig na hardin na Eden so inkasoberano nen Jehova? (Gen. 3:24)

2. Basaen so Apocalipsis 12:9.

   Apabeneg kasi nen Satanas so totoo ed pananguley na Dios? (1 Juan 5:19)

Istorya 5

Ginmapo Iran Nanirap

1. Antoy klase na bilay di Adan tan Eva diad paway na hardin na Eden?

2. Antoy ginmapon agawad si Adan tan Eva, tan akin?

3. Akin et ontatken tan ompatey iray anak di Adan tan Eva?

4. No komon ta inunor di Adan tan Eva si Jehova, anto komoy klase na bilay da tan na ananak da?

5. Antoy resulta na ag-intulok nen Eva?

6. Antoy ngaran na unonan duaran anak di Adan tan Eva?

7. Diad litrato, siopa iratay arum ya ugugaw?

Kaaruman iran tepet:

1. Basaen so Genesis 3:16-23 tan 4:1, 2.

   1. Panon ya naapektoan so bilay nen Adan lapud nisumpa so dalin? (Gen. 3:17-19; Roma 8:20, 22)

   2. Akin ya dugaruga so ngaran ya Eva, a mankabaliksan na “Say Manbibilay”? (Gen. 3:20)

   3. Panon ya impanengneng nen Jehova so konsiderasyon ed si Adan tan Eva kayari ran nankasalanan? (Gen. 3:7, 21)

2. Basaen so Apocalipsis 21:3, 4.

   Anto ran “datin bengatla” so labay mo lan naandi?

Istorya 6

Maong ya Anak tan Mauges ya Anak

1. Antoy trabaho di Cain tan Abel?

2. Antoy inregalo di Cain tan Abel ed si Jehova?

3. Akin ya aliketan si Jehova ed regalo nen Abel, tan akin ya ag-aliketan ed regalo nen Cain?

4. Anton klase na too si Cain, tan panon ya impetek nen Jehova?

5. Antoy ginawa nen Cain sanen bukbukor dan dua nen agi to diad alog?

6. Antoy agawa ed si Cain sanen pinatey toy agi to?

Kaaruman iran tepet:

1. Basaen so Genesis 4:2-26.

   1. Antoy imbilin nen Jehova ed si Cain? (Gen. 4:7)

   2. Antoy walad puso nen Cain? (Gen. 4:9)

   3. Parad si Jehova, mauges kasi so pamatey? (Gen. 4:10; Isa. 26:21)

2. Basaen so 1 Juan 3:11, 12.

   1. Akin et nampasnok ya maong si Cain, tan antoy naaralan tayo ed satan? (Gen. 4:4, 5; Uli. 14:30; 28:22)

   2. Panon ya ipapanengneng na Biblia ya anggano sumpad si Jehova so amin ya kapamilya tayo, sarag tayo nin siansiay manmatoor? (Sal. 27:10; Mat. 10:21, 22)

3. Basaen so Juan 11:25.

   Antoy ipapaseguro nen Jehova ed amin ya ompatey a matunong? (Juan 5:24)

Istorya 7

Lakin Agtinmakot

1. Akin et duma si Enoc?

2. Akin ya mauges iray totoo nen panaon nen Enoc?

3. Anto ray mauges a gagawaen na totoo nensaman? (Nengnengen so litrato.)

4. Akin et kaukolan ya manpakpel si Enoc?

5. Panon karukey so bilay na totoo nensaman, balet pigay taon ya nambilay si Enoc?

6. Antoy agawa kayari impatey nen Enoc?

Kaaruman iran tepet:

1. Basaen so Genesis 5:21-24, 27.

   1. Kasin kaaro nen Jehova si Enoc? (Gen. 5:24)

   2. Diad Biblia, siopan too so nambilay na sankadukeyan, tan pigay taon to nen inatey? (Gen. 5:27)

2. Basaen so Genesis 6:5.

   Panon kauges so dalin kayari impatey nen Enoc, tan panon mon ikompara itan natan? (2 Tim. 3:13)

3. Basaen so Hebreos 11:5.

   Anto so kualidad nen Enoc ya ‘amaliket a maong ed Dios,’ tan antoy resulta? (Gen. 5:22)

4. Basaen so Judas 14, 15.

   Panon ya naalig na saray Kristiano natan so inkakpel nen Enoc sano papasakbayan da ray totoo ed isabi na Armagedon? (2 Tim. 4:2; Heb. 13:6)

Istorya 8

Saray Higante Diad Dalin

1. Antoy agawa sanen dinmengel ed si Satanas iray arum ya anghel na Dios?

2. Akin et tinaynan na arum ya anghel so kimey dad tawen tan linmeksab irad dalin?

3. Akin et agdugan onlad dalin iray anghel tan gawaen dan too so sarili da?

4. Akin et nikadkaduma iray anak na saray anghel?

5. Singa nanengneng mod litrato, antoy ginawa na saray higanten anak na anghel?

6. Kayari nen Enoc, siopay sinmublay ya maong a too diad dalin, tan akin ya sikatoy labay na Dios?

Kaaruman iran tepet:

1. Basaen so Genesis 6:1-8.

   Singa ibabaga na Genesis 6:6, panon ya naapektoan na saray gagawaen tayo so liknaan nen Jehova? (Sal. 78:40, 41; Uli. 27:11)

2. Basaen so Judas 6.

   Antoy naaralan tayo ed saramay anghel ya “agnansiansia ed datin kipapasen da” nen panaon nen Noe? (1 Cor. 3:5-9; 2 Ped. 2:4, 9, 10)

Istorya 9

Nanggaway Biong si Noe

1. Pigaray membro na pamilya nen Noe, tan antoy kangaranan na taloran anak to?

2. Antoy impagawa na Dios ed si Noe, tan akin?

3. Antoy reaksion na totoo nen imbaga nen Noe ed sikara so gawaen na Dios?

4. Antoy imbaga na Dios ya gawaen ed saray ayayep?

5. Sanen inkapot na Dios so puerta na biong, antoy ginawa nen Noe tan na pamilya to?

Kaaruman iran tepet:

1. Basaen so Genesis 6:9-22.

   1. Akin et nidumaduman managdayew ed tuan Dios si Noe? (Gen. 6:9, 22)

   2. Antoy nalilikna na Dios ed kaugsan, tan panon ya naapektoan na satan iray pipilien tayon panagligliwaan? (Gen. 6:11, 12; Sal. 11:5)

   3. Panon tayon naalig si Noe sano makaawat tayoy instruksion panamegley na organisasyon nen Jehova? (Gen. 6:22; 1 Juan 5:3)

2. Basaen so Genesis 7:1-9.

   Parad si Jehova et matunong si Noe anggaman aliwan perpekto, panon kan apaseseg ed satan? (Gen. 7:1; Uli. 10:16; Isa. 26:7)

Istorya 10

Say Baleg ya Delap

1. Akin et agla makaloob ed biong so anggan siopa sanen ginmapo lay uran?

2. Pigaran agew tan labi ya inmuran, tan panon kaaralem so danum?

3. Antoy agawa ed biong sanen manaralem so danum?

4. Kasin akaliktar iramay higante, tan antoy agawad saray tatay da?

5. Antoy agawad biong kayari limay bulan?

6. Akin et imbulos nen Noe so sakey a wawak?

7. Panon ya naamtaan nen Noe ya inmabeba lay danum?

8. Antoy imbaga na Dios ed si Noe kayari masulok a sakey taon ya impanayam dad biong?

Kaaruman iran tepet:

1. Basaen so Genesis 7:10-24.

   1. Panon karakel so inatey ed Delap? (Gen. 7:23)

   2. Pigaran panaon so linmabas manlapu lad inmuran ya anggad 14inmekat so danum? (Gen. 7:24)

2. Basaen so Genesis 8:1-17.

   Panon ya ipapanengneng na Genesis 8:17 ya ag-anguman so orihinal a gagala nen Jehova parad dalin? (Gen. 1:22)

3. Basaen so 1 Pedro 3:19, 20.

   1. Sanen pinmawil ed tawen iray rebelden anghel, antoy dusa ra? (Jud. 6)

   2. Panon a say istoryay bilay nen Noe et mamabiskeg ed talek tayo ya sarasarag nen Jehova ya iliktar iray totoo to? (2 Ped. 2:9)

Istorya 11

Sankaunaan ya Rainbow

1. Singa nanenengneng mo ed litrato, antoy unaan ya ginawa nen Noe kapaway to ed biong?

2. Antoy ingganggan na Dios ed si Noe tan say pamilya to kayari Delap?

3. Anto so impormisa na Dios?

4. Sano makanengneng tayo na rainbow, antoy nanonotan tayo?

Kaaruman iran tepet:

1. Basaen so Genesis 8:18-22.

   1. Panon tayon makapangiter natan na “ambalingit” a bagat ed si Jehova? (Gen. 8:21; Heb. 13:15, 16)

   2. Antoy naobserbaan nen Jehova a walad puso na too, tan anto so nepeg tayon panalwaran? (Gen. 8:21; Mat. 15:18, 19)

2. Basaen so Genesis 9:9-17.

   1. Antoy impormisa nen Jehova ed amin ya pinalsa diad dalin? (Gen. 9:10, 11)

   2. Anggad kapigan mansiansia so impormisa ya rainbow? (Gen. 9:16)

Istorya 12

Angipaalagey Ira na Baleg a Tore

1. Siopa si Nimrod, tan kasin sikatoy labay na Dios?

2. Diad kawigin litrato, antoy gagawaen na totoo?

3. Akin et aglabay nen Jehova so pampapaalagey da?

4. Panon ya pinatunda na Dios so pampapaalagey da na tore?

5. Antoy intawag ed samay syudad, tan antoy kabaliksan na satan?

6. Antoy agawa ed saray totoo kayarin pinanduruma na Dios so salita ra?

Kaaruman iran tepet:

1. Basaen so Genesis 10:1, 8-10.

   Antoy ugali nen Nimrod, tan antoy naaralan tayod saya? (Uli. 3:31)

2. Basaen so Genesis 11:1-9.

   Akin et nampaalagey ira na tore, tan akin et seguradon agnasumpal so pampapaalagey da? (Gen. 11:4; Uli. 16:18; Juan 5:44)

Istorya 13

Abraham—Kaaro na Dios

1. Anton klase na totoo so manaayam ed syudad na Ur?

2. Siopa yay laki ed litrato, kapigan inyanak, tan iner so panaayaman to?

3. Antoy ingganggan na Dios ed si Abraham?

4. Akin et tinawag ya kaaro na Dios si Abraham?

5. Siopay akila ed si Abraham sanen tinaynan toy Ur?

6. Antoy imbaga na Dios ed si Abraham sanen akasabi ed Canaan?

7. Antoy impormisa na Dios ed si Abraham nen mantaon lay 99?

Kaaruman iran tepet:

1. Basaen so Genesis 11:27-32.

   1. Antoy pikanayonan nen Abraham ed si Lot? (Gen. 11:27)

   2. Anggaman si Tera so imbagan angiyuna ed pamilya to ya onalis ed Canaan, panon tayon amta ya si Abraham so talagan angidaulo ed inyalis da, tan akin et ginawa to iya? (Gen. 11:31; Gawa 7:2-4)

2. Basaen so Genesis 12:1-7.

   Panon ya pinalaknab nen Jehova so impisipanan tod si Abraham sanen akasabi rad Canaan? (Gen. 12:7)

3. Basaen so Genesis 17:1-8, 15-17.

   1. Antoy nagmaliw ya balon ngaran nen Abram sanen sikatoy mantaon na 99, tan akin? (Gen. 17:5)

   2. Anto ran bendisyon so impormisa nen Jehova ed si Sara? (Gen. 17:15, 16)

4. Basaen so Genesis 18:9-19.

   1. Diad Genesis 18:19, anto ran responsabilidad so niiter ed saray ama? (Deu. 6:6, 7; Efe. 6:4)

   2. Antoy eksperiensya nen Sara ya mangipapanengneng ya anggapoy niyamot tayod si Jehova? (Gen. 18:12, 15; Sal. 44:21)

Istorya 14

Sinubok na Dios so Pananisia nen Abraham

1. Antoy impormisa na Dios ed si Abraham, tan panon itan ya tinoor na Dios?

2. Singa nanengneng ed litrato, panon ya sinubok na Dios so pananisia nen Abraham?

3. Antoy ginawa nen Abraham, anggaman agto amtay rason no akin ya onmay ingganggan na Dios?

4. Antoy agawa sanen pateyen la nen Abraham so anak to?

5. Panon kabaleg so pananisia nen Abraham ed Dios?

6. Antoy inter na Dios ya iyapay nen Abraham, tan panon?

Kaaruman iran tepet:

1. Basaen so Genesis 21:1-7.

   Akin ya sinegat nen Abraham so anak to nen waloy agew to la? (Gen. 17:10-12; 21:4)

2. Basaen so Genesis 22:1-18.

   Panon ya impanengneng nen Isaac so katutulok tod ama ton si Abraham, tan panon ya impanengneng na saya so mas importantin nagawa ed arapen? (Gen. 22:7-9; 1 Cor. 5:7; Fil. 2:8, 9)

Istorya 15

Linmingaw so Asawa nen Lot

1. Akin et nansian si Abraham tan Lot?

2. Akin et pinili nen Lot so manayam ed Sodoma?

3. Antoy ugali na saray totoo ed Sodoma?

4. Antoy imbaga na duaran anghel ed si Lot?

5. Akin et nagmaliw ya pungol na asin so asawa nen Lot?

6. Antoy naaralan tayo ed samay agawad asawa nen Lot?

Kaaruman iran tepet:

1. Basaen so Genesis 13:5-13.

   Pian naayos so agpantatalosan, antoy naaralan tayo ed si Abraham? (Gen. 13:8, 9; Roma 12:10; Fil. 2:3, 4)

2. Basaen so Genesis 18:20-33.

   Panon ya say impantrato nen Jehova ed si Abraham so mamaseguro ed sikatayo ya matunong so pangukom nen Jehova tan nen Jesus? (Gen. 18:25, 26; Mat. 25:31-33)

3. Basaen so Genesis 19:1-29.

   1. Unong ed sayan istorya, antoy nalilikna na Dios ed homoseksualidad? (Gen. 19:5, 13; Lev. 20:13)

   2. Antoy pandumaan na reaksion nen Lot tan nen Abraham ed ganggan na Dios, tan antoy naaralan tayo ed saya? (Gen. 19:15, 16, 19, 20; 22:3)

4. Basaen so Lucas 17:28-32.

   Panon ya impasen na asawa nen Lot iray kaykayamanan, tan panon iyan onkanan pasakbay ed sikatayo? (Luc. 12:15; 17:31, 32; Mat. 6:19-21, 25)

5. Basaen so 2 Pedro 2:6-8.

   Bilang pangalig ed si Lot, panon tayon ipasen so mauges a mundon panaayaman tayo? (Eze. 9:4; 1 Juan 2:15-17)

Istorya 16

Angasawa si Isaac na Maong a Bii

1. Siopa yay laki tan bii ed litrato?

2. Antoy ginawa nen Abraham pian naiyanapan na asawa so anak to, tan akin?

3. Panon ya inebatan so pikakasi na aripen nen Abraham?

4. Antoy ebat nen Rebeca sanen sikatoy tinepetan no labay toy miasawa ed si Isaac?

5. Antoy nampaliket lamet ed si Isaac?

Kaaruman iran tepet:

1. Basaen so Genesis 24:1-67.

   1. Anto ray balibalin kualidad nen Rebeca sanen sikatoy abanaan na aripen nen Abraham diad bobon? (Gen. 24:17-20; Uli. 31:17, 31)

   2. Antoy naaralan na saray Kristiano natan ed samay ginawa nen Abraham parad si Isaac? (Gen. 24:37, 38; 1 Cor. 7:39; 2 Cor. 6:14)

   3. Akin et kaukolan tayon ipanaon so pandalepdep, a singa ginawa nen Isaac? (Gen. 24:63; Sal. 77:12; Fil. 4:8)

Istorya 17

Kambal ya Mandumaan

1. Siopa si Esau tan Jacob, tan antoy pandumaan da?

2. Pigay taon di Esau tan Jacob nen inatey so laki dan si Abraham?

3. Antoy ginawa nen Esau ya nanermenan a maong na nanay tan tatay to?

4. Akin et nampasnok a maong si Esau ed agi ton si Jacob?

5. Antoy imbilin nen Isaac ed anak ton si Jacob?

Kaaruman iran tepet:

1. Basaen so Genesis 25:5-11, 20-34.

   1. Antoy impropesiya nen Jehova nipaakar ed duaran anak nen Rebeca? (Gen. 25:23)

   2. Antoy pandumaan na panmoria di Jacob tan Esau ed inkapanguloan? (Gen. 25:31-34)

2. Basaen so Genesis 26:34, 35; 27:1-46; tan 28:1-5.

   1. Panon ya impanengneng nen Esau ya agto aapresyaen iray espiritual a bengatla? (Gen. 26:34, 35; 27:46)

   2. Pian naawat nen Jacob so bendisyon na Dios, antoy imbilin nen Isaac ed sikato? (Gen. 28:1-4)

3. Basaen so Hebreos 12:16, 17.

   Antoy naaralan tayod si Esau nipaakar ed panmudmorad saray sagradon bengatla?

Istorya 18

Linmad Haran si Jacob

1. Siopa iyay marikit ed litrato, tan antoy ginawa nen Jacob parad sikato?

2. Antoy ginawa nen Jacob pian naasawa si Raquel?

3. Antoy ginawa nen Laban nen asabi lay agew na pankasal di Jacob tan Raquel?

4. Anto lamet so ginawa nen Jacob pian naasawa si Raquel?

Kaaruman iran tepet:

1. Basaen so Genesis 29:1-30.

   1. Anggan sanen sinaol nen Laban, panon ya impanengneng nen Jacob a sikatoy marespeto, tan antoy naaralan tayod saya? (Gen. 25:27; 29:26-28; Mat. 5:37)

   2. Panon ya impanengneng nen Jacob so pandumaan na tua tan aliwan tuan panangaro? (Gen. 29:18, 20, 30; Kanta nen Sol. 8:6)

   3. Siopa ray apatiran bibii ya nagmaliw ya asawa nen Jacob tan angiyanak na lalaki? (Gen. 29:23, 24, 28, 29)

Istorya 19

Baleg so Pamilya nen Jacob

1. Antoy kangaranan na anemiran anak nen Jacob ed unonan asawa ton si Lea?

2. Siopay duaran anak a laki nen Jacob ed si Zilpa ya aripen nen Lea?

3. Antoy kangaranan na duaran anak nen Jacob ed si Bilha ya aripen nen Raquel?

4. Siopay duaran anak a laki nen Raquel, tan antoy agawa sanen inyanak toy komaduan anak to?

5. Diad litrato, pigaran amin so anak a lalaki nen Jacob, tan anto so nanlapu ed sikara?

Kaaruman iran tepet:

1. Basaen so Genesis 29:32-35; 30:1-26; tan 35:16-19.

   Singa ipapanengneng na 12 anak a lalaki nen Jacob, panon ya ngangaranan iray Hebreon ugugaw nensaman?

2. Basaen so Genesis 37:35.

   Anggaman si Dina labat so abitla ed Biblia, panon tayon amta ya wala ni arum ya anak a bibii nen Jacob? (Gen. 37:34, 35)

Istorya 20

Mauges so Agawad si Dina

1. Akin ya aglabay nen Abraham tan Isaac ya mangasawa iray anak da na taga-Canaan?

2. Inabuloyan kasi nen Jacob so marikit to ya mikaaro ed saray bibiin Canaanita?

3. Diad litrato, siopa yay lakin sankanengneng toy Dina, tan antoy mauges ya ginawa to?

4. Antoy ginawa na saray kuya nen Dina ya si Simeon tan Levi sanen naamtaan day agawa?

5. Aliketan kasi si Jacob ed ginawa di Simeon tan Levi?

6. Antoy sengegan na problema na pamilya da?

Kaaruman iran tepet:

1. Basaen so Genesis 34:1-31.

   1. Aminsan labat kasin binisita nen Dina iray bibiin Canaanita? Ipaliwawa. (Gen. 34:1)

   2. Akin et kasalanan met nen Dina so agawad sikato? (Gal. 6:7)

   3. Panon ya nipanengneng na saray kalangweran natan ya akaaral irad samay agawad si Dina? (Uli. 13:20; 1 Cor. 15:33; 1 Juan 5:19)

Istorya 21

Binusol si Jose na Saray Kuya To

1. Akin et mangimon ed si Jose iray kuya to, tan antoy ginawa ra?

2. Antoy labay ya gawaen ed si Jose na saray kuya to, balet antoy imbaga nen Ruben?

3. Antoy agawa sanen dinmalan iray negosyanten Ismaelita?

4. Antoy ginawa na saray kuya nen Jose pian isipen na tatay da ya inatey lay Jose?

Kaaruman iran tepet:

1. Basaen so Genesis 37:1-35.

   1. Panon ya naalig na saray Kristiano so alimbawa nen Jose diad pangipaamtad kongregasyon ed mauges a kagagawa? (Gen. 37:2; Lev. 5:1; 1 Cor. 1:11)

   2. Akin et mauges so impantrato ed si Jose na saray kuya to? (Gen. 37:11, 18; Uli. 27:4; Sant. 3:14-16)

   3. Antoy normal ya alikna nen Jacob sanen naandi so inad-aro ton anak? (Gen. 37:35)

Istorya 22

Inkulong si Jose

1. Pigay taon nen Jose sanen inawit ed Ehipto, tan antoy agawa kasabi to diman?

2. Akin et akulong si Jose?

3. Anton kimey so inter ed si Jose diad prisoan?

4. Diad prisoan, antoy ginawa nen Jose parad managserbi na alak tan ed panadero?

5. Antoy agawa sanen imbulos lay managserbi na alak?

Kaaruman iran tepet:

1. Basaen so Genesis 39:1-23.

   Lapud nen panaon nen Jose et anggapo ni akasulat ya ganggan ya mangibabagan kabusol na Dios so pikakalugoran, akin et imbatikan toy asawa nen Potifar? (Gen. 2:24; 20:3; 39:9)

2. Basaen so Genesis 40:1-23.

   1. Istoryam pad antikey no antoy kinugip na managserbi na alak tan no antoy inter nen Jehova ed si Jose ya kabaliksan na satan. (Gen. 40:9-13)

   2. Antoy kinugip na panadero, tan antoy labay ya ibaga na satan? (Gen. 40:16-19)

   3. Panon ya aaligen na matoor tan makabat ya aripen natan so ugali nen Jose? (Gen. 40:8; Sal. 36:9; Juan 17:17; Gawa 17:2, 3)

   4. Base ed Genesis 40:20, akin et agmanseselebra na birthday iray Kristiano? (Ecl. 7:1; Mar. 6:21-28)

Istorya 23

Kugip nen Faraon

1. Aminsan a labi, antoy agawad si Faraon?

2. Akin et anonotan a siansia na managserbi na alak si Jose?

3. Singa nanengneng ed litrato, antoy duaran kugip nen Faraon?

4. Antoy imbaga nen Jose ya kabaliksan na saraman ya kugkugip?

5. Panon a nagmaliw ya onkukumaduan sankaimportantian a too ed Ehipto si Jose?

6. Akin et linmad Ehipto iray kuya nen Jose, tan akin et sikatoy agda abidbir?

7. Anton kugip so anonotan nen Jose, tan antoy atalosan to?

Kaaruman iran tepet:

1. Basaen so Genesis 41:1-57.

   1. Panon ya pinagalangan nen Jose si Jehova, tan panon itan a naalig na saray Kristiano natan? (Gen. 41:16, 25, 28; Mat. 5:16; 1 Ped. 2:12)

   2. Panon a saramay taon a dakel so naakan ed Ehipto ya tinumbokan na eras et mangipapanengneng ed pandumaan na espiritual a kipapasen na saray totoo nen Jehova tan na Kakristianoan? (Gen. 41:29, 30; Amos 8:11, 12)

2. Basaen so Genesis 42:1-8 tan 50:20.

   Mauges kasi no ondakmomo iray lingkor nen Jehova ed sakey a too bilang pangigalang ed atagey a posisyon to no satan so niyugalid sakey a bansa? (Gen. 42:6)

Istorya 24

Sinubok nen Jose Iray Kuya To

1. Akin et imbaga nen Jose ya espiya iray kuya to?

2. Akin et apilitan si Jacob ya ipila si Benjamin ed Ehipto?

3. Akin et walad sako nen Benjamin imay pilak ya kopa nen Jose?

4. Antoy imbaga nen Juda pian naabuloyan ya onsempet si Benjamin?

5. Kasin anguman iray kuya nen Jose?

Kaaruman iran tepet:

1. Basaen so Genesis 42:9-38.

   Akin et maong ya panonot ed saray walaay responsabilidad ed organisasyon nen Jehova natan so imbaga nen Jose a walad Genesis 42:18? (Neh. 5:15; 2 Cor. 7:1, 2)

2. Basaen so Genesis 43:1-34.

   1. Anggaman si Ruben so panguloan, akin et si Juda so akisalita parad agagi to? (Gen. 43:3, 8, 9; 44:14, 18; 1 Awa. 5:2)

   2. Panon ya sinubok nen Jose iray kuya to, tan akin? (Gen. 43:33, 34)

3. Basaen so Genesis 44:1-34.

   1. Pian agnabidbir na saray kuya to, panon ya impakabat nen Jose so sarili to? (Gen. 44:5, 15; Lev. 19:26)

   2. Panon ya impanengneng na saray kuya nen Jose ya agla ra mangimon ed sikato? (Gen. 44:13, 33, 34)

Istorya 25

Inmalis so Pamilya ed Ehipto

1. Antoy agawa sanen impakabat nen Jose so sarili to ed agagi to?

2. Antoy maar-aron impaliwawa nen Jose ed agagi to?

3. Antoy imbaga nen Faraon sanen naamtaan ton sinmabi iray agagi nen Jose?

4. Panon kabaleg so pamilya nen Jacob sanen inmalis irad Ehipto?

5. Antoy intawag ed pamilya nen Jacob, tan akin?

Kaaruman iran tepet:

1. Basaen so Genesis 45:1-28.

   Panon ya ipapanengneng na istorya nen Jose ya sarag nen Jehova ya gawaen a maabig so pansumpalan na mauges a planon mamasakit ed saray lingkor to? (Gen. 45:5-8; Isa. 8:10; Fil. 1:12-14)

2. Basaen so Genesis 46:1-27.

   Antoy impaseguro nen Jehova ed si Jacob sanen onalis la rad Ehipto? (Gen. 46:1-4)

Istorya 26

Matoor si Job ed Dios

1. Siopa si Job?

2. Antoy sinalin gawaen nen Satanas, balet kasin agawaan to?

3. Antoy inabuloyan nen Jehova ya gawaen nen Satanas, tan akin?

4. Akin et imbaga na asawa nen Job ya ‘ayew moy Dios pian ompatey ka la’? (Nengnengen so litrato.)

5. Singa nanenengneng mod komaduan litrato, panon ya benendisyonan nen Jehova si Job, tan akin?

6. No manmatoor tayod si Jehova a singa si Job, anto ran bendisyon so naawat tayo?

Kaaruman iran tepet:

1. Basaen so Job 1:1-22.

   Panon ya naalig na saray Kristiano natan si Job? (Job 1:1; Fil. 2:15; 2 Ped. 3:14)

2. Basaen so Job 2:1-13.

   Anton nandumaan ya reaksion so impanengneng nen Job tan na asawa to ed panamasegsegang nen Satanas? (Job 2:9, 10; Uli. 19:3; Miq. 7:7; Mal. 3:14)

3. Basaen so Job 42:10-17.

   1. Antoy pipadparaan na bendisyon ed si Job tan ed si Jesus lapud katooran da? (Job 42:12; Fil. 2:9-11)

   2. Panon tayon apabiskeg na saray bendisyon ya naawat nen Job lapud impansiansia ton matoor ed Dios? (Job 42:10, 12; Heb. 6:10; Sant. 1:2-4, 12; 5:11)

Istorya 27

Mauges ya Ari ed Ehipto

1. Diad litrato, siopa may lakin mansisiplat, tan siopa may sisiplatan to?

2. Nen inatey lay Jose, antoy agawad saray Israelita?

3. Akin et tinmakot iray Ehipsio ed saray Israelita?

4. Antoy ingganggan nen Faraon ed saray manamianak?

Kaaruman iran tepet:

1. Basaen so Exodo 1:6-22.

   1. Panon ya ginapoan nen Jehova a gawaen so impormisa to ed si Abraham? (Exo. 1:7; Gen. 12:2; Gawa 7:17)

   2. Panon ya nirespeto na saray Hebreon manamianak so inkasagrado na bilay? (Exo. 1:17; Gen. 9:6)

   3. Panon ya benendisyonan iray manamianak lapud katooran dad si Jehova? (Exo. 1:20, 21; Uli. 19:17)

   4. Panon ya kinontra nen Satanas so gagala nen Jehova parad insipan ya Bini nen Abraham? (Exo. 1:22; Mat. 2:16)

Istorya 28

Akaliktar so Ugaw a si Moises

1. Siopa yay ugaw ya walad litrato, tan siopa yay eegnaan to?

2. Antoy ginawa na nanay nen Moises pian agnapatey na saray Ehipsio si Moises?

3. Siopa yay ugaw ya bii ed litrato, tan antoy ginawa to?

4. Nen nalmo na marikit nen Faraon so ugaw, antoy imbaga nen Miriam?

5. Antoy imbaga na prinsesa ed nanay nen Moises?

Kaaruman ya tepet:

1. Basaen so Exodo 2:1-10.

   Antoy pankanawnawa na nanay nen Moises pian ipasal tan ibangat si Moises legan ya melag ni, tan antoy naaralan na saray atateng ed satan? (Exo. 2:9, 10; Deu. 6:6-9; Uli. 22:6; Efe. 6:4; 2 Tim. 3:15)

Istorya 29

Tinmakas si Moises

1. Iner binmaleg si Moises, balet antoy amta to nipaakar ed saray ateng to?

2. Antoy ginawa nen Moises nen 40 to la?

3. Antoy imbaga nen Moises ed sakey ya lakin Israelita ya milalaban, tan antoy inyebat na laki?

4. Akin et tinmakas si Moises?

5. Iner so binatikan nen Moises, tan siopay akabat tod man?

6. Antoy ginawa nen Moises ed loob na 40 taon sanen tinaynan toy Ehipto?

Kaaruman iran tepet:

1. Basaen so Exodo 2:11-25.

   Anggaman nanaral na kakabatan na saray Ehipsio ed loob na dakel a taon, panon ya impanengneng nen Moises so katooran tod si Jehova tan ed saray kapara ton Israelita? (Exo. 2:11, 12; Heb. 11:24)

2. Basaen so Gawa 7:22-29.

   Antoy naaralan tayod impanali nen Moises ya iliktar iray Israelita manlapud impakaaripen dad Ehipto anggano bukor to? (Gawa 7:23-25; 1 Ped. 5:6, 10)

Istorya 30

Mandarlang ya Kiew

1. Anton palandey iyay walad litrato?

2. Antoy makapakelkelaw ya anengneng nen Moises sanen linmad palandey ya manpastol?

3. Antoy imbaga na boses ya manlalapud mandarlang ya kiew, tan siopay akanboses?

4. Antoy inyebat nen Moises sanen imbaga na Dios ya sikato so ibakin mangipaway ed saray Israelita diad Ehipto?

5. Antoy imbaga na Dios ya iyebat nen Moises no tepeten day angibakid sikato?

6. Panon ya napaneknekan nen Moises ya sikatoy imbaki na Dios?

Kaaruman iran tepet:

1. Basaen so Exodo 3:1-22.

   Panon itayon napaseseg ed eksperiensya nen Moises ya anggano isipen tayon agtayo kualipikadon manggawa ed saray asainmin tayo et tulongan itayo nen Jehova? (Exo. 3:11, 13; 2 Cor. 3:5, 6)

2. Basaen so Exodo 4:1-20.

   1. Antoy anguman ed ugali nen Moises legan na 40 taon tod Midian, tan antoy naaralan ed saya na saray malabay ya nawalaan na pribilehyo ed kongregasyon? (Exo. 2:11, 12; 4:10, 13; Miq. 6:8; 1 Tim. 3:1, 6, 10)

   2. No dinisiplina itayo nen Jehova panamegley na organisasyon to, panon itayon napabiskeg na alimbawa nen Moises? (Exo. 4:12-14; Sal. 103:14; Heb. 12:4-11)

Istorya 31

Linma si Moises tan Aaron ed si Faraon

1. Antoy epektod saray Israelita na saray milagro ya ginawa nen Moises tan Aaron?

2. Antoy imbaga di Moises tan Aaron ed si Faraon, tan antoy ebat nen Faraon?

3. Singa nanengneng ed litrato, antoy agawa sanen imbantak nen Aaron so baston to?

4. Panon ya inikdan nen Jehova na leksion si Faraon, tan antoy reaksion nen Faraon?

5. Antoy agawa kayari na koma-10 ya salot?

Kaaruman iran tepet:

1. Basaen so Exodo 4:27-31 tan 5:1-23.

   Antoy labay ya ibaga nen Faraon sanen imbaga ton: “Agkon balot kabat ’tay Jehova”? (Exo. 5:2, NW; 1 Sam. 2:12; Roma 1:21)

2. Basaen so Exodo 6:1-13, 26-30.

   1. Akin et nibagan ag-impakabat nen Jehova so inkasikato ed si Abraham, Isaac, tan Jacob? (Exo. 3:13, 14; 6:3; Gen. 12:8)

   2. Antoy aliknam sanen naamtaan mon inusar a siansia nen Jehova si Moises anggano parad si Moises et agkualipikado ed asainmin to? (Exo. 6:12, 30; Luc. 21:13-15)

3. Basaen so Exodo 7:1-13.

   1. Sanen makpel ya imbaga di Moises tan Aaron so panangukom nen Jehova ed si Faraon, anton alimbawa so impanengneng dad saray lingkor na Dios natan? (Exo. 7:2, 3, 6; Gawa 4:29-31)

   2. Panon ya impanengneng nen Jehova ya sikatoy mas atagey nen saray dirios na Ehipto? (Exo. 7:12; 1 Awa. 29:12)

Istorya 32

Say 10 Salot

1. Diad litrato, anto so unonan taloran salot ya indapo nen Jehova ed Ehipto?

2. Antoy pandumaan na unonan taloran salot ed arum ni ran salot?

3. Anto so komapat, komalima, tan komanem ya salot?

4. Anto so komapito, komawalo, tan komasiam ya salot?

5. Antis na koma-samplon salot, antoy impagawa nen Jehova ed saray Israelita?

6. Anto so koma-samplon salot, tan antoy agawa kayari na satan?

Kaaruman iran tepet:

1. Basaen so Exodo 7:19–8:23.

   1. Anggaman naalig na saray managmahiko ed Ehipto so unonan duaran salot nen Jehova, antoy inamin da lanlamang kayari na komatlon salot? (Exo. 8:18, 19; Mat. 12:24-28)

   2. Panon ya impanengneng na komapat ya salot a sarag nen Jehova ya protektaan so totoo to, tan antoy nepeg ya nalikna na totoo ed onsasabin “baleg ya irap”? (Exo. 8:22, 23; Apo. 7:13, 14; 2 Awa. 16:9)

2. Basaen so Exodo 8:24; 9:3, 6, 10, 11, 14, 16, 23-25; tan 10:13-15, 21-23.

   1. Anton duaran grupo so akaeksperiensya ed Samploran Salot, tan panon dan naapektoan so panmoria tayo natan? (Exo. 8:10, 18, 19; 9:14)

   2. Panon itayon natulongan na Exodo 9:16 pian natalosan no akin ya inabuloyan nen Jehova si Satanas ya mansiansia anggad natan? (Roma 9:21, 22)

3. Basaen so Exodo 12:21-32.

   Panon a niliktar so dakel lapud Paskua, tan antoy irerepresenta na satan? (Exo. 12:21-23; Juan 1:29; Roma 5:18, 19, 21; 1 Cor. 5:7)

Istorya 33

Imbaliw ed Ambalangan Dayat

1. Pigaran Israelitan lalaki, likud ed saray bibii tan ugugaw, so inmalis ed Ehipto, tan siopa ray akilad sikara?

2. Antoy alikna nen Faraon kayari ton imbulos iray Israelita, tan antoy ginawa to?

3. Antoy ginawa nen Jehova pian napatunda iray Ehipsion onaataki ed saray totoo to?

4. Antoy agawa sanen intagey nen Moises so baston to ed Ambalangan Dayat, tan antoy ginawa na saray Israelita?

5. Antoy agawa sanen inusilan na saray Ehipsio iray Israelita ed pegley na dayat?

6. Panon ya impanengneng na saray Israelita ya sikaray maliket tan misasalamat ed si Jehova lapud akaliktar ira?

Kaaruman iran tepet:

1. Basaen so Exodo 12:33-36.

   Panon a sineguro nen Jehova a nabayaran iray totoo to lapud dakel a taon ya impakaaripen dad Ehipto? (Exo. 3:21, 22; 12:35, 36)

2. Basaen so Exodo 14:1-31.

   Panon ya makaapekto iray salita nen Moises ya walad Exodo 14:13, 14 ed saray lingkor nen Jehova natan legan dan aarapen so onsasabin Armagedon? (2 Awa. 20:17; Sal. 91:8)

3. Basaen so Exodo 15:1-8, 20, 21.

   1. Akin et nepeg ya kantaan si Jehova na saray lingkor to? (Exo. 15:1, 2; Sal. 105:2, 3; Apo. 15:3, 4)

   2. Diad Ambalangan Dayat, anton alimbawa na panangidayew ed si Jehova so impanengneng nen Miriam tan na saray bibii parad saray Kristianon bibii natan? (Exo. 15:20, 21; Sal. 68:11)

Istorya 34

Balon Klase na Naakan

1. Diad litrato, antoy dodokdoken na totoo, tan antoy tawag dad satan?

2. Antoy imbilin nen Moises ed saray totoo nipaakar ed panangalay mana?

3. Antoy imbaga nen Jehova ed saray totoo ya gawaen da ed komanem ya agew, tan akin?

4. Anton milagro so ginawa nen Jehova sanen angikera ira na mana parad komapiton agew?

5. Pigay taon ya pinakan nen Jehova iray totoo na mana?

Kaaruman iran tepet:

1. Basaen so Exodo 16:1-36 tan Numeros 11:7-9.

   1. Panon ya ipapanengneng na Exodo 16:8 ya importante so panrespeto ed saray aturon mangidadaulo ed Kristianon kongregasyon? (Heb. 13:17)

   2. Diad kalawakan, panon ya inagew-agew a napapanonotan iray Israelita ya kaukolan day mandepende ed si Jehova? (Exo. 16:14-16, 35; Deu. 8:2, 3)

   3. Anto so simbolikon kabaliksan na mana ya inter nen Jesus, tan panon tayon nagunggonaan ed sayan “tinapay manlapud tawen”? (Juan 6:31-35, 40)

2. Basaen so Josue 5:10-12.

   Pigay taon ya angan na mana iray Israelita, panon iyan anubok ed sikara, tan antoy naaralan tayod saya? (Exo. 16:35; Num. 11:4-6; 1 Cor. 10:10, 11)

Istorya 35

Inter nen Jehova Iray Ganggan To

1. Manga duay bulan kayarin tinmaynan ed Ehipto iray Israelita, iner ira nankampo?

2. Antoy imbaga nen Jehova ya labay ton gawaen na saray totoo, tan antoy ebat da?

3. Akin et inikdan nen Jehova si Moises na duaran tapyas na bato?

4. Likud ed Samploran Ganggan, anto ni arum a ganggan ya inter nen Jehova ed saray Israelita?

5. Anton duaran ganggan so imbaga nen Jesus ya sankaimportantian?

Kaaruman iran tepet:

1. Basaen so Exodo 19:1-25; 20:1-21; 24:12-18; tan 31:18.

   Panon ya makatulong ed sikatayo iray salitan walad Exodo 19:8 pian natalosan tayo no antoy lalanoren na Kristianon dedikasyon? (Mat. 16:24; 1 Ped. 4:1-3)

2. Basaen so Deuteronomio 6:4-6; Levitico 19:18; tan Mateo 22:36-40.

   Panon ya nipanengneng na saray Kristiano so panangaro da ed Dios tan ed kakaabay? (Mar. 6:34; Gawa 4:20; Roma 15:2)

Istorya 36

Balitok a Baka

1. Diad litrato, antoy gagawaen na totoo, tan akin?

2. Akin ya nampasnok si Jehova, tan antoy ginawa nen Moises sanen anengneng toy gagawaen na totoo?

3. Antoy ingganggan nen Moises ed arum a lalaki?

4. Antoy naaralan tayod sayan istorya?

Kaaruman iran tepet:

1. Basaen so Exodo 32:1-35.

   1. Panon ya ipapanengneng na sayan salaysay so nalilikna nen Jehova sano laokan na palson panagdayew so dugan panagdayew? (Exo. 32:4-6, 10; 1 Cor. 10:7, 11)

   2. Antoy nepeg ya panalwaran na saray Kristiano sano manpipili na panagligliwaan, a singa say pangansion tan pansayaw? (Exo. 32:18, 19; Efe. 5:15, 16; 1 Juan 2:15-17)

   3. Panon ya impanengneng na tribu nen Levi so maong ya alimbawa diad impansiansia ran matunong? (Exo. 32:25-28; Sal. 18:25)

Istorya 37

Tolda a Parad Panagdayew

1. Diad litrato, antoy tawag ed satay impaalagey na saray Israelita, tan parad anto itan?

2. Akin et binilin nen Jehova si Moises ya manggawa na tolda a mainomay ya bagbagen?

3. Anto may kahon diad melag a kuarto ed sampot na tolda, tan antoy karga to?

4. Siopay pinili nen Jehova a magmaliw ya atagey a saserdote, tan antoy gagawaen na atagey a saserdote?

5. Bitlaen so taloran bengatla a walad baleg a kuarto na tolda.

6. Antoy duaran bengatla ya walad paway na tabernakulo, tan parad anto iratan?

Kaaruman iran tepet:

1. Basaen so Exodo 25:8-40; 26:1-37; 27:1-8; tan 28:1.

   Antoy irerepresenta na saray kerubin diad “kaban na testimonya”? (Exo. 25:20, 22, NW; Num. 7:89; 2 Ara. 19:15)

2. Basaen so Exodo 30:1-10, 17-21; 34:1, 2; tan Hebreos 9:1-5.

   1. Akin ya indanet nen Jehova ya importantin pansiansiaen na saray saserdoten manlilingkor ed tabernakulo so pisikal a kalinisan, tan antoy nepeg ya epekto na saya ed sikatayo natan? (Exo. 30:18-21; 40:30, 31; Heb. 10:22)

   2. Panon ya impanengneng nen Pablo ya say tabernakulo tan Ganggan na sipanan et agla nauusar sanen nansulat ed saray Hebreon Kristiano? (Heb. 9:1, 9; 10:1)

Istorya 38

Say 12 ya Espiya

1. Antoy apansin mo ed saray ubas diad litrato, tan iner nanlapu iratan?

2. Akin ya angibaki si Moises na 12 ya espiya diad Canaan?

3. Kapawil na samploran espiya, antoy imbaga rad si Moises?

4. Panon ya nanmatalek ed si Jehova so duaran espiya, tan antoy ngaran da?

5. Akin et nampasnok si Jehova, tan antoy imbaga to ed si Moises?

Kaaruman iran tepet:

1. Basaen so Numeros 13:1-33.

   1. Siopa ray pinilin man-espiya ed dalin, tan antoy baleg a pankanawnawa ra? (Num. 13:2, 3, 18-20)

   2. Akin et midumay panmoria di Josue tan Caleb ed saray arum nin espiya, tan antoy ibabangat na saya ed sikatayo? (Num. 13:28-30; Mat. 17:20; 2 Cor. 5:7)

2. Basaen so Numeros 14:1-38.

   1. Anton pasakbay nipaakar ed panagreklamo sumpad saray mangirerepresenta ed si Jehova diad dalin so nepeg tayon nodnonoten? (Num. 14:2, 3, 27; Mat. 25:40, 45; 1 Cor. 10:10)

   2. Panon ya ipapanengneng na Numeros 14:24 ya interesado si Jehova ed balang sakey ed saray lingkor to? (1 Ara. 19:18; Uli. 15:3)

Istorya 39

Nanrosas so Baston nen Aaron

1. Siopa ray nanrebelde ed si Moises tan Aaron, tan antoy imbaga dad si Moises?

2. Antoy imbaga nen Moises ed si Kora tan ed 250 ya kakaiba to?

3. Antoy imbaga nen Moises ed totoo, tan antoy agawa kapangibaga tod saman?

4. Antoy agawa ed si Kora tan ed 250 ya kakaiba to?

5. Antoy ginawa nen Eleazar ya anak nen Aaron ed kargaay ngalab na inaatey ya lalaki, tan akin?

6. Akin et pinarosas nen Jehova so baston nen Aaron? (Nengnengen so litrato.)

Kaaruman iran tepet:

1. Basaen so Numeros 16:1-49.

   1. Antoy ginawa di Kora tan saray kakaiba to, tan akin ya panagrebelde itan ed si Jehova? (Num. 16:9, 10, 18; Lev. 10:1, 2; Uli. 11:2)

   2. Anto so lingon inisip nen Kora tan na saray 250 ya “papangulo ed muyong”? (Num. 16:1-3, NW; Uli. 15:33; Isa. 49:7)

2. Basaen so Numeros 17:1-11 tan 26:10.

   1. Antoy ipapanengneng na impanrosas na baston nen Aaron, tan akin et imbilin nen Jehova ya ikarga itan ed kaban? (Num. 17:5, 8, 10)

   2. Anton importantin leksion so naaralan tayo ed impanrosas na baston nen Aaron? (Num. 17:10; Gawa 20:28; Fil. 2:14; Heb. 13:17)

Istorya 40

Pinekpek nen Moises so Bato

1. Panon ya inasikaso nen Jehova iray Israelita legan iran walad desierto?

2. Antoy reklamo na saray Israelita nen pinmawil irad Kades?

3. Panon ya angiter si Jehova na danum ed saray totoo tan ayayep?

4. Diad litrato, siopa tay lakin ituturo toy sarili to, tan akin?

5. Akin et nampasnok si Jehova ed si Moises tan Aaron, tan antoy dusa ra?

6. Antoy agawa ed Palandey Hor, tan siopay sinmublay ya atagey a saserdote na Israel?

Kaaruman iran tepet:

1. Basaen so Numeros 20:1-13, 22-29 tan Deuteronomio 29:5.

   1. Antoy naaralan tayod impangasikaso nen Jehova ed saray Israelita diad desierto? (Deu. 29:5; Mat. 6:31; Heb. 13:5; Sant. 1:17)

   2. Antoy liknaan nen Jehova ed ag-impangirayew nen Moises tan Aaron ed sikato diad arap na Israel? (Num. 20:12; 1 Cor. 10:12; Apo. 4:11)

   3. Antoy naaralan tayod reaksion nen Moises ed disiplinan inter nen Jehova? (Num. 12:3; 20:12, 27, 28; Deu. 32:4; Heb. 12:7-11)

Istorya 41

Gansa ya Uleg

1. Diad litrato, anto so akaputipot ed poste, tan akin et ingganggan nen Jehova si Moises ya iyan ditan so uleg?

2. Akin et nibagan ag-amta na totoo so misalamat ed amin a ginawa na Dios ed sikara?

3. Antoy kinerew na totoo ed si Moises sanen dinusa ira nen Jehova panamegley na uleg?

4. Akin et imbaga nen Jehova ed si Moises ya manggawa na gansan uleg?

5. Antoy naaralan tayo ed sayan istorya?

Kaaruman iran tepet:

1. Basaen so Numeros 21:4-9.

   1. Antoy ipapasakbay ed sikatayo na impanreklamo na Israel ed saray probisyon nen Jehova? (Num. 21:5, 6; Roma 2:4)

   2. Kalabas na pigaran siglo, panon ya inusar na saray Israelita so gansan uleg, tan antoy ginawa nen Arin Hezekias? (Num. 21:9; 2 Ara. 18:1-4)

2. Basaen so Juan 3:14, 15.

   Panon ya irerepresenta na gansan uleg ya walad poste so impangipasak ed si Jesu-Kristo? (Gal. 3:13; 1 Ped. 2:24)

Istorya 42

Nansalita so Sakey ya Asno

1. Siopa si Balak, tan akin et impatawag toy Balaam?

2. Akin et dinmukol ed dalan so asno nen Balaam?

3. Antoy imbaga na asno ed si Balaam?

4. Antoy imbaga na anghel ed si Balaam?

5. Antoy agawa sanen sinali nen Balaam ya isumpa so Israel?

Kaaruman iran tepet:

1. Basaen so Numeros 21:21-35.

   Akin et tinalo na Israel si Sihon ya ari na saray Amoreo tan si Og ya ari na Basan? (Num. 21:21, 23, 33, 34)

2. Basaen so Numeros 22:1-40.

   Akin et sasalien nen Balaam ya isumpa so Israel, tan antoy naaralan tayo ed saya? (Num. 22:16, 17; Uli. 6:16, 18; 2 Ped. 2:15; Jud. 11)

3. Basaen so Numeros 23:1-30.

   Anggaman singa sakey a managdayew nen Jehova si Balaam, panon ya nanengneng ed ginawa to ya sikatoy aliwan tuan managdayew? (Num. 23:3, 11-14; 1 Sam. 15:22)

4. Basaen so Numeros 24:1-25.

   Panon ya apabiskeg na sayan salaysay so pananisia tayo ed pakasumpal na linawa nen Jehova? (Num. 24:10; Isa. 54:17)

Istorya 43

Nagmaliw ya Lider si Josue

1. Diad litrato, siopa yay duaran laki ya akaalagey ed abay nen Moises?

2. Antoy imbaga nen Jehova ed si Josue?

3. Akin et tinmatdang si Moises ed toktok na Palandey Nebo, tan antoy imbaga nen Jehova ed sikato?

4. Pigay taon nen Moises sanen inatey?

5. Akin et maer-ermen iray totoo, balet antoy rason na panliket da?

Kaaruman iran tepet:

1. Basaen so Numeros 27:12-23.

   Anton ambelat ya asainmin so inter nen Jehova ed si Josue, tan panon ya aasikasoen nen Jehova iray totoo To natan? (Num. 27:15-19; Gawa 20:28; Heb. 13:7)

2. Basaen so Deuteronomio 3:23-29.

   Akin et ag-inabuloyan nen Jehova si Moises ya makaloob ed insipan a dalin, tan antoy naaralan tayod saya? (Deu. 3:25-27; Num. 20:12, 13)

3. Basaen so Deuteronomio 31:1-8, 14-23.

   Panon ya ipapanengneng na sampot iran salita nen Moises ed Israel ya mapaabeba ton inawat so disiplina nen Jehova? (Deu. 31:6-8, 23)

4. Basaen so Deuteronomio 32:45-52.

   Antoy epekto na Salitay Dios ed bilay tayo? (Deu. 32:47; Lev. 18:5; Heb. 4:12)

5. Basaen so Deuteronomio 34:1-12.

   Anggaman aliwan literal ya anengneng nen Moises si Jehova, antoy ipapaamta na Deuteronomio 34:10 nipaakar ed relasyon tod si Jehova? (Exo. 33:11, 20; Num. 12:8)

Istorya 44

Inyamot nen Rahab Iray Espiya

1. Iner so panaayaman nen Rahab?

2. Siopa irayay duaran lalaki ed litrato, tan akin et wala rad Jerico?

3. Antoy ingganggan na ari na Jerico ed si Rahab, tan antoy inyebat to?

4. Panon ya tinulongan nen Rahab so duaran lalaki, tan antoy kinerew tod sikara?

5. Antoy impormisa na duaran espiya ed si Rahab?

Kaaruman iran tepet:

1. Basaen so Josue 2:1-24.

   Panon ya asumpal so impormisa nen Jehova ya walad Exodo 23:28 sanen akilaban iray Israelita ed saray taga-Jerico? (Jos. 2:9-11)

2. Basaen so Hebreos 11:31.

   Panon ya impanengneng nen Rahab ya importante so pananisia? (Roma 1:17; Heb. 10:39; Sant. 2:25)

Istorya 45

Imbaliw ed Ilog Jordan

1. Anton milagro so ginawa nen Jehova pian makabaliw iray Israelita ed Ilog Jordan?

2. Anton klase na pananisia so kaukolan ya ipanengneng na saray Israelita pian makabaliw ira?

3. Akin et imbaga nen Jehova ed si Josue ya mangala na 12 angkabaleg a bato ed ilog?

4. Antoy tampol ya agawa kasakbit na saray saserdote ed Jordan?

Kaaruman iran tepet:

1. Basaen so Josue 3:1-17.

   1. Singa ipapanengneng na sayan istorya, antoy kaukolan tayon gawaen pian tulongan tan bendisyonan tayo nen Jehova? (Jos. 3:13, 15; Uli. 3:5; Sant. 2:22, 26)

   2. Komustay Ilog Jordan sanen binmaliw iray Israelita paonlad Insipan a Dalin, tan panon ya inggloria na saya so ngaran nen Jehova? (Jos. 3:15; 4:18; Sal. 66:5-7)

2. Basaen so Josue 4:1-18.

   Parad anto so 12 bato ya inalad Jordan tan impantatapewan ed Gilgal? (Jos. 4:4-7)

Istorya 46

Say Padir na Jerico

1. Antoy inggangan nen Jehova ed saray sundalo tan saray saserdote diad loob na anemiran agew?

2. Antoy gawaen da diad komapiton agew?

3. Singa nanenengneng mod litrato, antoy nagagawa ed saray padir na Jerico?

4. Akin et walay ambalangan lubir ya akaberber ed bintana?

5. Antoy ingganggan nen Josue ya gawaen na saray sundalo ed saray totoo tan ed syudad, balet antoy gawaen dad pilak, balitok, gansa, tan balatyang?

6. Antoy ingganggan ed duaran espiya?

Kaaruman iran tepet:

1. Basaen so Josue 6:1-25.

   1. Panon a say panmamartsa na saray Israelita ed paliber na Jerico diad komapiton agew so mipara ed panagpulong na Saray Tasi nen Jehova ed sarayan kaunoran ya agew? (Jos. 6:15, 16; Isa. 60:22; Mat. 24:14; 1 Cor. 9:16)

   2. Panon ya asumpal so propesiyan walad Josue 6:26 kayari na 500 a taon, tan antoy ibabangat na saya ed sikatayo nipaakar ed salita nen Jehova? (1 Ara. 16:34; Isa. 55:11)

Istorya 47

Sakey a Matakew ed Israel

1. Diad litrato, siopa yay lakin mangikokotkot na kayamanan ya inalad Jerico, tan siopa irayay ontutulong ed sikato?

2. Akin et talagan mauges so ginawa nen Acan tan say pamilya to?

3. Antoy imbaga nen Jehova sanen tinepet nen Josue no akin ya atalo iray Israelita ed impilaban dad Ai?

4. Kayarin inyakar si Acan tan say pamilya to ed si Josue, antoy agawa ed sikara?

5. Antoy naaralan tayo ed agawad si Acan?

Kaaruman iran tepet:

1. Basaen so Josue 7:1-26.

   1. Antoy ipapatnag na pikakasi nen Josue nipaakar ed relasyon tod Manamalsa to? (Jos. 7:7-9; Sal. 119:145; 1 Juan 5:14)

   2. Antoy ipapanengneng na ginawa nen Acan, tan panon iyan onkanan pasakbay ed sikatayo? (Jos. 7:11, 14, 15; Uli. 15:3; 1 Tim. 5:24; Heb. 4:13)

2. Basaen so Josue 8:1-29.

   Bilang indibidual, antoy responsabilidad tayo ed Kristianon kongregasyon natan? (Jos. 7:13; Lev. 5:1; Uli. 28:13)

Istorya 48

Saray Mautek ya Gibeonita

1. Antoy pidumaan na saray taga-Gibeon tan saray Canaanita ya walad asingger iran syudad?

2. Singa nanengneng mod litrato, antoy gagawaen na saray Gibeonita, tan akin?

3. Antoy impormisa di Josue tan saray Israelitan lider ed saray Gibeonita, balet antoy naamtaan da kayari taloran agew?

4. Antoy agawa sanen abalitaan na saray ari ed arum a syudad ya akikaaro iray Gibeonita ed Israel?

Kaaruman iran tepet:

1. Basaen so Josue 9:1-27.

   1. Anggaman binilin nen Jehova so bansan Israel ya ‘pateyen iray amin ya manaayam ed dalin,’ anto ran kualidad so anengneng tayod sikato diad agto impamatey ed saray Gibeonita? (Jos. 9:22, 24; Mat. 9:13; Gawa 10:34, 35; 2 Ped. 3:9)

   2. Diad impanumpal nen Josue ed pormisa tod saray Gibeonita, panon ya naalig na saray Kristiano natan so alimbawa to? (Jos. 9:18, 19; Mat. 5:37; Efe. 4:25)

2. Basaen so Josue 10:1-5.

   Panon ya aaligen natan na baleg ya ulop iray Gibeonita, kanian magmamaliw iran puntirya na anto? (Jos. 10:4; Zac. 8:23; Mat. 25:35-40; Apo. 12:17)

Istorya 49

Agsinmelek so Agew

1. Diad litrato, antoy ibabaga nen Josue, tan akin?

2. Panon ya tinulongan nen Jehova si Josue tan saray sundalo to?

3. Pigaran kalaban ya ari so tinalo nen Josue, tan panon kabayag?

4. Akin et inapag nen Josue so dalin na Canaan?

5. Pigay taon nen Josue sanen inatey, tan antoy ginawa na totoo kayari impatey to?

Kaaruman iran tepet:

1. Basaen so Josue 10:6-15.

   Lapud naamtaan tayon agpinaselek nen Jehova so agew tan bulan parad Israel, antoy napanmatalekan tayo natan? (Jos. 10:8, 10, 12, 13; Sal. 18:3; Uli. 18:10)

2. Basaen so Josue 12:7-24.

   Siopan talaga so akatalo ed 31 ya arari na Canaan, tan akin et importante iya ed sikatayo natan? (Jos. 12:7; 24:11-13; Deu. 31:8; Luc. 21:9, 25-28)

3. Basaen so Josue 14:1-5.

   Panon ya inapag so dalin parad saray tribu na Israel, tan antoy ipapanengneng na saya nipaakar ed tawiren tayod Paraiso? (Jos. 14:2; Isa. 65:21; Eze. 47:21-23; 1 Cor. 14:33)

4. Basaen so Uko-ukom 2:8-13.

   Singa si Josue diad Israel, siopa natan so mamapatunda ed apostasya? (Uko. 2:8, 10, 11; Mat. 24:45-47; 2 Tes. 2:3-6; Tit. 1:7-9; Apo. 1:1; 2:1, 2)

Istorya 50

Duaran Makpel a Bii

1. Antoy ngaran na arum ed saray ukom?

2. Antoy espisyal ya kimey nen Debora, tan panon to iyan gagawaen?

3. Sanen saray Israelita et kakalabanen nen Arin Jabin tan say lider na sundalo to a si Sisera, antoy impaibaga nen Jehova ed si Debora parad si Ukom Barak, tan siopay imbaga ton napagalangan?

4. Panon ya impanengneng nen Jael ya sikatoy makpel?

5. Antoy agawa kayari impatey nen Arin Jabin?

Kaaruman iran tepet:

1. Basaen so Uko-ukom 2:14-22.

   Panon ya nanresultad impakasakitan na saray Israelita so impamasanok dad si Jehova, tan antoy naaralan tayod saya? (Uko. 2:20; Uli. 3:1, 2; Eze. 18:21-23)

2. Basaen so Uko-ukom 4:1-24.

   Antoy naaralan na saray Kristianon bibii natan nipaakar ed pananisia tan pakpel nen Debora tan Jael? (Uko. 4:4, 8, 9, 14, 21, 22; Uli. 31:30; 1 Cor. 16:13)

3. Basaen so Uko-ukom 5:1-31.

   Panon ya onaplika so kanta na impanalo di Barak tan Debora ed pikakasi nipaakar ed onsasabin Armagedon? (Uko. 5:3, 31; 1 Awa. 16:8-10; Apo. 7:9, 10; 16:16; 19:19-21)

Istorya 51

Rut tan Noemi

1. Akin et nanayam ed Moab si Noemi?

2. Siopa si Rut tan Orpa?

3. Antoy ginawa di Rut tan Orpa sanen papapawilen la ra nen Noemi ed baley da?

4. Siopa si Boaz, tan panon ton tinulongan si Rut tan Noemi?

5. Antoy ngaran na anak di Boaz tan Rut, tan akin ya sikatoy nepeg tayon tandaan?

Kaaruman iran tepet:

1. Basaen so Rut 1:1-17.

   1. Anto so balibalin imbaga nen Rut a pakanengnengay matoor a panangaro to? (Rut 1:16, 17)

   2. Panon a say panagnonot nen Rut et miparad panmoria na ‘arum a karnero’ ed saray alanaan ya walad dalin natan? (Juan 10:16; Zac. 8:23)

2. Basaen so Rut 2:1-23.

   Panon a nagmaliw ya maong ya alimbawa si Rut ed saray kalangweran a bibii natan? (Rut 2:17, 18; Uli. 23:22; 31:15)

3. Basaen so Rut 3:5-13.

   1. Antoy liknaan nen Boaz ed inkamabulos nen Rut ya miasawad sikato imbes a diad mas ugaw?

   2. Antoy naaralan tayo ed matoor ya panangaro nen Rut? (Rut 3:10; 1 Cor. 13:4, 5)

4. Basaen so Rut 4:7-17.

   Panon ya naalig na saray Kristianon lalaki si Boaz? (Rut 4:9, 10; 1 Tim. 3:1, 12, 13; 5:8)

Istorya 52

Si Gideon tan Saray 300 ya Sundalo To

1. Panon tan akin ya napepeligro iray Israelita?

2. Akin et imbaga nen Jehova ed si Gideon ya masyadon dakel iray sundalo to?

3. Pigaran sundalo so tinmilak sanen imbaga nen Gideon ya onsempet la ray natatakot ya milaban?

4. Diad litrato, ipaliwawam pa no panon ya binawasan nen Jehova iray sundalo nen Gideon ya anggad nagmaliw ya 300 labat.

5. Panon ya inorganisa nen Gideon so 300 a sundalo to, tan panon ya analo so Israel?

Kaaruman iran tepet:

1. Basaen so Uko-ukom 6:36-40.

   1. Panon ya sineguro nen Gideon no antoy linawa nen Jehova?

   2. Panon tayon naamtaan natan so linawa nen Jehova? (Uli. 2:3-6; Mat. 7:7-11; 2 Tim. 3:16, 17)

2. Basaen so Uko-ukom 7:1-25.

   1. Aliwan singa saramay mapaulyan a sundalo, antoy naaralan tayo ed saramay 300 a nansiansian alerto? (Uko. 7:3, 6; Roma 13:11, 12; Efe. 5:15-17)

   2. Singa saramay 300 a sundalo ya akaaral ed si Gideon, panon ti met ya makaaral ed mas Baleg a Gideon, si Jesu-Kristo? (Uko. 7:17; Mat. 11:29, 30; 28:19, 20; 1 Ped. 2:21)

   3. Panon ya makatulong ed sikatayo so Uko-ukom 7:21 ed pagmaliw ya kontenton manlingkor ed inerman ya pangibakian nen Jehova ed sikatayo? (1 Cor. 4:2; 12:14-18; Sant. 4:10)

3. Basaen so Uko-ukom 8:1-3.

   Sano reresolbien iray agpantatalosan na saray agagi, antoy naaralan tayod ginawa nen Gideon pian naresolbe so problema rad saray Efraimita? (Uli. 15:1; Mat. 5:23, 24; Luc. 9:48)

Istorya 53

Say Pormisa nen Jefte

1. Siopa si Jefte, tan kapigan nambilay?

2. Antoy impormisa nen Jefte ed si Jehova?

3. Akin et nanermen si Jefte kasempet to manlapud impanalo tod saray Ammonita?

4. Antoy imbaga na anak nen Jefte sanen naamtaan toy pormisa na ama to?

5. Akin et inar-aro na totoo so anak nen Jefte?

Kaaruman iran tepet:

1. Basaen so Uko-ukom 10:6-18.

   Antoy naaralan tayod ag-impanmatoor na Israel ed si Jehova? (Uko. 10:6, 15, 16; Roma 15:4; Apo. 2:10)

2. Basaen so Uko-ukom 11:1-11, 29-40.

   1. Panon tayon amta ya say impangiter nen Jefte ed anak to bilang “bagat a poolan” et agmankabaliksay pamool ed sikato? (Uko. 11:31; Lev. 16:24; Deu. 18:10, 12)

   2. Panon ya imbagat nen Jefte so anak to?

   3. Antoy naaralan tayo ed impanumpal nen Jefte ed pormisa tod si Jehova? (Uko. 11:35, 39; Ecl. 5:4, 5; Mat. 16:24)

   4. Akin et maong ya alimbawa so anak nen Jefte parad saray kalangweran a Kristianon malabay ya onloob ed sigpot-panaon a serbisyo? (Uko. 11:36; Mat. 6:33; Fil. 3:8)

Istorya 54

Say Sankabiskegan a Too

1. Antoy ngaran na sankabiskegan a too, tan siopay angiter na biskeg to?

2. Diad litrato, antoy ginawa nen Samson ed baleg a leon?

3. Diad litrato, anton sekreto so ibabaga nen Samson ed si Delila, tan panon a lapud saya et sikatoy narel laingen na saray Filisteo?

4. Panon ya apatey nen Samson so 3,000 ya Filisteo diad agew na impatey to?

Kaaruman iran tepet:

1. Basaen so Uko-ukom 13:1-14.

   Panon a si Manoa tan say asawa to et maong ya alimbawa ed saray atateng diad pamapabaleg dad anak da? (Uko. 13:8; Sal. 127:3; Efe. 6:4)

2. Basaen so Uko-ukom 14:5-9 tan 15:9-16.

   1. Antoy ipapanengneng na impamatey nen Samson ed leon, impamultot tod lubir ya impansinger ed sikato, tan impangusar tod pangal na asno pian pateyen so 1,000 lalaki nipaakar ed nagawaan na masanton espiritu nen Jehova?

   2. Panon itayon tutulongan na masanton espiritu natan? (Uko. 14:6; 15:14; Zac. 4:6; Gawa 4:31)

3. Basaen so Uko-ukom 16:18-31.

   Panon ya naimpluensyaan si Samson na mauges ya kaulop, tan antoy naaralan tayod saya? (Uko. 16:18, 19; 1 Cor. 15:33)

Istorya 55

Ugaw ya Manlilingkor ed Dios

1. Antoy ngaran na sayay ugaw ed litrato, tan siopa ray kaiba to?

2. Antoy impikasi nen Hana sanen linmad tabernakulo nen Jehova, tan panon ya inebatan nen Jehova?

3. Pigay taon nen Samuel sanen inyakar ed tolda nen Jehova, tan antoy iiter nen nanay tod sikato kada taon?

4. Antoy kangaranan na saray anak nen Eli, tan anto ran klasen totoo?

5. Panon ya tinawag nen Jehova si Samuel, tan antoy imbaga To?

6. Antoy nagmaliwan nen Samuel sanen baleg la, tan antoy agawa sanen masiken la?

Kaaruman iran tepet:

1. Basaen so 1 Samuel 1:1-28.

   1. Anton maong ya alimbawa so impanengneng nen Elkana parad saray ulo na pamilya ya mangidadaulo ed dugan panagdayew? (1 Sam. 1:3, 21; Mat. 6:33; Fil. 1:10)

   2. Antoy naaralan tayo ed alimbawa nen Hana sano walay mairap a problema? (1 Sam. 1:10, 11; Sal. 55:22; Roma 12:12)

2. Basaen so 1 Samuel 2:11-36.

   Panon a mas pinagalangan nen Eli iray anak to nen say si Jehova, tan antoy naaralan tayod saya? (1 Sam. 2:22-24, 27, 29; Deu. 21:18-21; Mat. 10:36, 37)

3. Basaen so 1 Samuel 4:16-18.

   Anto so apatiran mauges a balita nipaakar ed impilaban na Israel, tan antoy epekto na saya ed si Eli?

4. Basaen so 1 Samuel 8:4-9.

   Panon a sinakitan na Israel so puso nen Jehova, tan panon tayon matoor a nasuportaan so Panarian to natan? (1 Sam. 8:5, 7; Juan 17:16; Sant. 4:4)

Istorya 56

Saul—Say Unaan ya Ari na Israel

1. Diad litrato, antoy gagawaen nen Samuel, tan akin?

2. Akin a labay nen Jehova si Saul?

3. Antoy ngaran na anak nen Saul, tan antoy ginawa na anak to?

4. Akin et ag-inalagar nen Saul si Samuel ya mangibagat?

5. Antoy naaralan tayod istorya nipaakar ed si Saul?

Kaaruman iran tepet:

1. Basaen so 1 Samuel 9:15-21 tan 10:17-27.

   Panon ya akatulong so inkamapaabeba nen Saul pian agbasta-basta makagaway aliwa sanen sikatoy binalaw na arum? (1 Sam. 9:21; 10:21, 22, 27; Uli. 17:27)

2. Basaen so 1 Samuel 13:5-14.

   Anton kasalanan so ginawa nen Saul diad Gilgal? (1 Sam. 10:8; 13:8, 9, 13)

3. Basaen so 1 Samuel 15:1-35.

   1. Anton seryoson kasalanan so ginawa nen Saul nipaakar ed si Agag, say ari na Amalek? (1 Sam. 15:2, 3, 8, 9, 22)

   2. Panon ya indepensa nen Saul so ginawa to tan tinetel toy arum? (1 Sam. 15:24)

   3. Anton pasakbay so nepeg tayon dengelen natan sano sisimbawaen itayo? (1 Sam. 15:19-21; Sal. 141:5; Uli. 9:8, 9; 11:2)

Istorya 57

Pinili na Dios si David

1. Antoy ngaran na sayay ugaw ed litrato, tan panon tayon amta ya sikatoy masibeg?

2. Taga iner si David, tan siopay tatay tan laki to?

3. Akin et imbaki nen Jehova si Samuel ed kindi Jesse a taga-Betlehem?

4. Antoy agawa sanen inyarap nen Jesse ed si Samuel so pitorad saray anak to?

5. Sanen tinawag day David, antoy imbaga nen Jehova ed si Samuel?

Kaaruman iran tepet:

1. Basaen so 1 Samuel 17:34, 35.

   Panon ya ipapanengneng na sarayan teksto ya makpel si David tan manmamatalek ed si Jehova? (1 Sam. 17:37)

2. Basaen so 1 Samuel 16:1-14.

   1. Panon ya ontulong ed sikatayo so imbaga nen Jehova ya walad 1 Samuel 16:7 pian patas so pantrato tayod amin tan agmanhusga base ed itsura? (Gawa 10:34, 35; 1 Tim. 2:4)

   2. Panon ya ipapanengneng na agawad si Saul ya sano ekalen nen Jehova so masanton espiritu to ed sakey, say onsalat et mauges ya espiritu, tan say pilalek ya manggawa na mauges? (1 Sam. 16:14; Mat. 12:43-45; Gal. 5:16)

Istorya 58

David tan Goliat

1. Antoy inkantiaw nen Goliat ed saray sundalo na Israel?

2. Panon katagey si Goliat, tan antoy premyo nen Arin Saul ed toon makapatey ed si Goliat?

3. Antoy inyebat nen David sanen imbaga nen Saul ya agto nasarag si Goliat ta sikatoy ugaw ni?

4. Diad ebat nen David ed si Goliat, panon ton impanengneng so talek tod si Jehova?

5. Diad litrato, antoy inusar nen David ya pamatey ed si Goliat, tan antoy agawa ed saray Filisteo kayari na saya?

Kaaruman iran tepet:

1. Basaen so 1 Samuel 17:1-54.

   1. Antoy sekreto nen David, akin et aglabat tinmakot, tan panon tayon naalig? (1 Sam. 17:37, 45; Efe. 6:10, 11)

   2. Sano manggagalaw, akin et kaukolan ya paliisan na saray Kristiano so pikompetensya ya singa si Goliat? (1 Sam. 17:8; Gal. 5:26; 1 Tim. 4:8)

   3. Panon ya napatnagan ed imbaga nen David ya manmamatalek ed tulong na Dios? (1 Sam. 17:45-47; 2 Awa. 20:15)

   4. Imbes ya ibagan istorya labat iya na duaran manlalaban ya kampo, panon ya ipapanengneng na salaysay ya laban iya na palson dirios tan na tuan Dios a si Jehova? (1 Sam. 17:43, 46, 47)

   5. Panon ya aaligen na saray alanaan so impanmatalek nen David ed si Jehova? (1 Sam. 17:37; Jer. 1:17-19; Apo. 12:17)

Istorya 59

Tinmakas si David

1. Akin et akaibeg si Saul ed si David, balet kasin ontan met si Jonatan?

2. Antoy agawa sanen totogtogan nen David na arpa si Saul?

3. Anto ni impagawa nen Saul ed si David antis ton naasawa si Mical, tan akin?

4. Diad litrato, anto so agawa diad komatlon beses?

5. Panon ya tinulongan nen Mical si David, tan antoy ginawa nen David ed loob na pitoy taon?

Kaaruman iran tepet:

1. Basaen so 1 Samuel 18:1-30.

   1. Panon ya say agkinmupas ya aroan di Jonatan tan David so mangipapanengneng ed aroan na ‘arum a karnero’ tan “melag a pulok”? (1 Sam. 18:1; Juan 10:16; Luc. 12:32; Zac. 8:23)

   2. Lapud si Jonatan komon so manawir ed trono nen Saul, panon ya ipapanengneng na 1 Samuel 18:4 ya talagan sikatoy mapasakop ed pinilin ari?

   3. Panon ya ipapanengneng na agawad si Saul ya nayarin manresultad graben kasalanan so ibeg, tan antoy ipapasakbay na saya? (1 Sam. 18:7-9, 25; Sant. 3:14-16)

2. Basaen so 1 Samuel 19:1-17.

   Panon ya impusta nen Jonatan so bilay to sanen kinompronta toy Saul? (1 Sam. 19:1, 4-6; Uli. 16:14)

Istorya 60

Abigail tan David

1. Diad litrato, antoy ngaran to yay bii ya onaabet ed si David, tan antoy ugali to?

2. Siopa si Nabal?

3. Akin et angibaki si David na pigaran lalaki pian mikasi ed si Nabal?

4. Antoy imbaga nen Nabal ed saray totoo nen David, tan antoy reaksion nen David?

5. Panon ya impanengneng nen Abigail ya sikatoy maisip?

Kaaruman iran tepet:

1. Basaen so 1 Samuel 22:1-4.

   Akin et maabig ya aligen so alimbawa na pamilya nen David diad pansuporta tayod saray kaagian? (Uli. 17:17; 1 Tes. 5:14)

2. Basaen so 1 Samuel 25:1-43.

   1. Akin et negatiboy impangipakabat ed si Nabal? (1 Sam. 25:2-5, 10, 14, 21, 25)

   2. Antoy naaralan na Kristianon kaasawaan ed si Abigail? (1 Sam. 25:32, 33; Uli. 31:26; Efe. 5:24)

   3. Apigilan nen Abigail si David ya manggawa na anton duaran mauges bengatla? (1 Sam. 25:31, 33; Roma 12:19; Efe. 4:26)

   4. Panon a say reaksion nen David ed imbaga nen Abigail so makatulong ed saray lalaki natan pian naalig day panmoria nen Jehova ed bibii? (Gawa 21:8, 9; Roma 2:11; 1 Ped. 3:7)

Istorya 61

Nagmaliw ya Ari si David

1. Antoy ginawa di David tan Abisai legan ya nanaugip si Saul ed kampo to?

2. Antoy intepet nen David ed si Saul?

3. Sanen sinmempet lay Saul, iner so nakar nen David?

4. Antoy nanermenan nen David kanian nanggawa na marakdakep a kansion?

5. Pigay taon nen David sanen nagmaliw ya ari ed Hebron, tan antoy kangaranan na arum ya anak to?

6. Iner so sinmublay ya nan-arian nen David?

Kaaruman iran tepet:

1. Basaen so 1 Samuel 26:1-25.

   1. Diad 1 Samuel 26:11, panoy pangipapasen nen David ed teokratikon uksoyan? (Sal. 37:7; Roma 13:2)

   2. Sano mansasagpot tayon ipanengneng so maaron kaabigan balet nibabaliwala itan, panon a makatulong imay imbaga nen David ya akarekord ed 1 Samuel 26:23 pian napansiansiay dugan panmoria? (1 Ki. 8:32; Sal. 18:20)

2. Basaen so 2 Samuel 1:26.

   Panon ya naalig na saray Kristiano natan so ‘aralem a panangaro ed sakey tan sakey’ ya impanengneng di David tan Jonatan? (1 Ped. 4:8; Col. 3:14; 1 Juan 4:12)

3. Basaen so 2 Samuel 5:1-10.

   1. Pigay taon a nan-ari si David ed Hebron tan ed Jerusalem? (2 Sam. 5:4, 5)

   2. Siopay nanlapuan na amin ya walad si David tan antoy ipapanonot na saya ed sikatayo? (2 Sam. 5:10; 1 Sam. 16:13; 1 Cor. 1:31; Fil. 4:13)

Istorya 62

Problema ed Pamilya nen David

1. Diad tulong nen Jehova, antoy agawan siansia ed dalin na Canaan?

2. Sakey a labi, antoy agawa sanen walad toktok na palasyo si David?

3. Akin et nampasnok a maong si Jehova ed si David?

4. Diad litrato, siopay imbaki nen Jehova a mangibagad saray kasalanan nen David, tan antoy imbaga na laki a nagawad si David?

5. Anto ray problema nen David?

6. Siopay sinmublay ed si David a nagmaliw ya ari na Israel?

Kaaruman iran tepet:

1. Basaen so 2 Samuel 11:1-27.

   1. Akin et proteksion ed sikatayo so pagmaliw ya busy diad panaglingkor ed si Jehova?

   2. Akin et nankasalanan si David, tan antoy ipapasakbay na saya ed saray lingkor nen Jehova natan? (2 Sam. 11:2; Mat. 5:27-29; 1 Cor. 10:12; Sant. 1:14, 15)

2. Basaen so 2 Samuel 12:1-18.

   1. Antoy naaralan na saray elder tan atateng ed paraan na impansimbawa nen Natan ed si David? (2 Sam. 12:1-4; Uli. 12:18; Mat. 13:34)

   2. Akin et kinasian nen Jehova si David? (2 Sam. 12:13; Sal. 32:5; 2 Cor. 7:9, 10)

Istorya 63

Solomon—Matalinon Ari

1. Antoy tinepet nen Jehova ed si Solomon, tan antoy ebat to?

2. Lapud aliketan si Jehova ed kerew nen Solomon, antoy impormisa to?

3. Anto imay mairap a problema na duaran bii ya inkonsulta da ed si Solomon?

4. Diad litrato, antoy solusyon nen Solomon ed problema da?

5. Komustay impan-ari nen Solomon, tan akin?

Kaaruman iran tepet:

1. Basaen so 1 Arari 3:3-28.

   1. Antoy naaralan na saray lalakin walaay responsabilidad ed organisasyon na Dios ed impapuson balikas nen Solomon diad 1 Arari 3:7? (Sal. 119:105; Uli. 3:5, 6)

   2. Akin et alimbawa na dugan pikakasi so kerew nen Solomon? (1 Ara. 3:9, 11; Uli. 30:8, 9; 1 Juan 5:14)

   3. Akin a say impansolusyon nen Solomon ed problema na duaran bibii so mangiiter ed sikatayo na talek ed pan-ari na mas Baleg a Solomon, si Jesu-Kristo? (1 Ara. 3:28; Isa. 9:6, 7; 11:2-4)

2. Basaen so 1 Arari 4:29-34.

   1. Antoy ebat nen Jehova ed kerew nen Solomon ya naikday matulok a puso? (1 Ara. 4:29)

   2. Nensaman et nansagpotan na totoo ya narengel so karunongan nen Solomon, kanian anto met so nepeg ya ugali tayod panagaral na Salitay Dios? (1 Ara. 4:29, 34; Juan 17:3; 2 Tim. 3:16)

Istorya 64

Impaalagey nen Solomon so Templo

1. Pigay taon ya impaalagey nen Solomon so templo nen Jehova, tan akin et balbaleg so agastos?

2. Pigara so baleg a kuarto ed templo, tan anto so inkarga ed loob na kuarto?

3. Antoy impikasi nen Solomon sanen asumpal so templo?

4. Panon ya impanengneng nen Jehova ya agustoan toy pikakasi nen Solomon?

5. Lapud saray asawa nen Solomon, antoy ginawa to tan antoy nagmaliwan to?

6. Akin et nampasnok si Jehova ed si Solomon, tan antoy imbaga nen Jehova ed sikato?

Kaaruman iran tepet:

1. Basaen so 1 Awaran 28:9, 10.

   Singa samay imbaga nen David ya akarekord ed 1 Awaran 28:9, 10, antoy nepeg tayon pansagpotan ed inagew-agew? (Sal. 19:14; Fil. 4:8, 9)

2. Basaen so 2 Awaran 6:12-21, 32-42.

   1. Panon ya impanengneng nen Solomon ya agnakarga na bilding ya ginaway too so Sankatagyan a Dios? (2 Awa. 6:18; Gawa 17:24, 25)

   2. Antoy ipapanengneng na imbaga nen Solomon ya akarekord ed 2 Awaran 6:32, 33 nipaakar ed si Jehova? (Gawa 10:34, 35; Gal. 2:6)

3. Basaen so 2 Awaran 7:1-5.

   Singa saray Israelita ya apakiwas a mandayew ed si Jehova sanen anengneng da so gloria to, panon tayo met natan a napakiwas sano dadalepdepen tayo so bendisyon nen Jehova ed totoo to? (2 Awa. 7:3; Sal. 22:22; 34:1; 96:2)

4. Basaen so 1 Arari 11:9-13.

   Panon ya impanengneng na impanbilay nen Solomon ya importante so pansiansian matoor anggad angga? (1 Ara. 11:4, 9; Mat. 10:22; Apo. 2:10)

Istorya 65

Apaldua so Panarian

1. Siopa irayay duaran laki diad litrato?

2. Antoy ginawa nen Ahias ed kawes to, tan akin?

3. Antoy sinalin gawaen nen Solomon ed si Jeroboam?

4. Akin et ginawa na samploran tribu ya ari si Jeroboam?

5. Akin et nanggawa na duaran balitok a baka si Jeroboam tan antoy resulta?

6. Antoy agawa ed duaran tribu tan ed templo nen Jehova diad Jerusalem?

Kaaruman iran tepet:

1. Basaen so 1 Arari 11:26-43.

   Anton klase na too si Jeroboam, tan antoy impormisa nen Jehova ed sikato no lanang ton unoren so ganggan na Dios? (1 Ara. 11:28, 38)

2. Basaen so 1 Arari 12:1-33.

   1. Antoy naaralan na saray atateng tan elder ed makapuy ya alimbawa nen Rehoboam nipaakar ed pan-abuso ed autoridad? (1 Ara. 12:13; Ecl. 7:7; 1 Ped. 5:2, 3)

   2. Siopay nepeg a kerewan na saray kalangweran natan na giya sano mandedesisyon? (1 Ara. 12:6, 7; Uli. 1:8, 9; 2 Tim. 3:16, 17; Heb. 13:7)

   3. Akin et nanggawa na duaran balitok a baka si Jeroboam, tan panon a pakanengnengan iya ya anggapoy talek tod si Jehova? (1 Ara. 11:37; 12:26-28)

   4. Siopay angigulo ed saray samploran tribu pian man-apostasya? (1 Ara. 12:32, 33)

Istorya 66

Jezebel—Mauges ya Reyna

1. Siopa si Jezebel?

2. Akin et maer-ermen si Arin Ahab?

3. Antoy ginawa nen Jezebel pian naala so ubasan nen Nabot tan iter itan ed asawa ton si Ahab?

4. Siopay imbaki nen Jehova pian dusaen si Jezebel?

5. Diad litrato, antoy agawa kasabi nen Jehu ed palasyo nen Jezebel?

Kaaruman iran tepet:

1. Basaen so 1 Arari 16:29-33 tan 18:3, 4.

   Panon kauges so Israel nen panaon nen Arin Ahab? (1 Ara. 14:9)

2. Basaen so 1 Arari 21:1-16.

   1. Panon ya impanengneng nen Nabot so pakpel tan katooran ed si Jehova? (1 Ara. 21:1-3; Lev. 25:23-28)

   2. Diad agawa ed si Ahab, antoy naaralan tayo sano nadidismaya? (1 Ara. 21:4; Roma 5:3-5)

3. Basaen so 2 Arari 9:30-37.

   Antoy naaralan tayo ed seseg nen Jehu diad panggawad linawa nen Jehova? (2 Ara. 9:4-10; 2 Cor. 9:1, 2; 2 Tim. 4:2)

Istorya 67

Nanmatalek si Jehosafat ed si Jehova

1. Siopa si Jehosafat, tan kapigan nambilay?

2. Akin et ataktakot iray Israelita, tan antoy ginawa na dakel ed sikara?

3. Antoy ebat nen Jehova ed pikakasi nen Jehosafat?

4. Antoy ginawa nen Jehova antis na panlalaban?

5. Antoy naaralan tayo ed si Jehosafat?

Kaaruman iran tepet:

1. Basaen so 2 Awaran 20:1-30.

   1. Panon ya impanengneng nen Jehosafat no antoy nepeg a gawaen na saray matoor a lingkor na Dios sano ondadalan ed delikadon situasyon? (2 Awa. 20:12; Sal. 25:15; 62:1)

   2. Lapud lanang ya walay uusaren nen Jehova sano mitatalosan ed totoo to, anto so uusaren to natan? (2 Awa. 20:14, 15; Mat. 24:45-47; Juan 15:15)

   3. Sano idapo na Dios so “baleg ya agew na Dios a Makapanyarin-amin,” panon a mipara so situasyon tayo ed kindi Jehosafat? (2 Awa. 20:15, 17; 32:8; Apo. 16:14, 16)

   4. Singa saray Levita, antoy nitutulong na saray payunir tan misionero ed panagpulong a kimey? (2 Awa. 20:19, 21; Roma 10:13-15; 2 Tim. 4:2)

Istorya 68

Duaran Ugaw ya Abilay Lamet

1. Siopa irayay walad litrato, tan antoy agawad ugaw?

2. Antoy impikasi nen Elias nipaakar ed ugaw, tan antoy agawa?

3. Antoy ngaran na katulongan nen Elias?

4. Akin et inanap na biin taga-Sunem si Eliseo?

5. Antoy ginawa nen Eliseo, tan antoy agawad inatey ya ugaw?

6. Singa ipapanengneng na ginawa di Elias tan Eliseo, anto so sarasarag nen Jehova a gawaen?

Kaaruman iran tepet:

1. Basaen so 1 Arari 17:8-24.

   1. Panon ya asubok so katutulok tan pananisia nen Elias? (1 Ara. 17:9; 19:1-4, 10)

   2. Akin et nikadkaduma so pananisia na balon taga-Zarepat? (1 Ara. 17:12-16; Luc. 4:25, 26)

   3. Panon ya ipapanengneng na eksperiensya na balon taga-Zarepat ya tua so imbaga nen Jesus ya akarekord ed Mateo 10:41, 42? (1 Ara. 17:10-12, 17, 23, 24)

2. Basaen so 2 Arari 4:8-37.

   1. Antoy naaralan tayod inkamaparawes na biin taga-Sunem? (2 Ara. 4:8; Luc. 6:38; Roma 12:13; 1 Juan 3:17)

   2. Panon tayon nipanengneng so kaabigan ed saray lingkor na Dios natan? (Gawa 20:35; 28:1, 2; Gal. 6:9, 10; Heb. 6:10)

Istorya 69

Tinulongan na Ugaw a Bii so Makapanyarin Laki

1. Diad litrato, antoy ibabaga na ugaw ed sayay bii?

2. Siopa yay bii ed litrato, tan antoy gagawaen na ugaw ed abung to?

3. Antoy impaibaga nen Eliseo ed si Naaman, tan akin et nampasnok si Naaman?

4. Antoy agawa sanen dinengel nen Naaman so lingkor to?

5. Akin et ag-inawat nen Eliseo so regalo nen Naaman, balet antoy ginawa nen Gehazi?

6. Antoy agawad si Gehazi, tan antoy naaralan tayo ed saya?

Kaaruman iran tepet:

1. Basaen so 2 Arari 5:1-27.

   1. Akin et makapaseseg ed saray kalangweran natan so alimbawa na Israelitan ugaw? (2 Ara. 5:3; Sal. 8:2; 148:12, 13)

   2. Akin et maabig ya nodnonoten so agawad si Naaman no walay Makasulatan a simbawa ed sikatayo? (2 Ara. 5:15; Heb. 12:5, 6; Sant. 4:6)

   3. Antoy naaralan tayod si Eliseo tan Gehazi? (2 Ara. 5:9, 10, 14-16, 20; Mat. 10:8; Gawa 5:1-5; 2 Cor. 2:17)

Istorya 70

Si Jonas tan say Baleg ya Sira

1. Siopa si Jonas, tan antoy ingganggan nen Jehova ed sikato?

2. Lapud aglabay nen Jonas so onlad pangibabakian nen Jehova, antoy ginawa to?

3. Antoy impatua nen Jonas ed saray akalugan ed barko pian ontunday bagyo?

4. Diad litrato, antoy agawa sanen onlelereg lay Jonas?

5. Panon kabayag si Jonas ed eges na baleg a sira, tan antoy ginawa tod man?

6. Iner linma si Jonas nen inyula na baleg a sira, tan antoy naaralan tayod saya?

Kaaruman iran tepet:

1. Basaen so Jonas 1:1-17.

   Panon ya impasen nen Jonas so asainmin ton pulongan iray taga-Ninive? (Jonas 1:2, 3; Uli. 3:7; Ecl. 8:12)

2. Basaen so Jonas 2:1, 2, 10.

   Panon ya makatulong so eksperiensya nen Jonas pian manmatalek itayo ya ebatan nen Jehova iray pikakasi tayo? (Sal. 22:24; 34:6; 1 Juan 5:14)

3. Basaen so Jonas 3:1-10.

   1. Panon itayon apaseseg ed impangusar nin siansia nen Jehova ed si Jonas anggan diad gapo et agto inunor so ingganggan ed sikato? (Sal. 103:14; 1 Ped. 5:10)

   2. Antoy ibabangat ed sikatayo na eksperiensya nen Jonas ed saray taga-Ninive nipaakar ed panhusga ed saray walad teritorya tayo? (Jonas 3:6-9; Ecl. 11:6; Gawa 13:48)

Istorya 71

Impormisa na Dios so Paraiso

1. Siopa si Isaias, kapigan nambilay, tan antoy impanengneng nen Jehova ed sikato?

2. Antoy labay ya ibaga na salitan “paraiso,” tan antoy nanonotan mod satan?

3. Antoy imbaga nen Jehova ya isulat nen Isaias nipaakar ed balon Paraiso?

4. Akin et pinapaway si Adan tan Eva ed balibalin ayaman da?

5. Antoy impormisa nen Jehova ed saray mangaaro ed sikato?

Kaaruman iran tepet:

1. Basaen so Isaias 11:6-9.

   1. Panon ya impanengneng na Salita na Dios ya walay kareenan na saray ayayep tan totoo diad balon mundo? (Sal. 148:10, 13; Isa. 65:25; Eze. 34:25)

   2. Diad samay imbaga nen Isaias, anton espiritual a kasumpalan so nagagawa natan ed saray totoo nen Jehova? (Roma 12:2; Efe. 4:23, 24)

   3. Siopay nepeg a nirayew ed panguuman na personalidad na totoo natan tan ed balon mundo? (Isa. 48:17, 18; Gal. 5:22, 23; Fil. 4:7)

2. Basaen so Apocalipsis 21:3, 4.

   1. Panon ya ipapanengneng na Kasulatan ya simbolikon manaayam so Dios ed saray totoo, aliwan literal ya wadiad dalin? (Lev. 26:11, 12; 2 Awa. 6:18; Isa. 66:1; Apo. 21:2, 3, 22-24)

   2. Anton klase na lua tan ot-ot so naandi? (Luc. 8:49-52; Roma 8:21, 22; Apo. 21:4)

Istorya 72

Tinulongan na Dios si Arin Hezekias

1. Siopa yay laki ed litrato, tan akin et dakel so problema to?

2. Anto irayay sulat ya inggaton nen Hezekias ed arap na templo na Dios, tan antoy impikasi to?

3. Anton klase na ari si Hezekias, tan antoy impasabi nen Jehova ed sikato panamegley nen propeta Isaias?

4. Diad litrato, antoy ginawa na anghel nen Jehova ed saray Asiryano?

5. Anggaman dinmeen ya agano so duaran tribu na Israel, antoy agawa sanen inatey lay Hezekias?

Kaaruman iran tepet:

1. Basaen so 2 Arari 18:1-36.

   1. Panon ya sinalin pakapuyen na Asiryanon si Rabsaces so pananisia na saray Israelita? (2 Ara. 18:19, 21; Exo. 5:2; Sal. 64:3)

   2. Sano wala ray onsusumpa, panon ya aaligen na Saray Tasi nen Jehova si Hezekias? (2 Ara. 18:36; Sal. 39:1; Uli. 26:4; 2 Tim. 2:24)

2. Basaen so 2 Arari 19:1-37.

   1. Sano napoproblema, panon ya aaligen na saray totoo nen Jehova natan si Hezekias? (2 Ara. 19:1, 2; Uli. 3:5, 6; Heb. 10:24, 25; Sant. 5:14, 15)

   2. Antoy amitlon akataloan nen Arin Senakerib, tan siopay isisimbolo na saya? (2 Ara. 19:32, 35, 37; Apo. 20:2, 3)

3. Basaen so 2 Arari 21:1-6, 16.

   Akin et nibagan si Manases so sankaugesan ya ari ed Jerusalem? (2 Awa. 33:4-6, 9)

Istorya 73

Say Sampot a Maong ya Ari ed Israel

1. Pigay taon nen Josias sanen nagmaliw ya ari, tan antoy ginawa to sanen pitoy taon to lan ari?

2. Diad unonan litrato, antoy gagawaen nen Josias?

3. Antoy nalmo na atagey a saserdote sanen aapigeren so templo?

4. Akin et pinilat nen Josias so kawes to?

5. Anton mensahe so impaibaga nen Jehova ed si Josias?

Kaaruman iran tepet:

1. Basaen so 2 Awaran 34:1-28.

   1. Akin et maong ya alimbawa si Josias parad saramay aliwliway impanugaw da? (2 Awa. 33:21-25; 34:1, 2; Sal. 27:10)

   2. Antoy ginawa nen Josias pian nipawil so dugan panagdayew diad koma-8, koma-12, tan koma-18 a taon na impan-ari to? (2 Awa. 34:3, 8)

   3. Antoy naaralan tayo ed si Arin Josias tan Atagey a Saserdoten Hilkias ed pangasikasod pasen a pandadayewan? (2 Awa. 34:9-13; Uli. 11:14; 1 Cor. 10:31)

Istorya 74

Lakin Agtinmakot

1. Siopa iyay lakin walad litrato?

2. Antoy inisip nen Jeremias ed pagmaliw ton propeta, balet antoy imbagad sikato nen Jehova?

3. Antoy lanang ya ibabaga nen Jeremias ed totoo?

4. Panon ya sinalin patundaen na saray saserdote si Jeremias, balet panon ton impanengneng ya sikatoy agtinmakot?

5. Antoy agawa sanen ag-anguman iray Israelita?

Kaaruman iran tepet:

1. Basaen so Jeremias 1:1-8.

   1. Singa ipapanengneng na alimbawa nen Jeremias, panon a magmaliw ya kualipikado so sakey a manlingkor ed si Jehova? (2 Cor. 3:5, 6)

   2. Panon ya napapaseseg iray Kristianon kalangweran natan ed alimbawa nen Jeremias? (Ecl. 12:1; 1 Tim. 4:12)

2. Basaen so Jeremias 10:1-5.

   Anton epektibon ilustrasyon so inusar nen Jeremias pian ipanengneng ya anggapoy kana na panmatalek ed saray idolo? (Jer. 10:5; Isa. 46:7; Hab. 2:19)

3. Basaen so Jeremias 26:1-16.

   1. Sano manpapasakbay iray alanaan natan, panon dan ipapapuso so ganggan nen Jehova ed si Jeremias ya ‘ag-ira manbabawas na anggan sakey a salita’? (Jer. 26:2, NW; Deu. 4:2; Gawa 20:27)

   2. Antoy naaralan na Saray Tasi nen Jehova ed maong ya alimbawa nen Jeremias sano papasakbayan da iray totoo? (Jer. 26:8, 12, 14, 15; 2 Tim. 4:1-5)

4. Basaen so 2 Arari 24:1-17.

   Antoy mauges a nansumpalan na Juda lapud ag-ira nanmatoor ed si Jehova? (2 Ara. 24:2-4, 14)

Istorya 75

Apatiran Balolaki Diad Babilonia

1. Siopa irayay apatiran balolaki diad litrato, tan akin et wala rad Babilonia?

2. Antoy plano nen Nabucodonosor ed sikara, tan antoy ingganggan tod saray aripen to?

3. Antoy kinerew nen Daniel ya ipakan tan ipainum ed sikato tan ed taloran kakaaro to?

4. Kayari na samploran agew ya impangan na pising, antoy itsura di Daniel no ikomparad saray kaedaran da?

5. Akin et walad palasyo na ari si Daniel tan saray kakaaro to, tan akin ya mas maong ni ran aminpigapiga nen saray saserdote tan matatalinon aripen?

Kaaruman iran tepet:

1. Basaen so Daniel 1:1-21.

   1. Anton sagpot so kaukolan pian agnatukso tan nalabanan iray kakapuyan? (Dan. 1:8; Gen. 39:7, 10; Gal. 6:9)

   2. Anto ray “mananam a kakanen” a nayarin pakatuksoan odino pakadesdesan a salien na saray kalangweran natan? (Dan. 1:8, NW; Uli. 20:1; 2 Cor. 6:17–7:1)

   3. Antoy naapresya tayo ed istorya na apatiran Hebreo nipaakar ed pangala na sekular a kakabatan? (Dan. 1:20; Isa. 54:13; 1 Cor. 3:18-20)

Istorya 76

Aderal so Jerusalem

1. Diad litrato, antoy nagagawad Jerusalem tan saray Israelita?

2. Siopa si Ezequiel, tan anto ray makapabiglan impanengneng nen Jehova ed sikato?

3. Lapud agnirespeto na saray Israelita si Jehova, antoy imbaga to?

4. Antoy ginawa nen Arin Nabucodonosor sanen nanrebelde iray Israelita ed sikato?

5. Akin et inabuloyan nen Jehova a naderal so Israel?

6. Akin et anggapo lay nanayam ed dalin na Israel, tan pigaran taon?

Kaaruman iran tepet:

1. Basaen so 2 Arari 25:1-26.

   1. Siopa si Zedekias, antoy agawad sikato, tan panon ya asumpal so propesiya na Biblia? (2 Ara. 25:5-7; Eze. 12:13-15)

   2. Siopay tinetel nen Jehova ed ag-impanmatoor na Israel? (2 Ara. 25:9, 11, 12, 18, 19; 2 Awa. 36:14, 17)

2. Basaen so Ezequiel 8:1-18.

   Panon ya inalig na Kakristianoan so apostatan impandayew na Israel ed agew? (Eze. 8:16; Isa. 5:20, 21; Juan 3:19-21; 2 Tim. 4:3)

Istorya 77

Ag-ira Dinmakmomo

1. Antoy ingganggan nen Ari Nabucodonosor ed saray totoo?

2. Akin et agdinmakmomo ed balitok ya imahen iray taloran kaaro nen Daniel?

3. Sanen inikdan nen Nabucodonosor na sakey nin tsansa iray taloran Hebreo pian ondakmomo, panon dan impanengneng a manmamatalek irad si Jehova?

4. Antoy ingganggan nen Nabucodonosor a gawaen na saray lingkor to ed si Sadrac, Mesac, tan Abednego?

5. Antoy anengneng nen Nabucodonosor ed mandarlang ya hurno?

6. Akin et indayew na ari so Dios di Sadrac, Mesac, tan Abednego, tan antoy naaralan tayod saya?

Kaaruman iran tepet:

1. Basaen so Daniel 3:1-30.

   1. Anton ugali na taloran balolakin Hebreo so nepeg ya aligen na saray lingkor na Dios sano nasusubok so katooran da? (Dan. 3:17, 18; Mat. 10:28; Roma 14:7, 8)

   2. Anton importantin leksion so imbangat nen Jehova a Dios ed si Nabucodonosor? (Dan. 3:28, 29; 4:34, 35)

Istorya 78

Sulat na Lima ed Padir

1. Antoy agawa sanen walay piesta na ari ed Babilonia tan inuusar to ray lusor tan yaong ya inalad templo nen Jehova diad Jerusalem?

2. Antoy imbaga nen Belsazar ed saray matatalinon lalaki, balet antoy agda nagawaan?

3. Antoy imbaga na nanay nen Belsazar ya gawaen?

4. Antoy imbaga nen Daniel ya rason no akin ya angibaki so Dios na lima ya mansulat ed padir?

5. Antoy imbaga nen Daniel a kabaliksan na saray salita ed padir?

6. Antoy agawa legan a mansasalita ni si Daniel?

Kaaruman iran tepet:

1. Basaen so Daniel 5:1-31.

   1. Antoy pandumaan na takot ed Dios tan samay takot ya alikna nen Belsazar sanen anengneng to so sulat ed padir? (Dan. 5:6, 7; Sal. 19:9; Roma 8:35-39)

   2. Panon ya impanengneng nen Daniel so pakpel sanen mitotongtong ed si Belsazar tan saray importantin totoo to? (Dan. 5:17, 18, 22, 26-28; Gawa 4:29)

   3. Panon ya impaimano na Daniel kapitulo 5 so soberanya nen Jehova ed interon uniberso? (Dan. 4:17, 25; 5:21)

Istorya 79

Si Daniel Diad Ungib na Leon

1. Siopa si Dario, tan panon ton ipapasen si Daniel?

2. Antoy impagawa ed si Dario na saray maibeg ya lalaki?

3. Antoy ginawa nen Daniel nen abalitaan toy nipaakar ed balon ganggan?

4. Akin et ansakit so loob nen Dario tan agmakaugip, tan antoy ginawa to kaimbuasan?

5. Antoy ebat nen Daniel ed si Dario?

6. Antoy agawa ed saray mauges a lalaki ya manasalin mamatey ed si Daniel, tan antoy insulat nen Dario ed interon panarian to?

Kaaruman iran tepet:

1. Basaen so Daniel 6:1-28.

   1. Panon ya say impankokomplot sumpad si Daniel so mangipapanonot ed sikatayo ed saray onsusumpad kimey na Saray Tasi nen Jehova natan? (Dan. 6:7; Sal. 94:20; Isa. 10:1; Roma 8:31)

   2. Panon ya naalig na saray lingkor na Dios natan si Daniel diad pansiansian pampasakop ed “saray atagey ya autoridad”? (Dan. 6:5, 10; Roma 13:1; Gawa 5:29)

   3. Panon tayon naalig si Daniel diad panlingkor ed si Jehova a “naynay”? (Dan. 6:16, 20; Fil. 3:16; Apo. 7:15)

Istorya 80

Tinmaynan Irad Babilonia

1. Diad litrato, antoy gagawaen na saray Israelita?

2. Panon ya inunor nen Ciro so propesiya nen Jehova panamegley nen Isaias?

3. Antoy ingganggan nen Ciro ed saray Israelitan agmakasempet ed Jerusalem?

4. Antoy impaawit nen Ciro ed saramay sinmempet ed Jerusalem?

5. Pigaran bulan iran nambiahe?

6. Pigaran taon so linmabas manlapu nen ataynan so dalin da?

Kaaruman iran tepet:

1. Basaen so Isaias 44:28 tan 45:1-4.

   1. Panon ya impanengneng nen Jehova ya seguradon nagawa so propesiya nipaakar ed si Ciro? (Isa. 55:10, 11; Roma 4:17)

   2. Antoy ipapanengneng na propesiya nen Isaias ed si Ciro nipaakar ed abilidad nen Jehova a Dios ya amtaen so nagawad arapen? (Isa. 42:9; 45:21; 46:10, 11; 2 Ped. 1:20)

2. Basaen so Esdras 1:1-11.

   Singa saramay ag-akasempet ed Jerusalem, panon tayo met natan a ‘napabiskeg so lima’ na saray makasarag ya manpayunir? (Esd. 1:4, 6; Roma 12:13; Col. 4:12)

Istorya 81

Manmatalek ed Tulong na Dios

1. Pigaray sinmempet ed Jerusalem, balet antoy asabian da diman?

2. Antoy unonan impaalagey na saray Israelita kasabi ra, balet antoy ginawa na saray kalaban da?

3. Siopa si Aggeo tan Zacarias, tan antoy imbaga rad totoo?

4. Akin et nansulat ed Babilonia si Tatenai, tan antoy ebat ya naawat to?

5. Antoy ginawa nen Esdras sanen naamtaan ton kaukolan ya apigeren so templo na Dios?

6. Diad litrato, antoy ipipikasi nen Esdras, panon ya naebatan so pikakasi to, tan antoy naaralan tayod saya?

Kaaruman iran tepet:

1. Basaen so Esdras 3:1-13.

   No wala tayod lugar ya anggapoy kongregasyon, antoy itultuloy tayon gawaen? (Esd. 3:3, 6; Gawa 17:16, 17; Heb. 13:15)

2. Basaen so Esdras 4:1-7.

   Anto so maabig ya alimbawa nen Zorobabel parad totoo na Dios nipaakar ed pibibiang ed arum a pananisia? (Exo. 34:12; 1 Cor. 15:33; 2 Cor. 6:14-17)

3. Basaen so Esdras 5:1-5, 17 tan 6:1-22.

   1. Akin et ag-apatunda na saray onsusumpa so impampaalagey ed templo? (Esd. 5:5; Isa. 54:17)

   2. Panon a say ginawa na mamasiken na Judio so mamapaseseg ed saray elder pian paigiya ed si Jehova sano susumpaen ira? (Esd. 6:14; Sal. 32:8; Roma 8:31; Sant. 1:5)

4. Basaen so Esdras 8:21-23, 28-36.

   Antis tayon onkiwas, antoy maabig ya aligen tayo ed si Esdras? (Esd. 8:23; Sal. 127:1; Uli. 10:22; Sant. 4:13-15)

Istorya 82

Mardokeo tan Ester

1. Siopa si Mardokeo tan Ester?

2. Akin et nampaanap na balon asawa si Arin Ahasuero, tan siopay pinili to?

3. Siopa si Haman, tan akin et pinmetang so ulo to?

4. Anto may impagawan ganggan, tan antoy ginawa nen Ester sanen naawat toy mensahen nanlapud si Mardokeo?

5. Antoy agawad si Haman, tan antoy agawad si Mardokeo?

6. Panon ya akaliktar iray Israelita?

Kaaruman iran tepet:

1. Basaen so Ester 2:12-18.

   Panon ya impanengneng nen Ester ya importantin paaligwasen so “mareen tan maulimek ya espiritu”? (Ester 2:15; 1 Ped. 3:1-5)

2. Basaen so Ester 4:1-17.

   Singa si Ester ya naikday pankanawnawan onkiwas parad dugan panagdayew, anton pankanawnawa so inter ed sikatayo natan pian nipanengneng so debosyon tan katooran ed si Jehova? (Ester 4:13, 14; Mat. 5:14-16; 24:14)

3. Basaen so Ester 7:1-6.

   Singa si Ester, panon a nayarin napasegsegang met natan iray totoo na Dios? (Ester 7:4; Mat. 10:16-22; 1 Ped. 2:12)

Istorya 83

Padir na Jerusalem

1. Antoy alikna na saray Israelita sanen agni nipaalagey so padir na Jerusalem?

2. Siopa si Nehemias?

3. Antoy trabaho nen Nehemias, tan akin et importante itan?

4. Anton balita so nampaermen ed si Nehemias, tan antoy ginawa to?

5. Panon ya impanengneng nen Artaxerxes so kamaongan ed si Nehemias?

6. Panon ya inuksoy nen Nehemias so pampaalagey pian ag-ira napatunda na saray kalaban da?

Kaaruman iran tepet:

1. Basaen so Nehemias 1:4-6 tan 2:1-20.

   Panon ya kinmerew si Nehemias na tulong ed si Jehova? (Neh. 2:4, 5; Roma 12:12; 1 Ped. 4:7)

2. Basaen so Nehemias 3:3-5.

   Antoy naaralan na saray elder tan ministeryal a lingkor ed pandumaan na saray Tekoita tan “saray ankabli” odino prominentin totoo? (Neh. 3:5, 27; 2 Tes. 3:7-10; 1 Ped. 5:5)

3. Basaen so Nehemias 4:1-23.

   1. Antoy akatulong ed saray Israelita pian itultuloy so pampaalagey anggano grabe so isusumpa? (Neh. 4:6, 8, 9; Sal. 50:15; Isa. 65:13, 14)

   2. Panon tayon napapaseseg natan ed alimbawa na saray Israelita?

4. Basaen so Nehemias 6:15.

   Diad samay impakasumpal ed padir na Jerusalem ed loob na duaran bulan, antoy anengneng tayon nagawaan na mabiskeg a pananisia? (Sal. 56:3, 4; Mat. 17:20; 19:26)

Istorya 84

Binisita na Anghel si Maria

1. Siopa yay bii ed litrato?

2. Antoy imbaga nen Gabriel ed si Maria?

3. Panon ya impaliwawa nen Gabriel ed si Maria a sikatoy manlukon anggano anggapoy asawa to?

4. Antoy agawa sanen binisita nen Maria si Elizabet ya kanayon to?

5. Antoy inisip nen Jose sanen naamtaan ton malukon si Maria, balet akin et angumay nonot to?

Kaaruman iran tepet:

1. Basaen so Lucas 1:26-56.

   1. Sanen inyalis so bilay na Anak na Dios manlapud tawen, antoy ipapanengneng na Lucas 1:35 nipaakar ed Adamikon ag-inkaperpekto na eggcell nen Maria? (Ag. 2:11-13; Juan 6:69; Heb. 7:26; 10:5)

   2. Panon ya apagalangan si Jesus anggan sanen agni niyanak? (Luc. 1:41-43)

   3. Antoy maabig ya alimbawa nen Maria ed saray Kristiano natan ya akaawat na espisyal iran pribilehyo? (Luc. 1:38, 46-49; 17:10; Uli. 11:2)

2. Basaen so Mateo 1:18-25.

   Anggano ag-nginaranan si Jesus ya Emmanuel, panon a say betang to bilang too so anumpal ed kabaliksan na satan? (Mat. 1:22, 23; Juan 14:8-10; Heb. 1:1-3)

Istorya 85

Inyanak si Jesus Diad Kulongay Ayayep

1. Siopa yay ugaw ed litrato, tan iner imparukol nen Maria?

2. Akin ya niyanak si Jesus ed kulongay ayayep?

3. Diad litrato, siopa irayay lalaki ya onloloob ed kulongay ayayep, tan antoy imbaga na anghel ed sikara?

4. Siopan talaga si Jesus?

5. Akin et tinawag si Jesus ya Anak na Dios?

Kaaruman iran tepet:

1. Basaen so Lucas 2:1-20.

   1. Antoy ginawa nen Cesar Augusto ya akatulong pian nasumpal so propesiya nipaakar ed kiyanak nen Jesus? (Luc. 2:1-4; Miq. 5:2)

   2. Panon a nibilang so sakey a too ed saray tatawagen ya “totoon aabobonan”? (Luc. 2:14; Mat. 16:24; Juan 17:3; Gawa 3:19; Heb. 11:6)

   3. No saramay mapaabeban Judion managpastol et manliket lapud inkiyanak na Manangiliktar, anto so mas panliketan na saray lingkor na Dios natan? (Luc. 2:10, 11; Efe. 3:8, 9; Apo. 11:15; 14:6)

Istorya 86

Lalaki ya Intonton na Bitewen

1. Diad litrato, siopa irayay lalaki, tan akin et ituturo na sakey ed sikara so maliwawan bitewen?

2. Akin et pinmetang so ulo nen Arin Herodes, tan antoy ginawa to?

3. Iner itotonton na bitewen iray lalaki, balet akin et sananey so dinalan da sanen pasempet la ra?

4. Antoy ingganggan nen Herodes, tan akin?

5. Antoy imbaga nen Jehova ed si Jose?

6. Siopa so nampasinag ed balon bitewen, tan akin?

Kaaruman ya tepet:

1. Basaen so Mateo 2:1-23.

   Pigay taon nen Jesus tan iner nanayam sanen binisita na saray astrologo? (Mat. 2:1, 11, 16)

Istorya 87

Si Jesus Diad Templo

1. Diad litrato, pigay taon nen Jesus, tan kulaan to?

2. Antoy tinaon ya gagawaen nen Jose kaibay pamilya to?

3. Nen onlalabi la, akin et pinmawil si Jose tan Maria ed Jerusalem?

4. Iner da nalmo si Jesus, tan akin et mankelkelaw iray totoo?

5. Antoy imbaga nen Jesus ed nanay to?

6. Panon tayon naalig si Jesus diad panaral nipaakar ed Dios?

Kaaruman iran tepet:

1. Basaen so Lucas 2:41-52.

   1. Anggano ibabaga na Ganggan ya saray lalaki labat so kaukolan ya onatendi ed tinaon iran piesta, antoy maong ya alimbawa di Jose tan Maria ed saray atateng natan? (Luc. 2:41; Deu. 16:16; 31:12; Uli. 22:6)

   2. Panon ya angipanengneng si Jesus na maabig ya alimbawa ed saray kalangweran natan ya manpapasakop ed atateng da? (Luc. 2:51; Deu. 5:16; Uli. 23:22; Col. 3:20)

2. Basaen so Mateo 13:53-56.

   Siopa ray apatiran agagi nen Jesus ya binitla ed Biblia, tan panon ya nausar ed kongregasyon so duara ed sikara? (Mat. 13:55; Gawa 12:17; 15:6, 13; 21:18; Gal. 1:19; Sant. 1:1; Jud. 1)

Istorya 88

Binautismoan nen Juan si Jesus

1. Siopa yay duaran laki ed litrato?

2. Panon ya babautismoan so sakey a too?

3. Siopay kaslakan ya babautismoan nen Juan?

4. Akin et kinerew nen Jesus ed si Juan ya sikatoy bautismoan to?

5. Panon ya impanengneng na Dios ya Sikatoy aliketan ed impanpabautismo nen Jesus?

6. Antoy agawa sanen linmay Jesus ed mareen a lugar diad loob na 40 ya agew?

7. Siopa ray sankaunaan ya papatumbok odino disipulo nen Jesus, tan antoy unonan milagro to?

Kaaruman iran tepet:

1. Basaen so Mateo 3:13-17.

   Anto so ginawa nen Jesus ya pangaligan na saray disipulo to sano manpabautismo? (Sal. 40:7, 8; Mat. 28:19, 20; Luc. 3:21, 22)

2. Basaen so Mateo 4:1-11.

   Panon ya makatulong so marundunong ya impangusar nen Jesus ed Kasulatan pian napapaseseg tayon regular ya aralen itan? (Mat. 4:5-7; 2 Ped. 3:17, 18; 1 Juan 4:1)

3. Basaen so Juan 1:29-51.

   Siopa so impaimano nen Juan a Managbautismo ed saray disipulo to, tan panon tayon naalig si Juan natan? (Juan 1:29, 35, 36; 3:30; Mat. 23:10)

4. Basaen so Juan 2:1-12.

   Panon ya ipapanengneng na unonan milagro nen Jesus ya ag-isisiblet nen Jehova ed saray lingkor To so antokaman ya maabig? (Juan 2:9, 10; Sal. 84:11; Sant. 1:17)

Istorya 89

Nilinisan nen Jesus so Templo

1. Akin et ilalako so ayayep diad templo?

2. Akin et nampasnok si Jesus?

3. Diad litrato, antoy gagawaen nen Jesus, tan antoy ingganggan tod saramay manlalako na malapati?

4. Sanen anengneng na saray babangatan nen Jesus so gagawaen to, antoy anonotan da?

5. Anton distrito so dinalan nen Jesus sanen papawil lad Galilea?

Kaaruman ya tepet:

1. Basaen so Juan 2:13-25.

   No nonoten tayo imay impanpasnok nen Jesus ed saray managsalat na kuarta diad templo, panoy dugan panmoria ed pannegosyo diad Kingdom Hall? (Juan 2:15, 16; 1 Cor. 10:24, 31-33)

Istorya 90

Diad Abay na Bobon

1. Akin et walad abay na bobon si Jesus, tan antoy ibabaga tod samay bii?

2. Akin et abigla so bii, antoy imbaga nen Jesus ed sikato, tan akin?

3. Antoy amta na bii ya tutukoyen nen Jesus a danum, balet anton talagay tutukoyen to?

4. Akin et agmakapanisia so bii ed amta nen Jesus nipaakar ed sikato, tan angalaan to ed sayan impormasyon?

5. Antoy naaralan tayo ed sayan istorya?

Kaaruman iran tepet:

1. Basaen so Juan 4:5-43.

   1. Pian naalig si Jesus, antoy nepeg tayon ipanengneng ed totoon dumay kolor odino binalegan da? (Juan 4:9; 1 Cor. 9:22; 1 Tim. 2:3, 4; Tito 2:11)

   2. Anto ran espiritual a gunggona so naawat na toon magmaliw ya disipulo nen Jesus? (Juan 4:14; Isa. 58:11; 2 Cor. 4:16)

   3. Panon tayon nipanengneng so apresasyon ya singa samay Samaritanan maliket ya anginabang na naaralan to? (Juan 4:7, 28; Mat. 6:33; Luc. 10:40-42)

Istorya 91

Nambangat si Jesus Diad Palandey

1. Diad litrato, iner so pambabangatan nen Jesus, tan siopa ray walad abay to?

2. Antoy kangaranan na 12 ya apostol?

3. Anto so Panarian ya impulong nen Jesus?

4. Antoy imbangat nen Jesus ya ipikasi na totoo?

5. Antoy imbaga nen Jesus a nepeg ya pantrato na balang sakey?

Kaaruman iran tepet:

1. Basaen so Mateo 5:1-12.

   Panon tayon nipanengneng ya manonot tayod espiritual a pankaukolan tayo? (Mat. 5:3; Roma 10:13-15; 1 Tim. 4:13, 15, 16)

2. Basaen so Mateo 5:21-26.

   Panon ya ipapanengneng na Mateo 5:23, 24 ya say relasyon tayod agagi et apektaen toy relasyon tayod si Jehova? (Mat. 6:14, 15; Sal. 133:1; Col. 3:13; 1 Juan 4:20)

3. Basaen so Mateo 6:1-8.

   Anto ray alimbawa na pantunongtunongan ya nepeg a paliisan na saray Kristiano? (Luc. 18:11, 12; 1 Cor. 4:6, 7; 2 Cor. 9:7)

4. Basaen so Mateo 6:25-34.

   Antoy imbangat nen Jesus nipaakar ed panmatalek ed si Jehova a mangitarya ed materyal a pankaukolan tayo? (Exo. 16:4; Sal. 37:25; Fil. 4:6)

5. Basaen so Mateo 7:1-11.

   Antoy ibabangat na malinlinew ya ilustrasyon ed Mateo 7:5? (Uli. 26:12; Roma 2:1; 14:10; Sant. 4:11, 12)

Istorya 92

Binilay nen Jesus Iray Inaatey

1. Siopa so tatay na sayay ugaw, tan akin ya aburido ran maong?

2. Antoy ginawa nen Jairo sanen nalmo toy Jesus?

3. Antoy agawa sanen paonla la rad abung di Jairo, tan antoy imbalita na mensahero ed si Jairo?

4. Diad abung nen Jairo, akin et inelekan na totoo si Jesus?

5. Antoy ginawa nen Jesus ed ugaw?

6. Siopa ni ray binilay nen Jesus, tan antoy ipapanengneng na saya?

Kaaruman iran tepet:

1. Basaen so Lucas 8:40-56.

   Panon ya impanengneng nen Jesus so panangabagey tan inka-makatunongan ed bii ya manpaparala, tan antoy naaralan na saray elder ed satan? (Luc. 8:43, 44, 47, 48; Lev. 15:25-27; Mat. 9:12, 13; Col. 3:12-14)

2. Basaen so Lucas 7:11-17.

   Akin et makaligliwa ed saray inateyan so ginawa nen Jesus ed samay balon taga-Nain? (Luc. 7:13; 2 Cor. 1:3, 4; Heb. 4:15)

3. Basaen so Juan 11:17-44.

   Panon ya impanengneng nen Jesus ya normal labat so panermen sano inatey so sakey ya inad-aro? (Juan 11:33-36, 38; 2 Sam. 18:33; 19:1-4)

Istorya 93

Dakel so Pinakan nen Jesus

1. Antoy makapabiglan agawad si Juan a Managbautismo, tan antoy alikna nen Jesus?

2. Panon ya pinakan nen Jesus so nilibon totoo ya tinmumbok ed sikato, tan pigaray kera?

3. Akin et ataktakot iray disipulo nen manpegley labi la, tan antoy agawad si Pedro?

4. Panon lamet ya amakan si Jesus na nilibon totoo?

5. Akin et balibali no uleyan la nen Jesus so dalin bilang Ari?

Kaaruman iran tepet:

1. Basaen so Mateo 14:1-32.

   1. Diad Mateo 14:23-32, antoy nanengneng tayon ugali nen Pedro?

   2. Panon ya ipapanengneng na Biblia ya anguman si Pedro tan nakal toy ugali ton pabigla-bigla? (Mat. 14:27-30; Juan 18:10; 21:7; Gawa 2:14, 37-40; 1 Ped. 5:6, 10)

2. Basaen so Mateo 15:29-38.

   Panon ya impanengneng nen Jesus ya papablien toy iiter na Ama ton naakan? (Mat. 15:37; Juan 6:12; Col. 3:15)

3. Basaen so Juan 6:1-21.

   Panon ya naalig na saray Kristiano so alimbawa nen Jesus no nipaakar ed gobierno? (Juan 6:15; Mat. 22:21; Roma 12:2; 13:1-4)

Istorya 94

Inaro To ray Ugugaw

1. Antoy pandedebatian na saray apostol ed dalan?

2. Akin et anawag si Jesus na ugaw tan pinaalagey tod arap na saray apostol?

3. Antoy nepeg ya naaralan na saray apostol ed saray ugugaw?

4. Panon ya impanengneng nen Jesus so panangaro tod saray ugugaw?

Kaaruman iran tepet:

1. Basaen so Mateo 18:1-4.

   Akin et manguusar si Jesus na ilustrasyon sano manbabangat? (Mat. 13:34, 36; Mar. 4:33, 34)

2. Basaen so Mateo 19:13-15.

   Anto ray ugali na ugugaw a nepeg tayon aligen pian bendisyonan na Panarian? (Sal. 25:9; 138:6; 1 Cor. 14:20)

3. Basaen so Marcos 9:33-37.

   Antoy imbangat nen Jesus ed saray disipulo to nipaakar ed atagey a posisyon? (Mar. 9:35; Mat. 20:25, 26; Gal. 6:3; Fil. 2:5-8)

4. Basaen so Marcos 10:13-16.

   Kasin mainomay ya asinggeran si Jesus, tan antoy naaralan na saray elder ed alimbawa to? (Mar. 6:30-34; Fil. 2:1-4; 1 Tim. 4:12)

Istorya 95

Say Panagbangat nen Jesus

1. Antoy intepet na sakey a laki ed si Jesus, tan akin?

2. Antoy uusaren nen Jesus no maminsan sano manbabangat, tan antoy amta tayo la nipaakar ed saray Judio tan Samaritano?

3. Diad istorya nen Jesus, antoy agawa ed sakey a Judio ya paonlad Jerico?

4. Antoy agawa sanen dinmalan so sakey a Judion saserdote tan sakey a Levita?

5. Diad litrato, siopa yay ontutulong ed Judion binugbog?

6. Kasumpal nen Jesus ya angistorya, antoy intepet to, tan antoy ebat na katongtong to?

Kaaruman iran tepet:

1. Basaen so Lucas 10:25-37.

   1. Imbes ya ebatan lan tampol, panon ya tinulongan nen Jesus so lakin marunong ed Ganggan ya mangebat ed satan? (Luc. 10:26; Mat. 16:13-16)

   2. Panon ya angusar si Jesus na ilustrasyon pian nadaeg so aliwan patas ya trato na katongtong to? (Luc. 10:36, 37; 18:9-14; Tito 1:9)

Istorya 96

Pinaabig To Iray Mansasakit

1. Antoy ginawa nen Jesus sanen linmad nanduruman lugar?

2. Manga taloran taon kayarin abautismoan si Jesus, antoy imbaga tod saray apostol to?

3. Siopa irayay walad litrato, tan antoy ginawa nen Jesus ed sayay bii?

4. Akin et ag-akasel iray lider na relihyon ed ebat nen Jesus?

5. Sanen asingger lad Jerico si Jesus tan saray apostol to, antoy ginawa nen Jesus ed duaran mipapayabol a bulag?

6. Akin et manggagawa na milagro si Jesus?

Kaaruman iran tepet:

1. Basaen so Mateo 15:30, 31.

   Anton makapadinayew a pakayari nen Jehova so impanengneng nen Jesus, tan panon iyan mangapekta ed pakatalos tayod pormisa nen Jehova ya balon mundo? (Sal. 37:29; Isa. 33:24)

2. Basaen so Lucas 13:10-17.

   Panon a saray makapadinayew ya milagron ginawa nen Jesus legan na Sabaton so mangipanengneng ed inawan iter to ed totoo legan na Sanlibon Taon ya Uley to? (Luc. 13:10-13; Sal. 46:9; Mat. 12:8; Col. 2:16, 17; Apo. 21:1-4)

3. Basaen so Mateo 20:29-34.

   Panon ya ipapanengneng na sayan istorya a lanang ya akaparaan si Jesus ya ontulong, tan antoy naaralan tayo ed saya? (Deu. 15:7; Sant. 2:15, 16; 1 Juan 3:17)

Istorya 97

Sinmabi si Jesus Bilang Ari

1. Sanen akasabi si Jesus ed melag a baryo ya asingger ed Jerusalem, antoy ingganggan tod saray disipulo to?

2. Diad litrato, antoy agawa sanen asingger lay Jesus ed syudad na Jerusalem?

3. Antoy ginawa na ugugaw sanen pinaabig nen Jesus iray bulag tan lupoy?

4. Antoy imbaga nen Jesus ed saray nampasnok a saserdote?

5. Panon tayon naalig iramay ugugaw ya angidayew ed si Jesus?

6. Antoy labay ya naamtaan na saray disipulo?

Kaaruman iran tepet:

1. Basaen so Mateo 21:1-17.

   1. Antoy pandumaan na inloob nen Jesus ed Jerusalem bilang Ari tan na saray heneral na Roma? (Mat. 21:4, 5; Zac. 9:9; Fil. 2:5-8; Col. 2:15)

   2. Antoy naaralan na saray kalangweran ed saray Israelitan ugugaw ya angibalikas ed Salmo 118 sanen linmoob si Jesus ed templo? (Mat. 21:9, 15; Sal. 118:25, 26; 2 Tim. 3:15; 2 Ped. 3:18)

2. Basaen so Juan 12:12-16.

   Antoy isisimbolo na sanga na palma ya inusar na totoon angidayew ed si Jesus? (Juan 12:13; Fil. 2:10; Apo. 7:9, 10)

Istorya 98

Diad Palandey Olibo

1. Diad litrato, siopa ditan si Jesus, tan siopa ray kaiba to?

2. Antoy sinalin gawaen na saray saserdote ed si Jesus diad templo, tan antoy imbaga to ed sikara?

3. Antoy tinepet na saray apostol ed si Jesus?

4. Akin et imbaga nen Jesus so arum ed saray nagawa diad dalin sano sikatoy man-ari la ed tawen?

5. Antoy imbaga nen Jesus ya nagawa antis ton ekalen so amin a mauges diad dalin?

Kaaruman iran tepet:

1. Basaen so Mateo 23:1-39.

   1. Anggano ibabaga na Biblia ya nayari mangusar na saray sekular ya titulo, antoy ipapanengneng na imbaga nen Jesus a walad Mateo 23:8-11 nipaakar ed pangusar na ataragey iran titulo diad kongregasyon? (Gawa 26:25; Roma 13:7; 1 Ped. 2:13, 14)

   2. Antoy ginawa na saray Fariseo pian agmagmaliw ya Kristiano iray totoo, tan panon ya ontan met so gagawaen na saray lider na relihyon natan? (Mat. 23:13; Luc. 11:52; Juan 9:22; 12:42; 1 Tes. 2:16)

2. Basaen so Mateo 24:1-14.

   1. Panon ya impanengneng na Mateo 24:13 ya importante so pansungdo?

   2. Antoy labay ya ibaga na salitan “anggaan” diad Mateo 24:13? (Mat. 16:27; Roma 14:10-12; 2 Cor. 5:10)

3. Basaen so Marcos 13:3-10.

   Diad Marcos 13:10, anton salita so mangipapanengneng ya sambotan so panangipulong ed maong a balita, tan panon itayon naapektoan na imbaga nen Jesus? (Roma 13:11, 12; 1 Cor. 7:29-31; 2 Tim. 4:2)

Istorya 99

Diad Kuarto ed Tagey

1. Diad litrato, akin et walad maawang ya kuarto si Jesus tan saray 12 apostol to?

2. Siopa yay lakin onaalis la, tan antoy gawaen to?

3. Anton espisyal a pangdem so inggapo nen Jesus kayari na pangdem ed Paskua?

4. Antoy ipapanonot na sayan espisyal a pangdem ed saray papatumbok nen Jesus?

5. Kayari na Pangdem na Katawan, antoy imbilin nen Jesus ed saray papatumbok to, tan kayari to et antoy ginawa ra?

Kaaruman iran tepet:

1. Basaen so Mateo 26:14-30.

   1. Panon ya ipapanengneng na Mateo 26:15 ya inggagala nen Judas so pantraidor tod si Jesus?

   2. Anto so duaran gagala na nipaagus a dala nen Jesus? (Mat. 26:27, 28; Jer. 31:31-33; Efe. 1:7; Heb. 9:19, 20)

2. Basaen so Lucas 22:1-39.

   Antoy labay ya ibaga na “linmoob si Satanas ed puso nen Judas”? (Luc. 22:3; Juan 13:2; Gawa 1:24, 25)

3. Basaen so Juan 13:1-20.

   1. Diad Juan 13:2, kasin natetel si Judas ed ginawa to, tan antoy naaralan na saray lingkor na Dios ed saya? (Gen. 4:7; 2 Cor. 2:11; Gal. 6:1; Sant. 1:13, 14)

   2. Anton epektibon leksion so inter nen Jesus? (Juan 13:15; Mat. 23:11; 1 Ped. 2:21)

4. Basaen so Juan 17:1-26.

   Antoy labay ya ibaga nen Jesus sanen impikasi to ray papatumbok to a “magmaliw iran saksakey”? (Juan 17:11, 21-23; Roma 13:8; 14:19; Col. 3:14)

Istorya 100

Si Jesus Diad Hardin

1. Iner so nakar di Jesus tan saray apostol to kaalis da ed kuarto, tan antoy imbilin tod sikara?

2. Antoy asabian nen Jesus sanen pinawil to ray apostol to, tan aminpigan agawa iya?

3. Siopay sinmabi ed hardin, tan diad litrato, antoy ginawa nen Judas Iscariote?

4. Akin et inangoban nen Judas si Jesus, tan antoy ginawa nen Pedro?

5. Antoy imbaga nen Jesus ed si Pedro, balet akin et agkinmerew na saray anghel si Jesus ed Dios?

Kaaruman iran tepet:

1. Basaen so Mateo 26:36-56.

   1. Panon a maabig ya aligen na saray elder natan so paraan na impansimbawa nen Jesus ed saray disipulo to? (Mat. 20:25-28; 26:40, 41; Gal. 5:17; Efe. 4:29, 31, 32)

   2. Panon ya impasen nen Jesus iray armas ya panlaban ed kaparan too? (Mat. 26:52; Luc. 6:27, 28; Juan 18:36)

2. Basaen so Lucas 22:39-53.

   Sanen nampanengneng so sakey ya anghel ed si Jesus diad hardin na Getsemani pian sikatoy pabiskegen, kasin ipapanengneng na saya ya kinmapuy so pananisia nen Jesus? Ipaliwawa. (Luc. 22:41-43; Isa. 49:8; Mat. 4:10, 11; Heb. 5:7)

3. Basaen so Juan 18:1-12.

   Panon ya pinrotektaan nen Jesus iray disipulo to ed saray onsusumpa, tan antoy naaralan tayod saya? (Juan 10:11, 12; 18:1, 6-9; Heb. 13:6; Sant. 2:25)

Istorya 101

Pinatey Day Jesus

1. Siopay manunan responsable ed impatey nen Jesus?

2. Antoy ginawa na saray apostol sanen inerel na saray lider na relihyon si Jesus?

3. Antoy agawa diad abung nen Caifas ya atagey a saserdote?

4. Akin et batik tan inmaki-akis si Pedro?

5. Sanen impawil si Jesus ed si Pilato, antoy inyeyag na manunan saserdote?

6. Antoy agawad si Jesus diad bandad ngarem na Biernes, tan antoy impormisa to ed sakey a kriminal ya akapasak ed abay to?

7. Iner so Paraiso ya imbaga nen Jesus?

Kaaruman iran tepet:

1. Basaen so Mateo 26:57-75.

   Panon ya impanengneng na saray membro na atagey a korte na Judio ya mauges so kapusoan da? (Mat. 26:59, 67, 68)

2. Basaen so Mateo 27:1-50.

   Akin et nibaga tayon aliwan masimoon so impanbabawi nen Judas? (Mat. 27:3, 4; Mar. 3:29; 14:21; 2 Cor. 7:10, 11)

3. Basaen so Lucas 22:54-71.

   Antoy naaralan tayo sanen intila nen Pedro si Jesus diad samay labi ya sikatoy trinaidor tan inaresto? (Luc. 22:60-62; Mat. 26:31-35; 1 Cor. 10:12)

4. Basaen so Lucas 23:1-49.

   Antoy reaksion nen Jesus ed aliwan patas ya trato rad sikato, tan antoy naaralan tayod saya? (Luc. 23:33, 34; Roma 12:17-19; 1 Ped. 2:23)

5. Basaen so Juan 18:12-40.

   Antoy ipapanengneng na agawad si Pedro ya anggano walay panaon a sikatoy tinmakot ed too, ayarian toy anguman tan nagmaliw a maong ya apostol? (Juan 18:25-27; 1 Cor. 4:2; 1 Ped. 3:14, 15; 5:8, 9)

6. Basaen so Juan 19:1-30.

   1. Anto so balansin panmoria nen Jesus ed saray materyal a bengatla? (Juan 2:1, 2, 9, 10; 19:23, 24; Mat. 6:31, 32; 8:20)

   2. Nen asingger lan ompatey si Jesus, panon ya saray imbaga to et angiyalangon ed inkasoberano nen Jehova? (Juan 16:33; 19:30; 2 Ped. 3:14; 1 Juan 5:4)

Istorya 102

Abilay si Jesus

1. Diad litrato, siopa iyay bii tan lalaki, tan iner so kulaan da?

2. Akin et angibaki si Pilato na saray sundalon manbantay ed lubok nen Jesus?

3. Antoy ginawa na sakey ya anghel nen onliliwawa la diad komatlon agew na impatey nen Jesus, balet antoy ginawa na saray saserdote?

4. Akin et mankelaw iray bibiin binmisita ed lubok nen Jesus?

5. Akin et batik si Pedro tan Juan ed lubok nen Jesus, tan antoy anengneng da?

6. Antoy agawad bangkay nen Jesus, tan antoy ginawa to pian nipanengneng ed saray disipulo ya sikatoy abilay?

Kaaruman iran tepet:

1. Basaen so Mateo 27:62-66 tan 28:1-15.

   Sanen pinaoli si Jesus, panon ya nankasalanan ed masanton espiritu so atagey a saserdote, saray Fariseo, tan mamasiken? (Mat. 12:24, 31, 32; 28:11-15)

2. Basaen so Lucas 24:1-12.

   Panon ya ipapanengneng na istorya na inkioli nen Jesus ya ipapasen nen Jehova a napanpiyaan a tasi iray bibii? (Luc. 24:4, 9, 10; Mat. 28:1-7)

3. Basaen so Juan 20:1-12.

   Panon ya makatulong so Juan 20:8, 9 pian magmaliw tayon maanos sano wala ray agtayo natalosan ya kasumpalan na propesiya ed Biblia? (Uli. 4:18; Mat. 17:22, 23; Luc. 24:5-8; Juan 16:12)

Istorya 103

Diad Akatalak ya Kuarto

1. Antoy imbaga nen Maria ed lakin abalang to et hardinero, balet panon ton naamtaan ya si Jesus iman?

2. Antoy agawad duaran disipulo ya oonlad Emaus?

3. Antoy makapakelaw ya agawa legan ya ibabaga na duaran disipulo ed saray apostol ya anengneng day Jesus?

4. Aminpigan nampanengneng si Jesus ed saray papatumbok to?

5. Antoy imbaga nen Tomas sanen nadngel to ya anengneng na saray disipulo so Katawan, balet antoy agawa kayari waloran agew?

Kaaruman iran tepet:

1. Basaen so Juan 20:11-29.

   Base ed Juan 20:23, kasin ibabaga nen Jesus ya walay autoridad na totoo a mamerdona na kasalanan? Ipaliwawa. (Sal. 49:2, 7; Isa. 55:7; 1 Tim. 2:5, 6; 1 Juan 2:1, 2)

2. Basaen so Lucas 24:13-43.

   Panon tayon niparaan so puso tayo pian naawat so katuaan manlapud Biblia? (Luc. 24:32, 33; Esd. 7:10; Mat. 5:3; Gawa 16:14; Heb. 5:11-14)

Istorya 104

Pinmawil si Jesus ed Tawen

1. Pigaray disipulo nen Jesus ya akanengneng ed sikato diad aminsan ya inkagawa, tan antoy intongtong tod sikara?

2. Anto so Panarian na Dios, tan sano man-ari lay Jesus ed sanlibon taon, anto so klase na bilay diad dalin?

3. Pigaran agew ya nampanengneng si Jesus ed saray disipulo to, balet antoy kaukolan to lan gawaen?

4. Antis ya tinaynan nen Jesus iray disipulo to, antoy imbaga tod sikara?

5. Diad litrato, antoy nagagawa, tan akin et agda la anengneng si Jesus?

Kaaruman iran tepet:

1. Basaen so 1 Corinto 15:3-8.

   Akin et matalek si apostol Pablo ya angitongtong nipaakar ed inkioli nen Jesus, tan anto ray matalek met ya nitongtong na saray Kristiano natan? (1 Cor. 15:4, 7, 8; Isa. 2:2, 3; Mat. 24:14; 2 Tim. 3:1-5)

2. Basaen so Gawa 1:1-11.

   Singa impasakbay na Gawa 1:8, panon kalaknab so panagpulong? (Gawa 6:7; 9:31; 11:19-21; Col. 1:23)

Istorya 105

Manaalagar Irad Jerusalem

1. Diad litrato, antoy agawad saray papatumbok nen Jesus ya manaalagar diad Jerusalem?

2. Antoy akabiglaan na saray bisita ed Jerusalem?

3. Antoy impaliwawa nen Pedro ed saray totoo?

4. Antoy alikna na totoo kayari ran dinengel si Pedro, tan antoy imbaga ton gawaen da?

5. Pigaray nampabautismo diad mismon agew na Pentecostes, 33 C.E.?

Kaaruman iran tepet:

1. Basaen so Gawa 2:1-47.

   1. Panon ya impanengneng na imbaga nen Pedro ya walad Gawa 2:23, 36 ya wala met so kasalanan na interon nasyon na Judio ed impatey nen Jesus? (1 Tes. 2:14, 15)

   2. Panon ya angipanengneng si Pedro na maabig ya alimbawa diad impankatunongan manlapud Kasulatan? (Gawa 2:16, 17, 29, 31, 36, 39; Col. 4:6)

   3. Panon ya inusar nen Pedro so unona ed saray “tombok na panarian na katawenan” ya impormisa nen Jesus ya iter ed sikato? (Gawa 2:14, 22-24, 37, 38; Mat. 16:19)

Istorya 106

Imbulos ed Prisoan

1. Sakey ya ngarem, antoy agawad si Pedro tan Juan sanen oonla rad templo?

2. Antoy imbaga nen Pedro ed samay lupoy, tan antoy inter to a mas importante nen say kuarta?

3. Akin et mansyodot iray lider na relihyon, tan antoy ginawa rad si Pedro tan Juan?

4. Antoy imbaga nen Pedro ed saray lider na relihyon, tan antoy imbilin ed saray apostol?

5. Akin ya akaibeg iray lider na relihyon, balet antoy agawa sanen impriso lamet iray apostol?

6. Antoy ebat na saray apostol sanen inawit irad Sanhedrin?

Kaaruman iran tepet:

1. Basaen so Gawa 3:1-10.

   Anggaman anggapoy pakayari tayon manggawa na milagro natan, panon ya makatulong ed sikatayo so imbaga nen Pedro a nabasad Gawa 3:6 pian napabli so mensahe na Panarian? (Juan 17:3; 2 Cor. 5:18-20; Fil. 3:8)

2. Basaen so Gawa 4:1-31.

   Sano wala ray onsusumpa ed ministeryo tayo, panon tayon naalig iray Kristiano nen inmunan siglo? (Gawa 4:29, 31; Efe. 6:18-20; 1 Tes. 2:2)

3. Basaen so Gawa 5:17-42.

   Panon ya impanengneng na arum ya aliwan Tasi, nensaman tan natan, so inkamakatunongan ed panagpulong a kimey? (Gawa 5:34-39)

Istorya 107

Tinupak Day Esteban

1. Siopa si Esteban, tan sikatoy tutulongan na Dios ya manggawa na anto?

2. Antoy imbaga nen Esteban ya amasnokan na saray lider na relihyon?

3. Sanen inggayugoy day Esteban ed paway na syudad, antoy ginawa dad sikato?

4. Diad litrato, siopa yay kalangweran ya lakin angitilakan day latop a kawes?

5. Antis ya inatey si Esteban, antoy impikasi tod si Jehova?

6. Panon tayon naalig si Esteban sano walay manggawa na mauges ed sikatayo?

Kaaruman iran tepet:

1. Basaen so Gawa 6:8-15.

   Anto ray mapalikdon katilaan ya uusaren na saray lider na relihyon pian patundaen so panagpulong na Saray Tasi nen Jehova? (Gawa 6:9, 11, 13)

2. Basaen so Gawa 7:1-60.

   1. Antoy akatulong ed si Esteban pian epektibo ton nidepensa so maong a balita diad Sanhedrin, tan antoy naaralan tayo ed sikato? (Gawa 7:51-53; Roma 15:4; 2 Tim. 3:14-17; 1 Ped. 3:15)

   2. Antoy nepeg ya trato tayo ed saray onsusumpa ed kimey tayo? (Gawa 7:58-60; Mat. 5:44; Luc. 23:33, 34)

Istorya 108

Diad Dalan Paarap ed Damasco

1. Antoy ginawa nen Saulo sanen inatey lay Esteban?

2. Sanen paarap lay Saulo diad Damasco, antoy makapakelaw ya agawa?

3. Antoy ingganggan nen Jesus ed si Saulo?

4. Antoy imbilin nen Jesus ed si Ananias, tan panon ya akanengneng lamet si Saulo?

5. Akabkabat si Saulo ed anton ngaran, tan panon ya sikatoy nausar?

Kaaruman iran tepet:

1. Basaen so Gawa 8:1-4.

   Panon ya akatulong so panamasegsegang ed balon letneg a Kristianon kongregasyon pian nikayat so maong a balita, tan antoy miparan nagagawa diad panaon tayo? (Gawa 8:4; Isa. 54:17)

2. Basaen so Gawa 9:1-20.

   Anton taloran misyon so imbaga nen Jesus ya ipagawa tod si Saulo? (Gawa 9:15; 13:5; 26:1; 27:24; Roma 11:13)

3. Basaen so Gawa 22:6-16.

   Panon tayon naalig si Ananias, tan akin et makana itan? (Gawa 22:12; 1 Tim. 3:7; 1 Ped. 1:14-16; 2:12)

4. Basaen so Gawa 26:8-20.

   Panon ya makapaseseg ed saray walaan na agmananisian kaasawaan natan so impakakomberte nen Saulo ed Inkakristiano? (Gawa 26:11; 1 Tim. 1:14-16; 2 Tim. 4:2; 1 Ped. 3:1-3)

Istorya 109

Binisita Nen Pedro si Cornelio

1. Diad litrato, siopa yay ontatalimukor?

2. Antoy imbaga na sakey ya anghel ed si Cornelio?

3. Antoy impanengneng na Dios ed si Pedro sanen walad toktok na abung nen Simon diad Joppe?

4. Akin et imbaga nen Pedro ed si Cornelio ya ag-ondadakmomo tan mandadayew ed sikato?

5. Akin et mankelkelaw iray Judion disipulo ya kaiba nen Pedro?

6. Antoy importantin naaralan tayo ed imbisita nen Pedro kindi Cornelio?

Kaaruman iran tepet:

1. Basaen so Gawa 10:1-48.

   Antoy ipapanengneng na imbaga nen Pedro ya nabasa ed Gawa 10:42 nipaakar ed panangipulong ed maong a balita na Panarian? (Mat. 28:19; Mar. 13:10; Gawa 1:8)

2. Basaen so Gawa 11:1-18.

   Antoy reaksion nen Pedro sanen malinew lay bilin nen Jehova nipaakar ed saray Gentil, tan panon tayon naalig so alimbawa to? (Gawa 11:17, 18; 2 Cor. 10:5; Efe. 5:17)

Istorya 110

Timoteo—Balon Kaiba nen Pablo

1. Diad litrato, siopa yay kalangweran, taga iner, tan antoy ngaran na nanay tan bai to?

2. Antoy imbaga nen Timoteo sanen ipipila di Silas tan Pablo a manpulong ed ararawin pasen?

3. Iner inmunan tinawag ya Kristiano iray papatumbok nen Jesus?

4. Kaalis di Pablo, Silas, tan Timoteo diad Listra, anto ray arum a syudad ya binisita ra?

5. Panon a tinulongan nen Timoteo si Pablo, tan antoy nepeg ya itepet na saray kalangweran ed sarili da?

Kaaruman iran tepet:

1. Basaen so Gawa 9:19-30.

   Panon a nan-alwar si apostol Pablo sanen susumpaen lapud maong a balita? (Gawa 9:22-25, 29, 30; Mat. 10:16)

2. Basaen so Gawa 11:19-26.

   Panon ya impanengneng na Gawa 11:19-21, 26 ya igigiya na espiritu nen Jehova so panagpulong a kimey?

3. Basaen so Gawa 13:13-16, 42-52.

   Panon ya impanengneng na Gawa 13:51, 52 ya ag-inabuloyan na saray disipulo so isusumpa ya mandismaya ed sikara? (Mat. 10:14; Gawa 18:6; 1 Ped. 4:14)

4. Basaen so Gawa 14:1-6, 19-28.

   Panon a makatulong ed sikatayo so balikas ya “inmatalek da ra ed si Jehova” pian agmanaburido sano tutulongan tayo ray balo ni? (Gawa 14:21-23; 20:32; Juan 6:44)

5. Basaen so Gawa 16:1-5.

   Panon ya impanengneng na mabulos ya impan-pasegat nen Timoteo so kaimportantian na panggawad “amin a bengatla nisengeg ed maong a balita”? (Gawa 16:3; 1 Cor. 9:23; 1 Tes. 2:8)

6. Basaen so Gawa 18:1-11, 18-22.

   Panon ya ipapanengneng na Gawa 18:9, 10 a si Jesus so mismon mangiwawanwan ed panagpulong a kimey, tan anton talek so iiter na satan ed sikatayo? (Mat. 28:20)

Istorya 111

Ugaw ya Akaugip

1. Diad litrato, siopa yay ugaw ya akarukol ed dalin, tan antoy agawad sikato?

2. Antoy ginawa nen Pablo sanen anengneng ton inatey so ugaw?

3. Iner so laen di Pablo, Timoteo, tan saray kakaiba ra, tan antoy agawa sanen tinmundan agano so barko ed Mileto?

4. Antoy impasakbay nen propeta Agabo ed si Pablo, tan panon ya agawa so imbaga to?

Kaaruman iran tepet:

1. Basaen so Gawa 20:7-38.

   1. Base ed imbaga nen Pablo diad Gawa 20:26, 27, panon itayon mansiansian “malinis . . . ed dala na amin a totoo”? (Eze. 33:8; Gawa 18:6, 7)

   2. Akin et ‘tutumboken ya maong na saray mamatatken so matuan salita’ sano manbabangat? (Gawa 20:17, 29, 30; Tito 1:7-9; 2 Tim. 1:13)

2. Basaen so Gawa 26:24-32.

   Panon ya inusar nen Pablo so pagmaliw a mibabaley na Roma pian nagawaan so panagpulong a kimey ya inawat tod si Jesus? (Gawa 9:15; 16:37, 38; 25:11, 12; 26:32; Luc. 21:12, 13)

Istorya 112

Sinmadsar ed Isla

1. Antoy agawad barkon akaluganan nen Pablo sanen dinmalan irad isla na Creta?

2. Antoy imbaga nen Pablo ed saramay pasahero?

3. Akin et nagagaygay so barko?

4. Antoy imbaga na opisyal na saray sundalo, tan pigaray akasakbit ed baybay?

5. Antoy ngaran na islan nakar da, tan antoy agawad si Pablo sanen maong lay panaon?

Kaaruman iran tepet:

1. Basaen so Gawa 27:1-44.

   Sano babasaen tayo so impanbiahe nen Pablo paarap ed Roma, panon ya lalo tayon naseguro ya susto so rekord na Biblia? (Gawa 27:16-19, 27-32; Luc. 1:3; 2 Tim. 3:16, 17)

2. Basaen so Gawa 28:1-14.

   No saray paganon manaayam ed Malta et “angipanengneng na nikadkaduma tan maomaong a pitotoo” ed si apostol Pablo tan ed saray pasaheron kaiba to, saray Kristiano et nepeg a mangipanengneng na anto tan nagkalalo la diad anton paraan? (Gawa 28:1, 2; Heb. 13:1, 2; 1 Ped. 4:9)

Istorya 113

Si Pablo Diad Roma

1. Siopa ray pinulongan nen Pablo sanen apriso ed Roma?

2. Diad litrato, siopa yay bisita, tan antoy gagawaen to parad si Pablo?

3. Siopa si Epafrodito, tan antoy inawit to sanen sinmempet ed Filipos?

4. Akin et nansulat si Pablo ed maapit a kaaro ton si Filemon?

5. Antoy ginawa nen Pablo sanen imbulos, tan ag-abayag et antoy agawad sikato?

6. Siopay inusar nen Jehova a mangisulat ed saray sampot a libro na Biblia, antoy karga na libron Apocalipsis?

Kaaruman iran tepet:

1. Basaen so Gawa 28:16-31 tan Filipos 1:13.

   Panon ya inusar nen Pablo so panaon to legan ya apriso ed Roma, tan antoy epekto na mabiskeg a pananisia to ed kongregasyon? (Gawa 28:23, 30; Fil. 1:14)

2. Basaen so Filipos 2:19-30.

   Panon ya impanengneng nen Pablo so apresasyon tod si Timoteo tan Epafrodito, tan panon tayon naalig si Pablo? (Fil. 2:20, 22, 25, 29, 30; 1 Cor. 16:18; 1 Tes. 5:12, 13)

3. Basaen so Filemon 1-25.

   1. Akin et pinaseseg nen Pablo si Filemon ya manggawa na duga, tan panon iyan onkanan pangaligan na saray elder natan? (Filem. 9; 2 Cor. 8:8; Gal. 5:13)

   2. Panon ya ipapanengneng na Filemon 13, 14 ya igagalang nen Pablo so konsiensia na arum? (1 Cor. 8:7, 13; 10:31-33)

4. Basaen so 2 Timoteo 4:7-9.

   Singa si apostol Pablo, panon tayon makapanmatalek ya bendisyonan tayo nen Jehova no mansiansia tayon matoor? (Mat. 24:13; Heb. 6:10)

Istorya 114

Naderal so Amin ya Mauges

1. Akin et ibabaga na Biblia ya wala ray kabayo ed tawen?

2. Antoy tawag ed pilaban na Dios ed saray mauges a totoo diad dalin, tan antoy gagala na sayan panlalaban?

3. Diad litrato, siopa so manunan milaban, akin et aka-korona tan aka-espada?

4. No pawilen moy Istorya 10, 15, tan 33, akin et agtayo pankelawan ya deralen na Dios iray mauges a totoo?

5. Panon ya ipapanengneng na Istorya 36 tan 76 ya deralen na Dios iray mauges a totoo anggano ibabaga ran mandadayew irad sikato?

Kaaruman iran tepet:

1. Basaen so Apocalipsis 19:11-16.

   1. Panon ya impalinew na Biblia ya si Jesu-Kristo imay akalugan ed amputin kabayo? (Apo. 1:5; 3:14; 19:11; Isa. 11:4)

   2. Panon ya ipapanengneng na awalsikan na dalan kawes nen Jesus ya segurado tan sigpot so panalo to? (Apo. 14:18-20; 19:13)

   3. Siopa ray nayarin kaibad saray armadan ontutumbok ed si Jesus ya akalugan ed amputin kabayo? (Apo. 12:7; 19:14; Mat. 25:31, 32)

Istorya 115

Balon Paraiso Diad Dalin

1. Diad Paraison dalin, antoy ibabaga na Biblia ya nagawa?

2. Antoy impormisa na Biblia ed saramay manayam ed Paraiso?

3. Kapigan gawaen nen Jesus irayan marakdakep a bengatla?

4. Sanen wadiad dalin si Jesus, antoy ginawa to pian ipanengneng so gawaen to sano man-ari la diad Panarian na Dios?

5. Antoy seguroen nen Jesus tan saray kaiba to sano man-ari la ra?

Kaaruman iran tepet:

1. Basaen so Apocalipsis 5:9, 10.

   Akin a segurado tayon saramay manuley ed dalin legan na Sanlibon Taon et masimpatiya tan makasin arari tan saserdote? (Efe. 4:20-24; 1 Ped. 1:7; 3:8; 5:6-10)

2. Basaen so Apocalipsis 14:1-3.

   Antoy kabaliksan na akatatak so ngaray Ama tan ngaray kordero ed moling na 144,000? (1 Cor. 3:23; 2 Tim. 2:19; Apo. 3:12)

Istorya 116

No Panon Tayon Manbilay ya Andi-Angga

1. Antoy gawaen tayo pian makapambilay ya andi-angga?

2. Panon tayon nakabat si Jehova a Dios tan si Jesus, ya singa ipapanengneng na litrato?

3. Anto may sakey ya libro diad litrato, tan akin ya lanang tayon basaen itan?

4. Likud ed panaral nipaakar ed si Jehova tan si Jesus, anto ni kaukolan pian makapambilay ya andi-angga?

5. Antoy naaralan tayod Istorya 69?

6. Diad Istorya 55, antoy maong ya alimbawa nen ugaw ya Samuel?

7. Panon tayon naalig si Jesu-Kristo, tan no aligen tayo, antoy nagawad sikatayo diad arapen?

Kaaruman iran tepet:

1. Basaen so Juan 17:3.

   Panon ya ipapanengneng na Biblia ya say pikabat ed si Jehova a Dios tan si Jesu-Kristo et aliwa labat lan basta pan-memorize ed katuaan? (Mat. 7:21; Sant. 2:18-20; 1 Juan 2:17)

2. Basaen so Salmo 145:1-21.

   1. Dakel iray rason pian idayew si Jehova, mangibaga ka pay pigara. (Sal. 145:8-11; Apo. 4:11)

   2. Panon ya si Jehova et “maong ed amin,” tan panon tayon napaapit ed sikato lapud saya? (Sal. 145:9; Mat. 5:43-45)

   3. No inaro tayoy Jehova, napakiwas tayon gawaen so anto? (Sal. 119:171, 172, 175; 145:11, 12, 21)