Algun Pastoor Rabia Ta Haya un Contesta Suave

Artur, un superintendente di circuito na Armenia, tabata bishitando un congregacion di Testigonan di Jehova. El a haya sa cu e congregacion ey nunca a participa den predicacion publico. Esey ta encera predica cu stand di literatura. Pa anima nan pa predica cu stand di literatura, Artur cu su casa, Anna, hunto cu un otro Testigo cu yama Jirayr, a pone un stand di literatura den un pueblo chikito. Nan a scoge un luga caminda hopi hende tabata pasa.

Algun hende cu a pasa eybanda tabata mustra interes, y nan tabata bay cu literatura. Pero, e forma nobo aki di predica mesora a hala atencion di opositor. Dos pastoor a acerca e stand di literatura. Anto, un di nan diripiente a scop e stand y bash’e abou. Despues, el a dal Artur un wanta den cara cu a pone Artur su bril cay abou. Artur, Anna, y Jirayr a purba di trankilisa e pastoornan, pero nan no a logra. E pastoornan a trapa riba e stand, y nan literatura a plama bay tur caminda. Despues cu e pastoornan a insulta e Testigonan y menasa nan, nan a bay.

Artur, Anna, y Jirayr a bay na warda di polis pa entrega keho. Nan a duna un declaracion y brevemente nan a papia tocante Bijbel cu algun polis y otro trahador cu tabata eynan. Despues, nan a hiba e tres Testigonan cerca e polis cu tabata na encargo, kende tabata kier haya mas informacion tocante loke a pasa. Pero ora el a mira cu Artur tabata un homber fuerte, e kier a sa dicon Artur no a defende su mes ora e pastoor a dal e wanta; el a stop di haci pregunta tocante e caso, y e kier a haya sa mas tocante e creencianan di testigonan di Jehova. Nan a papia cuater ora largo. E polis a keda asina impresiona cu el a bisa: “Esey si ta un bon religion. Mi tambe kier join e religion ey.”

E siguiente dia, Artur a bolbe bay predica cu e stand di literatura. Un homber cu a mira loke a pasa e dia anterior a acerc’e. E homber a elogia Artur pa e manera calmo cu el a trata cu e asunto. Despues, el a bisa Artur cu ora el a wak kico e pastoornan a haci, el a perde tur respet pa nan.

E anochi ey mes, e hefe di polis a yama Artur pa e bin e warda di polis atrobe. Pero na luga di papia di e caso, el a haci Artur mas pregunta tocante Bijbel. Dos otro polis tambe a join e combersacion.

E siguiente dia, Artur a bolbe bishita e hefe di polis pa mustr’e algun di nos videonan tocante Bijbel. E hefe di polis a yama algun otro polis pa nan tambe bin wak e videonan.

E mal comportacion di e pastoornan a pone cu hopi polis a scucha e mensahenan di Bijbel pa prome biaha, y nan a haya un bon impresion di testigonan di Jehova.