LEKSION 29

Antoy Nagawad Sikatayo no Ompatey Tayo?

Printed Edition

Asalim lay inateyan? Diad satan ya maer-ermen a panaon, ompan naisip mo: ‘Antoy nagawad sikatayo no ompatey tayo? Nanengneng tayo lamet kasi iray inad-aro tayo?’ Diad sayan leksion tan diad onsublay, pantongtongan tayo iray makaligliwan ebat na Biblia.

1. Antoy nagawad sikatayo no ompatey tayo?

Inkompara nen Jesus so patey ed araldalem ya ugip. Antoy pamparehoan na patey tan ugip? No say sakey ya too et araldalem so ugip to, agto amtay nagagawa ed kaliberliber. No say sakey et inatey, anggapo lay nalikna ton sakit tan agto met la nalikna so ermen. “Saray inatey et anggapon balot so amta ra,” so kuan na Biblia.—Basaen so Eclesiastes 9:5.

2. Akin et makatulong ed sikatayo no amta tayoy katuaan tungkol ed patey?

Dakel ya totoo so natatakot ed patey tan ed saray inaatey. Pero, naekal so panaaburidom no naamtaan mo so ibabaga na Biblia tungkol ed patey. Imbaga nen Jesus: “Say katuaan so mangibulos ed sikayo.” (Juan 8:32) Ibabangat na arum a relihyon ya walay mansiansian imortal a kamarerwa ya manbibilay kayari patey. Pero aliwan ontan so ibabangat na Biblia. Anggapoy maniirap kayari ipapatey. Sakey ni, lapud anggapo lay amta na saray inaatey, agda tayo sarag ya sakitan. Kanian agtayo ra kailangan ya paliketen, sambaen, tan dasalan.

Ibabaga na arum ya nakatongtong da iray inaatey. Pero imposible ’tan. Naaralan tayo ya saray inaatey et “anggapon balot so amta ra.” Iisipen na arum ya say katongtong da et samay inatey lan inad-aro da. Pero diad tua, say katongtong da et saray demonyo ya mankunkunwarin sikara imay toon inatey. Kanian lapud amta tayo so katuaan tungkol ed patey, naprotektaan tayo ed saray demonyo. Bibilinen itayo nen Jehova ya agtayo sasalien so mitongtong ed saray inaatey, ta amta to ya delikado so mitongtong ed saray demonyo.—Basaen so Deuteronomio 18:10-12.

DAKEL NI NAARALAN MO

Amtaen no anto ni ray ibabaga na Biblia tungkol ed patey pian ombiskeg so pananisiam ed maar-aron Dios ya agto papairapen iray inaatey.

Laki, kaibay duaran melag nin anak to, akayurong ira diad lamay na asawa to tan ina na anak to. Wadtan iray kakaaro tan kapamilya to pian manligliwa tan ontulong ed sikara.

3. Aralen so tuan kipapasen na saray inaatey

Nandurumay papanisiaan na totoo ed no antoy nagawa no ompatey tayo. Siempre, agmet nayari ya saratan ya amin et tua.

Anto ray papanisiaan ed lugar yo ya kipapasen na inaatey?

Pian naamtaan so ibabangat na Biblia, i-play so VIDEO.

VIDEO: Anto so Kipapasen na Saray Inatey?—Video Clip (1:19)

Litrato: Eksena ed video ya ‘Anto so Kipapasen na Saray Inatey?—Video Clip.’ 1. Bangkay ya akarukol ed dukolan na ospital. 2. Laki ya akaugip ed tren legan ya manbiabiahe, wala ray kaabay to.

Basaen so Eclesiastes 3:20, insan ebatan iraya:

Diad abasan bersikulo, antoy nagawa no ompatey so sakey?
Kasin walay mansiansian mabilay ed sikato kayari ipatey to?

Nabasa ed Biblia so impatey nen Lazaro ya kaaro nen Jesus. Basaen so Juan 11:11-14, tan nengnengen no antoy imbaga nen Jesus ya kipapasen nen Lazaro. Insan ebatan iraya:

Iner inkompara nen Jesus so patey?
Antoy ipapanengneng na saya ya kipapasen na saray inaatey?
Antoy nibagam ed ibabangat na Biblia tungkol ed patey?

4. Natulongan itayo no amta tayoy tua tungkol ed patey

No amta tayoy tua tungkol ed patey, agtayo la natatakot ed saray inaatey. Basaen so Eclesiastes 9:10, insan ebatan iya:

Sarag itayo kasin sakitan na saray inaatey?

Naprotektaan itayo met na katuaan ya walad Biblia pian agtayo panisiaan ya saray inaatey et kailangan ya paliketen odino sambaen ni ingen. Basaen so Isaias 8:19 tan Apocalipsis 4:11, insan ebatan iya:

Anto kasi nalikna nen Jehova no say sakey ya too et sambaen toy inaatey odino onkerew na tulong ed sikara?

Litrato: Saray ritual pian idayew so inatey. 1. Lakin akatalimukor tan manpipikasi diad arap na pantyon tan angi-atang na kakanen. 2. Taloran lalaki ya onsasayaw ya akasulong na tradisyonal ya kawes na tribu da. 3. Parada, ya akamaskara iray totoo na bungo tan aka-awit iray skeleton diad Agew na Inatey. — Lapud amta tayo so katuaan tungkol ed patey, agtayo la gagawaen iray kustombre odino ritual ya aglabay nen Jehova

5. Naligliwa tayo no amta tayoy tua tungkol ed patey

Imbangat ed dakel ya totoo ya no ompatey ira, manirap ira lapud saray aliwan ginawa da ed apalabas. Pero, naamtaan tayo ya anggapoy papairapen ya inatey—anggan saramay inaatey ya mauge-uges so ginawa da. Basaen so Roma 6:7, insan ebatan iya:

Singa ibabaga na Biblia, say sakey ya inatey et nibulos odino aperdona la ed saray kasalanan to. Parad sika, wala kasi inatey ya maniirap lapud saray apalabas ya ginawa ton kasalanan?

No diman tayo mas nakakabat si Jehova, diman tayo mas natalosan ya agbalot manirap iray inaatey. Kabkabusol to so ideyan pairapen ya maong so totoo. Basaen so Deuteronomio 32:4 tan 1 Juan 4:8, insan ebatan iraya:

Base ed sarayan bersikulo, kasin say Dios ya balibali iray kualidad to et payagan ton manirap iray inaatey?
Parad sika, makaligliwa kasi so naamtaan mon katuaan tungkol ed patey? Akin ey?

IBABAGA NA ARUM: “Antakot koy ompatey ta ompan napairap ak.”