Revelashon

8 I ora e Lamchi a habri e di shete seyo a reina un silensio den shelu pa mas o ménos mei ora. 2 Anto mi a mira e shete angelnan ku ta para dilanti di Dios, i nan a risibí shete tròmpèt.

3 I un otro angel ku tabatin un paila di oro pa sensia a yega para na e altar; i el a risibí un kantidat grandi di sensia pa e ofresé riba e altar di oro ku tabata dilanti di e trono ora ku e santunan tabata hasi orashon. 4 I for di man di e angel huma di e sensia tabata subi dilanti di Dios, pareu ku orashon di e santunan. 5 Ma mesora e angel a yena e paila di sensia ku poko kandela di e altar i a tira e kandela riba tera. Despues di esei tabatin zonido di dònder, rayo di werlek, stèm i un temblor. 6 I e shete angelnan ku tabatin e shete tròmpètnan a prepará pa supla nan.

7 I e promé angel a supla su tròmpèt. I un yobida di pipita di eis i kandela mesklá ku sanger a kai riba tera; i un terser parti di tera a kima, un terser parti di palu a kima i tur mata bèrdè a kima.

8 I e di dos angel a supla su tròmpèt. I algu manera un seru grandi na kandela a kai den laman. I un terser parti di laman a bira sanger; 9 i un terser parti di e kriaturanan den laman ku tabatin alma* a muri, i un terser parti di e barkunan a noufragá.

10 I e di tres angel a supla su tròmpèt. I un strea grandi, briante manera un lampi, a kai for di shelu, i el a kai riba un terser parti di e riunan i riba e fuentenan di awa. 11 Nòmber di e strea akí tabata Apsinto.* I un terser parti di e awanan a bira marga, i hopi hende a muri pa motibu di e awanan, pasobra esakinan a bira marga.

12 I e di kuater angel a supla su tròmpèt. I un terser parti di solo a haña un gòlpi duru i tambe un terser parti di luna i un terser parti di e streanan, pa asina un terser parti di nan bira skur, i pa durante un terser parti di dia i di anochi no tin iluminashon.

13 I mi a mira un águila ku tabata bula meimei di shelu, i mi a tend’é bisa na bos haltu: “Ai, ai, ai di esnan ku ta biba riba tera pa motibu di e restu di toká di tròmpèt di e tres angelnan ku ta na punto di supla nan tròmpèt!”