Dicon David Mester A Hui

DESPUES cu David a mata Goliat, Abner, hefe di ehersito di Israel a hib’e cerca Saul. Saul a keda masha contento cu David. El a hacie hefe di su ehersito y a hib’e pa biba den cas di rei.

Despues, ora e ehersito a regresa di un bataya contra e Filisteonan, e hende muhernan a canta: ‘Saul a mata miles, pero David a mata decenas di miles.’ Esei a haci Saul jaloers, pasobra nan a duna mas honor na David cu na Saul. Pero Jonatan, yiu di Saul, no tabata jaloers. E tabata stima David masha hopi, y David tambe tabata stima Jonatan. P’esei nan dos a priminti otro cu semper nan lo keda amigo.

David tabata un bon tocado di harpa, y Saul tabata gusta e musica cu e tabata toca. Pero un dia e envidia di Saul a pon’e haci un cos teribel. Ora David tabata toca harpa, Saul a cohe su lansa y a tir’e, bisando: ‘Mi ta bai claba David den muraya!’ Pero David a hala, y e lansa a hera. Despues Saul a hera David atrobe cu su lansa. Asina David tabata sa cu e mester a tene masha cuidou.

Bo ta corda e promesa cu Saul a haci? El a bisa cu e lo duna su yiu muher como esposa na esun cu mata Goliat. Porfin Saul a bisa David cu e por haya su yiu muher Mical, pero prome e mester a mata 100 Filisteo enemigo. Imagina bo! Loke Saul tabata spera ta cu e Filisteonan lo a mata David. Pero nan no a mat’e, y p’esei el a duna su yiu muher como esposa na David.

Un dia Saul a bisa Jonatan y tur su sirbidornan cu e kier mata David. Pero Jonatan a bisa su tata: ‘No haci daño na David. E no a haci bo nada malo nunca. Mas bien, tur loke el a haci a yuda bo hopi. El a risca su bida ora el a mata Goliat, y ora bo a mira esei bo a keda contento.’

Saul a scucha su yiu, y a priminti di no haci David daño. Nan a trece David bek, y el a sirbi Saul den su cas atrobe mescos cu prome. Sinembargo, un dia ora David tabata toca musica, Saul a tira su lansa atrobe riba David. David a hala, y e lansa a dal den muraya. Esei tabata di tres bes! Awor David a haya sa cu e mester hui!

E anochi ei David a bai su mes cas. Pero Saul a manda algun homber pa mat’e. Mical tabata sa kico su tata tabatin plania pa haci. P’esei el a bisa David: ‘Si bo no hui awenochi, lo bo manece morto.’ E anochi ei Mical a yuda David hui dor di un bentana. Pa casi shete aña David tabatin cu sconde den un luga tras di otro pa Saul no hay’e.