“Sigui Pidi, y Boso Lo Ricibi”

“Señor, siña nos haci oracion.” (Lucas 11:1) Esaki ta loke un discipel a pidi Hesus. Como parti di su contesta, Hesus a conta dos ilustracion cu ta siña nos con pa haci oracion pa Dios scucha nos. Si bo a yega di puntra bo mes si Dios ta scucha bo oracionnan, lo bo ta interesa pa sa kico Hesus a contesta su discipel.—Lesa Lucas 11:5-13.

E prome ilustracion ta enfoca principalmente riba e persona cu ta haci oracion. (Lucas 11:5-8) E relato ta papia di un homber cu ta haya un bishita anochi laat y cu no tin nada pa ofrece su bishitante. Pa e anfitrion, e situacion aki ta algo urgente. Maske tabata laat caba, e ta bay na cas di un amigo pa fia un par di pan. Na prome instante, e amigo no kier a lanta pasobra su famia ta morto na soño den camber hunto cu ne. Pero e anfitrion, sin worry cu nada, ta sigui insisti te ora su amigo lanta y dun’e loke e mester.a

Kico e ilustracion aki ta siña nos tocante oracion? Loke Hesus kier bisa nos ta cu nos tin cu sigui insisti, esta, sigui pidi, busca y bati. (Lucas 11:9, 10) Acaso Hesus ta bisando aki cu ora nos ta haci oracion ta comosifuera nos ta bati na porta di un Dios cu no kier scucha nos? No. Hesus kier laga nos compronde cu, contrario na e amigo cu no tin mucho gana di yuda, Dios si ta ansioso pa contesta peticion di esnan cu ta persisti den oracion. Ora nos persisti, nos ta demostra cu nos tin fe den Dios. Ademas, nos ta mustra cu di berdad nos tin mester di loke nos ta pidi y cu nos ta sigur cu si ta Dios su boluntad, e por duna nos esey.—Marco 11:24; 1 Juan 5:14.

E di dos ilustracion ta enfoca riba Esun cu ta “scucha oracion”: Jehova. (Salmo 65:2) Prome, Hesus a puntra: “Acaso tin un tata entre boso cu si su yiu pidie un pisca, e ta dun’e un colebra en bes di un pisca? Of si e pidie tambe un webo, e ta dun’e un scorpion?” E contesta ta no; niun tata cu ta stima su yiu lo no dun’e algo cu lo hacie daño. Despues, Hesus a splica nan e ilustracion: Si un tata imperfecto ta duna “bon regalo” na su yiunan, “cuanto mas e Tata cu ta den cielo lo duna spirito santo”, e mihor regalo cu por tin, na su yiunan riba tera cu ta pidie.—Lucas 11:11-13; Mateo 7:11.

Kico e ilustracion aki ta siña nos di Jehova, Esun cu ta “scucha oracion”? Hesus ta pidi nos pa mira Jehova como un tata cu ta cla pa satisface e necesidadnan di su yiunan stima. Jehova su adoradornan por sinti nan liber pa acerc’e cu e deseonan di nan curason. Y como cu nan sa cu e kier lo mihor pa nan, nan ta cla pa acepta su contesta riba nan peticion, hasta si esey no ta loke nan a spera.b