Probablemente bo a mira nan ta predica di cas pa cas of na luganan publico pa ofrece literatura biblico y curso di Bijbel. Kisas bo a haya e revista aki for di un testigo di Jehova. Y podise bo ta pensa mescos cu un di e personanan cu nos a caba di menciona y ta puntra bo mes: Ken testigonan di Jehova realmente ta?

Si acaso bo tin e tipo di pregunta- of pensamentonan aki, cerca ken bo por bay pa haya contesta? Con bo por haya sa kico testigonan di Jehova realmente ta kere? Ademas, con nan ta cubri e gastonan di e obra di predica y di nan luganan di adoracion? Y pakico nan ta bishita bo na bo cas y acerca bo na luganan publico?

Cecilie cu nos a menciona caba, a bisa: “Mi a lesa hopi tocante testigonan di Jehova riba internet. Tambe mi a tende algun rumor y a scucha hopi cos malo di testigonan di Jehova for di hende cu tin prehuicio. Pesey mi a cuminsa pensa malo di testigonan di Jehova.” Pero despues cu Cecilie a papia personalmente cu testigonan di Jehova, el a haya contesta satisfactorio pa su preguntanan.

Abo kier haya contesta for di un fuente confiabel pa e preguntanan cu bo tin tocante testigonan di Jehova? Nos ta anima bo pa puntra esnan cu a publica e revista aki, esta, testigonan di Jehova. Dicon? Pasobra esnan cu sa mas hopi tocante testigonan di Jehova ta nan mes. (Proverbionan 14:15) Nos ta spera cu e siguiente articulonan lo yuda bo haya sa ken nos ta, kico nos creencia ta y tambe pakico nos ta predica.

Nos ta un organisacion internacional independiente cu no ta afilia na ningun otro organisacion religioso. Aunke nos sede mundial ta na Merca, mayoria di testigo di Jehova ta biba na otro pais. Nos ta rond di ocho miyon Testigo cu ta siña hende Bijbel den mas cu 230 pais. Dicon nos ta haci esey? Pasobra nos ta cumpli cu loke Hesus a bisa, esta, cu “e bon noticia aki di e Reino lo ser predica den henter e Tera habita, como testimonio pa tur nacion, anto e fin lo yega.”—Mateo 24:14.

Sin importa na unda nos ta biba, nos ta obedece ley. Sinembargo, nos ta keda neutral den asuntonan politico. Nos ta neutral pasobra nos ta sigui e guia cu Hesus a duna tur cristian, esta, pa “no ta parti di mundo.” Pues, nos no ta mete den ningun asunto politico ni nos no ta apoya guera. (Juan 15:19; 17:16) Ta pa motibo di nan neutralidad cristian mes nan a encarcela, tortura y mata testigonan di Jehova durante Segundo Guera Mundial. Un ex-obispo Aleman a bisa: “Nan ta e unico personanan cu por bisa cu nan a nenga di cumpli cu servicio militar pa motibo di nan consenshi durante e Tercer Reich.”

Pero esey no kiermen cu nos ta isola nos mes di otro hende. Pasobra ora Hesus a haci oracion na Dios, el a haci e siguiente peticion pa su discipelnan: “Mi no ta pidi bo pa saca nan for di mundo.” (Juan 17:15) Pesey bo por mira nos ta traha, shop y bay scol manera tur otro hende.

Testigonan di Jehova ta kere cu “henter e Scritura ta inspira di Dios y ta probechoso.” (2 Timoteo 3:16) Pesey nos, como testigo di Jehova, ta uza Bijbel como un guia practico pa yuda nos conoce e Creador y pa nos por tin un bida cu proposito.

Bijbel ta bisa: “Bo ta digno, Jehova, nos Dios, di ricibi alabanza pa bo gloria, honor y poder.” (Revelacion 4:11) Pesey mes como su Testigonan, nos ta adora Jehova Dios so y ta haci nos best pa yuda hende conoce su nomber.—Isaias 43:10-12.

Como cristian, nos ta kere cu Hesus, esta, “e Yiu di Dios”,a a bin na mundo y a bira e Mesias. (Juan 1:34, 41; 4:25, 26) Despues cu Hesus a muri, el a haya resureccion pa bay biba den cielo. (1 Corintionan 15:3, 4) Y cu tempo el a bira Rey di e Reino di Dios. (Revelacion 11:15) E Reino ey ta un gobierno real cu lo converti e Tera den un paradijs. (Daniel 2:44) Bijbel ta bisa: “E humildenan lo hereda e Tera, y lo deleita nan mes den paz abundante.”—Salmo 37:11, 29.

Ademas, testigonan di Jehova ta kere cu principionan di Bijbel por yuda hende den nos tempo tambe. (Isaias 48:17, 18) Pesey nos ta aplica principio biblico den nos bida. Por ehempel, nos no ta huma ni uza droga. Dicon no? Pasobra Bijbel ta bisa nos pa evita bicionan cu ta contamina nos curpa y nos mente. (2 Corintionan 7:1) Ademas, nos no ta practica loke Bijbel ta condena specificamente, manera bebemento di mas, inmoralidad sexual y hortamento.—1 Corintionan 6:9-11.

Tur aña, nos ta imprimi y distribui cientos di miyones di Bijbel y otro literatura cu ta basa riba Bijbel. Nos ta construi y maneha oficina di sucursal y luganan di imprenta rond mundo. Ademas, nos tin miles di luga di adoracion simpel pero atractivo. E luganan aki caminda nos ta reuni yama Salon di Reino. Ken ta financia tur esaki?

Nos obra mundial ta financia completamente pa donacion of contribucion boluntario. (2 Corintionan 9:7) Na 1879 e segundo edicion di E Toren di Vigilancia a bisa: “Nos ta kere cu ta JEHOVA ta esun cu ta sostene ‘Zion’s Watch Tower’ [esaki tabata e nomber di e Toren di Vigilancia], y mientras cu esey ta e caso, nunca nos lo no roga ni pidi hende sosten.” Ainda nos ta kere esey.

Ken cu ta desea por manda su donacion na un di nos sucursalnan of por pone donacion den e caha di contribucion na Salon di Reino. Pero nunca nos no ta pidi diesmo, pasa collect of cobra pa e trabou cu nos ta haci ni pa nos publicacionnan. Nos no ta haya un salario pa predica, ni pa siña hende den congregacion ni pa yuda traha luganan di adoracion, ya cu Hesus a bisa: “Boso a ricibi pornada, duna pornada.” (Mateo 10:8) Tur esnan cu ta traha na un di nos sucursalnan y na e oficina principal, hasta e directiva of Cuerpo Gobernante di testigonan di Jehova, ta miembro di un orden religioso cu no ta ricibi salario.

Ta uza donacionnan tambe ora tin desaster natural. E prome cristiannan gustosamente a yuda victimanan ora tabatin calamidad. (Romanonan 15:26) Nos tambe ta yuda victimanan di calamidad door di reconstrui nan cas, nan luganan di adoracion y percura pa nan haya cuminda, paña y tratamento medico.

Kisas hende por reconoce nos mesora door di e trabou di predica cu nos ta haci rond mundo. Nos ta predica di cas pa cas, den areanan publico y cualkier caminda cu nos por haya hende. Dicon nos ta predica?

Nos ta predica pa alaba Dios y pa yuda hende conoce su nomber. (Hebreonan 13:15) Un otro motibo pakico nos ta predica ta pasobra nos ta obedece Hesucristo, kende a bisa: “Bay, y haci hende di tur nacion mi discipel, ... y siña nan cumpli cu tur loke mi a manda boso.”—Mateo 28:19, 20.

Ademas, nos ta stima nos prohimo. (Mateo 22:39) Nos sa cu mayoria di hende tin nan mes creencia, y no ta tur hende ta interesa den nos mensahe. Pero nos ta convenci cu loke Bijbel ta siña por salba bida di hende. Pesey nos ta sigui e ehempel di e cristiannan di prome siglo, kendenan “sin stop ... a sigui siña hende y declara e bon noticia tocante Hesus, cu ta e Cristo.”—Echonan 5:41, 42.

Gran parti di esnan cu ta lesa nos literatura no ta testigo di Jehova. Y miyones di hende cu nos ta duna curso di Bijbel ta pertenece na otro religion. Toch nan ta agradecido cu testigonan di Jehova ta bishita nan.

Por ta bo tin mas pregunta tocante testigonan di Jehova. Si esey ta e caso, nos ta anima bo pa haya sa e contesta door di haci lo siguiente:

• Papia cu un testigo di Jehova.

• Bishita nos website, www.jw.org/jw-paa.

• Asisti na nos reunionnan; entrada ta gratis y un y tur ta bonbini.