LEKSION 23

Bautismo—Balibalin Iplanom!

Printed Edition

Imbangat nen Jesus ya kailangan ya nabautismoan iray Kristiano. (Basaen so Mateo 28:19, 20.) Pero anto ’tay bautismo? Tan antoy gawaen na sakey pian nabautismoan?

1. Anto so bautismo?

Say salitan “bautismo” et nanlapud Greek ya salita ya say labay ton ibaga et “ilebleb” ed danum. Nen abautismoan si Jesus, sikatoy inlubog ed Ilog Jordan, insan “[inmimwas ed] danum.” (Marcos 1:9, 10) Ontan met iray tuan Kristiano natan. No manpapabautismo ira, ipapalseb odino ilulubog ira ed danum.

2. Antoy ipapanengneng na pampabautismo?

No manpabautismo so sakey, ipapanengneng to ya inter odino indedika to la so sarili to ed si Jehova a Dios. Panon ton gawaen so dedikasyon? Antis ya manpabautismo, manpikasin bukor. Ibaga tod si Jehova ya labay to lan panlingkoran diad interon bilay to. Ipromisa to ya si Jehova labat so dayewen to, tan say sankaimportantian ed sikato et say panggawa ed panlabayan na Dios. Mandesisyon ya “iburi toy sarili to tan . . . mantultuloy ya ontumbok” ed saray ibabangat nen Jesus tan aligen so alimbawa to. (Mateo 16:24) No idedika na sakey so sarili to tan manpabautismo, nakaaro to lan maong si Jehova tan saray kaagian.

3. Antoy gawaen na sakey pian nabautismoan?

Pian nabautismoan ka, kailangan mon kabaten si Jehova, tan pabiskegen so pananisiam ed sikato. (Basaen so Hebreo 11:6.) Legan mon nakakabat si Jehova tan ombibiskeg so pananisiam ed sikato, lalom ya naaro. Seguradon labalabay mo ya ipaamta ed arum si Jehova, tan unoren iray ganggan to. (2 Timoteo 4:2; 1 Juan 5:3) No say sakey et manbibilay “a manepeg ed si Jehova pian sikatoy napaliket [ya] maong,” mandesisyon la ya idedika toy bilay to ed Dios, tan manpabautismo.—Colosas 1:9, 10.a

DAKEL NI NAARALAN MO

Amtaen no antoy naaralan tayo ed bautismo nen Jesus, tan no panon ya makapanparaan so sakey parad sayan importantin desisyon.

4. Makaaral tayo ed bautismo nen Jesus

Basaen so Mateo 3:13-17 pian naamtaan ni ray detalye na bautismo nen Jesus. Insan ebatan iraya:

Kasin baby si Jesus nen abautismoan?
Panon ya abautismoan si Jesus? Kasin winisikan labat na danum?

Nen abautismoan si Jesus, inggapo to so espisyal a kimey ya ipapagawa na Dios ed sikato diad dalin. Basaen so Lucas 3:21-23 tan Juan 6:38, insan ebatan iya:

Kayarin abautismoan si Jesus, anton kimey so inyuna to ed bilay to?

5. Nasarag moy manpabautismo

Diad gapo, singa mairap ya gawaen so dedikasyon tan bautismo. Balet, sarag moy onaligwas ya anggad punton agka la manaalangan ya gawaen itan ya importantin desisyon. Pian naamtaan mo ya wala la ray akagawa ed satan, i-play so VIDEO.

VIDEO: No Panon ya Nakaaro si Jehova (1:11)

Basaen so Juan 17:3 tan Santiago 1:5, insan ebatan iya:

Antoy makatulong pian makapanparaan so sakey parad bautismo?

A. Biin idededika toy sarili to ed Dios diad pikakasi.

B. Babautismoan imay bii bilang Tasi nen Jehova diad pangilubog ed sikato ed danum.

Idedika tayo so sarili tayo ed si Jehova diad pangibaga ed sikato ya labay tayo lan panlingkoran ed interon bilay tayo
Diad bautismo tayo, ipapanengneng tayo ed publiko ya indedika tayo lay bilay tayo ed Dios

6. No manpabautismo tayo, magmaliw tayo lan parte na pamilya nen Jehova

No manpabautismo tayo, magmaliw tayo lan parte na pamilyan nankakasakey diad interon mundo. Inerman so nanlapuan tayo odino lahi tayo, pareho nin siansia so papanisiaan tan tutumboken tayon prinsipyo tan estandarte ed moral. Basaen so Salmo 25:14 tan 1 Pedro 2:17, insan ebatan iya:

No say sakey et manpabautismo, antoy epekto na satan ed relasyon tod si Jehova tan ed arum ya mandadayew ed Sikato?

Litrato: Malikeliket so bautismadon sister nen iisipen toy balibalin relasyon to ed saray agagi. 1. Ibabaga toy nalilikna to diad sakey a sister. 2. Itatabin toy maedad lan sister. 3. Kaiba ton mamangan iray kakaaro to ya nandurumay edad da. 4. Sikatoy iibaan na sakey a sister legan ton pupulongan so sakey a laki. 5. Manse-selfie kaibay duaran Tasi ya dumay lahi da diad sakey a kombension.

IBABAGA NA ARUM: “Agko ni labay so manpabautismo.”

No ontan so naliliknam, iplanom ni kasi so manpabautismo?

SUMARYO

Imbangat nen Jesus ya kailangan ya nabautismoan iray Kristiano. Pian nagawaan itan, dapat mabiskeg so pananisia na sakey ed si Jehova, uunoren to ray estandarte To, tan idedika toy sarili to ed Dios.

Rebyu

Anto so bautismo, tan akin et importante itan?
Antoy koneksion na dedikasyon tan bautismo?
Anto ray kailangan ya gawaen na sakey antis ton idedika so sarili to tan manpabautismo?

Asumpal so leksion nen:

Salim iyan gawaen

Nengnengen so checklist diad sampot na Seksion 4 ya “Akaparaan Ak La Kasin Manpulong Kaiba na Kongregasyon?” tan “Akaparaan Ak La Kasin Manpabautismo?,” pian naamtaan no panon kan magmaliw ya kualipikado.

Arum ni:

Your other goal

DISKOBRIEN

Amtaen no anton talaga so bautismo.

“Anto so Bautismo?” (Artikulo ed website)

Rebyuen no anto ray paraan ya makatulong pian nabautismoan so sakey.

“Say Panangarom ed si Jehova so Mamakiwas ed Sika ya Manpabautismo” (Say Panag-bantayan, Marso 2020)

Basaen no panon ya akapandesisyon so sakey ya laki ya manpabautismo lapud saray naaralan to ed Biblia.

“Labay Dan Siak a Mismoy Makalmo na Katuaan” (Say Panag-bantayan, Marso–Abril 2013)

Amtaen no akin ya balibalin iplano so pampabautismo tan no panon kan makapanparaan parad satan.

“Dapat Na ba Akong Magpabautismo?” (Ang mga Tanong ng mga Kabataan—Mga Sagot na Lumulutas, Tomo 2, kabanata 37)

a No say sakey et datin abinyagan ed sananey ya relihyon, kailangan to nin siansia so manpabautismo. Akin ey? On, ta ag-imbangat na satan ya relihyon so katuaan ya walad Biblia.—Nengnengen so Gawa 19:1-5 tan Leksion 13.