Apigeren tan Pabiskeg Mo Lamet so Relasyon Mod si Jehova

KADA taon, dakel ya pinabpablin karnero nen Jehova so ompapawil ed kongregasyon. Imadyin mo pay ‘liket ed tawen’ kada no walay magbabawin nankasalanan ya ompawil! (Luc. 15:7, 10) No sakey ka ed saray akapawil, tandaan mo ya malikeliket si Jesus, saray anghel, tan nagkalalo lay Aman Jehova ta parte ka lamet na kongregasyon. Pero, seguradon wala ray subok legan mon aapigeren tan papabiskegen so relasyon mod si Jehova. Anto iratan, tan antoy makatulong ed sika?

ANTO RAY SUBOK?

Dakel ed saray akapawil ed kongregasyon et lalabanan da nin siansia iray negatibon nalilikna ra. Seguro naliliknam met imay alikna nen Arin David. Anggano pinerdona la nen Aman Jehova iray kasalanan to, sankanonot to nin siansia so karakel na lingo ya agawaan to. (Sal. 40:12; 65:3) Ompan say sakey ya pinmawil lad si Jehova et siansia nin nababaingan odino nakokonsiensia anggano linmabas lay dakel ya taon. Oniay imbaga nen Isabellea ya masulok ya 20 taon ya adispelo: “Anggano akapawil ak la, mairap kon awaten ya pinerdona ak la nen Jehova.” No paulyanan mon onkapuy so liknaan mo, onkapuy met so espiritualidad mo. (Pro. 24:10) Kanian labanan mo itan ya liknaan.

Iisipen na arum ya mairap da lan napapawil imay datin relasyon da ed si Jehova. Oniay imbaga nen Antoine nen sikatoy akapawil la: “Say pakaliknak, singa alingwanan ko lan amin so gagawaen na sakey ya Tasi.” No ontan so nalilikna na sakey, ompan agla mamasya ed panlilingkor to ed si Jehova anggano akapawil la.

Nikompara itan ed sakey ya too ya aderal so abung to lapud makmaksil ya bagyo. No isipen toy karakel na kaukolan ton apigeren pian nipaalagey lamet so abung to, ompan agla laingen makagapo. Nayarin ontan met so situasyon mo no aderal so relasyon mod si Jehova lapud akagawa kay ambelat ya kasalanan. Ompan isipen mo ya amayamay so kaukolan mon gawaen pian naapiger tan napabiskeg mo lamet so relasyon mod sikato. Pero tandaan mo ya agmo itan gawaen ya bukor.

Oniay imbitasyon nen Jehova: “Dago kayo natan, tan pantongtongan tayo ray kaukolan ya ipetek.” (Isa. 1:18) Diad tua, balbaleg lay agawaan mo pian ‘nipetek’ so bilay mo. Inar-aro ka nen Jehova lapud nansagpotan mo itan. Isip mo pa: Lapud impawil mo, walay niyebat nen Aman Jehova ed pangakantiaw nen Satanas!—Pro. 27:11.

Nen pinmawil kad si Jehova, impanengneng mo ya labay mo lamet so onapit ed sikato, tan ipapaseguro to ya sikatoy onapit met ed sika. (Sant. 4:8) Pero tandaan mo ya aliwan lapud akapawil ka lad kongregasyon et anggapo lay kaukolan mon gawaen. Dapat itultuloy mon pabiskegen so panangarom ed Amam tan Kaarom, si Jehova. Panon mon gawaen itan?

SARAY SARAG MON GAWAEN

Dapat walay goal mo pian ombiskeg lamet so espiritualidad mo. Tua, ompan agmet aderal so pundasyon na pananisiam ta agmo alingwanan iray katuaan tungkol ed si Jehova tan saray sipan to. Pero pian nipaalagey mo lamet so pinagkalusek na espiritual ya abung mo, dapat regular kan manpulong, miaral, tan miulop ed saray agagi. Nia ray sarag mon gawaen.

Lanang kan mitongtong ed si Jehova. Ompan no maminsan et ngalngali agmo labay so manpikasi ta nakokonsiensia ka. Natatalosan itan nen Aman Jehova. (Roma 8:26) Pero labay to ya ‘seetan mo so manpikasi.’ Ibagam ed si Jehova ya labay mon gawaen so anggaay nayarian mo pian ompawil so maapit ya relasyon mod sikato. (Roma 12:12) Oniay nanonotan nen Andrej: “Talagan nakokonsiensia tan nababaingan ak ya maong. Pero kayarik ya manpikasi, onlelemew so liknaan ko tan ondedeen met lay nonot ko.” No agmo amta no antoy ipikasim, makatulong no basaen mo imay pikakasi nen Arin David ya akarekord ed Salmo 51 tan 65.

Agmo papaulyanan so panag-aral moy Biblia. No lanang mon basaen tan aralen so Biblia, ombiskeg so espiritualidad mo tan mas naar-arom si Jehova. (Sal. 19:7-11) Oniay inamin nen Felipe: “Say rason no akin ya kinmapuy ak ed espiritual tan apaermen koy Jehova et apaulyanan koy personal study’k. Agko labay ya nasakitan ko lamet si Aman Jehova, kanian lanang ak lan manpe-personal study natan.” Maabig no ontan met so gawaen mo. Sarag mon tepetan iray maespiritual ya kaarom no anto ran topic so balibalin i-personal study’m.

Manggawa kay paraan pian naka-close mo lamet iray agagi. Say pakalikna na arum ya akapawil et ompan husgaan ira na saray kakongregasyon da. Oniay inamin nen Larissa: “Nababaingan ak ya maong ta amtak ya asakitan ko ray kakongregasyon ko. Abayag kon nilabanan itan ya liknaan.” Pero agmo lilingwanan ya labalabay kan tulongan na saray elder tan saray maespiritual ya agagi pian ombiskeg lamet so espiritualidad mo. (Nengnengen so kahon ya “Antoy Gawaen na Saray Elder?”) Malikeliket ira ta akapawil ka la tan labay dan naliknam lamet so liket ed panaglingkor!—Pro. 17:17.

Antoy makatulong pian naka-close mo lamet iray agagi? Miaral tan manpulong kan lanang pian nakaibam ira. Baleg so nitulong to ’tan. Oniay imbaga nen Felix: “Aliknak ya inar-aro ak na saray kakongregasyon ko. Tatalaranan da manayay ipawil ko! Tinulongan da ak pian agak nailang ed kongregasyon. Impalikna dad siak ya talagan pinerdona ak la nen Jehova, tan inalalayan da ak pian makabangon ak lamet.”—Nengnengen so kahon ya “Antoy Gawaen Mo?”

AGKA ONSUSUKO!

Ilaloan mo ya dakel nin “bagyo” so padalanen nen Satanas ed bilay mo ta labay ton nabuyak lamet so relasyon mod si Jehova. (Luc. 4:13) Kanian dapat akaparaan ka tan pabiskeg mo la natan so espiritualidad mo.

Oniay imbaga nen Jehova tungkol ed saray karnero to: “Anapen ko iramay nababalang, tiponen ko iramay niyarawi, bedberan ko iramay apiley, tan pabiskegen ko iramay makapuy.” (Eze. 34:16) Dakdakel lay atulongan nen Jehova ya makabangon lamet. Kanian seguradon tulongan to ka met pian tuloytuloy mon napabiskeg so relasyon mod sikato.