• Anto so Panarian na Dios?
    Panliketan so Bilay ya Anggapoy Anggaan!—Panag-aral na Biblia
    • Leksion 31. Si Jesu-Kristo, say Ari ed tawen, diad arap na gloria nen Jehova.

      LEKSION 31

      Anto so Panarian na Dios?

      Say sankaimportantian ya mensahe na Biblia et say Panarian na Dios. Usaren nen Jehova itan ya Panarian pian sumpalen so gagala to parad dalin. Anto itan ya Panarian? Panon tayon amta ya manuuley la itan natan? Anto la ray agawaan to? Tan anto ni ray gawaen to diad arapen? Diad sayan leksion tan diad onsublay ya duaran leksion et naebatan iratan ya tepet.

      1. Anto so Panarian na Dios, tan siopa so Ari ed satan?

      Say Panarian et sakey a gobierno ya ginawa o inletneg nen Jehova ya Dios. Say Ari na satan, si Jesu-Kristo et manuuley ed tawen. (Mateo 4:17; Juan 18:36) Oniay ibabaga na Biblia tungkol ed si Jesus: “Sikatoy manuley ya andi-anggaan bilang Ari.” (Lucas 1:32, 33) Bilang Ari na Panarian na Dios, uleyan nen Jesus so interon dalin.

      2. Siopa ray manuley ya kaiba nen Jesus?

      Agbukbukor nen Jesus ya manuley. Wala ray kaiba to ya “manlapud balang tribu tan lenguahe tan rasa tan nasyon . . . tan manuley ira bilang arari ed dalin.” (Apocalipsis 5:9, 10) Pigara so kaiba nen Kristo ya manuley? Manlapu nen linmad dalin si Jesus, minilyon so nagmaliw ya papatumbok ton Kristiano. Balet, 144,000 labat ed sikara so onla ed tawen ya manuley kaiba to. (Basaen so Apocalipsis 14:1-4.) Kanian amin lan Kristiano diad dalin et magmaliw ya sakop odino citizen na Panarian.—Salmo 37:29.

      3. Akin et mas maong ya aminpigapiga so Panarian na Dios nen saray gobierno na totoo?

      Anggano labay na saray totoon manuley so manggawa na maong, anggapoy pakasarag da ya gawaen so amin ya labay da. Sakey ni, nasabi panaon, salatan ira lanlamang na arum a manuley ya ompan anggapoy malasakit dad saray sakop da. Balet say Manuley ed Panarian na Dios, si Jesus, et agbalot salatan na anggan siopa. Say Dios et “mangiletneg na panarian ya agbalot naderal.” (Daniel 2:44) Manuley si Jesus ed interon dalin, tan pareparehoy pantrato to ed amin. Sikatoy maaro, maomaong, tan patas. Tan ibangat to ray totoo ya magmaliw met ya maaro, maomaong, tan patas.—Basaen so Isaias 11:9.

      DAKEL NI NAARALAN MO

      Amtaen no akin ya mas maong ya aminpigapiga so Panarian na Dios nen say anggan dinan ya gobierno na too.

      Manlapud trono to ed tawen, uuleyan nen Jesu-Kristo so interon dalin. Akayurong ed benegan to iray kaiba ton manuley. Diad benegan da, si Jehova et onsisinag ya maliwliwawa.

      4. Makapanyarin gobierno ya manuley ed interon dalin

      Mas makapanyari si Jesu-Kristo ya manuley nen say anggan siopan nanuley. Basaen so Mateo 28:18, insan ebatan iya:

      • Akin et mas atagey so pakauley nen Jesus nen say anggan siopan toon manuley?

      Mabetbet ya manguuman so gobierno na totoo tan melag labat ya parte na dalin so sakop na kada sakey ed sikara. Say Panarian na Dios balet ey? Basaen so Daniel 7:14, insan ebatan iraya:

      • Akin et makapaliket ya naamtaan ya say Panarian na Dios et “agnaderal”?

      • Akin et makapaliket ya naamtaan ya uleyan toy interon dalin?

      5. Kailangan ya salatan so uley na too

      Akin et kailangan ya salatan na Panarian na Dios iray gobierno na totoo? I-play so VIDEO, insan ebatan iya.

      VIDEO: Anto so Panarian na Dios?—Video Clip (1:41)

      • Antoy resulta na impanuley na too?

      Basaen so Eclesiastes 8:9, insan ebatan iraya:

      • Parad sika, dapat labat kasi ya salatan na Panarian na Dios iray gobierno na too? Akin ey?

      6. Natatalosan itayo na saray manuley ed Panarian na Dios

      Lapud asali na Ari tayo, si Jesus, so nambilay bilang too, sikatoy “makapilikna ed saray kakapuyan tayo.” (Hebreo 4:15) Saray 144,000 ya matoor a lalaki tan bibii ya manuley kaiba nen Jesus et pinili nen Jehova “manlapud balang tribu tan lenguahe tan rasa tan nasyon.”—Apocalipsis 5:9.

      • Parad sika, makapaliket kasin naamtaan ya asali nen Jesus tan amin ya kaiba ton manuley so nagmaliw ya too? Akin ey?

      Alanaan ya lalaki tan bibii ya nandurumay lahi da tan nambilay ed nanduruman panaon.

      Nampili si Jehova na lalaki tan bibii ya nandurumay lahi da pian manuley kaiba nen Jesus

      7. Mas maong ya aminpigapiga so batas o ganggan na Panarian na Dios

      Manggagawa iray gobierno na batas pian natulongan tan naprotektaan iray sakop da. Wala met iray batas na Panarian na Dios ya kailangan ya tumboken na saray sakop to. Basaen so 1 Corinto 6:9-11, insan ebatan iraya:

      • Anto kasi pansumpalan na mundo no unoren na amin ya totoo iray ganggan na Dios?a

      • Parad sika, dapat labat kasin ilaloan nen Jehova iray sakop na Panarian to ya respetoen da ray ganggan to? Akin ey?

      • Antoy mangipapanengneng ya sarag na saramay datin agmanguunor ed sarayan batas so manguman?—Nengnengen so bersikulo 11.

      Diad nansangaan ya karsada, papatundaen na pulis iray luluganan. Ombebeltang iray totoon nanduruma so edad da.

      Nanggawa iray gobierno na batas pian protektaan tan tulongan iray sakop da. Pero saray ganggan na Panarian na Dios et mas maong ya aminpigapiga ya manprotekta tan ontulong ed saray sakop to

      NO ITEPET NA ARUM: “Anto ’tay Panarian na Dios?”

      • Antoy ibagam ey?

      SUMARYO

      Say Panarian na Dios et tudtuan gobierno ed tawen ya manuley ed interon dalin.

      Rebyu

      • Siopa ray manuley ed Panarian na Dios?

      • Akin et mas maong ya aminpigapiga so Panarian na Dios nen say anggan dinan ya gobierno na too?

      • Anto ray arum ya iilaloan nen Jehova ed saray sakop na Panarian?

      Salim iyan gawaen

      DISKOBRIEN

      Amtaen no antoy imbangat nen Jesus ya kawalaan na Panarian.

      “Kasin say Panarian na Dios et Walad Pusom?” (Artikulo ed website)

      Akin et mas pipilien na Saray Tasi nen Jehova so manmatoor ed Panarian na Dios nen say diad uley na too?

      Matoor ed Panarian na Dios (1:43)

      Amtaen so ibabaga na Biblia tungkol ed saray 144,000 ya pinili nen Jehova ya manuley kaiba nen Jesus.

      “Siopa ray Onlad Tawen?” (Artikulo ed website)

      Antoy akakombinse ed sakey a biin apriso ya say Dios labat so makapangiter na hustisya ed aliwan patas ya mundo?

      “Naamtaan Kon Siansia no Akin ya Anggapoy Hustisya” (Onliing!-E, Nobyembre 2011)

      a Arum ed sarayan ganggan tan prinsipyo et pantongtongan diad Seksion 3.

  • Manuuley Lay Panarian na Dios!
    Panliketan so Bilay ya Anggapoy Anggaan!—Panag-aral na Biblia
    • Leksion 32. Si Jesu-Kristo, say Ari ed tawen ya sankaegnaan toy setro tan uuleyan toy dalin.

      LEKSION 32

      Manuuley Lay Panarian na Dios!

      Nen 1914, ginmapon nanuley ed tawen so Panarian na Dios. Diad satan met ginmapo so kaunoran iran agew na uley na too. Panon tayon amta? Aralen tayoy propesiya ed Biblia tan saray situasyon tan ugali ya mapatpatnag manlapu la nen 1914.

      1. Antoy impropesiya ed Biblia?

      Impropesiya ed libro na Biblia ya Daniel ya say Panarian na Dios et onggapon manuley diad sampot na panaon ya say tawag et “pitoran panaon.” (Daniel 4:16, 17) Kayari nilasus ya taon, tinawag met itan nen Jesus ya “aturon panaon na saray nasyon,” tan imbangat to ya diad saman a panaon et agni itan anampot. (Lucas 21:24) Naaralan ta ed saya ya say pitoran panaon et anampot diad taon 1914.

      2. Anto ray situasyon tan ugali ya mapatpatnag manlapu la nen 1914?

      Intepet na saray disipulo nen Jesus ed sikato: “Antoy tanda na kiwawalam tan say kaunoran a parte na sistema na mundo?” (Mateo 24:3) Pian ebatan ira, impropesiya nen Jesus so dakel ya nagawa no onggapo lan manuley ed tawen bilang Ari ed Panarian na Dios. Kaiba ed saraya so guerra, eras, tan yegyeg. (Basaen so Mateo 24:7.) Impropesiya met na Biblia ya lapud ugali na saray totoo diad “kaunoran iran agew,” magmaliw ya “mair-irap” so bilay. (2 Timoteo 3:1-5) Manlapu la nen 1914, sankapatnagan irayan situasyon tan ugali na saray totoo.

      3. Akin et aliwliway nagagawa ed mundo manlapu nen ginmapon nanuley so Panarian na Dios?

      Ag-abayag nen nagmaliw ya Ari na Panarian na Dios si Jesus diad tawen, akilaban ed si Satanas tan saray demonyo. Atalo si Satanas. Ibabaga na Biblia ya “sikatoy imbantak diad dalin, tan saray anghel to et imbantak a kaiba to.” (Apocalipsis 12:9, 10, 12) Agaylay pasnok nen Satanas ta amta ton magano lay kaderal to. Kanian papairapen tan guguloen toy amin diad dalin. Kampegan aliwliwa lay nagagawa ed mundo! Solusyonan na Panarian na Dios irayan amin ya problema.

      DAKEL NI NAARALAN MO

      Aralen no panon tayon amta ya ginmapon nanuley so Panarian nen 1914, tan no antoy epekto na satan ed sikatayo.

      4. Say impankuenta ed propesiya na Biblia ya ompugta ed 1914

      I-play so VIDEO.

      VIDEO: Ginmapon Nanuley so Panarian na Dios nen 1914 (5:02)

      Pian ipaamta so nagawad arapen, impankugip na Dios si Nabucodonosor ya Ari na Babilonia nensaman. Nabasa tayo itan ya kugip tan say eksplinasyon nen Daniel diad Biblia. Malinew ya parehon ontutukoy itan ed uley nen Nabucodonosor tan say Panarian na Dios.—Basaen so Daniel 4:17.a

      Basaen so Daniel 4:20-26, insan usaren so tsart pian ebatan iraya:

      No Antoy Koneksion na Kiew ya Akugip ed Panarian na Dios

      SAY PROPESIYA (Daniel 4:20-36)

      Uley

      (A) Balbaleg ya kiew

      Balbaleg ya kiew.

      Apultot so uley

      (B) ‘Batangen so kiew,’ tan paulyanan ya “onlabas so pitoran panaon”

      Binatang ya kiew ya binariberan na balatyang tan gansa so sengeg to.

      Nipawil so uley

      (C) “Say Panarian mo et nipawil ed sika”

      Balbaleg ya kiew.

      Diad unonan kasumpalan na sayan propesiya . . .

      • (D) Siopa so irerepresenta na kiew?—Nengnengen so bersikulo 22.

      • (E) Panon ya apultot so panuuley to?—Basaen so Daniel 4:29-33.

      • (F) Antoy agawad si Nabucodonosor diad sampot na “pitoran panaon”?—Basaen so Daniel 4:34-36.

      UNONAN KASUMPALAN

      Uley

      (D) Nabucodonosor, Ari na Babilonia

      Si Arin Nabucodonosor ya malaslastog ya akaalagey.

      Apultot so uley

      (E) Kayari 606 B.C.E., naatapis si Nabucodonosor tan agto la sarag so manuley diad literal ya pitoran taon

      Si Nabucodonosor ya singa ayep ya mankakabkab na dika.

      Nipawil so uley

      (F) Pinmawil so kalakal nen Nabucodonosor tan nanuley lamet

      Si Arin Nabucodonosor ya akatangay ed tawen tan inyatagey toy lima to.

      Diad komaduan kasumpalan na sayan propesiya . . .

      • (G) Siopa so irerepresenta na kiew?—Basaen so 1 Awaran 29:23.

      • (H) Panon ya apultot so panuuley da? Panon tayon amta ya siansia nin apultot itan ya uley nen wadiad dalin si Jesus?—Basaen so Lucas 21:24.

      • (I) Kapigan tan iner nipawil iyan uley?

      KOMADUAN KASUMPALAN

      Uley

      (G) Arari ed Israel ya angirepresenta ed uley na Dios

      Saray nantutumbokan ya arari ed Israel ya akayurong ed trono. Sisinagan ira na liwawa manlapud tagey.

      Apultot so uley

      (H) Aderal so Jerusalem, apultot so uley na saray ararin Israelita diad loob na 2,520 ya taon

      Apoolan so Jerusalem nen 607 B.C.E. Insan, linmabas so 2,520 ya taon.

      Nipawil so uley

      (I) Ginmapon nanuley si Jesus diad tawen bilang Ari na Panarian na Dios

      Si Jesus ya uuleyan toy dalin diad trono to ed tawen manlapu la nen 1914 C.E. Walay sinag na liwawa ya manlalapud sikato.

      Panon karukey so pitoran panaon?

      Wala ray parte na Biblia ya makatulong pian natalosan tayo iray arum a parte. Singa bilang, ibabaga na libro na Biblia ya Apocalipsis ya say talora tan kapalduan panaon et 1,260 ya agew. (Apocalipsis 12:6, 14) Kanian say pitoran panaon et doble na satan ya bilang odino 2,520 ya agew. Diad Biblia, no maminsan, say sakey agew et irerepresenta toy sakey taon. (Ezequiel 4:6) Kaibad satan imay pitoran panaon ya abitlad libron Daniel, ya irerepresenta toy 2,520 ya taon.

      5. Anguma-uman so mundo manlapu la nen 1914

      I-play so VIDEO.

      VIDEO: Anguma-uman so Mundo Manlapu La nen 1914 (1:10)

      Impropesiya nen Jesus iray situasyon ed mundo ya nagawa sano onggapo lan manari. Basaen so Lucas 21:9-11, insan ebatan iya:

      • Dinan ed saraya so naoobserbaan odino nababalitaan mo?

      Imbaga nen apostol Pablo no antoy ugali na totoo diad kaunoran iran agew na uley na too. Basaen so 2 Timoteo 3:1-5, insan ebatan iya:

      • Dinan ed sarayan ugali so nanenengneng mo ed totoo natan?

      Litrato: Saray eksena ya mangipapanengneng ed situasyon tan ugali na totoo diad kaunoran iran agew. 1. Sakey ya lider na militar ya walad arap na podium tan oneeyag ya akatagey so lima to. 2. Aderalderal ya bilding kayari yegyeg. 3. Eroplano ya pan-guerra. 4. Totoon aka-mask tan manaakar ed paway. 5. Say Twin Towers ed New York ya napopoolan ta inataki na saray terorista. 6. Lakin manda-drugs. 7. Asawan laki ya kuan to lan sakitan so asawa to tan eeyagan to. 8. Nanduruman drugs tan alak. 9. Duaran bibii ya usoy panangawes tan alahas da, manse-selfie ira. 10. DJ ya manpapatogtog ed concert. 11. Lakin mangitutupak na pasabog.

      6. Say uley na Panarian na Dios so manpakiwas ed sikatayo

      Basaen so Mateo 24:3, 14, insan ebatan iraya:

      • Anton importantin kimey so mangipapanengneng ya manuuley lay Panarian na Dios natan?

      • Panon kan makapitulongan ed sayan kimey?

      Manuuley la natan so Panarian na Dios tan asingger to lan uleyan so interon dalin. Basaen so Hebreo 10:24, 25, insan ebatan iya:

      • Antoy kailangan tayon gawaen ta ‘nanenengneng tayon manasingger lay agew’?

      Litrato: 1. Iyaaralan na Biblia ya inmatendi ed aral na Saray Tasi nen Jehova. 2. Pinulongan na sayan iyaaralan so kaaro to.

      No walay naaralan mo ya makatulong tan makapangiligtas ed arum, antoy gawaen mo?

      NO ITEPET NA ARUM: “Akin et bungay sangi na Saray Tasi nen Jehova ’tay 1914?”

      • Antoy ibagam ey?

      SUMARYO

      Prupruebaan na propesiya ed Biblia, impankuenta, tan saray situasyon ed mundo ya manuuley la natan so Panarian na Dios. Ipapanengneng tayon manisia tayod satan no ipupulong tayo itan tan mimiaral tayo.

      Rebyu

      • Antoy agawa diad sampot na pitoran panaon ya impropesiya na Biblia ed libron Daniel?

      • Antoy akakombinse ed sika ya ginmapon nanuley so Panarian na Dios nen 1914?

      • Panon mon nipanengneng ya panisiaan mon manuuley la natan so Panarian?

      Salim iyan gawaen

      DISKOBRIEN

      Amtaen no antoy ibabaga na saray historian tan arum nin totoo ya pananguman ed mundo manlapu la nen 1914.

      “Inmabeban Maong so Moralidad na Mundo” (Onliing!-E, Abril 2007)

      Amtaen no panon ya naapektoan so bilay na sakey ya laki nen abasa toy propesiya ed Mateo 24:14.

      “Inar-Arok ya Maong so Baseball!” (Say Panag-bantayan No. 3 2017)

      Panon tayon amta ya samay propesiya ed Daniel kapitulo 4 et ontutukoy ed Panarian na Dios?

      “Kapigan Ginmapon Nan-uley so Panarian na Dios? (Part 1)” (Say Panag-bantayan, Nobyembre–Disyembre 2014)

      Antoy mangipapanengneng ya samay “pitoran panaon” ya abitla ed Daniel kapitulo 4 et anampot nen 1914?

      “Kapigan Ginmapon Nan-uley so Panarian na Dios? (Part 2)” (Say Panag-bantayan, Enero–Pebrero 2015)

      a Nengnengen so sampot ya duaran artikulo diad seksion ya Diskobrien ya walad sayan leksion.

  • No Antoy Gawaen na Panarian
    Panliketan so Bilay ya Anggapoy Anggaan!—Panag-aral na Biblia
    • Leksion 33. Totoon manaayam ed paraison dalin.

      LEKSION 33

      No Antoy Gawaen na Panarian

      Manuuley la so Panarian na Dios. Agmanbayag, wala ray gawaen ton baleg ya pananguman diad dalin. Pantongtongan ta so arum ed saray balibalin nagawa diad uley na Panarian.

      1. Panon ya ipawil na Panarian na Dios so kareenan tan hustisya diad dalin?

      Deralen nen Jesus, say Ari na Panarian na Dios, iray mauges ya totoo tan gobierno diad guerra ya Armagedon. (Apocalipsis 16:14, 16) Diad satan, nagawa la iyan promisa na Biblia: “Agmanbayag et anggapo lay mauges.” (Salmo 37:10) Panamegley na Panarian, seguradoen nen Jesus ya walay kareenan tan hustisya diad interon mundo.—Basaen so Isaias 11:4.

      2. Anto lay klase na bilay no nagawa la so linawa na Dios diad dalin?

      Diad uley na Panarian na Dios, “saray matunong et tawiren day dalin, tan manbilay ira ditan diad andi-anggaan.” (Salmo 37:29) Imadyin mo pay manbilay ed mundo ya matunong la so amin! Manaaroan ira tan inaro dan amin si Jehova. Anggapo lay mansakit, tan manbilay ira ya anggapoy anggaan.

      3. Antoy gawaen na Panarian na Dios no anggapo la ray mauges?

      No anggapo la ray mauges, manuley si Jesus bilang Ari diad 1,000 ya taon. Diad satan ya panaon, sikato tan saray 144,000 ya kaiba ton manuley et tulongan da ray totoo diad dalin ya magmaliw ya perpekto. Diad sampot na 1,000 ya taon, magmaliw ya balibalin paraiso so dalin. Tan amin ya totoo et magmaliw ya maliket ta uunoren da ray ganggan nen Jehova. Insan ipawil nen Jesus so pananguley ed Ama to, si Jehova. Diad satan, “napasanto . . . so ngaran” nen Jehova. (Mateo 6:9, 10) Napruebaan lad satan ya si Jehova so maong ya Manuley tan inaro to iray amin ya sakop to. Insan la deralen nen Jehova si Satanas, saray demonyo, tan amin ya manrebelde ed uley to. (Apocalipsis 20:7-10) Lapud Panarian na Dios, magmaliw ya perpekto so kipapasen tan ag-itan mangangga.

      DAKEL NI NAARALAN MO

      Amtaen no akin ya segurado tayo ya usaren na Dios so Panarian pian sumpalen so amin ya promisa ed Biblia ya nagawad arapen.

      4. Panampoten na Panarian na Dios iray gobierno na totoo

      “Say too et uuleyan toy kapara ton too diad pankaugsan to.” (Eclesiastes 8:9) Panamegley na Panarian nen Jehova, panampoten to iyan aliwan patas ya kagagawa.

      Basaen so Daniel 2:44 tan 2 Tesalonica 1:6-8, insan ebatan iraya:

      • Antoy gawaen nen Jehova tan say Anak to, si Jesus, ed saray gobierno na totoo tan ed saray onsusuporta ed saratan?

      • Diad saray naaralan mo tungkol ed si Jehova tan si Jesus, akin et segurado ka ya patas ira?

      Si Jesus ya Ari ed tawen et manuuley ed paraison dalin.

      5. Si Jesus so sankamaongan ya Ari

      Bilang Ari na Panarian na Dios, dakel so gawaen nen Jesus pian natulongan iray sakop to diad dalin. I-play so VIDEO pian naamtaan ya labalabay nen Jesus tan walay inter na Dios ya pakayari to ya tulongan iray totoo.

      VIDEO: Impanengneng nen Jesus no Antoy Gawaen na Panarian (1:13)

      Nen wadiad dalin si Jesus, impanengneng to no antoy gawaen na Panarian. Dinan ed sarayan bendisyon so labalabay mo lan nagawa? Basaen iray teksto ya angibasiyan ed saratan ya bendisyon.

      NEN WADIAD DALIN SI JESUS . . .

      MANLAPUD TAWEN, SI JESUS ET . . .

      • seguradoen to ya perpekto so laman na amin.—Isaias 33:24.

      6. Diad arapen, balibali so gawaen na Panarian na Dios

      Sumpalen na Panarian so panlabayan nen Jehova parad totoo. Manbilay ira ya anggapoy anggaan diad paraison dalin. I-play so VIDEO pian nanengneng no panon ya uusaren nen Jehova so Anak to, si Jesus, pian nasumpal so panlabayan To.

      VIDEO: Nengnengen so Balibalin Nagawad Arapen (4:38)

      Basaen so Salmo 145:16, insan ebatan iya:

      • Antoy aliknam nen naamtaan mo ya ‘peneken nen Jehova so pirawat na balang mabilay a bengatla’?

      IBABAGA NA ARUM: “No mantutulongan tayon amin, sarasarag tayon solusyonan iray problema na mundo.”

      • Anto ran problema so agnasolusyonan na saray gobierno na too ya solusyonan na Panarian na Dios?

      SUMARYO

      Sumpalen na Panarian so panlabayan na Dios. Magmaliw ya paraiso so interon dalin ya panayaman na maong a totoo ya mandayew ed si Jehova diad andi-angga.

      Rebyu

      • Panon ya pasantoen na Panarian na Dios so ngaran nen Jehova?

      • Akin et manisia tayo ya sumpalen na Panarian na Dios iray promisa ed Biblia?

      • Dinan ed saray gawaen na Panarian so labalabay mo lan nagawa?

      Salim iyan gawaen

      DISKOBRIEN

      Amtaen no anto so Armagedon.

      “Anto so Guerra ya Armagedon?” (Artikulo ed website)

      Amtaen iray nagawa legan na samay tinawag nen Jesus ”ya baleg a kairapan.”—Mateo 24:21.

      “Anto so Baleg a Kairapan?” (Artikulo ed website)

      Bantayan no panon ya saniiban iimadyinen na pamilya iray bendisyon na Panarian.

      Imadyin Mon Wala Ka Lad Paraiso (1:50)

      Diad artikulo ya “Dakel a Tepet so Mangogonigon ed Siak,” nengnengen no panon ya naamtaan na sakey ya rebelde ed gobierno so solusyon ya aanapen to.

      “Uumanen na Biblia so Bilay” (Say Panag-bantayan, Enero–Marso 2012)