SEKSION 5

Benendisyonan na Dios si Abraham tan say Pamilya To

Binmaleg so poli nen Abraham. Sinalimbengan na Dios si Jose diad Ehipto

AMTA nen Jehova a nasabi panaon et manirap tan ompatey so inad-aro ton Anak. Nipasakbay itan diad Genesis 3:15, anggaman aliwan direkta. Panon kasin nipalikna na Dios ed katooan a talagan baleg a sakripisyo so ipatey na Anak to? Nengnengen tayo pay sakey a tudtuan agawa a nabasa ed Biblia. Imbaga na Dios ed si Abraham ya ibagat toy inad-aro ton anak a si Isaac.

Mabiskeg so pananisia nen Abraham. Isipen pa, insipan na Dios ed sikato a say panlapuan na impasakbay a Manangisalba, odino Bini, et diad linya nen Isaac. Matalek si Abraham a paolien na Dios si Isaac no nakaukolan, tan nen kuan to lan ibagat so mismon anak to lapud inkamatulok to, tampol a binano na anghel na Dios si Abraham. Nandinayewan na Dios so inkamabulos nen Abraham ya ibagat so inad-aro ton anak, tan inulit na Dios iray sipan to ed sayan matoor a too.

Linmabas so panaon, awalaan na duaran ilalak si Isaac, si Esau tan Jacob. Abendisyonan si Jacob lapud maapresya ed sagrado iran bengatla, ya aliwan singa si Esau. Sinalatan na Dios so ngaran nen Jacob na Israel, tan say 12 ilalak to so nagmaliw a lider na saray tribu na Israel. Balet panon a nagmaliw a baleg a nasyon iyan pamilya?

Ginmapo so nantutumbokan ya agawa sanen pangimonan na sarayan sanaagi so yugtan da a si Jose. Sikatoy inlako ra bilang aripen, tan inawit ed Ehipto. Balet benendisyonan na Dios iyan matoor tan makpel a balolaki. Lapud walay baleg ya eras, si Jose so pinili na Faraon odino ari na Ehipto pian ikdan na atagey a posisyon. Dugaruga ta imbaki nen Jacob so pigaran ilalak to ed Ehipto pian mangaliw na abasto—tan si Jose so administrador ed saman! Kayari na makapaakis ya impannenengneng da, pinerdona nen Jose so magbabawin agagi to, tan inyuksoy toy panayam na interon pamilya to ed Ehipto. Naikdan ira na mabunan dalin, a ditan da nitultuloy so ondakel tan onaligwas. Amta nen Jose ya inmaneobra na Dios iray inkagawa pian nasumpal iray sipan To.

Impaamta nen Jose ed agagi to ya sikato si Jose

Si Jacob a masiken la so nanayam ed Ehipto anggad impatey to, a walad simpok na ombabaleg a pamilya to. Antis ya ompatey, impasakbay to a say insipan a Bini, odino Manangisalba, so magmaliw a makapanyarin Manuley a nianak ed poli nen Juda ya anak to. Linmabas iray taon, impasakbay nen Jose antis ton ompatey ya ipaway na Dios so poli na Israel ed Ehipto.

—Nibase ed Genesis kapitulo 20 anggad 50; Hebreos 11:17-22.