Hosue

15 E region ku e famianan di e tribu di Huda a risibí* a yega te ku desierto Zin, ku tabata kore for di frontera di Édòm. Nan teritorio a yega te na Néguèv su punta zùit. 2 Nan frontera zùit tabata kore for di bahia di Laman Salu,* esta, for di e bahia na parti zùit, 3 sigui bai den direkshon zùit, pasa subida Akrabim, sigui bai Zin, sigui bai zùit i subi bai te Kádes-Barnea. Di Kádes-Barnea, nan frontera zùit a sigui bai Hèzròn, subi bai Adar i lora bai den direkshon di Karka. 4 Djei, e frontera a sigui bai den direkshon di Ásmòn, pasa vaye* di Egipto i kaba na Laman.* Esei tabata nan frontera zùit.

5 Huda su frontera ost tabata kore pareu ku oria di Laman Salu* i yega te boka di riu Yordan. Nan frontera nort a kuminsá na bahia di Laman Salu, na boka di riu Yordan. 6 Djei, nan frontera a subi bai den direkshon di Bèt-Hogla, pasa Bèt-Hogla, sigui bai nort, pasa Bèt-Áraba i subi bai te piedra di Bohan. Bohan tabata nòmber di un desendiente di Ruben. 7 Di piedra di Bohan, nan frontera nort a subi bai Debir, ku tabata keda pegá ku vaye Ákòr. Di Debir, nan frontera a bira bai nort den direkshon di Guilgal, ku tabata keda enfrente di subida Adumim ku tabata keda zùit di un vaye, sigui bai e awanan di En-Sémes i kaba na En-Rogel. 8 Djei, nan frontera nort a subi bai vaye Bèn-Hínòm i pasa zùit di Herúsalèm, ku tabata stat di e yebuseonan. Di Herúsalèm, e frontera a subi bai te kabes di e seru enfrente di vaye Hínòm, den direkshon wèst. Vaye Hínòm tabata keda pegá ku vaye Refaím, na parti nort. 9 For di kabes di e seru enfrente di vaye Hínòm, nan frontera nort a sigui kore bai te fuente di awa di Neftoa, bai e statnan den e serunan Éfròn i yega te Bala, esta, Kíriat-Yearim. 10 Di Bala, nan frontera nort a lora bai seru Seír, den direkshon wèst, sigui bai pasa barika di seru Yearim (banda nort), esta, Kesalòn, pa despues baha bai te Bèt-Sémes i sigui kore bai Timna. 11 Di Timna, nan frontera nort a pasa na banda nort di barika di seru Ékròn, sigui bai Sikaron, via seru Bala, pasa Yabnel i sigui bai te laman.

12 Huda su frontera wèst tabata kore pareu ku kosta di Laman Grandi.* Eseinan tabata tur e fronteranan di e region ku e famianan di e tribu di Huda a risibí.

13 Riba òrdu di Yehova, Hosue a duna Kálèb, yu hòmber di Yefune, un pida tereno den teritorio di e desendientenan di Huda. El a duna Kálèb Kíriat-Arba, esta, Hébròn. (Arba tabata nòmber di tata di Ának.) 14 E ora ei, Kálèb a kore ku e tres yu hòmbernan di Ának, esta, Sesai, Ahiman i Talmai, for di Hébròn. 15 Anto for di einan, Kálèb a sali bai bringa kontra e habitantenan di Debir. (Ántes, Debir tabata yama Kíriat-Séfer.) 16 Kálèb a bisa: “Lo mi laga e hòmber ku ataká Kíriat-Séfer i konkist’é kasa ku mi yu muhé Aksa.” 17 Anto Otniel, yu hòmber di Kálèb su ruman hòmber Kénaz, a konkistá e stat. E ora ei, Kálèb a laga Otniel kasa ku Aksa.* 18 Na kaminda pa kas, Aksa a roga Otniel pa e pidi Kálèb un pida tereno. Ora Aksa a baha for di su buriku,* Kálèb a puntr’é: “Kiko bo ta deseá, mi yu?” 19 Aksa a bis’é: “Por fabor, bendishoná mi ku un regalo, pasobra Tata a duna mi un pida tereno seku den zùit.* Por fabor, duna mi Gulòt-Maim* tambe.” Anto Kálèb a dun’é Gulòt-Ariba i Gulòt-Abou.

20 E famianan di e tribu di Huda a haña e siguiente herensia:

21 Te den zùit, den direkshon di e frontera di Édòm, e tribu di Huda a haña e siguiente statnan: Kabsel, Éder, Yagur, 22 Kina, Dimona, Adada, 23 Kédes, Házòr, Ítnan, 24 Zif, Telèm, Bealòt, 25 Házòr-Hadata, Kériòt-Hèzròn, esta, Házòr, 26 Ámam, Shema, Molada, 27 Házar-Gada, Hèsmòn, Bèt-Pelèt, 28 Házar-Sual, Berseba, Biziotia, 29 Bala, Im, Ésèm, 30 Eltolad, Kesil, Horma, 31 Zíklag, Madmana, Sansana, 32 Lebaòt, Silhim, Ain i Rímòn; na tur, 29 stat i nan pueblitonan.

33 Den e área ku tabata yama Sefela, bo tabata haña e siguiente statnan: Estaol, Zora, Asna, 34 Zanoa, En-Ganim, Tapúa, Énam, 35 Yarmut, Adulam, Soko, Azeka, 36 Saraim, Aditaim, Gedera i Gederotaim;* 14 stat i nan pueblitonan.

37 Tabatin tambe Zenan, Hadasa, Migdal-Gad, 38 Dilan, Mispe, Yòktel, 39 Lákis, Bozkat, Églòn, 40 Kabon, Lámas, Kítlis, 41 Guederòt, Bèt-Dagon, Nama i Makeda; 16 stat i nan pueblitonan.

42 Tabatin tambe Libna, Eter, Ásan, 43 Ifta, Asna, Nesib, 44 Keila, Ákzib i Maresa; nuebe stat i nan pueblitonan.

45 Tabatin tambe Ékròn i su pueblonan i su pueblitonan den bisindario. 46 Di Ékròn bai den direkshon wèst, e tribu di Huda a haña tur e lugánan ku tabata keda pegá ku Ásdòd i e pueblitonan den bisindario.

47 Nan tabatin tambe Ásdòd i su pueblonan i su pueblitonan den bisindario i Gaza i su pueblonan i su pueblitonan den bisindario bai te vaye di Egipto i Laman Grandi.* E region na kosta tambe tabata di e tribu di Huda.

48 Den e serunan, bo tabata haña e siguiente statnan di e tribu di Huda: Shamir, Yatir, Soko, 49 Dana, Kíriat-Sana, esta, Debir, 50 Ánab, Estemo, Anim, 51 Gósen,* Holon i Guilo; 11 stat i nan pueblitonan.

52 Tabatin tambe Árab, Duma, Ésan, 53 Yanum, Bèt-Tapúa, Afeka, 54 Humta, Kíriat-Arba (esta, Hébròn) i Zior; nuebe stat i nan pueblitonan.

55 Tabatin tambe Maon, Karmelo, Zif, Yuta, 56 Yézrel, Yòkdeam, Zanoa, 57 Kain, Guibea i Timna; dies stat i nan pueblitonan.

58 Tabatin tambe Hálhul, Bèt-Sur, Gédòr, 59 Marat, Bèt-Ánòt i Eltekon; seis stat i nan pueblitonan.

60 Tabatin tambe Kíriat-Baal, esta, Kíriat-Yearim, i Raba; dos stat i nan pueblitonan.

61 Den desierto,* tabatin Bèt-Áraba, Mídin, Sekaka, 62 Níbsan, Stat di Salu* i En-Guedi; seis stat i nan pueblitonan.

63 Pa loke tabata e yebuseonan ku tabata biba na Herúsalèm, e hòmbernan di e tribu di Huda no a logra kore ku nan. P’esei, te awe, e yebuseonan a keda biba na Herúsalèm huntu ku e pueblo di Huda.