Tuma e Profetanan Como Ehempel: Mikeas
1. Ki pregunta Mikeas por tabatin na mente, pero dicon su predicacion no tabata envano?
1 Bo a yega di puntra bo mes: ‘Ki dia e fin di e mundo malbado aki lo yega?’ Kisas profeta Mikeas tambe tabatin un pregunta asina na mente ora e tabata proclama Jehova su mensahe di huicio contra e reino di Israel y Juda. Pero, Mikeas su predicacion no tabata envano, pasobra na aña 740 prome cu Cristo, mientras Mikeas tabata na bida ainda, Jehova su profecia contra di Samaria a cumpli. (Mik. 1:6, 7) Despues, na aña 607, Jerusalem a ser destrui. (Mik. 3:12) Con nos por imita Mikeas segun cu nos ta warda riba Jehova su binidero dia di huicio?
2. Dicon nos tin cu warda cu pasenshi riba e dia di Jehova y kico esey ta encera?
2 Tene Pasenshi: Mikeas a skirbi: “Ma pa loke t’ami, lo mi warda riba [Jehova]; lo mi spera riba e Dios di mi salbacion.” (Mik. 7:7) Ta claro cu Mikeas no a sinta man crusa warda e fin yega. El a keda activo den su trabou como profeta. Segun cu nos ta warda riba e dia di Jehova, nos tambe mester ta ocupa den actonan di “conducta santo y mester haci obranan cu ta demostra devocion na Dios.” (2 Ped. 3:11, 12) Jehova su pasenshi ta duna hende chens pa arepenti. (2 Ped. 3:9) Ta pesey nos ta tuma e conseho di Bijbel na serio pa imita e pasenshi di e profetanan.—Sant. 5:10.
3. Dicon nos mester pidi Jehova pa su spirito santo?
3 Depende Riba Jehova Su Forsa: Aunke Mikeas su asignacion tabata dificil, el a depende riba Jehova su forsa pa cumpli cu ne. (Mik. 3:8) Ta Jehova mes ta urgi nos den su Palabra pa pidie pa su forsa. E ta duna forsa na esnan cu ta cansa pa asina nan por cumpli cu nan responsabilidadnan teocratico. (Sal. 84:5, 7; Isa. 40:28-31) Abo a yega di sinti esaki den bo bida cristian? Bo ta pidi Jehova regularmente pa fortalece bo pa medio di su spirito santo?—Luc. 11:13.
4. Ki excelente ehempel Mikeas a laga pa nos?
4 Mikeas a biba pa haci e boluntad di Dios. Esey tabata e cos di mas importante p’e. E tabata determina pa keda fiel na Dios maske e tabata rondona pa hende moralmente corumpi. Awe tambe, nos integridad ta ser poni na prueba tur dia. Pesey, laga nos fortalece nos determinacion pa “cana den e nomber di [Jehova] nos Dios pa semper y semper.”—Mik. 4:5.