En Busca di Pas Mental

ALBERT tawata un homber felismente casa y tawatin dos yiu precioso. Pero el a sinti cu su bida tawata falta algo. Tempo cu e tawatin cu lucha pa haya trabou, el a drenta politica y a cuminsa sigui socialismo. Asta el a bira un miembro activo di e partido comunista.

Pero masha lihe Albert a keda desilusiona cu comunismo. El a bandona politica y a dedica su mes completamente na su famia. Awor su meta den bida tawata pa su famia ta felis. No obstante, ainda Albert tawata sinti un bashi cu tawata molesti’e; ainda e no a logra haya un berdadero pas mental.

E experencia di Albert aki sigur no ta algo unico. Pa por haya berdadero proposito den bida, miyones di hende a purba cu varios ideologia, filosofia y religion. Den e mundo Occidental, e movemento hippie di e decada di 1960 tawata un rebelion contra balornan moral y social tradicional. Hobennan en particular a busca felicidad y proposito den bida den droga cu ta altera mente y den filosofia di e asina yama guru- y lidernan spiritual di e movemento aki. Ma e movemento hippie no a trece berdadero felicidad. Al contrario, el a yuda produci hobennan inmoral y adicto na droga, locual a acelera e degeneracion moral di sosiedad.

Pa siglonan, hopi hende a busca felicidad den rikesa, poder of educacion. Pero finalmente tur e empeñonan aki ta hiba na decepcion. Hesus a bisa cu “bida di hende no ta consisti di e abundancia di e cosnan cu e tin.” (Lucas 12:15) Mas bien, e coremento loco loco tras di rikesa por lo general ta trece infelicidad. Bijbel ta bisa: “Esnan cu kier bira rico ta cai den tentacion y den trampa y den hopi deseonan loco y dañino, cuanan ta hundi hende den ruina y destruccion. Pasobra amor pa placa ta raiz di tur sorto di maldad, y algun hende, door di desea esaki ... a traspasa nan mes cu hopi dolor.”—1 Timoteo 6:9, 10.

Awor con un persona por haya pas mental y proposito den bida? Acaso esei ta un asunto di experimento, manera tira un flecha den scuridad y spera cu e ta alcansa un blanco? Ta bon cu no ta asina. Manera nos lo mira den e siguiente articulo, e solucion ta sinta den satisface un necesidad masha importante y cu hende so tin.

[Plachi na pagina 3]

Coremento tras di rikesa, poder of educacion por yuda bo haya pas mental?