Corda Riba e Habitantenan di Cas di Cuido
1. Dicon nos mester comparti e bon noticia cu e habitantenan di cas di cuido?
1 Hopi hende ta haya nan confronta cu e efectonan di biehes. (Ecl. 12:1-7) Algun hende di edad ta biba den cas di cuido, of cas di anciano, y pesey ta dificil pa nos haya nan pa papia cu nan. Esaki ta e caso tambe hasta den pais caminda mayornan di edad ta bay biba cerca nan yiunan of otro famia. Aunke hende di edad y tambe otro hende cu ta biba den cas di cuido sa lubida of no por cana bon, kisas ainda nan por siña tocante Jehova y yega na apreci’e y stim’e. Con nos por tuma iniciativa pa comparti e bon noticia di “e speransa feliz” cu nan?—Tito 2:13.
2. Con nos mes por compila un lista di facilidadnan di cuido?
2 Con pa Cuminsa?: Por lo general, nos mes por compila un lista di facilidadnan di cuido uzando Internet of buki di telefon. Nos por busca por ehempel bou di e categoria di “cas di cuido di anciano” of “bejaardenzorg.” E superintendente di sirbishi por tuma iniciativa y pidi publicadornan capaz bishita e facilidadnan aki. Cu bon planificacion y confianza den Jehova, nos por cuminsa un estudio di Bijbel cu un grupo di habitante interesa.—Prov. 21:5; 1 Juan 5:14, 15.
3, 4. (a) Ken nos mester acerca pa introduci un estudio den grupo? (b) Con nos por splica kico un sesion di estudio ta encera?
3 E manera cu nos lo introduci un estudio den grupo ta depende di e tipo di facilidad. Si ta trata di un facilidad grandi, ta mihor puntra e recepcionista si nos por papia cu e persona encarga cu actividad. Pero si ta trata di un cas di cuido chikito cu dos of tres trahador cu ta duna cuido, ta mihor pa traha un afspraak pa papia cu e doño mes.
4 Den cualkier un di e situacionnan ey, splica cu bo ta un boluntario y ta yuda hende cu gusta lesa y combersa tocante Bijbel. Puntra si tin habitante cu lo ta interesa pa participa tur siman den un charla asina pa mey ora. Bo por uza un variedad di publicacion, pero experencia a mustra cu Mi Buki di Relato Biblico y E homber mas importante cu hamás a biba a duna bon resultado. Ta na su luga pa mustra e persona responsabel e publicacionnan aki. Palabra cu ne e dia, ora y luga caminda por tene e sesionnan aki; por lo general nan ta pone e informacion ey riba e kalender di actividadnan. No keda sin identifica bo mes como testigo di Jehova. Splica bon cla cu no ta un sirbishi religioso bo ta bin tene, sino pa papia tocante Bijbel.
5. Ki sugerencianan practico por haci e estudio ameno y beneficioso?
5 Manera pa Dirigi e Estudio: Tur cos ta depende di e circunstancianan y ambiente di e luga unda bo ta bay tene e estudio. Pues, sea flexibel y mustra sano huicio. Hiba un cantidad di ehemplar di e publicacion cu bo ta bay uza y recoge nan bek ora bo caba. Kisas bo mester bay cu algun cu letter grandi. E habitantenan cu kier, por lesa e paragraf of relato di Bijbel y despues bo por haci pregunta manera ta custumber. Durante e estudio, sea cariñoso, positivo y amabel. Tambe bo por laga nan wak, cu permiso di e persona concerni, algun di nos DVD-nan cu ta aumenta fe den Bijbel of cu ta splica e lesnan cu nan por saca for di un relato biblico. Kisas bo por habri y cera cu un oracion cortico tambe. Algun publicador a yega di uza hasta e canticanan.
6. Kico bo por haci si un habitante no ta di acuerdo cu algo?
6 Kico si un habitante no ta di acuerdo cu loke a ser lesa of bisa durante e estudio? Uza sano huicio ora di contest’e. (Col. 4:6) Kisas bo por lesa un texto di Bijbel cu ta contesta su pregunta. Pero si e ora ey no ta un bon momento pa haci esey, ta mihor bis’e danki pa su comentario y cu despues di e estudio boso por papia riba esey.
7. Kico bo por haci si un habitante haci un pregunta personal of mustra hopi interes?
7 Tin biaha, un habitante por haci un pregunta personal of bisa cu e tin gana di sa mas di un topico. Un ruman muher tin custumber di bisa: “Esey ta un bon observacion. Pero como cu ta trata di un pregunta personal, despues di e estudio nos dos por papia tocante dje.” Mayoria di biaha bo por palabra un otro dia y luga pa studia cu e habitante interesa.
8. Con mester raporta estudio di Bijbel den grupo y esnan individual?
8 Ta mihor pa tur biaha e mesun publicadornan conduci e estudio. Cada un por conta e ora. E publicador cu ta dirigi e sesionnan por marca un rebishita cada biaha y tur luna e por raporta un estudio. E estudionan cu nan cuminsa apart cu e habitantenan cu por siña y capta cos bon por ser raporta manera ta custumber.
9, 10. Splica ki cualidadnan nos mester tin den e rasgo di sirbishi aki.
9 Sea Consistente: Ta bon pa nos tin un dia y ora fiho pa e estudio. Tanto e habitantenan como e personal ta spera cu nos ta tene e estudio regularmente y cu nos ta cuminsa y caba na tempo. (Mat. 5:37) Pesey, nos mester ta diligente, bon organisa y confiabel. Experencia a mustra cu ta mihor pa dos publicador bay e estudio hunto: un ta dirigi e estudio, e otro ta yuda esun cu ta dirigi. (Ecl. 4:9, 10) Den facilidadnan mas grandi, kisas mas publicador ta necesario.
10 Tambe ta importante pa nos ta amigabel y mustra interes personal. (Flp. 2:4) E prome dia di e estudio, tuma tempo pa conoce e habitantenan cu asisti. Skirbi nan nomber y purba di siña nan for di cabes pa na e siguiente estudio uza nan na un manera respetuoso. Ora nos tin pasenshi y ta mustra compasion, nan tur lo sinti nan na cas y aprecia.
11. Con publicadornan cu ta dirigi un estudio den grupo por mustra respet pa e personal y pa famia di e habitantenan?
11 Nos mester ta respetuoso y amabel tambe cu e personal y cu famia di e habitantenan. Unabes nos a palabra e ora y e manera cu e estudio lo bay, no ta sabi pa cambia esaki sin papia prome cu e persona concerni. De bes en cuando, puntr’e si e tin cualkier observacion relaciona cu e estudio. Si durante e estudio famia bin di bishita, tuma iniciativa pa cera conoci cu nan. Splica nan e meta di e estudio. Sigura nan cu di curason bo ta interesa den nan famia y pidi nan pa keda y scucha.
12, 13. Conta algun experencia cu ta demostra dicon ta bon pa duna testimonio na casnan di cuido.
12 Resultadonan: Congregacionnan cu a participa den e rasgo di sirbishi aki y superintendentenan di circuito ta bisa cu e trabou aki ta dunando bon resultado. Den un cas di anciano, un 20 habitante a asisti na e prome les, y seis di nan tabata kier nan propio estudio. Cu tempo un señora a progresa te cu el a batisa. Na un otro cas, e estudio a motiva un señora di 85 aña pa asisti na reunionnan di congregacion y e tabata kier batisa. Ora un cas di cuido a dicidi di reorganisa su actividadnan y stop e estudio den grupo di testigonan di Jehova, e habitantenan a bay reclama cerca e director. Como resultado, nan a bolbe hinca e estudio den e programa y entre 25 pa 30 habitante a asisti.
13 E amor cu nos ta mustra na e habitantenan di cas di cuido no ta impresiona solamente nan. Por ehempel, tin biaha e personal ta sinta den e estudio y te hasta ta participa. E esfuerso cu nos ta haci pa mustra interes den e habitantenan ta un bunita testimonio pa e comunidad. (1 Ped. 2:12) Un director a puntra despues cu a splic’e e meta di e estudio: “Dicon boso a tarda asina tanto? Ki dia boso ta cuminsa?” Un otro a skirbi: “Lo mi recomenda e estudio den grupo aki na tur facilidad di cuido den bisindario. Testigonan di Jehova no ta cobra pa e servicio aki; e ta parti di nan trabou na fabor di comunidad.” Un cas di cuido na Hawai a duna testigonan di Jehova un plakkaat di merito pa nan trabou boluntario; nan a describi e rumannan como un “tesoro valioso” pa e habitantenan y e personal.
14. Dicon nos kier yuda hende cu ta den cas di cuido?
14 Jehova ta invita hende di edad pa alab’e. (Sal. 148:12, 13) E invitacion aki ta conta tambe pa esnan cu ta biba den cas di cuido, of cas di anciano. Tin e facilidadnan aki den boso teritorio caminda hende di edad por beneficia di e mensahe di e bon noticia? Cu yudansa di e ancianonan di congregacion y directiva di e facilidadnan aki, nos lo por duna e habitantenan un bon testimonio. Laga nos imita Jehova y corda riba hende di edad.—Sal. 71:9, 18.