Hende No Ta Confia e Politiconan Mas—⁠Kico Bijbel Ta Bisa?

Aña 2024 lo marca historia pa loke ta trata e cantidad di eleccion politico cu lo tuma luga rond mundo. Sinembargo, hopi hende a cuminsa perde confianza den e politiconan.

• Na Merca, e hendenan a haci un encuesta, y mayoria di e Mericanonan cu a ser entrevista ta haya cu “hopi politico tin meta egoista.” Hende ta sinti cu meta di e politiconan no ta pa sirbi e pueblo cu nan ta representa.a—Pew Research Center, 19 di september 2023.

Hopi hoben tampoco no ta confia e politiconan.

• “Hopi teenager kier solucion pa e problemanan crucial di mundo, pero e encuestanan ta mustra cu hopi hoben no ta haya cu e politiconan ta solucionando e problemanan ey.”—The New York Times, 29 di januari 2024.

• “Un encuesta ta mustra cu hopi hoben ta confia e hendenan riba YouTube mas cu nan ta confia e politiconan.”—The Korea Times, 22 di januari 2024.

Nos por tin confianza cu e politiconan lo yuda trece un mihor futuro? Ken si nos por confia?

Tene cuidou ken bo ta confia

Hende tin bon motibo pa tene cuidou ken nan ta confia. Bijbel ta bisa cu “un hende sin experencia ta kere tur cos cu bo bis’e, pero un persona sabi ta pensa bon prome cu e dal un paso.”—Proverbionan 14:15.

• Si bo kier sa con pa evalua un informacion pa mira si loke e ta bisa ta cuadra cu berdad, e siguiente articulo ta duna algun sugerencia practico: “Proteha Bo Mes Contra Informacion Falso.”

Hasta e politiconan di mas honesto y cu tin e mihor intencionnan ta limita den loke nan por haci. Bijbel ta spierta:

• “No confia den prinsnan [of, e lidernan humano], den yiu di hende, den kende no tin salbacion.”—Salmo 146:3, Beibel Santu.

Un lider cu nos por confia

Bijbel ta mustra cu Dios a nombra un lider cu nos por confia y cu ta plenamente capacita pa goberna: Hesucristo. (Lucas 1:32, 33) Hesus ta Rey di e Reino di Dios. E Reino di Dios ta un gobierno celestial cu ta goberna for di cielo.—Mateo 6:10.

• Ta importante pa bo haya sa dicon bo por confia den Hesus y kico lo e haci pa soluciona e problemanan cu nos ta enfrenta. Bo por lesa e siguiente articulonan pa haya contesta: “Ken Ta Rey di e Reino di Dios?” y “Kico e Reino di Dios Lo Haci?”