Manaaroan Kayon Maong

1. Antoy ingganggan nen Jesus ed saray disipulo to? (Nengnengen so litrato ed apis.)

DIAD samay labi antis ya ompatey si Jesus, oniay ingganggan to ed saray disipulo to: “No panon so impangarok ed sikayo, ontan met so panaaroan yo.” Inyarum to: “Diad saya et naamtaan na amin a sikayo iray disipulok​—no manaaroan kayo.”​—Juan 13:34, 35.

2. Akin et importante ya manaaroan itayo?

² Imbaga nen Jesus ya naamtaan na amin no siopa ray tuan disipulo to no say panangaro da ed sakey tan sakey et singa met ed impangaro tod sikara. Satan ya imbaga to nen inmunan siglo et onaplika ni anggad natan. Kanian anggano aliwan mainomay, importante ya manaaroan itayo!

3. Antoy pantongtongan tayo ed sayan artikulo?

³ Aliwa tayon perpekto kanian naiirapan tayon aroen so sakey tan sakey. Anggaman ontan, nepeg tayon gawaen so anggaay nayarian tayo ya aligen si Kristo. Diad sayan artikulo, pantongtongan tayo no akin ya say aro et importante pian makapikareenan, agmanlalabi, tan magmaliw tayon maparawes. Legan mon aaralen iyan artikulo, itepet mod sarilim: ‘Antoy naaralan kod saray agagi ya inar-aro dan maong so arum anggano mairap itan ya gawaen?’

MIKAREENAN

4. Base ed Mateo 5:23, 24, akin et nepeg itayon mikareenan ed agi ya walay babarongan tod sikatayo?

⁴ Imbangat nen Jesus ya importante ya mikareenan tayo ed agi ya walay babarongan tod sikatayo. (Basaen so Mateo 5:23, 24.) Imbaga to ya importantin pansiansiaen tayon maabig so relasyon tayo ed arum pian napaliket tayo so Dios. Naliliketan si Jehova no pansagpotan tayoy mikareenan ed saray agagi. Agto awaten so panagdayew tayo no agtayo ekalen so pansyodot ed puso tayo tan agtayo pansagpotan so mikareenan.​—1 Juan 4:20.

5. Akin et nairapan ya mikareenan si Mark?

⁵ Ompan naiirapan tayon mikareenan. Antoy rason? Imanoen so agawad si Mark.b Asakitan si Mark nen sikatoy binalaw tan dineralan na sakey a brother ya kakongregasyon to. Antoy reaksion to? “Agko akontrol so sarilik kanian amasnok ak,” so kuan to. Pagbabawian lanlamang nen Mark so ginawa to kanian kinmerew na perdona ed samay brother tan sinali toy mikareenan. Balet aglabay na samay brother so mikareenan. Inisip nen Mark, ‘Akin et mansagpot ak nin mikareenan anta agto labay?’ Balet sikatoy pinaseseg na manangasikaso na sirkito ya ag-onsusuko. Antoy ginawa nen Mark?

6. (a) Anto ray ginawa nen Mark pian makapikareenan? (b) Panon ya iyaaplika nen Mark so Colosas 3:13, 14?

⁶ Inusisa nen Mark so sarili to, tan inawat to ya sikatoy aliwan mapaabeba tan iisipen to ya sikaton lanang so duga. Atalosan to ya kaukolan ton umanen so ugali to. (Col. 3:8, 9, 12) Kanian inasinggeran to imay brother tan mapaabeban kinmerew lamet na perdona. Aminpiga to met ya sinulatan pian ipaamtad sikato ya talagan pagbabawian to may agawa tan labay ton ompawil so pankaaro da. Inikdan to ni ingen na saray simplin regalo ya amta ton nagustoan to. Makapaermen ta ombabarong nin siansia imay brother. Balet tuloytuloy ya uunoren nen Mark imay ganggan nen Jesus ya aroen tan perdonaen toy agi to. (Basaen so Colosas 3:13, 14.) Anggano aglabay na arum so mikareenan, say tuan panangaro so mamakiwas ed sikatayo ya tuloytuloy iran perdonaen tan ipikasi tayon makapikareenan tayo lanlamang ed sikara.​—Mat. 18:21, 22; Gal. 6:9.

7. (a) Antoy impaseseg nen Jesus ya gawaen tayo? (b) Anton mairap ya situasyon so naeksperiensya na sakey a sister?

⁷ Papasesegen itayo nen Jesus ya no antoy labay tayon pantrato na arum ed sikatayo, onman met so pantrato tayo ed sikara. Imbaga to met ya aliwan saramay mangaaro labat ed sikatayo so aroen tayo. (Luc. 6:31-33) Anggano matalag met ya nagawa, panon to no walay kakongregasyon mo ya iiwasan to ka tan agto ka ibabano? Ontan so naeksperiensya nen Lara. Imbaga to: “Agak papansinen na sakey a sister, tan agko amta no akin. Nai-stress ak tan agak la maliket ya miaral.” Nen primero, inisip nen Lara: ‘Anggapo met so ginawak ya aliwa. Sakey ni, ibabaga met na arum ya kakongregasyon mi ya duman talagay ugali to.’

8. Antoy ginawa nen Lara pian makapikareenan, tan antoy naaralan tayo ed eksperiensya to?

⁸ Nanggaway paraan si Lara pian makapikareenan. Nampikasi ed si Jehova tan inasinggeran to may sister. Nantongtongan dan dua so problema, nanlakapan ira, tan namperdonaan ira. Singa ayos lan amin. Balet imbaga nen Lara: “Ag-abayag, pinmawil may datin panagtrato tod siak. Kinmapuy ak.” Nen unona, inisip nen Lara ya agto la nalikna so liket no agmanguman imay sister. Balet atalosan lanlamang nen Lara ya say sankaabigan ya nagawaan to et itultuloy ton aroen imay sister tan ‘mabulos ton perdonaen.’ (Efe. 4:32–5:2) Anonotan to ya say tuan panangaro et “agmanbibilang na impakasakitan. Itetepel toy amin a bengatla, manisia ed amin a bengatla, maniilalo ed amin a bengatla, mansusungdo ed amin a bengatla.” (1 Cor. 13:5, 7) Kanian dinmeen lay nonot nen Lara. Asabi panaon, maong lay panagtrato to may sister ed si Lara. No pansagpotan moy mikareenan ed saray agagi tan itultuloy mo ran aroen, makaseguro kan “say Dios na aro tan kareenan et niwalad [sika].”​—2 Cor. 13:11.

AGMANLALABI

9. Base ed Gawa 10:34, 35, akin et nepeg ya anggapoy lalabien tayo?

⁹ Si Jehova et anggapoy lalabien odino papaboran to. (Basaen so Gawa 10:34, 35.) No anggapoy lalabien tayo, papaneknekan tayo ya ananak itayo na Dios. Uunoren tayo so ganggan ya aroen iray kapara tayon too a singa panangaro tayod sarili tayo, tan ontutulong tayo pian mansiansia so kareenan ed sikatayo ran sanaagi.​—Roma 12:9, 10; Sant. 2:8, 9.

10-11. Panon ya alabanan na sakey a sister so panaglabi?

¹⁰ Say arum ya agagi et naiirapan ya ekalen so panaglabi da. Singa bilang, imanoen so naeksperiensya na sakey a sister ya si Ruth. Nen tinedyer si Ruth, aliwliway impantrato ed sikato na sakey ya nanlapud arum a bansa. Antoy epekto na satan ed sikato? Inamin nen Ruth: “Amin ed satan ya bansa et kabusol ko. Inisip ko ya pareparehoy ugali na saray totoo ditan, anggan saray agagi.” Panon ya alabanan nen Ruth itan ya negatibon liknaan?

¹¹ Atalosan nen Ruth ya kaukolan ton labanan so ontan ya liknaan. Binasa to ray eksperiensya tan report ed satan ya bansa ya walad Yearbook. Imbaga to: “Ginawak so anggaay nayarian ko pian nauman so pakanengneng ko ed saray totoo ed satan a bansa. Naamtaan ko ya saray agagi ditan et maseseg ed panlilingkor dad si Jehova. Kabiangan met ira na internasyonal ya impanaagi tayo.” Atalosan met nen Ruth ya wala ni kaukolan ton gawaen. Imbaga to: “Kada no walay nakabat kon agagi ya nanlapud satan a bansa, mikakaaro ak ed sikara. Kakatongtongen ko ra tan kakabaten ko ran maong.” Antoy resulta? Imbaga nen Ruth: “Nakal ya siansia so negatibon panmoriak.”

12. Antoy kakapuyan nen Sarah?

¹² Wala ray agagi ya agda nalilikas ya wala la manayay lalabien da. Singa bilang, si Sarah et inisip to ya anggapoy lalabien to ta agto met huhusgaan iray totoo base ed lahi, kayamanan, odino pribilehyo da ed organisasyon. Balet inamin to: “Alikas ko ya walay lalabien ko.” Akin et nibaga to itan? Sikatoy nanlapud de-aral ya pamilya kanian mas labay ton nakaiba iray kapara ton de-aral. Aminsan et onia ni ingey imbaga tod kaaro to: “Saray de-aral labat ya agagi so labay kon kaiba. Iiwasan ko ray aliwan de-aral.” Talagan kaukolan ya umanen nen Sarah so pakanengneng tod arum. Antoy nepeg ton gawaen?

13. Antoy naaralan tayo ed impanguman na ugali nen Sarah?

¹³ Walay manangasikaso na sirkito ya tinmulong ed si Sarah pian nauman toy ugali to. Imbaga nen Sarah: “Kinomendaan day matoor ya panlilingkor ko, saray makapaseseg ya komentok, tan say kakabatan kod Biblia. Insan da impaliwawa ed siak ya legan ya ondarakel so kakabatan tayo, nepeg ya aralen tayo met ya ipanengneng iray Kristianon kualidad ya singa say inkamapaabeba tan panangasi.” Inyaplika nen Sarah iman ya imbaga na manangasikaso na sirkito. Inkuan to: “Atalosan ko ya say mas importante et say pangipanengneng na kaabigan tan panangaro.” Kanian anguman so pangipapasen tod saray agagi. Imbaga to: “Say nenengnengen ko la natan et saray ugali da ya mabmabli ed si Jehova.” Sikatayo ey? Agtayo nepeg ya isipen ya mas atagey tayo nen say arum lapud edukasyon tayo. No talagan ‘inaro tayo so amin ya agagi,’ nepeg ya anggapoy lalabien tayo.​—1 Ped. 2:17.

MAGMALIW YA MAPARAWES

14. Base ed Hebreo 13:16, antoy nalilikna nen Jehova no maparawes itayo?

¹⁴ Naliliketan si Jehova no maparawes itayo. (Basaen so Hebreo 13:16.) Ipapasen to itan ya kabiangan na panagdayew tayo, lalo la no tutulongan tayo ray mankaukolan. (Sant. 1:27; 2:14-17) Kanian papasesegen itayo na Biblia ya ‘iyugali tayoy mamarawes.’ (Roma 12:13) No paparawesen tayo ray agagi, ipapalikna tayod sikara ya maliket tayon nakaiba ira, iyaansakit tayo ra, tan labalabay tayo ran nakaaro. Naliliketan si Jehova no pamerindaen tayo ray agagi, mangiparaan tayoy nainum o naakan da, ipanaon tayoy miistoryaan ed sikara, tan ipalikna tayon inar-aro tayo ra. (1 Ped. 4:8-10) Balet ompan no maminsan et agtayo labay so mamarawes lapud nanduruman rason.

15-16. (a) Akin et manaalangan so arum ya mamarawes? (b) Antoy ginawa nen Edit pian magmaliw ya maparawes?

¹⁵ Ompan manaalangan tayon mamarawes lapud sirkumstansya tayo. Imanoen so alimbawa na abalo lan sister ya si Edit. Antis ya nagmaliw a Tasi, mas labay toy manbukbukor. Tan inisip to ya mas maong no say arum la so mamarawes.

¹⁶ Nen Tasi lay Edit, inuman toy panagnonot to. Nanggaway paraan pian magmaliw ya maparawes. Inkuan to: “Nen ipapaalagey so balon Kingdom Hall mi, imbagad siak na sakey ya elder ya walay onsabin sanasawa ya ontulong ed proyekto, tan tinepetan to ak no sarag ko ran patuloyen ya duay simba. Anonotan ko may impamendisyon nen Jehova ed samay balo ya taga Zarepat.” (1 Ara. 17:12-16) Inmabuloy si Edit ya manpundo ra ed abung to. Kasin sikatoy abendisyonan? Imbaga to: “Amay duaran simba et asabi toy duaran bulan. Tan nagmaliw kamin malet ya sankakaaro.” Awalaan met na maapit ya kakaaro diad kongregasyon si Edit. Payunir la natan tan labalabay ton itagar ya manmerinda ed abung to iray nakakaiba tod ministeryo. Imbaga to: “Balibali liknaan ko no mangiiter ak! Tan diad tua et dakel so nanaawat kon bendisyon.”​—Heb. 13:1, 2.

17. Antoy naisip nen Luke ed pamaparawes da?

¹⁷ Nayarin maparawes tayo la, balet wala ni kasi nagawaan tayo pian magmaliw tayon mas maparawes? Singa bilang, si Luke tan say asawa to et talagan maparawes. Niyugali da lan imbitaan ed abung da iray atateng, kakanayon, tan kakaaro da, pati say manangasikaso na sirkito tan say asawa to. Balet imbaga nen Luke: “Naisip mi ya say iimbitaan mi labat et saray ka-close mi.” Antoy ginawa nen Luke tan say asawa to pian magmaliw iran mas maparawes?

18. Antoy ginawa nen Luke tan say asawa to pian magmaliw iran mas maparawes?

¹⁸ Naaralan nen Luke tan say asawa to so tuan kabaliksan na inkamaparawes nen dinalepdep da iyan imbaga nen Jesus: “No saramay mangaaro labat ed sikayo so aaroen yo, antoy tumang yo?” (Mat. 5:45-47) Atalosan da ya kaukolan dan aligen si Jehova ya maiter ed amin. Kanian nandesisyon ira ya imbitaan iray agagin agda nin balot naimbitaan. Imbaga nen Luke: “Malikeliket kamin amin no saniiba kami. Kada sakey et napapaseseg tan napapabiskeg.”

19. Panon tayon napaneknekan ya disipulo itayo nen Jesus, tan antoy determinadom ya gawaen?

¹⁹ Malinew lad sikatayo no panon ya makatulong so tuan panangaro pian napakiwas itayon mikareenan, agmanlalabi, tan magmaliw ya maparawes. Nepeg tayon labanan iray negatibon liknaan tan aroen tayon maong iray agagi manlapud puso. No gawaen tayo itan, magmaliw tayon maliket tan papaneknekan tayo ya talagan disipulo itayo nen Jesus.​—Juan 13:17, 35.