1, 2. (a) Ora nos bay un casamento, kico tin biaha nos ta puntra nos mes, y dicon? (b) Cua preguntanan nos lo analisa den e capitulo aki?

BO GUSTA bay casamento? Hopi hende ta gusta pasobra e ocasionnan ey por ta hopi placentero. E pareha ta nechi bisti, y nan cara ta briya di alegria! Nan ta masha feliz, y nan futuro ta parce briyante.

² Sinembargo, nos mester reconoce cu awe ta bay hopi malo cu matrimonio. Pesey, maske nos tin e mihor deseonan pa e pareha recien casa, toch tin biaha nos ta puntra nos mes: ‘E matrimonio aki lo ta feliz? Lo e dura?’ Esey ta depende di si e pareha ta acepta e consehonan di Dios tocante matrimonio y ta haci esfuerso pa aplica nan. (Proverbionan 3:5, 6) Esaki ta necesario pa keda den e amor di Dios. Laga nos ban analisa con Bijbel ta contesta e cuater preguntanan aki: Pa ki motibo hende ta casa? Si bo ta bay casa, con bo por scoge un bon casa? Con bo por prepara pa matrimonio? Y kico por yuda un pareha pa nan por tin un matrimonio feliz y duradero?

PA KI MOTIBO HENDE TA CASA?

3. Dicon no ta sabi pa casa pa un motibo cu no ta dje importante ey?

³ Tin hende ta kere cu bo mester ta casa pa bo ta feliz, es decir, cu bo no por haya goso of satisfaccion den bida si bo no tin un casa. Esey sigur no ta berdad! Tuma por ehempel Hesus, kende no a casa nunca. El a indica cu keda soltero ta un don y hasta a anima hende cu por keda sin casa pa nan keda sin casa. (Mateo 19:11, 12) Apostel Pablo tambe a papia tocante e bentahanan di keda soltero. (1 Corintionan 7:32-38) Pero ni Hesus ni Pablo no a bisa cu bo ta obliga di keda soltero. De echo, Bijbel ta bisa cu hende cu ta “prohibi casamento” ta promoviendo “siñansa di demoño.” (1 Timoteo 4:1-3) A pesar di esey, tin hopi bentaha den keda soltero, specialmente pa un hende cu kier sirbi Jehova sin laga nada distra’e. Pues, lo no ta sabi pa casa pa un motibo cu no ta dje importante ey, por ehempel, pasobra hende rond di bo ta pone presion riba bo.

4. Dicon un bon matrimonio ta e mihor fundeshi pa cria yiu?

⁴ Di otro banda, tin motibo valido pa casa? Si. Matrimonio ta un otro don, of regalo, di Dios cu tin cierto bentaha y cu por haci hende hopi feliz. (Genesis 2:18) Por ehempel, un bon matrimonio ta e mihor fundeshi pa cria un famia. Yiu tin mester di un ambiente stabiel den cua ambos mayor ta duna nan amor, disciplina y guia. (Salmo 127:3; Efesionan 6:1-4) Ma criamento di yiu no ta e unico motibo valido pa casa.

5, 6. (a) Segun Eclesiastes 4:9-12, cua ta algun beneficio practico di un bon amistad? (b) Con matrimonio por ta manera un cordon lora tripel?

⁵ Laga nos analisa e texto central di e capitulo aki den su contexto: “Dos ta mihor cu un, pasobra nan tin un bon pago pa nan trabou. Pasobra si un di nan cay, esun lo lanta su compañero. Ma ay di esun cu cay ora no tin ningun hende pa lant’e. Ademas, si dos hende drumi hunto, nan ta keda cayente, ma con un hende por keda cayente su so? Y maske un hende por vence un cu ta su so, dos si por resistie. Un cordon lora tripel no ta kibra lihe.”—Eclesiastes 4:9-12.

⁶ E palabranan aki ta resalta principalmente e balor di amistad. Por aplica nan na matrimonio? Si, pasobra esey ta e tipo di amistad di mas intimo cu tin, y manera e palabranan ta indica, e union ey por ta un fuente di yudansa, consuelo y proteccion. Sinembargo, pa e union entre e homber y e muher por ta realmente fuerte, mester tin un di tres elemento. E ora ey lo e ta mescos cu un cordon cu ta consisti di tres cabuya cu ta gevlecht den otro, manera e versiculo ey ta indica. Esey lo ta hopi mas dificil pa kibra cu un cordon di dos cabuya. Kico ta e di tres cabuya cu ta haci e union realmente fuerte? Amor pa Jehova. Ora e pareha su devocion na Jehova ta hunga un papel importante den e matrimonio, y tanto e homber como e muher ta haci esfuerso pa agrada Jehova, nan matrimonio lo ta manera e cordon ey cu ta consisti di tres cabuya mara den otro.

7, 8. (a) Ki conseho Pablo a duna cristiannan soltero cu tin problema pa domina nan deseonan sexual? (b) Ki punto di bista realistico Bijbel ta duna nos di matrimonio?

⁷ Ademas, ta den matrimonio so tin mag di satisface deseo sexual. Ta den e union ey so relacion sexual por ser mira corectamente como un fuente di placer. (Proverbionan 5:18) Pero kico di hende soltero cu a pasa e periodo cu Bijbel ta yama “e flor di hubentud”, esta, e periodo cu nan impulsonan sexual ta hopi fuerte? Kico nan por haci? Den caso cu ainda nan ta lucha pa domina nan deseonan sexual y ta core peliger di comete actonan impuro, Pablo a duna nan e siguiente conseho inspira: “Si nan no tin dominio propio, laga nan casa, pasobra ta mihor casa cu keda kima di pasion.”—1 Corintionan 7:9, 36; Santiago 1:15.

⁸ Sea loke sea e motibo pakico un hende kier casa, ta bon pa e ta realistico. Manera Pablo a bisa, “esnan cu casa lo haya nan cu dificultad den bida.” (1 Corintionan 7:28) Hende casa ta haya nan cu dificultadnan cu hende soltero lo no haya nan cu ne. Awor, si bo dicidi di casa, kico bo por haci pa bo tin menos problema posibel y mas felicidad y satisfaccion? Un punto clave ta pa scoge un bon casa.

CON BO POR SCOGE UN BON CASA?

9, 10. (a) Con Pablo a ilustra e peliger di forma relacion intimo cu hende cu no ta creyente? (b) Kico hopi biaha ta e resultado ora un cristian casa cu un hende cu no ta creyente?

⁹ Bou di inspiracion, Pablo a skirbi un principio importante cu nos mester aplica ora di scoge un casa: “No forma un yugo desigual cu hende cu no ta creyente.” (2 Corintionan 6:14, nota) Kico lo pasa si un cunukero pone dos bestia cu no tin e mesun tamaño y forsa bou di e mesun yugo? Nan tur dos lo sufri. Mescos lo pasa si un cristian forma un “yugo” matrimonial cu un hende cu no ta creyente. Sin duda, lo tin friccion y tension constantemente den nan relacion, ya cu nan prioridad den bida lo no cuadra cu otro: Uno lo kier keda den e amor di Jehova, mientras cu e otro no ta interesa den esey. Esaki probablemente lo hiba na hopi problema. Pesey mes Pablo a bisa cristiannan cu si nan kier casa, nan haci esey “basta ta den Señor.”—1 Corintionan 7:39.

¹⁰ Pero algun cristian ta sinti nan asina so cu nan ta yega na e conclusion cu “un yugo desigual” ta mihor cu soledad. Tin di nan ta dicidi di no haci caso di e conseho di Bijbel y ta casa cu un persona cu no ta sirbi Jehova. Bes tras bes, e consecuencianan ta tristo. Tardi of trempan, nan ta bin realisa cu nan ta casa cu un persona cu ken nan no por comparti e cosnan di mas importante den bida. Anto e soledad cu nan ta sinti e ora ey kisas ta pio cu loke nan tabata sinti prome cu nan a casa. Afortunadamente, tin miles di cristian soltero cu ta acepta Jehova su conseho relaciona cu esaki y cu lealmente ta obedec’e. (Salmo 32:8) Aunke nan ta spera di casa un dia, nan ta keda soltero te ora nan haya un casa entre e hendenan cu ta sirbi Jehova Dios.

11. Kico por yuda bo scoge un bon casa? (Wak tambe e cuadro “Kico Por Yuda Mi Scoge un Bon Casa?”)

¹¹ Claro cu no ta tur sirbidor di Jehova automaticamente lo ta un bon casa. Si bo ta pensa riba matrimonio, busca un persona kende su personalidad, metanan spiritual y amor pa Dios ta similar cu esnan di bo. E esclavo fiel a publica hopi informacion encuanto e topico aki, y lo ta bon pa bo studia e conseho biblico ey hunto cu oracion y lag’e guia bo.a—Salmo 119:105.

12. Ki custumber tin den hopi cultura relaciona cu matrimonio, y for di cua ehempel biblico nos por siña un les pa casonan asina?

¹² Den hopi pais y cultura, hende tin e custumber cu ta e mayornan ta scoge un casa pa nan yiu. Por lo general, esey ta pasobra nan ta reconoce cu mayornan tin mas sabiduria y experencia pa tuma un decision importante asina. E tipo di matrimonionan ey hopi biaha ta resulta bon, mescos cu den tempo biblico. E mayornan cu tin e responsabilidad di tuma e decision importante aki por siña un bon les for di e ehempel di Abraham. Ora el a dicidi di busca un esposa pa su yiu homber Isaak, e no a considera placa y posicion social importante. Mas bien, el a haci hopi esfuerso pa busca un casa pa Isaak for di entre e hendenan cu tabata adora Jehova.b—Genesis 24:3, 67.

CON BO POR PREPARA PA MATRIMONIO?

13-15. (a) Con e principio na Proverbionan 24:27 por yuda un yoncuman cu tin pensa di casa? (b) Kico un mucha muher por haci pa prepara pa matrimonio?

¹³ Si bo tin pensa di casa, lo ta bon pa bo puntra bo mes: ‘Di berdad mi ta cla pa casa?’ E contesta no ta depende solamente di kico bo ta pensa di amor, sex, compañerismo of yiu. Mas bien, cada futuro esposo of esposa mester pensa riba e responsabilidadnan specifico cu matrimonio ta trece cu ne.

¹⁴ Un yoncuman cu ta busca un esposa mester pensa bon riba e siguiente principio: “Prepara bo trabou pafo, pone tur cos cla pa bo mes den cunucu; y despues traha bo cas.” (Proverbionan 24:27) Kico nos por compronde for di e versiculo aki? Wel, den tempo biblico, si un homber kier a “traha [su] cas”, es decir, casa y forma un famia, e mester a puntra su mes: ‘Mi ta cla pa cuida y mantene un esposa y e yiunan cu nos lo haya?’ Prome cu e casa, e mester a traha den su cunucu y percura pa su cosecha. E mesun principio ta aplica awe. Un homber cu kier casa tin cu prepara pa asumi su responsabilidad. Lo e tin cu traha tanten cu su salud ta permiti. E Palabra di Dios ta bisa cu un homber cu no ta atende e necesidadnan fisico, emocional y spiritual di su famia ta pio cu un persona sin fe!—1 Timoteo 5:8.

¹⁵ Un mucha muher cu dicidi di casa tambe mester prepara pa carga algun responsabilidad importante. Bijbel ta menciona algun cualidad y habilidad cu e mester tin pa yuda su esposo y pa cuida su hogar. (Proverbionan 31:10-31) Ken cu core casa, sea homber of muher, sin prepara pa carga e responsabilidadnan cu matrimonio ta trece cu ne ta hopi egoista. Dicon? Pasobra e no ta pensa riba loke e por ofrece su futuro casa. Awor, pa esnan cu tin pensa di casa, e preparacion mas importante mester ta e preparacion spiritual.

16, 17. Cristiannan cu ta prepara pa matrimonio mester medita riba cua principionan biblico?

¹⁶ Pa prepara pa matrimonio, e futuro esposo y esposa mester medita riba e papel cu Dios a duna cada un di nan. E homber mester sa kico ta su debernan como cabes di un famia cristian. Por ehempel, e no mester eherce su autoridad manera un dictador. Al contrario, e mester imita e ehempel di Hesus. (Efesionan 5:23) Asina tambe, e muher cristian mester compronde e papel digno cu e tin como esposa. Lo e ta dispuesto pa somete su mes na “e ley di su esposo”? (Romanonan 7:2) Como soltera, ya e ta bou di e ley di Jehova y di Cristo. (Galationan 6:2) Si e casa, e mester somete su mes na un ley mas: e autoridad di su esposo. Lo e por apoya un homber imperfecto y ser sumiso na dje? Si e no ta gusta e idea ey, mihor e no casa.

¹⁷ Ademas, e hende cu ta bay casa mester ta cla pa satisface e necesidadnan di su casa. (Filipensenan 2:4) Pablo a skirbi: “Laga cada un di boso stima su esposa manera e ta stima su mes; di otro banda, e esposa mester tin respet profundo pa su esposo.” Bou di inspiracion divino, Pablo a compronde cu e homber tin e necesidad special di sinti cu su esposa tin un respet profundo p’e, anto e muher tin e necesidad special di sinti cu su esposo ta stim’e.—Efesionan 5:21-33.

18. Dicon parehanan mester eherce dominio propio durante namoramento?

¹⁸ Pues, nos no mester mira namoramento simplemente como un periodo pa diberti. E ta un tempo pa e pareha siña con nan mester trata otro y pa nan wak si lo ta un bon decision pa casa cu otro. Tambe e ta un periodo pa nan eherce dominio propio. Dicon? Pasobra ta normal cu nan lo sinti atraccion fisico pa otro. Pero esey por bira asina intenso cu nan expresionnan di cariño por bay mucho leu, y nan por sinti e tentacion pa haci cosnan cu ta reserva pa matrimonio. Ma si di berdad nan ta stima otro, nan lo evita tur loke lo por perhudica e otro su relacion cu Dios. (1 Tesalonicensenan 4:6) Pues, eherce dominio propio durante bo namoramento; esey ta un cualidad cu bo por beneficia di dje henter bo bida, sea cu bo dicidi di casa of no.

KICO BO POR HACI PA BO MATRIMONIO DURA?

19, 20. Con hopi hende den e mundo djawe ta mira matrimonio, y con un cristian mester mir’e? Ilustra esey.

¹⁹ Si un pareha kier pa nan matrimonio dura, nan mester tin e punto di bista corecto di e compromiso ey. Den buki y pelicula, matrimonio hopi biaha ta e “final feliz” cu hende ta anhela. Pero den bida real, matrimonio no ta e final; e ta e comienso di un union cu Jehova a establece pa dura pa tempo indefini. (Genesis 2:24) Lamentablemente, e mundo djawe no ta mir’e asina. Den algun cultura, hende ta mira matrimonio como dos pida cabuya mara na un conopi. Nan no ta realisa con bon esey ta ilustra e punto di bista comun di matrimonio. Con asina? Wel, un bon conopi ta keda mara tanten cu ta necesario. Pero un otro rekisito importante ta cu e mester ta facil pa los tambe.

²⁰ Hopi hende awe ta mira matrimonio como algo temporal. Pues, nan ta core casa, pasobra nan ta pensa cu ora e matrimonio no ta satisface nan necesidadnan of si problema cuminsa, nan por pone un fin na dje. Pero corda cu Bijbel ta compara e tipo di lasonan ey—manera entre otro matrimonio—cu “un cordon lora tripel.” Cordon of cabuya cu nan ta traha pa barco di bela ta diseña pa dura largo, pa nan no fraña ni kibra y pa resisti e tormentanan mas pisa. Mescos ta e caso cu matrimonio. Jehova a establec’e pa e dura. Corda cu Hesus a bisa: “No laga ningun hende separa loke Dios a uni bou di un yugo.” (Mateo 19:6) Si bo casa, bo mester tin e mesun punto di bista ey di matrimonio. Acaso esey ta haci matrimonio un carga? No.

21. Ki actitud un esposo y esposa mester tin pa cu otro, y kico lo por yuda nan haci esey?

²¹ Matrimonio por ta un fuente di goso y satisfaccion. Pero pa esey ta e caso, e esposo y esposa mester siña mira otro for di e punto di bista corecto. Cada un tin cu haci esfuerso pa concentra riba e bon cualidadnan cu su casa tin y riba e esfuerso cu e ta haci, y no enfoca riba su defectonan. Acaso ta irealistico pa nos enfoca riba e aspectonan positivo di un casa imperfecto? Wel, Jehova nunca ta irealistico, pero toch nos tin confianza cu e ta enfoca riba nos cosnan positivo. Un escritor di salmo a puntra: “Si abo, SEÑOR, tuma inikidadnan na cuenta, o Señor, ken lo por a keda para?” (Salmo 130:3) Pues, asina tambe esposo y esposa mester ta comprensivo y wak e cosnan positivo di otro, y nan mester ta cla pa pordona otro.—Colosensenan 3:13.

22, 23. Con Abraham cu Sara a pone un bon ehempel pa parehanan casa awe?

²² Cu transcurso di tempo, matrimonio por duna e pareha mas felicidad y satisfaccion. Den Bijbel, nos ta haya e ehempel di e matrimonio di Abraham cu Sara ora cu ya nan tabata un pareha di edad avansa. Nan bida sigur no tabata sin contratiempo y problema. Bo por imagina cu lo no tabata facil pa Sara—kende e tempo ey tabatin mas cu 60 aña—bandona e comodidadnan di su cas, den e stad prospero di Ur, y bay biba den tent pa resto di su bida. Pero el a hacie y a somete su mes na e autoridad di su esposo. De echo, e tabata un berdadero complemento y ayudante pa Abraham, ya cu semper el a respeta Abraham y coopera cu ne pa su decisionnan por tin exito. Y Sara su sumision no tabata pa bista di hende. Hasta “den su mes”, el a referi na Abraham como su señor.c (Genesis 18:12; 1 Pedro 3:6) E tabata respeta Abraham di curason.

²³ Claro cu esey no kiermen cu Abraham cu Sara semper tabata di acuerdo cu otro. Un biaha Sara a pidie haci algo cu “a duel Abraham” hopi. Toch, ora Jehova a duna Abraham instruccion tocante e asunto, humildemente el a scucha su casa, y esey a resulta den bendicion pa e famia. (Genesis 21:9-13) Esposo- y esposanan djawe, hasta esnan cu tin varios decada casa, por siña hopi for di e pareha aki cu tabata fiel sirbidor di Dios.

24. Ki tipo di matrimonio ta honra Jehova Dios, y dicon?

²⁴ Den e congregacion cristian tin miles di matrimonio feliz, si, matrimonionan den cua e esposa ta respeta su esposo hopi, den cua e esposo ta stima y honra su esposa y den cua ambos ta coopera pa pone e boluntad di Jehova prome cu tur cos. Si bo mester dicidi di casa, scoge un bon casa, prepara bon pa matrimonio y haci esfuerso pa paz y amor reina den bo cas. Un matrimonio asina ta duna honor na Jehova Dios, y siguramente lo yuda bo keda den e amor di Dios.

1, 2. Ki pregunta nos lo analisa, y dicon?

SI BO ta casa, con lo bo describi bo matrimonio? E ta un fuente di felicidad of tin problema serio den bo matrimonio? Abo cu bo casa pocopoco a distancia for di otro? Of bo ta djis mantene bo bida casa, pero sin ningun goso of satisfaccion? Si ta asina, probablemente ta duel bo cu e relacion caluroso cu boso tabatin cu otro a fria. Como un cristian, sin duda bo kier pa bo matrimonio honra Jehova, bo Dios stima. Pues, bo situacion actual kisas ta preocupa bo y causa bo dolor. Pero animo! No pensa cu bo situacion ta sin speransa.

² Tin hopi pareha cu awor ta un bon ehempel ya cu nan tin un matrimonio solido, pero un tempo nan matrimonio tabata laga hopi di desea. Ta bisto cu nan a haya un manera pa fortalece nan relacion. Y bo tambe por hay’e. Pues, kico bo por haci pa bo tin un matrimonio mas feliz?

HALA MAS CERCA DI DIOS Y MAS CERCA DI BO CASA

3, 4. Dicon parehanan casa lo hala mas cerca di otro ora nan ta haci esfuerso pa hala mas cerca di Dios? Ilustra esey.

³ Abo cu bo casa lo hala mas cerca di otro si boso haci esfuerso pa hala mas cerca di Dios. Laga nos ilustra esaki. Un homber y un muher ta para na pia di un sero halto. E homber ta na un banda di e sero, e muher ta na e otro banda, y tin un distancia grandi ta separa nan. Tur dos ta cuminsa subi e sero pareu. Kico ta sosode? Mas cerca di e cabes di sero nan yega, mas chikito e distancia entre nan ta bira. Con e ilustracion aki por anima nos?

⁴ Wel, e subimento di e sero ta representa e esfuerso cu nos ta haci pa sirbi Jehova di henter nos alma. Sin duda abo cu bo casa ta stima Jehova y ta haciendo tur boso esfuerso pa subi e sero, na moda di papia. Ma si boso a hala for di otro, esaki kiermen cu boso ta subiendo e sero si, pero cada un na un banda. Kico lo pasa si boso sigui subi pa yega e cabes di sero? Ta berdad cu na principio por tin un distancia grandi entre boso, pero mas esfuerso boso haci pa subi e sero—es decir, pa hala mas cerca di Dios—mas abo cu bo casa lo hala cerca otro. Pues, e clave pa abo cu bo casa bira mas pega cu otro ta pa hala mas cerca di Dios. Pero con boso realmente por logra e meta ey?

5. (a) Menciona un manera pa hala mas cerca di Jehova y mas cerca di bo casa. (b) Con Jehova ta considera matrimonio?

⁵ Un di e mihor maneranan pa “subi e sero” ta aplicando e consehonan cu Bijbel ta duna boso tur dos como pareha casa. (Salmo 25:4; Isaias 48:17, 18) Pesey, laga nos analisa un punto specifico cu apostel Pablo a menciona. El a bisa: “Laga matrimonio ta honorabel den bista di tur hende.” (Hebreonan 13:4) Kico esey kiermen? E palabra “honorabel” ta nifica algo respeta y precioso. Y ta precies asina Jehova ta considera matrimonio: algo masha precioso.

AMOR PA JEHOVA MESTER TA BO MOTIVACION

6. Kico e contexto di Pablo su conseho tocante matrimonio ta indica, y dicon ta importante pa tene esaki na mente?

⁶ Claro cu como sirbidor di Dios, abo cu bo casa sa caba cu matrimonio ta precioso, hasta sagrado, pasobra ta Jehova mes a institu’e. (Mateo 19:4-6) Ma si na e momentonan aki bo tin problema matrimonial, e echo cu bo sa cu matrimonio ta honorabel lo no ta suficiente pa motiva abo cu bo casa pa trata otro cu amor y respet. Kico anto lo motiva boso? Presta bon atencion na Pablo su palabranan tocante e asunto. E contexto ta indica cu Pablo su conseho tocante matrimonio a forma parti di un serie di exhortacion of mandato cu el a duna. (Hebreonan 13:1-5) E no a bisa cu “matrimonio ta honorabel”, mas bien, e di: “Laga matrimonio ta honorabel.” Esaki no tabata djis un observacion di Pablo; e tabata un mandato. Ta bon pa tene e punto aki na mente, pasobra lo e por duna bo mas motivacion pa respeta y aprecia bo casa. Dicon nos ta bisa esey?

7. (a) Cua ta algun mandamento biblico cu nos ta cumpli cu ne, y dicon? (b) Ki beneficio nos ta haya ora nos ta obedece nan?

⁷ Pensa un rato. Con bo ta considera otro mandamento biblico, manera e encargo pa haci discipel of e conseho pa reuni hunto pa adora Dios? (Mateo 28:19; Hebreonan 10:24, 25) Sin duda, bo ta cumpli cu nan, aunke no ta tur biaha ta facil. Kisas e hendenan cu bo ta predica na dje ta reacciona na un manera negativo. Of ora bo sali for di trabou, bo ta asina cansa cu bo tin cu haci hopi esfuerso pa asisti na e reunionnan cristian. Pero toch bo ta sigui predica, y bo ta sigui asisti na reunion. Niun hende no por stop bo, ni sikiera Satanas! Dicon no? Pasobra bo ta stima Jehova di henter bo curason, y esey ta motiva bo pa obedece su mandamentonan. (1 Juan 5:3) Y ki beneficio bo ta haya ora bo ta predica y asisti na reunion? Bo ta sinti un goso y paz den bo curason pasobra bo sa cu bo ta haciendo e boluntad di Dios. Anto e sintimentonan ey, na nan turno, ta fortalece bo. (Nehemias 8:10) Ki les nos ta saca for di esaki?

8, 9. (a) Kico por motiva nos pa obedece e mandato pa honra matrimonio, y dicon? (b) Cua ta e dos puntonan cu nos lo bay analisa awor?

⁸ Pues, mescos cu bo amor pa Dios ta motiva bo pa obedece e mandamentonan pa predica y pa reuni hunto a pesar di obstaculo, e mesun amor ey mester motiva bo pa obedece e mandato biblico pa “laga [bo] matrimonio ta honorabel”, hasta ora esaki ta parce dificil pa haci. (Hebreonan 13:4; Salmo 18:29; Eclesiastes 5:4) Ademas, Jehova lo bendiciona bo esfuerso pa honra bo matrimonio, mescos cu e ta bendiciona e esfuerso cu bo ta haci pa predica y asisti na reunion.—1 Tesalonicensenan 1:3; Hebreonan 6:10.

⁹ Pues, kico bo por haci pa bo matrimonio ta honorabel? Di prome, bo tin cu evita comportacion cu ta perhudic’e. Y di dos, bo tin cu dal pasonan cu lo fortalec’e.

EVITA PALABRA Y COMPORTACION CU TA DESHONRA MATRIMONIO

10, 11. (a) Ki comportacion ta deshonra matrimonio? (b) Kico bo mester puntra bo casa?

¹⁰ Algun tempo pasa un esposa cristian a bisa: “Mi ta pidi Jehova duna mi forsa pa mi por soporta e cos aki.” Soporta kico? El a splica: “Mi casa ta dal mi cu palabra. Kisas bo no ta mira marca blauw na mi curpa, pero di paden mi curason ta tur na cicatriz debi na e cosnan cu e ta bisa mi constantemente, manera: ‘Bo tin mi cansa caba!’ of ‘Bo no ta sirbi!’” E esposa aki a trece un problema serio padilanti: abuso verbal, es decir, papiamento di cos ofensivo den matrimonio.

¹¹ Ta masha tristo ora un pareha cristian ta expresa palabranan cruel na otro, palabra cu ta causa herida emocional cu ta dificil pa cura! Ta bisto cu hende cu ta papia asina cu otro no tin un matrimonio honorabel. Con ta bayendo cu bo matrimonio? Un manera pa bo haya sa ta di puntra bo casa humildemente: “Ki efecto e cosnan cu mi ta bisa bo tin riba bo?” Si bo casa ta sinti cu bo palabranan tur ora bay ta causa herida emocional, bo mester ta dispuesto pa cambia bo comportacion.—Galationan 5:15; Efesionan 4:31.

12. Con un hende su adoracion por perde balor den bista di Dios?

¹² Corda cu ora bo ta papia malo cu bo casa, bo ta perhudica bo relacion cu Jehova. Bijbel ta bisa: “Si un hende ta kere cu e ta adora Dios, ma e no ta frena su lenga, e ta gaña su mes y su adoracion ta envano.” (Santiago 1:26) Bo manera di papia y bo adoracion no ta dos cos separa for di otro. Bijbel no ta apoya e idea cu no ta importa kico ta pasa na cas, basta bo ta bisa cu bo ta sirbi Dios. No gaña bo mes, esaki ta un asunto hopi serio. (1 Pedro 3:7) Por wel’i ta cu den congregacion bo ta habil y diligente, pero si na cas bo ta hurt bo casa deliberadamente cu palabra, bo ta deshonrando bo matrimonio y bo adoracion por ta envano den bista di Dios.

13. Con esposo cu esposa por causa otro dolor emocional?

¹³ Parehanan casa mester ta alerta tambe pa nan no causa otro dolor emocional na maneranan menos directo. Laga nos wak dos ehempel: Un mama soltera regularmente ta bel un ruman homber casa di congregacion pa pidie conseho, y nan ta papia oranan largo. Di otro banda, tur siman un ruman homber soltero ta traha basta ora den sirbishi di veld cu un ruman muher casa. E rumannan casa den e ehempelnan aki kisas no tin mal intencion; pero con nan comportacion ta afecta nan casa? Un esposa cu tabata den un situacion asina a bisa: “Ta duel mi hopi ora mi mira mi esposo ta dedica asina tanto tempo y atencion na un ruman muher den congregacion. E ta laga mi sinti cu mi ta inferior.”

14. (a) Segun Genesis 2:24, ki obligacion un pareha casa tin? (b) Kico nos mester puntra nos mes?

¹⁴ Ta di compronde cu e ruman casa aki y otronan cu ta den un situacion similar ta sinti nan gehurt. Nan casa ta pasando por halto di un norma fundamental cu Dios a establece pa matrimonio: “Un homber lo bandona su tata y su mama, y e tin cu pega na su esposa.” (Genesis 2:24, NW) Claro cu ora un hende casa, e ta keda respeta su mayornan; pero e versiculo aki ta indica cu den bista di Dios su obligacion principal ta cu su casa. Y mescos mester sosode cu su rumannan den fe; aunke un cristian ta stima nan masha hopi, su responsabilidad principal ta cu su casa. Pues, ora rumannan casa ta dedica demasiado tempo na rumannan den fe of ta mucho familiar cu nan, vooral cu esnan di e sexo opuesto, nan ta causa tension den nan matrimonio. Puntra bo mes: ‘Acaso esey por ta e motibo pakico tin desacuerdo den mi matrimonio? Mi ta duna mi casa e tempo, atencion y cariño cu e tin derecho riba dje?’

15. Segun Mateo 5:28, dicon cristiannan casa mester evita di dedica demasiado atencion na un persona di e sexo opuesto?

¹⁵ Ademas, ora rumannan casa ta dedica demasiado atencion na un persona di e sexo opuesto cu no ta nan casa, nan ta pone nan mes den un situacion peligroso. Lamentablemente, algun ruman casa a haya sintimentonan romantico pa hende cu nan a bira mucho familiar cu ne. (Mateo 5:28) Anto e laso emocional ey a hiba na comportacion cu ta deshonra matrimonio mas ainda. Laga nos wak kico apostel Pablo a bisa di e topico aki.

“TENE E CAMA MATRIMONIAL SIN MANCHA”

16. Ki spiertamento Pablo a duna relaciona cu matrimonio?

¹⁶ Asina cu Pablo a caba di duna e mandato pa “laga matrimonio ta honorabel”, el a agrega e spiertamento: “Tene e cama matrimonial sin mancha, pasobra Dios lo husga esnan cu ta comete fornicacion y adulterio.” (Hebreonan 13:4) Pablo a uza e expresion “cama matrimonial” pa referi na relacion sexual. Pa e cama matrimonial keda “sin mancha”, es decir, moralmente limpi, relacion sexual mester tuma luga solamente den matrimonio. Pesey, cristiannan ta cumpli cu e palabranan inspira: “Alegra bo den e esposa di bo hubentud.”—Proverbionan 5:18.

17. (a) Dicon cristiannan no ta laga mundo su punto di bista di adulterio influencia nan? (b) Con nos por imita e ehempel di Job?

¹⁷ Hende cu ta tene relacion sexual cu un persona cu no ta nan casa—loke ta adulterio—ta mustra un falta di respet enorme pa e leynan moral di Dios. Aunke hopi hende den e mundo djawe ta considera adulterio como algo normal, cristiannan berdadero no ta laga loke hende ta pensa influencia nan punto di bista tocante esey. Nan sa cu na final di cuenta, no ta hende, sino ta “Dios lo husga esnan cu ta comete fornicacion y adulterio.” (Hebreonan 10:31; 12:29) Pesey, nos ta adopta Jehova su punto di bista di e asunto aki. (Romanonan 12:9) Corda cu patriarca Job a bisa: “Mi a cera un alianza cu mi wowonan.” (Job 31:1) Si, pa evita e prome paso cu por hiba na adulterio, cristiannan berdadero ta domina nan wowo y no ta wak ningun otro hende, fuera di nan casa, cu pasion.—Wak e articulo “Kico Bijbel Ta Bisa di Divorcio y Separacion?“ den Appendix.

18. (a) Con serio adulterio ta den bista di Jehova? (b) Ki similaridad tin entre adulterio y idolatria?

¹⁸ Con serio adulterio ta den bista di Jehova? E Ley di Moises ta duna nos un idea di kico Jehova ta pensa di esey. Tabatin castigo di morto pa e Israelitanan cu a comete sea adulterio of idolatria. (Levitico 20:2, 10) Bo ta mira e similaridad entre e dos picanan ey? Tur dos pica a kibra un compromiso solem: Un Israelita cu a adora un imagen of dios falso a kibra su pacto cu Jehova, y un Israelita cu a comete adulterio a kibra su pacto cu su casa. Tur dos tabata un acto di traicion. (Exodo 19:5, 6; Deuteronomio 5:9; Malakias 2:14) Pues, ambos pica tabata repugnante den bista di Jehova, e Dios fiel y confiabel.—Salmo 33:4.

19. Kico lo por fortalece nos determinacion pa rechasa adulterio, y dicon?

¹⁹ Claro cu cristiannan no ta bou di Ley di Moises. Toch ta bon pa nos corda cu den Israel di antiguedad nan a considera adulterio un pica serio. Dicon ta bon pa corda esaki? Pasobra esey por fortalece nos determinacion pa nunca comete e acto di traicion ey. Pensa riba e comparacion aki: Lo bo drenta un misa, cay na rudia y resa na un imagen? Casi sigur bo ta bisa: ‘Hamas!’ Awor, kico si nan ofrece bo un suma grandi di placa pa hacie? Podise lo bo contesta: ‘Nunca di bo bida!’ Si, pa un cristian berdadero, e idea so di traiciona Jehova adorando un imagen ta algo repugnante. E mesun repugnancia ey nos mester sinti pa e idea di traiciona nos Dios, Jehova, y tambe nos casa, door di comete adulterio, sin importa e motibo cu nos por tin pa comete e pica ey. (Salmo 51:1, 4; Colosensenan 3:5) Hamas nos lo kier haci algo cu lo alegra e curason di Satanas y trece deshonor pa Jehova y pa e union sagrado di matrimonio.

CON BO POR FORTALECE BO MATRIMONIO?

20. Kico a pasa den algun matrimonio? Ilustra esey.

²⁰ Pero djis evita comportacion cu ta deshonra matrimonio no ta rebiba bo respet pa bo casa. Kico mas bo tin cu haci? Pa contesta e pregunta ey, laga nos compara matrimonio cu un cas. Kico ta e cosnan cu ta decora e cas ey y hacie mas bunita? Loke ta decora e cas ey ta palabranan amabel, atencion y otro muestra di honor y aprecio. Si e pareha ta hopi uni, ta comosifuera nan cas tin hopi decoracion cu ta dun’e color y un ambiente caluroso. Si nan cariño pa otro mengua, e decoracionnan ey ta disparce un pa un, y nan matrimonio ta keda manera un cas completamente bashi. Lo bo no kier pa esey pasa cu bo. Mas bien, bo ta desea pa bo “matrimonio ta honorabel”, manera Dios ta manda. Con cu bay bin, ta bale la pena drecha algo cu ta precioso y honorabel. Con bo por haci esey? E Palabra di Dios ta bisa: “Cu sabiduria un cas ta wordo traha, y cu comprondemento e ta wordo estableci. Y cu conocemento e cambernan ta wordo yena cu tur rikesa precioso y agradabel.” (Proverbionan 24:3, 4) Laga nos wak con por aplica e palabranan aki na matrimonio.

21. Con nos por fortalece nos matrimonio gradualmente? (Wak tambe e cuadro “Con Mi Por Fortalece Mi Matrimonio?”)

²¹ Entre e ‘rikesanan precioso’ cu ta yena un cas feliz tin e cualidadnan manera berdadero amor, temor di Dios y fe firme. (Proverbionan 15:16, 17; 1 Pedro 1:7) E cualidadnan ey ta fortalece un matrimonio. Pero bo a ripara con e cambernan ta yena cu “rikesa precioso”? Esey ta “cu conocemento.” Si, conocemento biblico por transforma hende su manera di pensa y motiva nan pa rebiba nan amor pa otro. (Romanonan 12:2; Filipensenan 1:9) Pues, cada bes cu abo cu bo casa cay sinta trankilamente pa considera un informacion biblico manera e texto di dia of un articulo tocante matrimonio publica den E Toren di Vigilancia of Despertad! ta comosifuera boso ta analisa un decoracion cu por haci boso cas bunita. Despues boso ta pone e decoracion ey den “e cambernan”, na moda di papia. Esey ta sosode ora amor pa Jehova motiva boso pa aplica e conseho cu boso a caba di analisa den boso matrimonio. Cu ki resultado? Boso cas lo por bolbe haya un poco di e color y ambiente caluroso cu un tempo e tabatin.

22. Ki satisfaccion nos lo tin si nos haci esfuerso pa fortalece nos matrimonio?

²² Claro cu por tuma basta tempo pa pone tur e decoracionnan aki un pa un bek den bo cas. Pero si bo haci esfuerso pa cumpli cu bo parti, lo bo tin e gran satisfaccion di sa cu bo ta obedeciendo e siguiente mandamento biblico: “Pa loke ta mustra honor na otro, tuma e iniciativa.” (Romanonan 12:10; Salmo 147:11) Riba tur cos, bo esfuerso sincero pa honra bo matrimonio lo yuda bo keda den e amor di Dios.