SEKSION 2
Naandin Paraiso
Walay rebelden anghel a nansugsog ed inmunan laki tan bii, si Adan tan Eva, ya agmanpasakop ed Dios. Kanian kinmayat so kasalanan tan patey ed interon mundo
ABAYAG ni antis a pinalsa iray totoo, amalsa so Dios na dakdakel ya agnanengneng iran espiritun pinalsa—saray anghel. Diad Hardin na Eden, sakey a rebelden anghel, a tinawag a Satanas a Diablo, so mapalikdon anukso ed si Eva a mangan ed bunga na kiew ya isesebel na Dios.
Diad impangusar nen Satanas ed uleg a singano satan so mansasalita, impasiki nen Satanas a walay isisiblet na Dios ed si Eva tan ed asawa to. Imbaga na saman ya anghel ed si Eva ya ag-ira ompatey no kanen da so isesebel a bunga. Inakusaan sirin nen Satanas so Dios a titilaan Toy totoon ananak To. Pinapaway nen Satanas ya maabig so pansumpalan na ag-itulok ed Dios, a manresulta kuno itan ed pakaliwawaay nonot tan pagmaliw a bulos. Balet ta tila itan—diad tua, satan so sankaunaan a tila ed dalin. Say talagan isyu dia et say inkasoberano na Dios, odino say sankatagyan a pananguley to, salanti, no kasin walay kanepegan na Dios a manguley, no kasin matunong so pananguley to, tan no kasin parad pankaabigan itan na saray uuleyan to.
Anisia si Eva ed impantila nen Satanas. Nanlapula’d saman et pinirawat to imay bunga, insan la angan ed satan. Insan to met inikdan so asawa to, tan angan met ed satan. Kanian nagmaliw iran makasalanan. Singa simpli labat iman a ginawa ra, pero diad tua et panagrebelde iman. Ginagala nen Adan tan Eva ya ag-unoren so ganggan na Dios, tan diad satan et impanengneng dan ag-ira nampasakop ed Manamalsa ya angiter ed sikara na amin a bengatla, kaiba lay perpekton bilay.
Say ilalak odino bini “sugaten to so ulom, et sika sugaten mo so mukor to.”—Genesis 3:15
Senentensiaan na Dios iraman a rebelde. Insipan to so isabi na Bini odino Manangisalba a mamatey ed si Satanas, ya irerepresenta na samay uleg. Pian nipanengneng so panangasi na Dios ed saray magmaliw ya ilalak di Adan tan Eva, agton tampol pinatey irayan rebelde. Saray ananak da et nawalaan na ilalo lapud samay ibaki na Dios so mangekal ed saray makapaermen a resulta na impanrebelde ed Eden. Legan a nisusulat so Biblia, kalkalnan nipaamta no panon a nagawa so gagala na Dios nipaakar ed sayan Manangisalba tan no siopa iyan ibaki.
Pinapaway na Dios si Adan tan Eva ed Paraiso. Pian walay napambilay da, kaukolan iran mantrabaho na impasya, a mandalus ira ed paway na Eden. Diad panaakar na panaon et nanlukon si Eva tan inyanak toy panguloan da nen Adan, si Cain. Awalaan met ira na arum ni ran anak a lalaki tan bibii, a kaiba lay Abel tan Set. Tan si Set so nanlapuan nen Noe.
—Base ed Genesis kapitulo 3 anggad 5; Apocalipsis 12:9.