Rahab A Sconde e Spionnan

E HOMBERNAN ei ta den dificultad. Nan mester hui, sino nan lo ser mata. Nan ta spion Israelita, y e señora cu ta yuda nan ta Rahab. Rahab tabata biba den un cas riba e muraya di e stad Jerico. Laga nos mira pakico e dos hombernan ei tabata den dificultad.

E Israelitanan tabata cla pa crusa Riu Jordan y drenta e tera di Canaan. Pero prome cu nan haci esei, Josue a manda dos spion. El a bisa nan: ‘Bai tira un bista riba e tera y e stad Jerico.’

Ora e dos spionnan a drenta Jerico, nan a bai na e cas di Rahab. Pero un hende a bisa e rei di Jerico: ‘Dos Israelita a drenta akiden awenochi pa spiona e tera.’ Ora e rei a tende esei, el a manda algun homber cerca Rahab, y nan a orden’e: ‘E hombernan cu bo tin den bo cas, saca nan afo!’ Pero Rahab a sconde e spionnan riba dak di su cas. P’esei el a bisa: ‘Algun homber a bini na mi cas si, pero mi no sa di unda nan a bini. Nan a bai net ora tabata birando scur, prome cu porta di e stad a sera. Si boso bai lihe, boso por alcansa nan!’ P’esei e hombernan a core pa busca nan.

Despues cu nan a bai, Rahab a subi lihe riba dak. ‘Mi sa cu Jehova lo duna boso e tera aki’, el a bisa e spionnan. ‘Nos a tende con el a seca Lama Cora ora boso a sali for di Egipto, y con boso a mata Rei Sehon y Og. Mi a trata boso cu bondad. P’esei, por fabor, priminti mi cu boso lo trata mi cu bondad. Salba mi tata cu mi mama y mi rumannan.’

E dos spionnan a priminti cu nan lo hacie, pero Rahab tabatin cu haci algo. ‘Tuma e cabuya cora aki y mar’e den bo bentana’, e spionnan a bisa, ‘y reuni henter bo famia den bo cas cerca bo. Y ora nos tur bolbe pa cohe Jerico, nos lo mira e cabuya den bo bentana y nos lo no mata ningun hende den bo cas.’ Ora e dos spionnan a bolbe cerca Josue, nan a bis’e tur loke a sosode.