Siopa may Mayaman a Too tan si Lazaro?

Say ebat na Biblia

Samay mayaman a too tan si Lazaro et karakter ed sakey ed saray ilustrasyon nen Jesus. (Lucas 16:19-31) Diad sayan istorya, irerepresenta na sarayan lalaki so duaran grupo na totoo: (1) saray mapasirayew ya Judion lider na relihyon diad panaon nen Jesus tan (2) saray mapaabeba balet masimoon ya totoon mangaawat ed mensahen ipupulong nen Jesus.

Diad sayan artikulo

• Antoy imbaga nen Jesus nipaakar ed sakey ya mayaman a too tan si Lazaro?

• Tua kasin agawa iyan istorya?

• Kasin susuportaan na sayan istorya so doktrina nipaakar ed impierno?

• Antoy labay ya ibaga na samay istorya nipaakar ed sakey ya mayaman a too tan si Lazaro?

Antoy imbaga nen Jesus nipaakar ed sakey ya mayaman a too tan si Lazaro?

Diad Lucas kapitulo 16, indeskribe nen Jesus so duaran lalaki ya anguman ya maong so kipapasen da.

Nia so sumaryo ed sayan istorya nen Jesus: Walay sakey ya toon mayamyaman. Naynay dan aawiten diad puerta to so sakey a mipapayabol a manngaray Lazaro, tan pipirawaten toy mangan ed saray napepelag ed lamisaan na samay mayaman a too. Diad inlabas na panaon et inatey si Lazaro tan inawit na saray anghel diad abay nen Abraham. Insan inatey met tan imponpon so mayaman a too. Diad sayan istorya, adeskribe ya makalikna ni iyan duaran laki ya inatey la. Dudusaen so inatey lan mayaman a too ed mandarlang ya apoy kanian akikasi ed si Abraham ya ibaki toy Lazaro ya idelnet tod danum so nguro na gamet to pian pabetelan toy dila to. Balet agginawa nen Abraham so kerew na mayaman a too tan imbaga to ya sarayan lalaki et anguman lay situasyon da tan walay maawang a kaaralman ed baetan da kanian ag-ira nayarin onla ed kawalaan na balang sakey.

Tua kasin agawa iyan istorya?

Andi. Inistorya nen Jesus iyan parabolo pian ibangat so sakey a leksion. Diad tua, bibidbiren na saray iskolar ya parabolo labat iya. Singa bilang, nabasa ed subheading na 1912 ya edisyon na Luther’s Bible ya sakey iyan parabolo. Ontan met, nabasa ed sakey ya paimanod leksab na Catholic Jerusalem Bible ya “sakey iyan inistoryan parabolo ya anggapoy koneksion tod siopaman a too ya nambilay kapiganman.”

Ibabangat kasi nen Jesus ya walay bilay kayari ipatey? Labay to kasin ibaga ya wala ray totoon maniirap ed impierno no ompatey ira tan wala ray onlad tawen ya singa si Abraham tan Lazaro? Dakel so pakanengnengan ya aliwan ontan so labay ya ibaga nen Jesus.

Singa bilang:

• No dudusaen ed literal ya pasen na mandarlang ya apoy imay mayaman a too, agkasi man-evaporate so danum ya walad nguro na gamet nen Lazaro?

• Anggano ag-itan man-evaporate, wala kasi nagawaan na anggan sakey labat ya tedter na danum pian nainawaan imay mayaman a too diad paniirap to ed literal ya apoy?

• Panon ya mabilay si Abraham ed tawen anta malinlinew ya imbaga nen Jesus ya diad samay panaon ya inistorya to so parabolo, anggapo ni sinmegep ed tawen?—Juan 3:13.

Kasin susuportaan na sayan istorya so doktrina nipaakar ed impierno?

Andi. Anggano ag-iya tuan agawa, papanisiaan na arum ya isisimbolo na saya so ideyan saray maong a totoo et onlad tawen tan saray mauges et dusaen ed impierno.a

Duga kasin panisiaan itan? Andi.

Say bangat ya impierno et kontra ed bangat na Biblia nipaakar ed kipapasen na saray inaatey. Singa bilang, ag-ibabaga na Biblia ya saray maong a totoo et onlad tawen no ompatey ira tan saray mauges et nadusa ed impierno. Oniay malinew ya ibabaga na Biblia: “Saray mabilay et amta ra ya ompatey ira, balet saray inatey et anggapon balot so amta ra.”—Eclesiastes 9:5.

Antoy labay ya ibaga na samay istorya nipaakar ed sakey ya mayaman a too tan si Lazaro?

Ipapanengneng na sayan istorya ya walay duaran grupo na totoo ya asingger lan manguman ya maong so kipapasen da.

Mapatpatnag ya irerepresenta na mayaman a too iray Judion lider na relihyon ya “maaro ed kuarta.” (Lucas 16:14) Dinengel day Jesus legan ya mansasalita, balet kinontra day mensahe to. Abebbeba so pakanengneng na sarayan lider na relihyon ed saray ordinaryon totoo.—Juan 7:49.

Irerepresenta nen Lazaro iray ordinaryon totoo ya angawat ed mensahe nen Jesus, tan impulisay ira na saray Judion lider na relihyon.

Baleg so angumanan na kipapasen na sayan duaran grupo.

• Say amta na saray Judion lider na relihyon et walad sikara so pabor na Dios. Balet inatey ira, ya singa panangibaga, nen impulisay ira na Dios tan say panagdayew da lapud agda inawat so mensahe nen Jesus. Tan pinairap ira na mensahe ya impulong nen Jesus tan saray papatumbok to.—Mateo 23:29, 30; Gawa 5:29-33.

• Saray ordinaryon totoo—ya abayag lan pinaulyanan na saray lider na relihyon da—et napapaboran la. Dakel so angawat ed mensahe na Dios ya impulong nen Jesus tan agunggonaan ira ed satan. Awalaan ira na pankanawnawan napaboran na Dios diad andi-anggaan.—Juan 17:3.