Lider Politico Ta Spierta Hende Cu Armagedon Ta na Caminda—Kico Bijbel Ta Bisa?

Dialuna mainta 10 di october 2022, Rusia a manda bom riba varios stad na Ucrania. Rusia a tuma revancha contra Ucrania pa un explosion grandi cu a tuma luga dos dia prome. E explosion ey a haci hopi daño na un brug importante cu ta conecta Crimea cu Rusia. E sucesonan ey a tuma luga poco tempo despues cu algun lider politico a bisa cu Armagedon ta na caminda.

• “Ta prome biaha desde tempo di [Presidente Mericano] Kennedy y e crisis di arma nuclear na Cuba cu nos ta asina cerca di Armagedon ... Mi no ta kere cu ta posibel pa hende uza arma nuclear sin cu esey ta hiba na Armagedon.”—Presidente Mericano Joe Biden, 6 di october 2022.

• “Mi tambe ta kere cu pronto nos lo haya nos cu Armagedon, algo cu lo afecta henter nos planeta.”—Esey ta loke presidente di Ucrania Volodymyr Zelensky a bisa ora a puntr’e kico lo ta e consecuencianan di uzo di arma nuclear (BBC News, 8 di october 2022).

Ta posibel cu uzo di arma nuclear lo hiba na Armagedon? Kico Bijbel ta bisa?

Uzo di arma nuclear lo hiba na Armagedon?

No. Ta un biaha so e palabra “Armagedon” ta ser menciona den Bijbel, esta, na Revelacion 16:16. Armagedon no ta referi na un guera entre nacion, pero e ta referi na un guera entre Dios y “e reynan di henter e Tera habita.” (Revelacion 16:14) Dios lo uza e guera di Armagedon pa caba cu gobernacion humano.—Daniel 2:44.

Pa haya sa mas tocante e consecuencianan cu Armagedon lo tin pa Tera, lesa e articulo: Kico e Guera di Armagedon Ta?

Un guera nuclear lo destrui planeta Tera y su habitantenan?

No. Aunke e lidernan di mundo lo por dicidi di uza arma nuclear den futuro, Dios lo no permiti pa Tera ser destrui. Bijbel ta bisa:

• “Tera ta permanece pa semper.”—Eclesiastes 1:4, Beibel Santu.

• “Hende husto lo hereda Tera, y nan lo biba riba dje pa semper.”—Salmo 37:29.

Sinembargo, profecia biblico y e sucesonan actual ta indica cu nos ta bibando na un momento crucial den historia humano. (Mateo 24:3-7; 2 Timoteo 3:1-5) Haya sa loke Bijbel ta bisa tocante futuro. Acepta nos curso di Bijbel gratis.