Angelnan​—Ki Influencia Nan Tin Riba Nos?

ORA profeta Daniel a describi e vision cu el a haya relaciona cu Dios su famia di angel, el a skirbi: “Miles y miles [di angel] tawata sirbi [Dios], y dies mil biaha dies mil tawata para su dilanti.” (Daniel 7:10) E versiculo aki ta indica pakico Dios a crea angel. Nan tin cu sirbie y para cla pa cumpli cu su instruccionnan.

Dios ta uza angel pa cumpli cu cierto tareanan en conexion cu sernan humano. Laga nos wak con e ta uza nan pa fortalece y proteha su pueblo, pa entrega mensahe na hende y pa ehecuta su huicio contra e malbadonan.

Angelnan Ta Fortalece y Proteha Hende

For di despues cu criaturanan spiritual a mira e creacion di tera y di e prome hendenan, nan a mustra hopi interes den humanidad. Papiando como si fuera ta sabiduria ta na palabra, Hesucristo a bisa durante su existencia prehumano: “Mi delicia tawata den e yiunan di hende.” (Proverbionan 8:31) Y Bijbel ta informa nos cu “angelnan ta anhela di mira” e detayenan tocante Cristo y e futuro cu a ser revela na e profetanan di Dios.—1 Pedro 1:11, 12.

Cu pasamento di tempo, e angelnan a tuma nota cu mayoria hende no tawata sirbiendo nan Creador amoroso. Esaki lo mester a haci e angelnan fiel hopi tristo! Di otro banda, ki ora cu un pecado repenti y acudi na Yehova, “tin goso den presencia di e angelnan.” (Lucas 15:10) Nan tin un interes profundo den e bienestar di hende cu ta sirbi Dios, y hopi biaha Yehova a uza nan pa fortalece y proteha su fiel sirbidonan riba tera. (Hebreonan 1:14) Wak algun ehempel.

Dos angel a yuda husto Lot y su yiu mohenan sobrevivi e destruccion di e stadnan malbado di Sodoma y Gomora door di hiba nan pafo di e area ei.a (Genesis 19:1, 15-26) Hopi siglo despues, aunke profeta Daniel a ser tira den un cueba di leon, el a sali ileso. Con esei tawata posibel? El a declara: “Mi Dios a manda su angel y a sera boca di e leonnan.” (Daniel 6:22) Angelnan a sostene Hesus na cuminsamento di su ministerio riba tera. (Marco 1:13) Y un poco prome cu Hesus a muri, un angel a aparece na dje y a “fortalec’e.” (Lucas 22:43) E sosten cu Hesus a haya di angel na e momentonan crucial ei di su bida lo mester tawata un gran bendicion p’e! Ta un angel tambe a libra apostel Pedro for di prizon.—Echonan 12:6-11.

Angelnan ta proteha nos awe? Si nos adora Yehova segun su Palabra, e ta sigura nos cu su angelnan poderoso y invisibel lo proteha nos. Bijbel ta priminti: “E angel di SEÑOR ta campa rond di esnan cu ta tem’e, y ta rescata nan.”—Salmo 34:7.

Sinembargo, nos tin cu reconoce cu na prome luga angelnan ta den sirbishi di Dios, y no di hende. (Salmo 103:20, 21) Nan ta sigui e instruccionnan di Dios, no hende su ordo of peticionnan. Pesei, esun cu nos tin cu pidi yudansa ta Yehova Dios, no e angelnan. (Mateo 26:53) Claro cu nos no por determina te na ki grado Dios ta uza angel pa yuda hende cu varios asunto pasobra nos no ta mira e angelnan. Pero loke si nos sa ta cu Yehova ta “sostene fuertemente esnan cu nan curason ta completamente di dje.” (2 Cronicanan 16:9; Salmo 91:11) Y nos tin e siguransa cu “si nos pidi cualkier cos conforme su boluntad, [Dios] ta tende nos.”—1 Huan 5:14.

E Scritura ta bisa tambe cu nos tin cu dirigi nos oracionnan y adoracion na Dios so. (Exodo 20:3-5; Salmo 5:1, 2; Mateo 6:9) Angelnan fiel ta anima nos pa haci esei. Por ehempel, ora apostel Huan a purba adora un angel, e criatura spiritual ei a scual e, bisando: “[“Tene cuidou!” NW] No haci esei; . . . Adora Dios.”—Revelacion 19:10.

Angelnan Ta Entrega Mensahenan di Dios

E palabra “angel” ta nifica “mensahero”, y esei ta un otro manera den cua angelnan ta sirbi Dios, esta, pa duna hende mensahe di Dios. Por ehempel, “angel Gabriel a wordo manda pa Dios na un stad den Galilea cu yama Nazaret.” Pakico? Pa e informa un mosa cu yama Maria cu aunke e tawata un birgen, lo el a consebi den su matris y duna lus na un yiu homber cu lo mester a ser yama Hesus. (Lucas 1:26-31) Dios a manda un angel tambe na e wardadonan den e cunucunan pa informa nan cu “Cristo e Señor” a nace. (Lucas 2:8-11) Mescos tambe, angelnan a entrega mensahenan di Dios na Abraham, Moises, Hesus y otro personanan menciona den Bijbel.—Genesis 18:1-5, 10; Exodo 3:1, 2; Lucas 22:39-43.

Con angelnan ta sirbi como mensahero di Dios awe? Considera e trabou cu Hesus a profetisa cu su siguidonan lo haci prome cu e fin di e sistema di cosnan aki. El a bisa: “E evangelio aki di e reino lo wordo predica den henter mundo como un testimonio na tur nacion, y e ora ei e fin lo yega.” (Mateo 24:3, 14) Tur aña, Testigonan di Yehova ta dedica mas cu mil miyon ora na predica e evangelio, of bon nobo di e Reino di Dios. Pero bo tawata sa cu angelnan tambe ta envolvi den e obra aki? Apostel Huan a referi na un vision cu el a haya, bisando: “Mi a mira un otro angel . . . , kende tawatin un evangelio eterno pa predica na esnan cu ta biba riba tera, y na tur nacion y tribu y lenga y pueblo.” (Revelacion 14:6, 7) E texto aki ta resalta e obra di mas importante cu angelnan ta haci awe na fabor di humanidad.

Segun cu Testigonan di Yehova ta predica di cas pa cas, nan ta mira evidencia cu ta angelnan ta dirigiendo e obra aki. Hopi bes nan ta bishita hende cu a caba di resa na Dios pa manda un hende bin yuda nan compronde su propositonan. Como resultado di e guia di angelnan y e actividad di e Testigonan, tur aña miles y miles di persona ta yega na conoce Yehova. Nos ta desea pa abo tambe beneficia di e trabou aki cu ta salba bida, bou di direccion di e angelnan.

Angelnan Ta Ehecuta e Huicio di Dios

Aunke angelnan no ta autorisa pa husga hende, nan no ta djis para un canto mira. (Huan 5:22; Hebreonan 12:22, 23) Den pasado nan a yega di sirbi como ehecutor di e huicionan di Dios. Por ehempel, Dios a uza angelnan den su guera contra e Egipcionan di antiguedad, kendenan tawatin e Israelitanan como esclabo. (Salmo 78:49) Y na un otro ocasion, den un solo anochi ‘e angel di Yehova’ a mata 185.000 solda den e campamento di un enemigo di e pueblo di Dios.—2 Reinan 19:35.

Den futuro tambe angelnan lo ehecuta e huicio desfaborabel di Dios. Hesus lo bini “cu su angelnan poderoso den candela tur na vlam, pa duna pago mereci na esnan cu no conoce Dios y na esnan cu no ta obedece e evangelio.” (2 Tesalonicensenan 1:7, 8) Pero e destruccion ei lo bini solamente riba hende cu no ta acepta e mensahe cu aworaki ta ser predica rond mundo cu respaldo di e angelnan. Hende cu ta busca Dios y cu ta cumpli cu siñansanan biblico lo no sufri daño.—Sofonias 2:3.

Nos por ta hopi gradicido pa e angelnan fiel cu semper ta cumpli cu e instruccionnan di Dios! Yehova ta uza nan pa yuda y proteha su sirbidonan leal riba tera. Esaki ta un gran consuelo pa nos pasobra tin criaturanan spiritual peligroso cu yama demoño y nan si kier haci nos daño.

Demoñonan​—Ken Nan Ta?

Durante e 15 siglonan cu a transcuri despues cu Satanas a gaña Eva den Eden, Dios su famia di angel a observa cu Satanas e Diabel a logra aleha tur hende for di Dios, cu excepcion di algun persona obediente manera Abel, Enok y Noe. (Genesis 3:1-7; Hebreonan 11:4, 5, 7) Algun angel tambe a cuminsa sigui Satanas. Bijbel ta referi na nan como e spiritonan cu tawata desobediente “den e dianan di Noe.” (1 Pedro 3:19, 20) Con nan a manifesta nan desobediencia?

Den tempo di Noe un cantidad no spesifica di angel rebelde a bandona nan luga den e famia celestial di Dios, a bini na tera y a tuma curpanan carnal. Cu ki intencion? Nan a cultiva un deseo pa tene relacion sexual cu hende mohe, y door di esei nan a bira tata di yiunan cu tawata yama nefilim, kendenan a bira gigantenan violento. Ademas, “maldad di hende tawata grandi riba tera, y . . . tur intencion di e pensamentonan di su curason tawata continuamente maldad so.” Pero Yehova Dios no a laga e corupcion aki di humanidad sigui. El a trece un Diluvio mundial, cu a bari tur hende malbado hunto cu nefilim. E unico hendenan cu a ser salba tawata e fiel sirbidonan di Dios.—Genesis 6:1-7, 17; 7:23.

Ora e Diluvio a bini e angelnan rebelde no a ser destrui. Nan a bandona nan curpa carnal y a regresa e region di spirito como criaturanan spiritual. Djei padilanti Bijbel ta referi na nan como demoño. Nan a pone nan mes na banda di Satanas e Diabel, kende ta ser yama “e prins di demoñonan.” (Mateo 12:24-27) Mescos cu nan gobernante, demoñonan ta anhela e adoracion di hende.

Demoñonan ta peligroso, pero nos no tin nodi tene miedo di nan. Nan poder ta limita. Ora e angelnan desobediente a regresa shelo, Dios no a laga nan drenta bek den su famia di angelnan fiel. Mas bien, el a corta tur iluminacion spiritual for di nan. Unico cos cu a keda nan ta un futuro scur, limita den un condicion di scuridad spiritual cu yama Tartaro. (2 Pedro 2:4, NW) Yehova a tene nan na “cadena eterno”, di manera cu nan ta den un scuridad spiritual. Ademas, aworaki nan no por tuma curpa humano mas.—Hudas 6.

Kico Abo Mester Haci?

Ainda demoñonan tin influencia riba hende? Si, nan ta haci esei door di uza triki of maña, manera esnan cu nan gobernante, Satanas e Diabel, ta uza. (Efesionan 6:11, 12) No obstante, si nos aplica e conseho di e Palabra di Dios, nos por para firme contra e demoñonan. Ademas, hende cu ta stima Dios ta haya proteccion di angelnan poderoso.

Ta masha importante pa bo siña kico ta e rekisitonan di Dios haya den Bijbel y cumpli cu loke bo ta siña! Bo por haya sa mas tocante e siñansanan di Bijbel door di tuma contacto cu Testigonan di Yehova den bo area of door di skirbi e editornan di e revista aki. Testigonan di Yehova lo ta contento pa studia Bijbel cu bo sin cobra bo nada, y na un ora cu ta cumbini bo.

[Nota]

[Cuadro na pagina 6]

CON ANGELNAN TA ORGANISA

Yehova su inmenso famia di angel ta organisa den e siguiente manera: E angel di mas importante pa loke ta poder y autoridad ta Miguel e arcangel, of Hesucristo. (1 Tesalonicensenan 4:16; Hudas 9) Bou di dje ta bini e serafinnan, e kerubinnan y otro angelnan.

E serafinnan ta ocupa un posicion hopi halto den e areglo di Dios. Nan ta sirbi na e trono di Dios. Parti di nan encargo ta pa declara e santidad di Dios y mantene su pueblo spiritualmente limpi.—Isaias 6:1-3, 6, 7.

E kerubinnan ta asisti na e trono di Dios y ta sostene e mahestad di Yehova.—Salmo 80:1; 99:1; Ezekiel 10:1, 2.

Otro angelnan ta sirbi como representante di Yehova, y nan ta cumpli cu e boluntad divino.

[Plachi na pagina 4]

Angelnan a hiba Lot y su yiu mohenan for di zona di peliger

[Plachi na pagina 5]

Ora apostel Huan a purba adora e angel, esaki a bis’e: “No haci esei”!

[Plachi na pagina 6]

Angelnan ta ehecuta e huicio di Dios

[Plachi na pagina 7]

Abo ta beneficiando di e trabou di predica cu angelnan ta dirigi?