LEKSION 19
Kasin Tuan Kristiano Iray Tasi nen Jehova?
Manisia kami ran Tasi nen Jehova ya tuan Kristiano kami. Akin ey? Amtaen no iner nanlapu odino akabase iray papanisiaan mi, say nikadkaduman tawag ed sikami, tan say panangaro mi ed sakey tan sakey.
1. Iner nanlapu iray papanisiaan na Saray Tasi nen Jehova?
Imbaga nen Jesus: “Say salita [na Dios] et katuaan.” (Juan 17:17) Singa si Jesus, naynay ya manlalapu ed Salita na Dios so papanisiaan na Saray Tasi nen Jehova. Singa bilang, onia so ginawa mi. Nen manga 1870, walay sakey a grupo na estudyante na Biblia ya inggapo dan inaral ya maong so Biblia. Ditan so angibasiyan da na papanisiaan da, anggano duman maong ed ibabangat tan papanisiaan na simbaan. Insan da imbangat ed arum iray katuaan ya wala ed Biblia.a
2. Akin et Tasi nen Jehova so tawag ed sikami?
Tinawag nen Jehova iray mandadayew ed sikato ya tasi to lapud ibabaga day katuaan tungkol ed sikato. (Hebreo 11:4–12:1) Singa bilang, oniay imbaga na Dios ed saray totoo to nensaman: “Sikayo ray tasik.” (Basaen so Isaias 43:10.) Si Jesus et tinawag ya “say Matoor a Tasi.” (Apocalipsis 1:5) Kanian nen 1931, say tawag la ed sikami et Tasi nen Jehova. Malikeliket kami ya natawag ed satan ya ngaran.
3. Panon ya aaligen na Saray Tasi nen Jehova so panangaro nen Jesus?
Inar-aron maong nen Jesus iray disipulo to tan inturing to ran kapamilya. (Basaen so Marcos 3:35.) Ontan met, walay pankakasakey na Saray Tasi nen Jehova ed interon mundo, tan singa ra sankakapamilya. Kanian say tawag mi ed sakey tan sakey et brother tan sister. (Filemon 1, 2) Uunoren mi met iyan ganggan: “Aro yoy amin ya agagi yo.” (1 Pedro 2:17) Ipapanengneng na Saray Tasi nen Jehova so onian panangaro ed nanduruman paraan. Singa bilang, tutulongan da ray mankaukolan ya kapananisiaan da ed interon mundo.
DAKEL NI NAARALAN MO
Amtaen ni so history na Saray Tasi nen Jehova tan nengnengen ni ray arum ya ebidensya ya tuan Kristiano kami.
Manlalapu ed Biblia so papanisiaan na saray tuan Kristiano tan ipapaamta da itan ed arum
4. Manlalapu ed Biblia iray papanisiaan mi
Imbaga nen Jehova ya onsabi panaon, say katuaan ya wala ed Biblia et mas natalosan. Basaen so Daniel 12:4 tan paimanod leksab, insan ebatan iya:
Antoy “ondakel” ed saray totoo na Dios no uusisaen o aaralen da so Biblia?
Amtaen no panon ya inaral na sakey a grupo na saray estudyante na Biblia, kaiba lay Charles Russell, so Salita na Dios. I-play so VIDEO, insan ebatan iya.
Diad video, panon ya inaral nen Charles Russell so Biblia, kaiba iray kapara ton Estudyante na Biblia?
Kasin antam?
Wala ray pankanawnawa ya iya-adjust mi arum ed saray papanisiaan mi. Akin ey? Singa say agew, ya no binmutay et kalkalnan onliliwawa lan onliliwawa so kaliberliber, kalkalna met ya ipapaamta na Dios so pakatalos ed Salita to. (Basaen so Proverbio 4:18.) Agmanguuman so Biblia. Balet no lalo mi itan ya natatalosan, iya-adjust mi iray papanisiaan mi.
5. Gagawaen mi no antoy labay ya ibaga na tawag ed sikami
Akin et Tasi nen Jehova so tawag ed sikami? I-play so VIDEO, insan ebatan iya.
Akin et dugaruga so tawag ed sikami ya Tasi nen Jehova?
Akin et nampili si Jehova na totoo ya magmaliw ya tasi to? Lapud ipaamta da ya sikato so tuan Dios, ta dakdakel natan so mangibabaga na katilaan tungkol ed sikato. Niay duara ed saratan ya katilaan.
Ibabangat na arum ya relihyon ed saray kamembro da ya labay kuno na Dios ya mangusar iray imahen ed panagdayew da. Pero, basaen so Levitico 26:1, insan ebatan iraya:
Antoy tua? Antoy nalikna nen Jehova no mangusar tayo na idolo ed pandayew?
Ibabangat na arum ya lider na relihyon ya si Jesus so Dios. Pero, basaen so Juan 20:17, insan ebatan iraya:
Antoy tua? Kasin say Dios tan si Jesus et saksakey ya persona?
Antoy nibagam nen naamtaan mon imbaki nen Jehova iray Tasi to pian ipulong so katuaan tungkol ed sikato tan say Anak to?
6. Manaaroan kami
Ibabaga na Biblia ya saray Kristiano et singa nanduruman parte na laman na too. Basaen so 1 Corinto 12:25, 26, insan ebatan iraya:
Antoy dapat ya gawaen na saray tuan Kristiano no maniirap iray kapara dan Kristiano?
Antoy apansin mo ed panaaroan na Saray Tasi nen Jehova?
No wala ray Tasi nen Jehova ya maniirap ed sakey ya bansa, ontulong ya tampol iray kapara dan Tasi ed nanduruman bansa. Pian nanengneng so sakey ya alimbawa, i-play so VIDEO. Insan ebatan iya.
Akin et ebidensya na panangaro iray relief ya iiter na Saray Tasi nen Jehova?
Ipapanengneng na saray tuan Kristiano so panangaro ed saray mankaukolan
IBABAGA NA ARUM: “Balon relihyon iratay Tasi nen Jehova.”
Kapigan ni tinawag nen Jehova iray mandadayew ed sikato ya tasi?
SUMARYO
Saray Tasi nen Jehova so tuan Kristiano. Saksakey kamin pamilya ed interon mundo, manlalapud Biblia iray papanisiaan mi, tan ipapaamta mi katuaan tungkol ed si Jehova.
Rebyu
Akin et Tasi nen Jehova so tawag ed sikami?
Panon min ituturing so sakey tan sakey?
Parad sika, tuan Kristiano kasi iray Tasi nen Jehova?
DISKOBRIEN
Nengnengen so sakey ya alimbawa no panon ya impaamta na Saray Tasi nen Jehova iray palson bangat.
Amtaen so ebat ed saray tepet mo tungkol ed Saray Tasi nen Jehova.
“Mabetbet ya Itetepet Nipaakar ed Saray Tasi nen Jehova” (page ed website)
Sasakitan nen Stephen iray arum ya lahi ta kabkabusol to ra. Amtaen no antoy anengneng to ed Saray Tasi nen Jehova kanian anguman.
“Lalon Onuuges so Bilay Ko” (Say Panag-bantayan-E, Hulyo 1, 2015)
a Manlapu nen 1879, ipa-publish la na saray totoo nen Jehova so magasin ya The Watchtower pian ipaliwawa so ibabaga na Biblia.