CAPITULO SEIS

E Cuestion Cu Nos Tur Tin Cu Enfrenta

1, 2. (a) Cua cuestion Satanas a lanta den Eden? (b) Con e cuestion ei ta bini dilanti den loke el a bisa?

BO TA envolvi den e cuestion di mas importante cu hamas humanidad a enfrenta. E posicion cu bo tuma pa cu e cuestion aki lo determina bo futuro eterno. E cuestion aki a presenta durante e rebelion cu a surgi den Eden. Na e ocasion ei Satanas a puntra Eva: “Di berdad Dios a bisa: ‘Bo no mag come di ningun palo di e hofi’?” Eva a contesta cu ta di un palo so Dios a bisa: “Boso no mester come di dje . . . pa boso no muri.” E ora ei Satanas mesora a acusa Yehova di ta gaña, y el a bisa cu ni e bida di Eva ni e bida di Adam no a depende di obediencia na Dios. Satanas a pretende cu Dios a priva su criaturanan di algo bon, esta di por fiha nan propio normanan den bida. Satanas a declara: “Dios sa cu e dia cu boso come di dje, boso wowo lo habri y boso lo ta manera Dios, conociendo bon y malo.”—Genesis 3:1-5.

² Cu otro palabra, Satanas a bisa cu hende lo ta mas miho para si nan a tuma nan propio decisionnan en bes di obedece e leinan di Dios. Pues el a desafia Dios su manera di goberna. Esaki a lanta e cuestion sumamente importante di soberania universal: e cuestion di si Dios tin derecho di goberna como esun supremo den universo. E pregunta cu a surgi ta: Kico ta mas miho pa hende, Yehova su manera di goberna of gobernacion independiente for di Dje? Wel, Yehova por a ehecuta mesora e sentencia di morto pa Adam cu Eva, pero esei lo no a resolve e cuestion di gobernacion supremo na un manera satisfactorio. Di otro banda, Dios por a demostra kico precis independencia for di Dje y di su leinan lo a produci door di laga sociedad humano sigui su mes rumbo pa un periodo extenso.

3. Cua cuestion di importancia secundario Satanas a lanta?

³ Satanas su atake contra Yehova su derecho di goberna cu a tuma luga den Eden no a keda te ei. Tambe el a pone na duda si otro personanan lo a keda fiel na Yehova. Esaki a bira un otro cuestion hopi liga cu esun prome, pero di importancia secundario. Su desafio a inclui tanto e desendencia di Adam cu Eva como tur yiu spiritual di Dios; asta Yehova su prome Yiu masha stima. Por ehempel, den e tempo di Job, Satanas a declara cu hende ta sirbi Yehova no pa motibo cu nan stima Dios of su manera di goberna, sino pa motibonan egoista. El a argumenta cu ora nan haya nan cu dificultad, nan ta entrega na deseo egoista.—Job 2:1-6; Revelacion 12:10.

Loke Historia A Comproba

4, 5. Kico historia a comproba tocante e intento di hende pa dirigi su mes pasonan?

⁴ Un punto vital den e cuestion di si Dios ta e gobernante supremo ta esaki: Dios no a crea hende pa biba independiente di su gobernacion y toch ser exitoso. Dios a traha hende di tal manera cu e mester depende di Dios su leinan husto pa e por tin exito. Profeta Yeremias a admiti: “O SEÑOR, mi sa cu e caminda di hende no ta di dje mes; tampoco no ta keda na hende pa dirigi su pasonan. Corigi mi, o SEÑOR.” (Yeremias 10:23, 24) Pesei e Palabra di Dios ta urgi nos: “Confia den SEÑOR cu henter bo curason, y no depende riba bo mes comprendemento.” (Proverbionan 3:5) Mescos cu Dios a traha hende pa ser goberna door di su leinan fisico pa nan por keda na bida, asina tambe el a pone leinan moral, cu lo resulta den un sociedad harmonioso si hende obedece nan.

⁵ Ta bisto anto cu Dios tawata sa cu e famia humano nunca lo por a dirigi su mes cu exito sin Dios su gobernacion. Den un intento fracasa pa ta independiente di e gobernacion di Dios, hende a establece diferente sistema politico, economico y religioso. E diferente sistemanan aki a pone cu hende ta den conflicto constante cu otro, resultando den violencia, guera y morto. “Hende a eherce autoridad riba un otro hende pa su daño.” (Eclesiastes 8:9) Esei ta precis loke a sosode atrabes di henter historia humano. Manera e Palabra di Dios a profetisa, hendenan malbado y gañadonan a sigui “bai di malo pa piyo.” (2 Timoteo 3:13) Y den siglo 20, hende a bai hopi dilanti riba tereno di ciencia y industria, pero tambe a experencia e piyo calamidadnan den historia. E palabranan di Yeremias 10:23 a keda comproba fuera di tur duda: Dios no a crea hende pa dirigi su mes pasonan.

6. Con Dios lo resolve pronto e asunto di hende su gobernacion independiente for di Dje?

⁶ E consecuencianan tragico y di termino largo di independencia for di Dios a demostra una bes pa semper cu gobernacion di hende nunca lo por tin exito. Dios su gobernacion ta e unico caminda cu ta hiba na felicidad, union, salu y bida. Y e Palabra di Dios ta mustra cu pronto Yehova ta bai stop di tolera gobernacion humano independiente. (Mateo 24:3-14; 2 Timoteo 3:1-5) Djis aki, lo E interveni den asuntonan humano pa eherce su derecho di goberna riba tera. Profecia biblico ta declara: “Den e dianan di e reinan ei [gobernacion humano cu ta existi awe] e Dios di shelo lo lanta un reino [den shelo] cu nunca lo no wordo destrui, y e reino ei lo no pasa pa ningun otro pueblo [nunca mas hende lo goberna tera]; e lo garna y pone un fin na tur e reinonan aki [di actualidad], ma e mes lo dura pa semper.”—Daniel 2:44.

Con pa Sobrevivi y Drenta den Dios Su Mundo Nobo

7. Ora Dios su gobernacion pone fin na hende su gobernacion, ken lo sobrevivi?

⁷ Ora Dios su gobernacion pone fin na hende su gobernacion, ken lo sobrevivi? Bijbel ta contesta: “E rectonan [esnan cu ta apoya Dios su derecho di goberna] lo biba den e tera, y e perfectonan lo keda den dje; ma e malbadonan [esnan cu no ta apoya Dios su derecho di goberna] lo wordo corta kita for di tera.” (Proverbionan 2:21, 22) E salmista tambe a bisa: “Aki poco tempo e malbado lo no t’ei mas . . . E hustonan lo hereda e tera, y lo biba den dje pa semper.”—Salmo 37:10, 29.

8. Con Dios lo vindica su derecho como Soberano plenamente?

⁸ Despues di destrui e sistema di Satanas, Dios lo introduci su mundo nobo. Den e mundo ei lo elimina violencia, guera, pobresa, sufrimento, malesa y morto completamente, cosnan destructivo cu pa miles di aña tawatin humanidad den nan gara. Bijbel ta duna un descripcion masha bunita di e bendicionnan cu ta spera humanidad obediente: “[Dios] lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolo; e prome cosnan a pasa.” (Revelacion 21:3, 4) Mediante su Reino celestial den man di Cristo, Dios lo vindica (es decir, hustifica of establece) plenamente Su derecho di ta nos Soberano, esta, nos Gobernante.—Romanonan 16:20; 2 Pedro 3:10-13; Revelacion 20:1-6.

Con Algun Hende A Reacciona Riba e Cuestion

9. (a) Con hende cu a keda fiel na Yehova a considera su palabra? (b) Con Noe a duna prueba di su fieldad, y con nos por beneficia di su ehempel?

⁹ Durante henter historia, tawatin hende homber y mohe cu a duna prueba di nan fieldad na Yehova y a respet’e como Soberano. Nan tawata sa cu nan bida a depende di scucha Yehova y obedec’e. Noe tawata un hende asina. Dios a bisa Noe: “E fin di tur carni a bin mi dilanti . . . Traha pa bo mes un arca.” Y Noe a somete su mes na Yehova su guia. Apesar cu otro hende di e tempo ei a ricibi spiertamento, nan a sigui hiba nan bida como si fuera nada straño no tawata bai pasa. Pero Noe a construi un arca gigantesco y diligentemente a sigui predica tocante Yehova su normanan husto na otro hende. Bijbel ta sigui bisa: “Asina Noe a haci; conforme tur loke Dios a orden’e, el a haci.”—Genesis 6:13-22; Hebreonan 11:7; 2 Pedro 2:5.

10. (a) Con Abraham cu Sara a apoya Yehova su derecho di goberna? (b) Den ki manera nos por beneficia di e ehempel di Abraham cu Sara?

¹⁰ Abraham cu Sara tambe tawata ehempelnan excelente di hende cu a apoya Yehova su derecho di goberna, haciendo tur loke El a manda nan. Nan tawata biba na Ur di e Caldeonan, un stad rico. Pero ora Yehova a bisa Abraham pa bai un otro pais, un pais cu e no a conoce, Abraham “a sali bai manera SEÑOR a papia cu ne.” Sin duda Sara tawatin un bida comodo na Ur, na su cas, y hunto cu su amigonan y famia. Sinembargo, e tawata sumiso na Yehova y na su esposo y a bai na e tera di Canan, aunke e no tawata sa ki situacion ta sper’e einan.—Genesis 11:31–12:4; Echonan 7:2-4.

11. (a) Bou di ki sircunstancianan Moises a apoya Yehova su derecho di goberna? (b) Con Moises su ehempel por beneficia nos?

¹¹ Moises tawata un otro persona cu a apoya Yehova su derecho di goberna. Y el a haci esei bou di sircunstancianan sumamente dificil: den confrontacionnan cara cara cu Farao di Egipto. No cu Moises tawatin confiansa den su mes. Al contrario, el a duda mes cu e por a papia na drechi. Pero el a obedece Yehova. Y cu Yehova su respaldo y cu yudansa di su ruman homber Aron, Moises a entrega Yehova su palabra bes tras bes na e Farao terco. Asta algun di e yiunan di Israel a critica Moises severamente. Pero toch Moises a haci fielmente loke Yehova a mand’e haci, y pa medio di dje Israel a ser libra for di Egipto.—Exodo 7:6; 12:50, 51; Hebreonan 11:24-27.

12. (a) Kico ta mustra cu fieldad na Yehova ta encera mas cu loke Dios a spesifica por escrito? (b) Si nos ta comprende kico e clase di fieldad aki ta, con lo e por yuda nos aplica 1 Huan 2:15?

¹² Pa esnan cu tawata fiel na Yehova, obediencia no tawata limita na solamente loke Dios a pone por escrito. Ora cu e esposa di Potifar a purba seduci Yosef pa tene relacion sexual cu ne, no tawatin ningun lei di Dios skirbi cu a prohibi adulterio. Sinembargo, Yosef tawata sa cu ta Yehova a institui matrimonio den Eden. E tawata sa cu relacion sexual cu esposa di un otro homber lo a desagrada Dios. Yosef no tawata interesa pa sa te con leu Dios lo a lag’e biba manera e Egipcionan. El a apoya e normanan di Yehova door cu el a medita riba Dios su trato cu humanidad anto a aplica consencialmente loke el a comprende cu tawata e boluntad di Dios.—Genesis 39:7-12; Salmo 77:11, 12.

13. (a) Con Job a duna prueba cu Diabel ta un mentiroso? (b) Con e tres Hebreonan tambe a mustra esei?

¹³ Hende cu di berdad conoce Yehova no ta aparta for di dje ni maske nan ser poni na prueba severamente. Segun Satanas su acusacion, si Job a perde tur su propiedadnan of su salu, asta Job (di ken Yehova a papia asina bon) lo a bandona Dios. Pero Job a duna prueba cu Diabel ta un mentiroso, maske Job mes no tawata sa dicon asina tanto calamidad a bini riba dje. (Job 2:9, 10) Siglonan despues Satanas, purbando keto bai pa proba su acusacion, a pone un rei rabia di Babilonia menasa tres hoben Hebreo cu morto den un forno cayente si nan no buig pa adora un imagen cu e rei a traha. Obliga na scohe entre obedece e mandamento di e rei of obedece Yehova su lei contra idolatria, e hobennan a laga e rei sa na un manera firme cu nan a sirbi Yehova y cu e tawata nan Soberano Supremo. Fieldad na Dios tawata mas precioso pa nan cu nan bida na e momento ei!—Daniel 3:14-18.

14. Con nos como hende imperfecto por duna prueba cu di berdad nos ta fiel na Yehova?

¹⁴ Nos mester conclui for di e ehempelnan ei cu pa un persona ta fiel na Yehova e mester ta perfecto of cu esun cu haci un fout a fracasa completamente? Di ningun manera! Bijbel ta bisa nos cu tawatin biaha cu Moises a faya. Aunke Yehova a keda malcontento, E no a rechasa Moises. E apostelnan di Hesucristo tambe tawatin nan debilidadnan. Yehova ta tene cuenta cu nos imperfeccion hereda, y basta nos no ignora su boluntad deliberadamente den un of otro manera, E ta keda contento cu nos. Si debi na debilidad nos comete un malecho, ta importante pa nos repenti sinceramente y no laga e eror bira un custumber. Asina nos ta demostra cu di berdad nos stima loke Yehova ta bisa ta bon y ta odia loke E ta mustra cu ta malo. A base di nos fe den Hesus su sacrificio—cu tin e balor di kita pica—nos por disfruta di un posicion limpi dilanti Dios.—Amos 5:15; Echonan 3:19; Hebreonan 9:14.

15. (a) Di tur hende, ta ken so a mantene integridad perfecto na Dios, y esaki a duna prueba di kico? (b) Con loke Hesus a haci ta yuda nos?

¹⁵ Sinembargo, acaso obediencia perfecto na Yehova su derecho di goberna simplemente no ta posibel pa hende? Durante 4.000 aña e contesta riba esaki tawata manera un “misterio”, un secreto sagrado. (1 Timoteo 3:16) Aunke Adam a ser crea perfecto, e no a pone un ehempel perfecto di debocion na Dios. Pues anto, ken si lo tawata por? Sigur ningun di su desendientenan pecaminoso. E unico hende cu a haci esei tawata Hesucristo. (Hebreonan 4:15) Loke Hesus a logra a duna prueba cu Adam (kende tawatin sircunstancianan hopi mas faborabel) lo por a mantene integridad perfecto si e tawata kier. E fayo no a sinta den Dios su obra di creacion. Pesei Hesucristo ta e ehempel cu nos ta trata na imita ora di demostra no solamente obediencia na lei dibino, sino tambe debocion personal na Yehova, e Soberano di universo.—Deuteronomio 32:4, 5.

Kico Ta Nos Contesta Personal?

16. Dicon nos mester ta constantemente alerta en cuanto nos actitud pa cu Yehova su derecho di goberna?

¹⁶ Cada un di nos awe ta enfrenta e cuestion di si Dios tin derecho di goberna como esun supremo den universo. Si nos a declara publicamente cu nos ta na Yehova su banda, Satanas ta haci nos su blanco di atake. E ta trece presion for di tur skina y lo sigui haci esei te na fin di su sistema di cosnan malbado. Nos mester ta sumamente alerta. (1 Pedro 5:8) Nos conducta ta mustra nos posicion pa cu e cuestion supremo di Yehova su derecho di goberna y e cuestion di importancia secundario tocante integridad na Dios bou di prueba. Lo ta malo pa nos mira conducta infiel como algo di menos importancia djis pasobra e ta comun den mundo. Pa mantene integridad nos tin cu haci esfuerso pa aplica Yehova su normanan husto den tur aspecto di bida.

17. Kico relaciona cu e origen di gañamento y hortamento mester pone nos evita nan?

¹⁷ Por ehempel, nos no por imita Satanas, kende ta “e tata di mentira.” (Huan 8:44) Nos mester ta honesto den tur nos tratonan. Den Satanas su sistema, hobennan hopi bes no ta papia berdad cu nan mayornan. Pero hobennan Cristian ta evita esaki, y di e manera ei ta duna prueba cu Satanas su acusacion cu e pueblo di Dios lo no keda fiel bou di prueba, no ta berdad. (Job 1:9-11; Proverbionan 6:16-19) Tambe tin cierto custumbernan di negoshi cu lo por indica cu un persona ta na banda di “e tata di mentira” en bes di na banda di e Dios di berdad. Nos ta evita e custumbernan aki. (Mikeas 6:11, 12) Hortamento tambe nunca ta hustifica, ni maske e persona ta den necesidad of si esun for di ken e ta horta ta rico. (Proverbionan 6:30, 31; 1 Pedro 4:15) Asta si hortamento ta un custumber normal caminda nos ta biba of si loke ta ser horta ta chikito, e ta keda algo cu ta contra lei di Dios.—Lucas 16:10; Romanonan 12:2; Efesionan 4:28.

18. (a) Na fin di Cristo su Reinado di Mil Aña, ki test humanidad lo ricibi? (b) Ki custumber nos mester cultiva for di awor?

¹⁸ Durante Cristo su Reinado di Mil Aña, Satanas y su demoñonan lo ta den abismo, incapas di influencia humanidad. Esta un gran alivio! Pero despues di e mil aña, lo los nan pa un poco tempo. Satanas y esnan cu ta siguie lo pone presion riba e parti di humanidad restaura cu ta mantene nan integridad na Dios. (Revelacion 20:7-10) Si nos tin e precioso oportunidad di ta na bida ora Dios los Satanas, con nos lo reacciona riba e cuestion di si Dios tin derecho di goberna e universo? Siendo cu e tempo ei henter humanidad lo ta perfecto, cualkier acto di infieldad lo ta algo delibera y lo resulta den destruccion eterno. Pesei ta masha importante pa nos cultiva for di awor e custumber di reacciona obedientemente riba cualkier instruccion cu Yehova duna nos, sea ta via su Palabra of via su organisacion! Haciendo esei, nos ta mustra nos berdadero debocion na Dje como e Soberano di universo.

Como Repaso

• Cua ta e cuestion grandi cu nos tur tin cu enfrenta? Con bini nos ta den e cuestion ei?

• Kico ta remarcabel en cuanto e maneranan cu homber- y mohenan di pasado a duna prueba di nan integridad na Yehova?

• Dicon ta importante pa tur dia nos honra Yehova cu nos conducta?