Storia di Bida
Tawata un Goso y un Reto pa Lanta Ocho Yiu den e Camindanan di Yehova
SEGUN E RELATO DI JOYCELYN VALENTINE
Na 1989 mi esposo a bai afo pa traha. El a priminti di manda placa pa mi por a cria mi ocho yiunan. Simannan a pasa sin cu mi a tende nada di dje. Lunanan a pasa y ainda nada di mi casa. Mi tawata consola mi mes bisando, ‘Asina cosnan drecha p’e, e ta bini cas.’
SIN placa pa cria mi famia, mi a bira desespera. Durante e cantidad di anochinan cu mi a pasa sin drumi, mi tawata puntra mi mes sin por a caba di kere: ‘Con e por haci un cos asina cu su famia?’ Cu tempo mi a bin acepta e realidad cruel cu mi esposo a bandona nos. Awe, un 16 aña despues cu el a bai laga nos, ainda e no a bolbe bek. Como resultado di esei, mi a haya mi ta lanta mi yiunan sin yudansa di un casa. Esaki tawata un reto, pero ora mi mira con mi yiunan a scohe pa e camindanan di Yehova, esei ta duna mi hopi goso. Ma prome cu mi conta con cosnan a sigui cu nos como famia, laga mi conta boso con mi mes a lanta.
En Busca di Guia di Bijbel
Mi a nace na 1938 riba e isla Caribeño di Jamaica. Aunke mi tata nunca no tawata miembro di un iglesia, e tawata considera su mes un hende temeroso di Dios. Anochi hopi bes e tawata pidi mi pa lesa p’e for di e buki biblico di Salmo. Den poco tempo mi por a ripiti hopi salmo for di cabes. Mi mama tawata miembro di un iglesia local, y de bes en cuando e tawata hiba mi misa.
Loke nos tawata tende na e reunionnan ei ta cu Dios ta tuma bon hende den shelo y kima mal hende pa semper den fierno. Tambe nan tawata bisa cu Hesus ta Dios y cu e ta stima mucha. Mi tawata basta confundi y mi tawatin miedo di Dios. Mi tawata puntra mi mes: ‘Con un Dios cu ta stima nos por tortura hende den candela?’
E idea di fierno tawata duna mi pesadiya. Cu tempo, mi a tuma un curso di Bijbel via corespondencia di Iglesia Adventista di Shete Dia. Nan a siña mi cu mal hende lo no ser tormenta pa semper, sino mas bien lo caba na shinishi den vlam di candela. Esaki a zona mi mas rasonabel, y mi a cuminsa asisti na nan sirbishinan religioso. Pero mi tawata haya nan siñansanan confuso, y loke mi a siña no a corigi mi punto di bista eroneo encuanto moralidad.
E tempo ei, por lo general hende tawata acepta cu fornicacion ta malo. Pero ami, mescos cu hopi otro hende, a kere cu ta solamente hende cu ta tene relacion sexual cu varios partner ta fornicado. Pues, dos persona cu no ta casa y cu a limita nan actividad sexual na otro no tawata comete pica. (1 Corintionan 6:9, 10; Hebreonan 13:4) E creencia ei tawata un di e motibonan pakico mi a haya seis yiu sin casa.
Mi Progreso Spiritual
Na 1965, Vaslyn Goodison y Ethel Chambers a bin biba den e comunidad di Bath, no mucho leu for di esun di nos. Nan tawata pionero, of predicado di tempo completo di Testigonan di Yehova, y un dia nan a papia cu mi tata. El a acepta nan oferta di un estudio di Bijbel. Si mi tawata na cas ora nan a bini, nan tawata papia cu mi tambe. Aunke mi tawata desconfia Testigonan di Yehova bastante, mi a dicidi di studia Bijbel cu nan pa proba nan cu nan ta robes.
Mi tawata haci hopi pregunta durante e estudio, y e Testigonan tawata contesta nan tur cu uzo di Bijbel. Cu nan yudansa mi a bin haya sa cu e mortonan ta inconciente y cu nan no ta sufri den fierno. (Eclesiastes 9:5, 10) Mi a siña tambe tocante e speransa di bida eterno den Paradijs riba tera. (Salmo 37:11, 29; Revelacion 21:3, 4) Aunke mi tata a stop di studia Bijbel, mi a cuminsa asisti na e reunionnan di e congregacion local di Testigonan di Yehova. E forma pacifico y ordena den cua nan tawata tene e reunionnan ei a laga mi siña mas tocante Yehova. Tambe mi a asisti na e asambleanan di sircuito y congresonan di districto, esta, reunionnan mas grandi cu e Testigonan ta tene. Tur e instruccion biblico aki a desaroya den mi un deseo fuerte pa adora Yehova den un forma aceptabel. Pero mi tawatin un obstaculo.
E tempo ei, mi tawata biba acompaña cu e tata di tres di mi seis yiunan. Mi a siña den Bijbel cu Dios ta condena relacion sexual pafo di matrimonio, y mi consenshi a cuminsa molestia mi. (Proverbionan 5:15-20; Galationan 5:19) Segun cu mi amor pa e berdad a crece, mi a anhela pa cambia mi bida na harmonia cu e lei di Dios. Finalmente, mi a tuma un decision. Mi a bisa mi compañero di bida cu sea nos ta casa of nos ta kibra e relacion. Aunke mi compañero di bida no a acepta mi creencianan, nos a casa oficialmente dia 15 di augustus 1970, cinco aña despues cu e Testigonan a papia cu mi pa prome biaha. Na december di aña 1970 mi a simbolisa mi dedicacion na Yehova mediante bautismo bou di awa.
Pa loke ta sirbishi di veld, hamas lo mi lubida e prome dia cu mi a sali pa predica. Mi tawata nervioso y mi no tawata sa con pa cuminsa un combersacion biblico. Eigenlijk, mi a haya un alivio ora e prome doño di cas a caba nos combersacion mesora. Pero, no a dura hopi cu mi no tawatin nervio mas. Na fin di e dia ei mi tawata masha contento ya cu mi a papia brevemente cu varios hende tocante Bijbel y a laga algun di nos publicacionnan basa riba Bijbel serca nan.
Mi A Mantene Mi Famia Spiritualmente Fuerte
Pa 1977 mi a haya dos yiu mas. Awor mi tawatin ocho. Mi tawata determina pa haci mi best pa yuda mi famia sirbi Yehova. (Hosue 24:15) Pesei mi a traha duro pa conduci un estudio regular di Bijbel cu mi famia. Tin biaha, debi na cansancio, mi tawata cabisha mientras un di e muchanan tawata lesa un paragraf na bos halto, y e muchanan tawatin cu lanta mi. Pero cansancio fisico nunca a stroba nos di studia Bijbel como famia.
Tambe, hopi biaha mi tawata haci oracion cu mi yiunan. Asina cu nan tawatin suficiente edad, mi a siña nan haci oracion na Yehova riba nan mes. Mi a haci sigur cu cada un di nan a haci un oracion personal prome cu nan a bai drumi. Mi tawata haci oracion cu cada yiu cu tawata mucho jong pa haci oracion.
Na prome instante mi esposo no tawata kier pa mi bai reunion di congregacion cu e muchanan. Sinembargo, ora el a realisa cu ta e lo tawatin cu wak pa e muchanan ora mi a bai reunion, e no a protesta mucho mas. Anochi, e tawata gusta sali bai serca su amigonan, pero e idea di bai cu ocho yiu si e no a gusta! Despues, asta el a cuminsa yuda mi prepara e muchanan pa bai Salon di Reino.
Pronto e muchanan a custumbra bai tur e reunionnan di congregacion y participa den e sirbishi publico. Durante nan vakantie di zomer, hopi bes nan tawata sali den e trabou di predica hunto cu e pioneronan, of predicadonan di tempo completo, den e congregacion. Esaki a yuda mi yiunan desaroya un amor di curason pa e congregacion y pa e trabou di predica.—Mateo 24:14.
Tempo di Prueba
Pa haya poco mas entrada pa e famia, mi esposo a cuminsa biaha bai afo pa busca trabou. E tawata bai laga e famia pa periodonan largo pero tawata bini bek regularmente. Pero na 1989, el a bai y no a bolbe mas. Manera mi a menciona anteriormente, e perdida di mi casa tawata un sla duro pa mi. Hopi anochi mi tawata yora y haci oracion ferviente na Yehova pa haya consuelo y perseverancia, y mi a sinti cu el a contesta mi oracionnan. Textonan manera Isaias 54:4 y 1 Corintionan 7:15 a duna mi pas mental y e forsa pa dal bai den bida. Den e congregacion cristian, famia- y amigonan tambe a apoya mi emocionalmente y materialmente. Mi ta masha gradicido na Yehova y su pueblo pa nan yudansa.
Nos a haya nos cu mas prueba. Un di mi yiu mohenan a ser expulsa for di e congregacion pa motibo di conducta antibiblico. Mi ta stima tur mi yiunan masha hopi, pero mi lealtad na Yehova ta bini na prome luga. Pues durante e tempo ei, ami cu mi otro yiunan tawata sigui e instruccion stricto di Bijbel encuanto con pa trata cu personanan expulsa. (1 Corintionan 5:11, 13) Nos a ricibi hopi critica di hende cu no tawata compronde nos posicion. Sinembargo, despues cu mi yiu mohe a ser restaura den e congregacion, su esposo a bisa mi cu nos posicion firme pa principionan di Bijbel a impresion’e. Awor e ta sirbi Yehova hunto cu su famia.
Confronta cu Problema Financiero
Ora mi esposo a bai laga nos, mi no tawatin un entrada fiho ni e famia no tawata ricibi su sosten financiero mas. E situacion aki a siña nos pa keda contento cu un bida simpel y pa duna mas balor na rikesa spiritual cu na empeñonan material. Segun cu e yiunan a siña stima y yuda otro, nan a bira mas pega cu otro. Ora esnan mas grandi a cuminsa traha, di nan mes nan tawata yuda nan rumannan mas chikito. Mi yiu mohe mayo, Marseree, a yuda su ruman mohe menor, Nicole, caba cu su scol secundario. Ademas, ami por a maneha un tienda chikito. E poco entrada cu mi tawata haya for di dje a yuda mi percura pa algun di nos necesidadnan material.
Nunca Yehova no a bandona nos. Un biaha mi a bisa un ruman mohe cristian cu debi na nos situacion financiero nos lo no por a asisti na e congreso di districto. El a contesta mi: “Ruman Val, ora bo tende cu lo tin un congreso, cuminsa prepara! Yehova ta provee pa bo.” Mi a sigui su conseho. Yehova a provee, y el a sigui haci esei. Nunca nos famia a perde un asamblea of un congreso pa falta di placa.
Na 1988, horcan Gilbert a dal Jamaica, y nos a bandona nos cas en busca di refugio den un luga mas sigur. Ora e bientonan a baha un tiki, ami cu mi yiu homber a sali for di e area di refugio pa bai wak kico a sobra di loke un tempo tawata nos cas. Segun cu nos tawata busca den e ruinanan, mi a mira algo cu mi kier a purba scapa. Diripiente e bientonan a lanta atrobe, pero ainda mi tawatin e cos den mi man. “Mami, pone e television abou. Ta esposa di Lot Mami ta anto?” (Lucas 17:31, 32) E comentario ei di mi yiu homber a yuda mi haya mi sano huicio bek. Mi a benta e television papa muha di awasero abou, y nos tur dos a core bai na un luga mas sigur.
Aworaki mi ta tembla ora mi corda con mi a risca mi bida pa un television. Pero ora mi pensa riba e comentario cu mi yiu homber a haci na e ocasion ei cu a mustra mi con alerta e ta den sentido spiritual, mi curason ta yena cu goso. Door di e entrenamento biblico cu el a ricibi di e congregacion cristian, e por a yuda mi evita di perhudica mi mes fisicamente y talbes spiritualmente.
E horcan a destrui nos cas y nos pertenencianan, y tambe el a caba cu nos animo. Despues nos rumannan cristian a yega. Nan a anima nos pa enfrenta e perdida aki cu confiansa den Yehova y pa keda activo den sirbishi, y nan a yuda nos reconstrui nos cas. E trabou amoroso ei, sin interes personal, cu boluntarionan Testigo di Jamaica y di exterior a haci, a conmove nos profundamente.
Nos A Pone Yehova na Prome Luga
Despues cu mi di dos yiu, Melaine, a caba scol, el a sirbi como pionero. Despues el a acepta un invitacion pa sirbi como pionero den un otro congregacion, locual a nifica cu lo e tawatin cu kita for di trabou. Aunke e trabou ei a permitie yuda nos famia bon den sentido financiero, nos a confia cu Yehova lo a percura pa nos, basta cada un di nos a pone interesnan di Reino na prome luga. (Mateo 6:33) Despues, mi yiu homber Ewan tambe a ricibi un invitacion pa sirbi como pionero. E tawata apoya e famia financieramente, pero nos a insisti pa e acepta e invitacion y a dese’e e bendicion di Yehova. Nunca mi a desanima mi yiunan di amplia nan sirbishi di Reino, y e resto di nos cu a keda cas nunca a falta e necesidadnan basico di bida. Mas bien, nos goso a aumenta, y tin biaha, nos por a yuda otronan den necesidad.
Awe, ta un gran goso pa mira mi yiunan “cana den e berdad.” (3 Huan 4) Un di mi yiu mohenan, Melaine, ta compañando su esposo actualmente den e sirbishi biahero como superintendente di sircuito. Mi yiu mohe Andrea y su esposo ta sirbi como pioneronan special, y e ta compaña su casa ora e ta bishita e congregacionnan como superintendente di sircuito substituto. Mi yiu homber Ewan y su casa ta sirbi como pioneronan special, y e ta anciano di congregacion. Un otro yiu mohe, Ava-Gay, ta traha hunto cu su casa na e sucursal di Testigonan di Yehova na Jamaica. Jennifer, Genieve y Nicole ta sirbi hunto cu nan esposonan y yiunan como miembronan activo den nan respectivo congregacionnan. Marseree ta biba hunto cu mi, y aworaki nos dos ta asisti na Congregacion Port Morant. Mi bendicionnan ta grandi, pasobra tur mi ocho yiunan ta sigui adora Yehova.
Atrabes di añanan mi a cuminsa haya problemanan cu salud. Awor mi ta lucha cu reumatismo di artritis, pero ainda mi ta disfruta di mi sirbishi como pionero. Pero pa algun tempo caba a bira dificil pa mi cana den mi bicindario pasobra e ta yen di sero. Tawata hopi duro pa mi sali den sirbishi. Mi a purba core un bais y a haya cu esei ta mas facil cu cana. Pesei mi a cumpra un bais segunda mano y a cuminsa uz’e. Na principio no tawata facil pa mi yiunan mira nan mama cu artritis core bais. Pero nan tawata masha contento di mira mi sigui predica manera mi curason a desea.
Mi ta sinti hopi goso ora mi mira hende cu mi a studia Bijbel cu ne acepta e berdad di Bijbel. Semper mi ta pidi Yehova yuda henter mi famia keda fiel na dje atrabes di e tempo di fin aki y pa eternidad. Mi ta alaba y ta gradici Yehova, e Gran ‘Scuchador di oracion’, pa a permiti mi enfrenta e reto di lanta mi ocho yiunan den su camindanan.—Salmo 65:2.
[Plachi na pagina 10]
Cu mi yiunan, nan casanan y mi nietonan
[Plachi na pagina 12]
Awor mi ta sali den sirbishi riba bais